اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 27 يونيو، 2010

يا حبيبتى يا مصر (1)

بنت خالى (ش.ش) زى ما دايما بحب أسميها...دكتورة فى احدى جامعات مصر العريقة  .... أدى فى السن بالظبط عندها 32 سنة ...دكتورة صغنونة أوى  بالنسبة لسن الدكاترة اللى بشوفه
ش.ش القطقوطة دى خريجة كلية سياسة واقتصاد... البنت دى كانت من أوائل الثانوية العامة ودحاحة مذاكرة... تموت فى المذاكرة..
المهم البنت كانت كل سنة بتجيب امتياز (بس امتياز حقيقى مش من بتاع مسلسلات رمضان)
 فاتخرجت واتعينت معيدة فى الجامعة.. وبعدين جاتلها فرصة تعمل الدراسات العليا من ماجيستير لدكتوراه فى جامعة فى ايطاليا وفرنسا الاتنين مع بعض... معرفش اذاى بالظبط ومسألتش لأنى بكره الحشريين (البراشوت) فمحبش أبقى زيهم.

المهم ... والدها مقتدر واسم معروف جدا فى مجال السياحة... فمكنش مستنى ان الجامعة العريقة  تصرف على بنته ولا هيقعد لسة يستنى اجراءات الروتين اللى ممكن تعطل بنته... فعمل لبنته كل حاجة تساعدها على السفر على حسابه.. ودبر سكنها فى فرنسا .. وفتح لها حساب فى البنك...و.....و.....و.... عمل كل اللى يريح بنته لحد ما سافرت وبقى هوه يسافرلها مرة ومامتها وأختها يسافرولها من وقت للتانى عشان يطمنوا عليها... وكمان كان بيتابع أى حاجة تخص أجازة أو غيره هنا فى الجامعة العريقة...

قوم ايه..... البنت كانت بتنزل مصر من فترة للتانية وأول ما تنزل تروح الجامعة وتقطع الأجازة الشهرين تلاتة اللى هيه قاعداهم فى مصر... وطلبت من ادارة الجامعة العريقة انها تحول مرتبها الضخم الكبير جدا (450جنيه) على البنك ... اللى أنا متأكدة 100% ان مكنش لهم أى دور فى رسالة الدكتوراه اللى كلفت والدها كتيييييييييييييييييير جدا.

المهم البنت قعدت 8 سنين ما بين مصر وايطاليا وفرنسا وأخيرا جه وقت مناقشة الرسالة فنزلت مصر أجازة شهرين علشان (تكتب الرسالة) ورجعت الجامعة فى الشهرين دول.. قبل ما تتم الشهرين ... (يعنى بعد شهر ونص من اقامتها فى مصر ) اضطرت تسافر فجأة فرنسا..... قوم ايه بقه يا سادة يا كرام  ......كانت الجامعة العريقة فى مصر قد حولت مرتبها (مرتب شهرين) على حسابها فى البنك .. والبنت معقدتش فى مصر غير شهر ونص بس

قامت الجامعة العريقة أرسلت خطاب لجامعة ايطاليا وفرنسا بضرورة رجوع الآنسة ش.ش لمراجعة أمور مهمة بالجامعة العريقة... فوقفت رسالة الدكتوراه والبنت هناك متعرفش ليه (كل ده قبل مناقشة الرسالة بأسبوعين)

كلمت باباها وقالتله الحقنى يا بابا ادارة الجامعة فى مصر وقفت رسالة الدكتوراه بتاعتى... باباها جرى على الجامعة وراح الادارة قالوله روح الحسابات...راح الحسابات... فالموظفة كانت بتفطر... بعد ما فطرت وشربت الشاى واتبسطت قالتله ...احنا حولنا فى حساب بنتك 450 جنيه كاملين (مرتب شهر نوفمبر) وبنتك سافرت 15 نوفمبر ... فكده يبقى فى 225جنيه دخلوا حسابها غلط.... الراجل جاله ذهووووووووووووووووووووووووووول..... وكان حاجة من الاتنين ...لاما يسب ويلعن فى الموظفة وفى الجامعة واللى جابها ويرزعها علقة سخنة... أو يغمى عليه من الخيبة التقيلة اللى فى مصر.... فاختار حل تالت عشان خاطر بنته اللى رسالة الدكتوراه بتاعتها واقفة... مسك أعصابه وطلع من جيبه 500جنيه وقال للموظفة خدى مرتب الشهر كامل أهوه ولو عايزين كل المبالغ اللى حولتوها قبل كدة على حساب بنتى أنا معنديش مانع بس ابعتوا فورا لادارة الجامعة بره عشان بنتى هتناقش بعد أسبوعين ..وكان عايز يقولها هوه صرف على بنته كام من بداية سفرها من 8 سنين لحد انهاردة ... بس ... أدرك انه واقف قدام بقرة حلوب مش هيفيد معاها الكلام

أنا من مزنقى هذا معنديش أى تعليق غير "يا حبيبتى يا مصر يا مصر"

هناك 14 تعليقًا:

momken يقول...

