اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الثلاثاء، 29 ديسمبر، 2009

جاءنا عريس ..مشينا العريس ..يا قلبي لا تحزن

كنت وقفت معاكوا ان ماما كلمت العريس فى التليفون وقالتلو شوف يا بنى بقه هتعمل ايه ؟؟ أنا مبحبش الدخول والخروج الكتير ده من غير حاجة رسمى "الناس تقول علينا ايه" - وهوه عمال يماطل و مشكلته انه بيحب يناقش كل تفصيلة صغيرة فى قاعدة منفصلة بذاتها .. وكل ما "أمى" تيجى تتكلم معاه فى حاجة رسمى يتهرب بسرعة ويغير الموضوع.... أو يخترع مصيبة ..زى مثلا "معلش يا شيماء أنا دلوقتى فى المستشفى بتبرع بالدم لخالى "- تانى يوم يتصل يعتذر ..."معلش يا شيماء مش هقدر آجى أصل خالى مات".... وألاقيه جاى تانى يوم متزوأ على سنجة عشرة والبرفان جايب آخر الشارع ولا كأنه كان فى عزاء لحد قريب منه أوى ولا حاجة ....فكنت حاسة انى هتخطب سنة 2020وهتجوز سنة 3000 بالطريقة دى.....

المهم... أنا كنت عرفت من قريبتى انه كان كاتب كتابه على واحدة قبل كدة....فأنا مريت على المعلومة دى مرور الكرام وموقفتش عندها لأنه عادى الانسان يخطب ويسيب وكل واحد بياخد نصيبه.
كنت حاسة من أول لحظة زى ما قولت ليكوا انه مش معايا خالص .. قولت يا بت يا شيماء وايه يعنى؟؟... الراجل مش واخد لسه عليكى...وهيه مسألة وقت....حسيت انى محطوطة فى مقارنة خفية مش عارفة مع مين؟؟؟... فقولت اهبطى يا شيماء دى تهيؤات..
فقررت أسأله عن التجربة الأولى دى -(ولو انى مكنتش عاوزة أتكلم فيها)- لقيته بيحكيلى عن "س" دى بمنتهى الحب والغرام والهيام ... وانها كانت انسانة فيها كل المواصفات وكانت بتموت فيه وبيموت فيها...وسبب الانفصال انها فى الأيام الأخيرة معاه اتغيرت شوية فى سلوكها وطباعها ولو كانت استمرت كويسة كان كمل معاها لآخر العمر.....

أنا : طب وهيه "س" دى اتخطبت أو اتجوزت ؟؟؟؟
هوه : لأ....أو مش عارف .. بعد ما انفصلنا هيه غيرت تليفوناتها كلها
أنا : مين اللى قالك انها غيرت التليفونات؟؟؟ انت جربت تكلمها تانى ولا ايه؟؟؟؟
هوه : ..؟؟؟؟؟؟..!!!هروب من السؤال.....

وزى ما أكون أنا فتحت على نفسى "كارثة" ...بقى كل محور الحوار عن "س" والحب الكبير ...واذاى كانت بتشوف الحياة بعنيه هوه وبتسمع بودانه هوه ... وهوه عايزنى أنا كمان أحبه نفس درجة حب "س" ليه واهتمام "س" بيه ... وهكذا...!!!

كنت حاسه انى محطوطة فى مقارنات مع حد من الأول... بس اتأكدت ان المقارنة دى كانت معاها... وانى لازم أبقى صورة طبق الأصل منها ......اللهم شوية الطباع الوحشة اللى هوه مكنش بيحبها فيها أحاول أنا بقى معملهاش..هوه طبعا مقلش ده مباشرة ..بس الحدق يفهم..

قلتله محبش أتحط فى مقارنة مع أى حد ولا أبقى حد غير نفسى...وقلتله انى حاسة من أول لحظة انه مش معايا ..قالى فعلا أنا مش معاكى.. بس ابذلى شوية مجهود شوية بقة علشان تاخدينى ليكى انتى ... وأبقى معاكى.. وأخرج من الحالة النفسية السيئة جدا جدا جدا جدا جدا جدا اللى أنا فيها اللى محسسانى انى هموت.

