اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 23 يناير 2011

ليه كدة..... ليه؟


استمرارا لردود الأفعال المتباينة على دعوات المشاركة في وقفة احتجاجية تقام في الخامس والعشرين من يناير القادم، دعا نجيب جبرائيل رئيس منظمة الاتحاد المصري لحقوق الانسان الشباب القبطي إلى عدم المشاركة في أي عمل يخالف الدستور والاحتكام إلى العقل.

وقال نجيب في بيان صادر عن المنظمة مساء السبت:" أدعو كافة الشباب القبطي الى الاحتكام الى العقل والالتزام بالقانون نحو مطا لب مشروعة بالحقوق التي يقرها الدستور وليست بمشاركة مع فوضى هدامة".


وأضاف:" تحث المنظمة كافة الشباب القبطي بعدم الخروج في مظاهرات 25 يناير لأنه ليست بالمظاهرات وعلو الحناجر تحل المشكلات ولكن بالمواجهة الموضوعية القائمة على الشرعية ومن خلال القنوات الرسمية ".


على صعيد متصل، طالبت الكنيسة القبطية الارثوذكسية الاقباط بالصلاة يوم 25 في البيوت وعدم الذهاب يوم الاحتجاج او التظاهر ،ودعا القمص عبد المسيح بسيط راعى كنيسة السيدة العذراء بمسطرد الاقباط الى عدم الذهاب يوم الاحتجاج والتظاهر الذي تم الاعلان عنة يوم 25 يناير لان هذه المظاهرة ورائها الاخوان المسلمون والجماعات السلفية والذين يريدون للمظاهرة ان تكبر وتحدث شغب مثلما حدث في تونس وسيعقبها فوضي وهيجان ونهب لممتلكات الاقباط لذا فمن باب اولي للأقباط الصلاة والصوم في هذا اليوم من اجل سلامة مصر ، وذلك على حد قوله.


ومن جهة اخري اصدر الدكتور القس بطرس فلتاؤس رئيس الطائفة المعمدانية الأولى بيانا أكد فيه أن الكنيسة المعمدانية الكتابية الاولي في مصر ترفض المشاركة في مظاهرات 25 يناير التي تدعو إليها بعض الحركات السياسية لان الأقباط لديهم فكر مسيحي تابع للكتاب المقدس الذى يقول "صلوا من أجل الرؤساء والسلاطين لكى نعيش حياة هادئة مطمئنة"، فالكتاب المقدس يطالب بعدم مقاومة السلطات.


نقلا عن موقع مصراوى


عايزة تفسير منطقى للمكتوب فوق ده ...  ده ايه؟
أنا كنت ضد علانية وقفة 25 يناير لسلامة وأمن المتظاهرين بس مش ضد الثورة على الفساد .. اللى مكتوب ده كارثة .. كارثة ..كارثة بكل معانيها .... شوية أسئلة بقة وحد يجاوبنى عليها لو سمحتوا وبسرعة :
1- مين اللى بيفرق دلوقتى بقه ؟ مين؟ ...لما تم الدعوة لوقفة 25 يناير محدش قال "أيها القوم المسلمون وحدوا الصفوف لوقفة 25 يناير ... لأ احنا قلنا يا "مصريين" طفح الكيل وعايزين نخرج "كلنــــا"  نطرد النظام الفاسد الفاجر اللى راكب على نفسنا 30 سنة


2- مين اللى قال ان اللى ورا الوقفة الاحتجاجية الأخوان المسلمون ... دى أحزاب معارضة ومنظمات حقوق الانسان وشباب الفيس بوك الحر ...شباب مصرى ... مصرى من كل الطبقات والتوجهات بس اجتمعوا على رغبة واحدة وهى تنحية النظام الفاسد.


3-"وسيعقبها فوضي وهيجان ونهب لممتلكات الاقباط لذا فمن باب اولي للأقباط الصلاة والصوم في هذا اليوم من اجل".... نهب لممتلكات الأقباط ... بس؟ يعنى لو مصلحة حكومية ولا شركة بيشتغل فيها 1000 واحد فاتح بيت مش مشكلة ... المهم ممتلكات الأقباط وتولع بقية مصر مش مشكلة  ... مين دلوقتى اللى عايش فى خندق وقافل على نفسه وفاصل نفسه عن المجتمع؟ ..وبعدين هوه اللى حصل فى تونس "فوضى وهيجان  .. بس ؟ .... دى رؤيتكم للحدث ...فوضى وهيجان؟!!!!!!!!!!!!!!!!!!!!!!!!!!!!!!!!!!


