اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 8 سبتمبر، 2010

دعاة المترو

ايه يا جماعة دعاة المترة دول ؟؟!!!! أصل أنا والحمد لله عايشة بمدينة المنصورة أعزها الله ...ف ما فيش عندنا مترو والحمد لله تعالى...... بس كل ما أفتح موقع أخبار على النت ألاقى خبر بيتكلم عن ناس لابسين جلاليب قصيرة ودقنهم مترين ....أو لابسين جنز على الموضة وماسكين كتابين أدعية وتفسير قرآن (ده بالنسبة للرجالة) .... ومنتقبات بالنسبة للبنات... والناس دول بقة بيدعوا الناس للدين الاسلامى.....!!!!!!!!!!!!!!!!!!!!!!!!!!!

هوه احنا رجعنا لعهد الفتوحات الاسلامية والناس لسه بتتعرف على ديننا الاسلامى جديد ولا ايه؟؟؟؟؟ ..... طب بلاش السؤال ده.... هوه احنا كفرة أستغفر الله العظيم والناس دول هما المؤمنين اللى هيدعونا للدين الاسلامى الجديد ..... ويدعونا بالعودة لرشدنا؟؟؟..... .. طب مين اللى ممكن يقرر اذا كانوا هما نفسهم أهل للدعوة ولا لأ.... أقصد يعنى مين اللى قال انهم أهل تقوى .... مين اللى يفصل فى مسألة اذا كانوا حرامية ومرتشين ومفسدين وكذابين ولا العكس ....مين؟؟؟؟؟!!!!!!!!!!!!

طب بلاش السؤال ده كمان .....نسأل سؤال تانى ... ينفع ديننا بقيمته ومكانته وعظمته وجلال وسمو تأثيره نتكلم عنه فى المترو فى وسط ناس بسيطة مركزة فى حاجة تانية خااااااااالص... اللى رايح شغله .. واللى راجع من شغله.... واللى رايحة تودى ابنها المدرسة.... واللى رايحة السوق.... واللى رايحة تشوف مامتها.... واللى نازلة تجرى على أكل عيشها بعد وفاة جوزها وفى دماغها لبس المدارس والعيد اللى جم مع بعض وفلوس الدروس ومصاريف المدرسة وعملية اللوز بتاعة شريف ابنها  ....و....و....و...... ينفع يا جماعة؟؟؟؟

طب بلاش السؤال ده كمان .... نسأل سؤال تانى... الناس دول مؤهلين لكدة؟؟؟؟؟ يعنى معاهم دكتوراه فى أصول الدين.... خريجين الأزهر الشريف....معاهم دكتوراه فى الشريعة ...... بيحضروا ماجيستير فى السنة النبوية المطهرة ؟؟؟؟؟؟!!!!

طب معلش سؤال بايخ أخير مين اللى بعث لينا المرتزقة بتوع المترو دول ؟؟؟ ... حد يجاوبنى متقعدوش تبحلقوا فيا كدة....أنا عايزة رد ورد يحتوى على حل جزرى للكوارث البشرية دى والا الدنيا هتولع أكتر ما هيه والعة...

سمعاكوا اتفضلوا الميكروفون معاكوا......

هناك 14 تعليقًا:

Kontiki يقول...

جنود ايران وتمويلها
ودة مالوش علاقة بدراسة اصول الدين او غيرة دة له علاقة بنشر فكر معين على اوسع نطاق ممكن

Rayk Cool يقول...

موضوع جميل و مدونة اجمل احيكي عليها
انا من رايي ان الحكم الوحيد هو عقل الانسان
و كما قال الله عز و جل
الحلال بين و الحرام بين
احلى مسا على الناس الكويسة :)

Tears يقول...

و الله يا شيماء صعبتى عليه من الصدمة اللى حصلتلك...عموما اتفرجى على مسلسل الجماعة عشان تلاقى ردود على كل اسئلتك و لو انى شايفة ان المسلسل برضة حنين عليهم زيادة

دى مش دعوة لاننا فعلا مسلمين و من زمان اوى عندنا الازهر انما ده مرض اسمه التسلط

عبدالله أتومنار يقول...

تقبل الله منا ومنك صالح الاعمال
وعيد مبارك وكل عام وانتم بالف خير

Shaimaa يقول...

kontiki
والله يا كونت أنا كان عندى احساس انهم فعلا جنود ايران ...بس نفسى أعرف البلد دى عايزة ايه بالظبط ... وبتمول الكلام ده ليه

Shaimaa يقول...

rayk cool
شكرا على ذوقك
وفعلا العقل هوه الحد الفاصل فى الكلام ده... لازم احنا اللى نرفض أو نقبل الكلام ده ونحط حد للناس دى
شرفتنى بالزيارة
خالص تقديرى

Shaimaa يقول...

Tears
أنا اطلاقا مش مصدومة ... لأنى عايشة معاكوا فى مصر مش فى كوكب تانى ... وبشوف من العينة دى فى كل مكان فى اليوم 100مرة ... فى شغلى ... وفى التلفزيون على كل القنوات .... أعتقد انى لو فتحت الحنفية هينزلوا منها .... الموضوع بقى تجارة
كل واحد مش لاقى شغل يروح يحفظ حديثين شريفين على كام آية قرآنية وفجأة يتحول الى داعيه اسلامى...

شوفت مسلسل الجماعة ... بحب فكر وحيد حامد جدا وبصدقه

Shaimaa يقول...

عبدالله أتو منار
تقبل الله منا ومنك ... وكل سنة وانت طيب وبخير وسعادة وصحة
خالص تقديرى

mrmr يقول...

كل سنه وانتى طيه يا جميل

عيد سعيد

داليـ ـ ـ ـ ـ ـ ــــا يقول...

بصى ياشيمو
هو كل واحد منهم حضرله درس وحفظله جزئين افتكر نفسه خلاص ممكن يوعظ الناس ويديهم دروس كمان

هو ممكن يدى نصيحه بسيطه
انما ميعملش فيها فقيه

تعرفى انا اتحطيط فى موقف مره
اقسم بالله ان الراجل ده كان حافظ قرأن بس وبيحضر دروس
واتفرجى عليه
تعرفى بيسئلنى ويقولى بتسمعى لمين
رديت وقلت له الداعى الاسلامى مصطفى حسنى
يقولى هو بيفهم حاجه
انا اتضايقت
كان نفسى اقوله ده على اساس انك انتا الا بتفهم
شفتى عمل ايه عشان بس حافظ القرأن
ياريته يعمل بيه وميسبش فى خلق الله
ده أهل لحاجه زى دى بقه

كل سنه وانتى طيبه

Shaimaa يقول...

داليـــــــا...
كل الناس دلوقتى بقت بتنصب نفسها شيوخ ومواعظ ياداليا ... ومجرد ما تدورى وشك تسمعى ألفاظ وحوارات تندى ليها الجبين زى ما بيقولوا...ربنا يهدى

وانتى طيبة يا حبيبتى

Shaimaa يقول...

mrmr
وانتى طيبة يا مرمور ولو انها متأخرة جدا جداااااااااااااا
دمتى بخير

فاروق بن النيل يقول...

شيماء ......
الفاضى يعمل قاضى .

Shaimaa يقول...

فاروق ابن النيل..
لأ وانت الصادق يعمل شيخ