اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الاثنين، 16 نوفمبر، 2009

الى من يهمه الأمر

قرأت على موقع "مصراوى" منذ أكثر من عام تقريبا خبرا ما زال ..وسيظل عالقا بذهنى ما حييت .. الخبر نصه كالآتى :
أمام مكتب لمأذون شرعى توقفت سيارة فارهة يبدو على صاحبها الثراء ...وترجل منها رجلا فى العقد الخامس من العمر يبدو من هيئته الثراء الفاحش ..يرتدى بدلة غاية فى الأناقة وتفوح منه عطور أخاذة ..يرافقه رجلين فى نفس أناقة الرجل الأول ولكن أقل قليلا فى المستوى .. ونزلت من السيارة فتاة تبلغ من العمر 33 عاما تقريبا ترافقها والدتها ...الفتاة فارعة الطول... غاية فى الجمال والأنوثة..وما ان شرع المأذون الشرعى فى كتابة عقد الزواج الذى سيربط بين هذه الفتاه وذلك الرجل ذات السادسة والخمسين عاما ... حتى أوقفه الرجل قائلا أن هناك شرط سيتم اضافته لعقد الزواج وهو (تنازل الفتاة تنازلا كليا عن الانجاب) فسأل المأذون الفتاة هل توافقين على هذا الشرط فأجابت..... نعم..أوافق....!!!!!!!!!!!


أسمع وأرى بعينى كل يوم آلاف القصص المشابهة لهذه الفتاة المسكينة....وأرجو ألا يلومها أحد ولا يحكم عليها ظاهريا ...عفوا...فلم يعش أيا منا تجربتها ..ولم يعرف أحدا السبب والدافع الرئيسى وراء كلمة ( نعم..أوافق)التى قالتها...هل سمع أحد صرخة آآآآآآآآآآآه التى دوت بداخلها وهى تقول (نعم) ...هل شعر أحد دوى انفجار كلمة لا.... لن أتنازل عن أمومتى) التى قطعت أحشائها وهى توقع بخط يدها صك التنازل النهائى عن كلمة (ماما)....


الى مجتمعنا...الى حكومتناالنظيفة الرشيدة...الى رجال الأعمال فى صورة وزراء...الى أ/أحمد عز وهشام طلعت مصطفى ..وغيرهم ....فيما يلى نص تنازل جيلنا ...جيل السبعينيات بالذات...عن كل الأحلام والآمال والأمنيات و..و..كل شىء... حتى لا نرهق أذهانكم وعقولكم بتفاهاتنا...!!!!!!!!!!!


الى من يهمه الأمر


نقر نحن ونعترف جيل السبيعنات "ونحن فى كامل قوانا العقلية" بأننا نتنازل تنازلا كليا لا رجعة فيه عن جميع آمالنا وطموحاتنا ..وأمانينا.. الماضية والحالية المعنوية.. والشعورية... والمادية ... الملموسة والغير الملموسة... ونقر بأننا ليس لدينا النية مطلقا فى مجرد التفكير أو التمنى أو الاشتياق لتحقيق أى أمل مهما .... مهما كان حجمه أو قيمته.


كما نقر أيضا أننا نتنازل عن جميع حقوقنا فى أى "طموح أو أمل أو رغبة شرعية مستقبلية" .. واذا ...اذا حدث خطأ غير مقصود وضبطنا نحلم ...فيعتبر هذا الحلم "لاغى" لحين اشعار آخر.....


ونقر ونعترف أننا أخطأنا فى الماضى عندما قررنا أن "نتمنى" أو نحلم" أو "نرغب" فى أى شىء..داعين الله أن تغفروا لنا هذا الخطأ الغير مقصود ... وثقتنا كبيرة فى حضراتكم...مستندين الى القاعدة الايمانية الراسخة ( اذا كان الله سبحانه وتعالى بجلاله وقدرته يغفر الذنوب جميعا ... ألن تغفروا لنا عثرة أو فلنقل جريمة "الحلم") .


ملحوظة : هناك بند "مفقود فى صيغة التنازل عاليه وهو "أننا تنازلنا بكامل ارادتنا وليس تحت أى ضغط" - ولكن ..... يعجز لسانى قبل قلمى أن يورد هذا البند فى صيغة التنازل..... ولا تعليق!!!! .


المقر بما فيه : جيل السبعينات

الأربعاء، 4 نوفمبر، 2009

غيبوبة

كل ما تتمناه الآن وفقط هو (الخروج من عالمه) ..الخروج من غيبوبة حبها له.. أو فلنقل... ارتباطها به و اصرار قلبها قبل عقلها على التواجد بخريطة حياته... لأنها تدرك أن هذا الارتباط المريض يدخلها فى "غيبوبة عميقة" تفشل جميع أجهزة الافاقة القديم منها والحديث فى أن تخرجها منها..
أحيانا عندما يطيل "هو" البعد عنها تدرك حجم وهول الخطأ الذى ترتكبه فى حق نفسها.. فتعيد ترتيب أوراقها .. تفكر باتزان غريب ....تدرك أن لنفسها حق عليها ...حق الاحترام .. حق المحافظة على ما تبقى من كرامة وكبرياء...فهى أولا وأخيرا " أنثى"و من المفترض أن كرامتها وكبرياءها هما التاج الذى يزين رأسها .. هما رأسمالها الذى يحاسبها عليه مجتمعها الشرقى.