بما انى خريج نفس الكليه العريقه دى

فمن موقعى هذا احب اقولك انها نفدت بجلدها

انا بقالى حوالى ست سنين غرقان فى دمى ومش عارف اخلص الماستر اساسا

نعنت دكاتره وروتين
واسامى تتسرق
وابحاثى تتسرق من دكاتره كبار وحركات تانيه منتهى قله الذوق والاخلاق

مع انى كان ممكن ببساطه اخلص فى السربون الماستر فى سنتين تلاته
بس بحب مصر

اما عن البقره فدى مجرد عينه يا امى والمزرعه مليانه


اصله معداش على مصر



تحياتى

Tears يقول...

ده احمدى ربنا انهم عملوا كده بس و مابعتوش قالوا لفرنسا انها اختلست و لا حاجة

قولى لها تنفد بجلدها و لو تقدر ما ترجعش يكون احسن لها و لو رجعت تشوف جامعة اجنبية فى مصر تشتغل فيها لان الحكومة خربت التعليم

Kontiki يقول...

اة طبعا دة اقل واجب فى الجامعه انتى عاوزاه تهرب بال 225 جنية فى فرنسا و الدول المتقدمة يعنى حوالى 32 يورو هههه بلا هم قوليلها زى ما قالت تيرز على الله ترجع تانى حكومة خونة دمروا التعليم واجيال طالعه دماغها مافيهاش علم ولا مؤهلة .

Shaimaa يقول...

momken
ربنا يعينك على اللى انت فيه يارب وتخرج منها على خير

Shaimaa يقول...

tears

أه والله على رأيك... كان ممكن البنت ترجع بجريمة عن طريق الانتربول بدل ما ترجع بالدكتوراه

Shaimaa يقول...

Kontiki
مش سايبين حاجة مش خربينها يا كونت... زى ما يكونوا بيتفننوا ويبتكروا اذاى يقضوا علينا بس مع عدم سبق الاصرار والترصد ... دايما هما مش فى الصورة

موجة يقول...

واضح ان ممكن متعقد من الكلية
فيه عيوب لكن ختفضل كليتي اللي علمتني ولسه بتعلمني..
العيب مش فيها دا في ناس من مصر كلها
هما السبب في الصورة دي..
انا كبسوط اني زرتك تاني هنا
ومستني زيارتك لمدونتي
هالص تحياتي
موجة

MSMO يقول...

فعلا يا حبيبتي يا مصر

Shaimaa يقول...

موجة
هوه العيب فينا احنا لأن احنا اللى بندير كل حاجة...فالموضوع أزمة ضمير
+ روتين وبيروقراطية بقالها 100 سنة

شكرا لمرورك

Shaimaa يقول...

MSMO

شرفتنى بالزيارة
شكرا على المرور

mrmr يقول...

مصر هى امى
نيلها هو دمى
ربنا يخليكى ليا يا مصر
وتسببى احباط لولادك وتكسرى بخاطرهم
هى دى مصر تشكر ربنا انها وصل بيها الحال لغايه كده مش لبست جنايه

Shaimaa يقول...

mrmr
صعب أوى نبقى شايفين الماضى أسود والحاضر عتمة وعارفين ان المستقبل كمان هيبقى أسوأ وأسوأ.. هنعيش صح امتى لما كل حاجة مدمرة فى عينينا كدة

أميرة الأحلام يقول...

شوشو حبيبتي وحشاني موووت يارب تكوني بخير انابقالي فتره غايبه عن النت معلش
بس وحشتوني جدا
وبعدين هي دي مصر ولو معملوش كده يبقي اكيد في حاجه غلط وفعلا تحيا مصر

Tamer Nabil يقول...

ازيك اخبارك اية

معنديش رد لان مفيش رد على الهبل اللى حصل دة بجد

ربنا يوفقك ويكرمك

مع خالص تحياتى