نيجى للماديات اللى أنا والله ما سألت عليها ... وقلتله من الأول ان أهم صفة بحبها فى الراجل "الصدق" ..الراجل عندى "كلمة" لو كذب ميبقاش راجل
من أول لحظة "والأرقام" عنده بتسرح شويتين تلاتة...مثلا ... عنده مش عارفة 280000 جنيه عاطيهم لحماه السابق يشغلهمله ولسة مخدهمش منه...دخله من الشىء الفلانى 4000جنيه ..ومن الشىء العلانى 3000جنيه.... ومن الشىء الترتانى 5000جنيه... ومن وظيفة الحكومة 1000جنيه.... ده غير مهندس الديكور اللى شغال فى الشقة بقاله أكتر من أسبوعين دلوقتى .. مع العلم ان مساحة الشقة 85 متر فقط وهوه مش هيغير فيها أى حاجة فيها خالص... هوه بس هيدهنها ... يبقى نفسى أعرف مهندس الديكور كان بيعمل ايه بقى فى الشقة؟؟؟؟!!!! من الآخر "أبو لمعة"......

كمان كان قالى ان بسبب الحالة النفسية السيئة جدا اللى هوه عايش فيها هيسافر الكويت يتفسح مع ناس أصحابه هناك بعتنله فيزا.... رجع قالى ....لأ ...ده أنا لو لقيت شغل كويس هناك همسك فى الشغل ده وأهى فرصة....وهاخد معايا 20000$ لزوم الفسحة والاقامة.....أيوة محدش يستغرب "عشرين ألف دولار" لزوم الوجاهة والفسحة ...والله العظيم أنا لو معايا المبلغ ده لأحطه فى البنك وديعة وأعيش سلطانة زمانى .لا أبهدل نفسى فى سفر ولا أذل نفسى فى أى بلد عربى بيبيعوا وبيشتروا فى المصريين!!!
"الشبكة" : فضل يتهرب منها ... يمين شمال ..قال هجبلك "عربية" شبكة ....(العربية دى عربية سيريون مستعملة) فقلتله أنا دفعت مقدم عربية هستلمها نص الشهر الجاى ودى والله الحقيقة مش بكذب عليه ولا حاجة وفى نفس الوقت قلت ده داخل على جهاز ومصاريف تانية أدبسه فى خمسين ستين ألف جنيه ليه دلوقتى ... قلتله الرقم اللى هتقوله بالنسبة للشبكة ... أنا موافقة عليه.... فهرب بلباقة شديدة من الكلام فى الموضوع ده.
آه .... نسيت أقول ليكوا صفة مهمة جدا هوه مبيحبهاش فى الست خالص خالص وقالهالى بالنص "مبحبش الست الذكية"...مبيحبش الست الذكية خالص اللى بتفهم دى ...لأ... هوه بيحب الست اللى مبتعرفش تتكلم أوتعلق على حاجة ... بيموت فى الست اللى مبتعرفش تعمل أى حاجة فى الحياة مهما كانت تافهة... بيحب الست المشلولة اللى كل ما حاجة تقف معاها تطلبه تقوله اللحقنى.. معرفتش أعمل كذا ...و"س" الحمد لله كانت كدة...

حسيت ان ضغطى ارتفع ...وحسيت انى مش عاوزة لا أشوفه قدامى ولا أسمعه... وماما كان نفسها تحدفه من البلكونة..والغريبة "ماما" مكنتش مصدقاه خالص من أول لحظة.... وحاسة انه أبو لمعة ...