فتسعد كثيرا بقراراها" العقلى" مع بعض تدعيم من القلب..... (بالخروج نهائيا) بلا رجعة من "عالمه" الذى لم تجنى من وراءه الا أشواكا تدمى كرامتها وتدميها ...... فتعقد مع عقلها وقلبها "الصفقة" وتدعمها بأسباب ومبررات غاية فى الاقناع ... فيكون أول بنود العقد هو عدم التفكير فيه ... البعد تماما عن عالمه ...تجاهل حلو حديثه..... تنشيط حواس الرفض....تقوية أدوات التحكم ...بناء جبل تجاهل جليدى......تخدير المشاعر لأجل غير مسمى...القضاء ولو مؤقتا على الاحتياج للفظ "مذكر" فى حياتها....محو كلمة "ضعيفة" من قاموسها الانسانى..... كبت رغبتها الجسدية كأنثى أمامه...وأخيرا قتل ودفن هذا الحب فى مكان مجهول حتى لا تفكر حتى فى مجرد زيارة قبره .


وتأتى اللحظة الحاسمة ...لحظة لقائه.... فتشحذ كل الحواس ....وتشحن كل طاقات الكره التى عرفها ولم يعرفها البشر....ويدوى فى أذنها محاولاتها الفاشلة السابقة فى البعد عنه.....وتظل كلمة "ضــعيـــفــــة" (التى تكرهها)تضىء وتطفىء فى شكل انذارات تحذيرية فتقوى عزمها وارادتها أكثر فأكثر




الآن تأتى ساعة الصفر..... لحظة اللقاء...... تفتح بابها ...تجده أمامها ..... فيقول: "وحشتينى"....!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
فتخور القوى..... وتغيب الحواس...وتختفى أدوات التحكم......وتشتعل المشاعر شوقا.....ويذوب جبل الجليد....... وتلتهب الرغبة ....وتعزف المشاعر لحنا تدركه حواسها جيدا فترقص عليه.... انه لحن أغنية نجاة.. "أيظن"...ولكن فى جزءها الثانى ....."مـــا أحــــلى الرجـــــوع اليــــــه"


أما عقلها ....................فقد دخل فى غيبوبة ..يعلم الله وحده متى سيفيق؟....!!!!

الاثنين، 2 نوفمبر، 2009

يتربى فى عزو

عمو "عزو" ربنا ما يحرمنا منه يارب بيقول ان الشعب المصرى هيطق من الرفاهية ...هينفجر من من مستوى
المعيشة الشاهق .....هيطرشق من "العز" اللى بيبرطع فيه يمين وشمال والدليل " الدامغ" والقاطع والأكيد على كدة
الكلام اللى قاله عمو عزو ..وأكد اننا باذن الله مش هنسمعه من أى حد تانى غيره (مش عارفة ليه .. يمكن هنموت بعدها ولا حاجة؟؟ .. الله أعلم!!!!..) أنا بس مش متأكدة اذا كان كل حديثه ده كان عن مصر ولا "مقاطعة تانية" ؟!!!... على العموم ده هنعمله سؤال مسابقتا فى نهاية الفضفضة.... المهم... سبب الرخاء بقه الآتى :
  • مصر فى الخمس سنين اللى فاتت ماشية لأدام
  • اقتصادها بقى قوى
  • مستوى المعيشة فيها ارتفع
  • متوسط الدخل السنوى الحقيقى للفرد ..زاد
  • الموظفين مرتباتهم زادت 100%
  • اتنين مليون من أهلنا اللى بيشتغلوا فى المحليات مرتباتهم زادت فوق ال 100% .. ب 50% كمان
  • مليون مصرى اشتروا سيارات جديدة فى الخمس سنيين اللى فاتت
  • 250 ألف سيارة اشتراها المصريين فى 2008
  • أكثر من 200 ألف أسرة اشترت وحدات اسكان اقتصادى أو متوسط وعملت احلال وتجديد لبيوتها فى الريف
  • معدلات الالتحاق بالتعليم الخاص بتزيد زيادة كبيرة
  • 3.5 مليون فرصة عمل فى 4 سنوات - فى سنة 2008 لوحدها 700 ألف فرصة عمل... منهم 600 ألف اتأمن عليهم فى التأمينات الاجتماعية.
أنا مش عارفة والله العظيم الافتراء بتاع الشعب المصرى ده ايه ؟؟؟...... كم الرخاء والرفاهية ده كله وبرده مفيش فايدة؟؟!!!!!!!!!! يقولوا فين ؟.. مين؟؟!!....مش شايفين حاجة ولا حاسين بحاجة ؟ خلاص كلكوا بقيتوا خريجى " مدارس النور والأمل" .." العمى"كاسى على عنيكوا .. أمال زيادة المرتبات 150% وديتوها فين ؟ صرفتوها فى ايه ؟ أكيد فى weekend ما أنا عارفاكو غاويين "العين السخنة وشرم"-... بلاش .... ال 250 ألف سيارة فارهة دول راحوا فييييييين ؟!!!!! ايه عملتوهم ميدالية؟؟!! ولا هتنكروا الخير اللى بقيتوا فيه وتقولوا ده طلعت عربيات بالريموت - ولا المساكن الفارهة السوبر لوكس....افتروا بقى على الراجل وقولوا محصلش .. ده متابعكوا... حتى فى الريف قاعدين تعملوا احلال وتجديد وتشطيب سوبر لوكس... اشى باركيه وحمامات شاكوزى وسقف معلق.. يا ساتر .. نفسى مرة أسمع منكوا كلمة " الحمد لله" .
وكله كوم "ومفجر ثورة التطوير والتحديث " ده كوم تانى .. يار ب استرها بسترك الكبير وميفجرش حاجة تانية .. كفاية علينا التطوير والتحديث .. لحسن تفجيرين فى الراس يوجع .
نشكر الله عز وجل اننا مسمعناش الكلام ده ومش هنسمعه من حد تانى يا عمو "عزو" لأننا لو كنا سمعناه من اتنين تلاتة كمان غيرك كان حصلنا "تفجير ثورى مكثف فى المخ" حاجة كدة شبه "مفجر ثورة التطوير والتحديث" - بقى مقياس تقدم وازدهار أى شعب تقاس بعدد السيارات اللى اشتراها وكم الالتحاق بالتعليم الخاص - أهى دى المصيبة الكبيرة فعلا .. كون الناس تسيب التعليم العادى الحكومى وتروح للخاص معناها ان التعليم الحكومى فى تدهور شنيع ونسبة الأغبياء والساقطين والفاشلين فى مصر فى ازدهار كبير - كمان مين اللى قال لحضرتك ان كل العربيات اللى بتتكلم عنها اللى اشتراها زوات الدخل المتوسط وتحت المتوسط؟؟؟!! مش الطبقة الارستقراطية؟؟!!!!!!! عند حضرتك احصائية بأسماء ومستوى معيشة كل فرد فيهم .
نرجو من سيادتكم التكرم برصد الآتى:
  • عدد الشباب المهاجرين يوميا بمراكب غير صالحة للاستخدام الآدمى الى ايطاليا وغيرها
  • عدد الشباب خريجى الجامعات اللى قاعدين على القهاوى "بلاش نتعبك ونقولك ارصد اللى قاعدين على سيابر الانترنت".
  • عدد البنى آدمين اللى قاعدين فى بيوت من الصفيح
  • عدد البنى آدمين الذين لا يصلهم ماء أو كهرباء
  • عدد البنى آدمين اللى قاعدين فى مناطق جبلية زى الدويقة وغيرها معرضة للانهيار فى أى لحظة .
  • عدد الأفراد ساكنى المقابر .. وياريت والنبى تعد كل غرفة فيها كام شخص ...معلش تعبينك معانا دايما .
  • عدد العوانس والعانسين .."حلوة عانسين دى"
  • عدد المرضى اللى بيموتوا قبل ما ييجى عليهم الدور فى العلاج
  • عدد الناس اللى قاعدة فى مناطق ايواء جماعى "وخيم" لحد ما ربنا يفرجها كام
  • رصد وتقييم حجم وكم الفساد والرشاوى والمحسوبية فى جميع القطاعات.. اللى خلاص خرج عن نطاق التقييم "معتش ينفع يتقيم"
معلش طلب أخير ... ياريت تبقى تشوف ولو حلقة واحدة من حلقات برنامج "واحد من الناس" بتاع عمرو الليثى" ... أنا عارفة انت مبتحبش البرامج اللى بتفترى "على التطوير والتحديث" من غير سبب دى .. بس معلش مرة واحدة متضرش...بجملة .
بتهيألى كفاية كدة انهاردة ولا ايه ؟؟!!!!!!!!!!!!!!!!!!!!!!!!!
**سؤال مسابقتنا...." أستاذ أحمد عز" فى حديثه عن "ثورة التطوير والتحديث" اللى اتفجرت مؤخرا كان بيتكلم عن بلد ايه؟!!
لو عرفتوا الاجابة اتصلو على 0900999999 وجوايزنا كثيرة (100شقة فارهة اسكان متوسط - 200عربية من ال 250ألف بتوع 2008 - 500فرصة عمل بزيادة 150% فى المرتب من بتوع 2008) يلا كل ما تتصل أكتر .. فرصتك فى الفوز أكبر .