يمكن غباء منى .... بس مقدرش أبقى رقم 2 فى أى حاجة... لا حياتى ولا شغلى وأكيد فى حياة الراجل اللى هشاركه عمره ... كمان معنديش المقدرة انى أطلع حد من حالة نفسية أنا حاسة انه مش عاوز أصلا يخرج منها ..مقدرش أجوز واحد عصبى لأبعد درجة... لدرجة انه مش قادر يسيطر على نفسه قدامى ....مقدرش أرتبط بانسان فشار وكذاب من غير داعى...على رأى ماما لو كان قال من الأول يا جماعة أنا امكانياتى كذا كذا كنت وافقت عليه فورا وبدأنا حياتنا مع بعض وكبرنا مع بعض..مقدرش كمان أبقى غبية ....أو مستغبية ذى ما هوه عاوز..وذى ما بنات كتير بتمثل الدور ده كويس أوى اليومين دول مع أى شاب يتقدملها .
اجمالا مقدرش أعيش حياتى مع شخص بالمواصفات دى ..اتصلت بقريبتى وقولتلها قوليله " كل شىء نصيب" .

حالتى النفسية "صفر" مش علشان أى حاجة .... بس عشان ده تانى أو تالت شخص من ضمن العاهات الكتير اللى شوفتها يجيلى بالمواصفات دى... العيب فيا أنا ولا فى مين؟؟؟!!! اشمعنى أنا بالذات اللى بتجيلى الأشخاص الغريبة دى اللى ولدت جوايا صفة "شك" دائم فى كل واحد هييجى بعد كدة ؟؟؟؟!!!

التجربة مش سهلة..المهم انى اتعلمت منها حاجات كتير ... أولها انى أبطل هبل شوية وأبطل أصدق الناس من أول ما أشوفهم "على رأى ماما"...
اتعلمت انى أنسى تماما موضوع الجواز ده ..لأنى بصراحة شديدة اتعقدت... نفسى أعرف مين اللى بيبعتلى العاهات دى
الحاجة الوحيدة "الايجابية" اللى حصلتلى بعد التجربة دى انى فوقت كويس جدا جدا من أوهام قديمة كانت جوايا وكانت غلط مليون فى المية واتأكدت تماما انها غلط ..... بس واضح انها مكنتش تنفع تتلغى الا بجرح غائر ذى ده.... الحمد لله

هناك 15 تعليقًا:

أميرة الاحزان يقول...
أزال المؤلف هذا التعليق.
أميرة الاحزان يقول...

السلام عليكم
اول مره ادخل عندك
وبصراحه انا لما قريت الي انتى كاتباه دمى اتحرق وحسيت ان ضغطى عالي
الحمدلله انك رفضتى لان صعب انك ترتبطى بانسان عايز واحده يعاملها كقطعه شطرنج يحركها زى ماهو عايز
غير كده
صعب قوى لما يكون مرتبط بحد قبلك او بمعنى اصح متعلق بيه وعايز التانيه تكون نسخه منها وده عن تجربه
محدش يقدر يكون غير نفسه
فحبيبتى ماتدايقيش نفسك
وان شاء الله ربنا يرزقك باحسن منه
انسان يستاهلك
وماتزعليش الدنيا صدقينى ماتستهلش
ربنا يجعل ايامك كلها فرح وسعاده
تحياتى لكى

Shaimaa يقول...

مش عارفة أقولك ايه يا أميرة كفاية كلامك ده بس لوحده ...الواحد لما يلاقى ناس زيك واقفة جانبه ولو بكلمة حلوة بحس ان الدنيا لسة بخير
حقيقى شكرا

winner يقول...


السلام عليكم.

أولاً: الحمد لله.
الحمد لله على كل شئ و على أي شئ.
و زي ما قلتلك قبل كدة إن ربنا وحده اللي يعلم الخير فين. و عسى أن تحبوا و عسى أن تكرهوا.

ثانياً: ماعتقدش إنك أول واحدة يتقدملها واحد و اتنين و تلاتة و عشرة كمان. و مش لازم يعني العيب منك. و العادي اليومين دول إن البنات و الولاد يتجوزا متأخر لأن محدش معاه فلوس. حتى اللي معاه فلوس فهي ماتقضيش حاجة في الزمن ده.

ثالثاً: و انتي قاعدة مكانك معززة مكرمة نصيبك هييجي لحد عندك و يدق الباب. ما تستعجليش الخير من عند ربنا و لا تقنطي من رحمته. كل شئ بأوان.


و إن شاء الله نفرح فيكي قصدي بيكي قريب. بس ماتنسيش تعزمي الإخوة المدونين.

77Math. يقول...

"نفسى أعرف مين اللى بيبعتلى العاهات دى"

قريبتك، كما ذكرتِ :D

Shaimaa يقول...

انت أول مين هيشرفنى يا winner
أنا بقول الحمد لله ومش عارفة ليه التجربة دى بالذات دونا عن أى حد جالى قبل كدة مش عارفة غيرت فيا حاجات كتييير جدا وقربتنى من ربنا أكتر

Shaimaa يقول...

والله يا 77math أنا بشكرها وبقول كتر خيرها حد غيرها لا كان حب يتحشر فى حاجة ... وما أكتر اللى ماشيين على قاعدة "وأنا مالى"....الحمد لله

هي وظروفها يقول...

ازيك يا شيماء اولا ده مريض نفسي وجاي يدي الثقه لنفسه عن طريق نزعها منك او من غيرك مش عاوز اقول اسقاط ده عايز يحس انه مرغوب فيه بس في نفس الوقت معرفش يرسم صح بصي الللي زي ده مش عيبك انتي انو يجيلك عيبه هو انه تاجر مواشي مش عريس وانت تستاهلي بني ادم ومنتيش سلعه ولا بوتجاز مطرح ما يعموزه يكون موجود انت انسانه وبكره ربنا يبعتلك انسان بجد ان شاء الله ولسه العمر ادامك ومتزعليش نفسك ميعبش الورده ان يجي شاب يقطفها من جمالها فيموتها والحمد لله انتي لسه ورده وربنا يخليكي ويكرمك وتفتحي مشتل وخيرها في غيرها وده يتقوله الللي عنده حنه يحني ديل حمار وطولت عليكي وسلام يا شيمو

Shaimaa يقول...

وليد... مش عارفة أقولك ايه..والله ما هيخرجنى من اللى أنا فيه ده اللى تعليقاتكم اللى ترفع معنويات بلد بحالهادى...مقدرش أقولك غير انك انسان محترم وسعيدة بمعرفتك
شكرا يا وليد

حصان المرجيحة يقول...

انا اول مرة ادخل المدونة بس بجد جامدة
بس علي فكرة 85 متر مش قليل دي حتي ماعدتش موجودة
و العشرين الف دولار ممكن تديهوملي اشغلهوملك بس انتي اكتبيلي توكيل و سيبي الباقي عليا ههههههههه
انا مش داخل علي طمع لا سمح الله
بالتوفيييييق

هي وظروفها يقول...

ايه يا شيمو فينك اتمني تكوني بخير والنفسيه مظبطه ويا ستي لو غبتي تاني هنعاقبك بتخليص اكل الفرح ومش هتاكلي انت حاجه طمنينا عليكي

Shaimaa يقول...

وليد...موجودة أهو... حد يبقى معاه ناس زى الفل زيكوا كدة ..وواقفين جنبوا كدة ويزعل أو يشيل هم
أشكرك بجد

Shaimaa يقول...

حصان المرجيحة.... نورت المدونةوزيارتك دى شرف ليا

أنا بشكركم جميعا يا جماعة مش عارفة أقول ليكوا ايه .. والله بجد كلامكوا ده اللى خرجنى من اللى أنا فيه
شكرااااااااااا

حصان المرجيحة يقول...

اسمحيلي اني اضيف مدونتك في المدونات الصديقة عندي

Shaimaa يقول...

ده شرف ليا يا "حصان الرجيحة"
شكرا ...
تحياتى الخاصة