4-"صلوا من أجل الرؤساء والسلاطين لكى نعيش حياة هادئة مطمئنة"، فالكتاب المقدس يطالب بعدم مقاومة السلطات"... الكتاب المقدس برىء من أمثالكم  ... برىء ..... والمسيح برىء منكم ... ده كتاب مقدس على هواكم .... عامل بالظبط زى "ولا تقربوا الصلاة" ويقف ميكملش الآية..... الكتاب المقدس قالكوا تبقوا سلبيين .... ليكوا دعوة بنفسكم بس ملكوش دعوة بحد تانى .... هتصلوا من أجل روؤساء فاسدين كلاب ...هتصلوا عشان ربنا يخليهم لينا لحد ما يخلصوا علينا ؟!!!!!!!!!!!!!!!!!!!!!!!!!!!!


الى كل القائمين على الكنائس وكافة المؤسسات القبطية المصرية وعلى رأسهم البابا شنودة ... أنتم تعيشون بداخل مصر ولستم على جزيرة نائية .. أنتم بمصر.... اذا صلح الحاكم صلحت كل مصر "مصـــرنــــا" وليست مصر القبطية ومصر المسلمة... لحد امتى هتفضلوا سلبيين وملكوش دعوة بحاجة فى مصر غير بناء الكنايس وحقوق القبطيين المسلوبة ... بس؟ هيه دى كل حواراتكم فى التليفزيون .. ومباركة الرئيس مبارك ... بس؟  لا ليكوا دعوة بالبلد ولا باللى فيها


  والى كل رجال الدين الاسلامى الغير معتدلين ارفعوا أيديكم عنا .... لا نحتاج الى وصاية أحد ولا فتوى أحد ... نحن مؤمنون بالفطرة ... من قبل حتى أن يولد أمثالكم 
كفاااااااااااااااااااااااااية

هناك 20 تعليقًا:

Tears يقول...

صراحة من ساعه ما اللى بيطلقوا على نفسهم رجال دين خرجوا لنا من المساجد و الكنايس و حطوا مناخيرهم فى حياتنا المدنية و الدنيا خربت و خابت و بقوا مجرد ابواق للحاكم الظالم مع ان مافيش دين فى الدنيا حتى لو بوذى بيدعوا للجبن و الذل و القبول بالاهانة و الظلم و الا ما يبقاش دين منطقى اصلا

فاروق سحير ( فاروق بن النيل ) يقول...

شيماء..........
إنتى حطينى إيدك بالضبط على المشكلة الحقيقية فى مصر واللى خلتنا نتأخر حتى سبقتنا تونس إلى الثورة على حاكمها
مع إنى ضد التظاهر بهذه الطريقة والإعلان عنها مسبقا لكنى أيضا ضد منافقى النظام من الفئتين وهم معروفون بولاءهم وبتفنيد مزاعم دينية لصالحهم ولصالح أسيادهم
والله ياشيماء موش مضيع حقوقنا إلا الذين يسمون أنفسهم رجال الدين كما قالت " الأستاذة / الفاضلة تييرز"
لأنهم أصحاب فتاوى مشكوك فى صحتها
شكرا لكى " موش طالع من بيتى يوم 25 يناير وحادعى عليهم بصلاتى ربنا ياخدهم وياخد منافيقينهم من الفئتين"
حتى أرى شبابا مصريا واعيا يفرق بين الوطن والدين ( الدين لله والوطن للجميع" فإذا كان عددهم على الأقل 40 مليون ساعتها حاتسمعى عن " حسنى الهارب أو المقتول" يارب قرب البعيد

فاتيما يقول...

ازيك يا شيماء

ممكن بس تهدى الاول
عشان حساكى متعصبة جداااا
واعصابك يا بنتى
احنا عاوزينك

بصى
هاتيها م الاول كدا
من الف باء تسلسل
كل من يصل لمنصب او رأس سلطة ف هذا البلد ..بييجى ازاى ؟
طيب لو فرضنا جه منتخب بعد الشر ولاّ بإختيار عشيرته وقومه
مش مطلوب منه يقدم فروض الطاعة والولاء ؟
مقدمش بيقعدش
بيقدم تنازلات بين الفينة والآخرى نخليه يقعد وماشى
او يهادن ويقول ابيع ..م الأول
ف كل الأحوال
من الباقى على الكراسى
سواء ف الازهر او الكنيسة ؟
ولائهم للى جايبهم ومقعدهم ومخليهم وبيحميهم وبيسيبهم يتمتعوا بالمناصب والنفوذ ..الخ

طيب يبقى خلاص
ليه متوقعة منهم رد فعل منطقى
او مساند
هما ف احسن الاحوال يبقوا محادين
زى ما عندنا الفتاوى شغالة ان حرق النفس والإنتحار حرام ومحدش استجرى يفتح بوقه يقول كمان ان اللى اتعمل ف الناس دى قبل ما تولع ف روحها ..حرام


وبعدين سؤال تانى
هل الناس ف رأس الكنيسة او الازهر بتمثلنا كلنا
اكيد اقباط كتير مش راضية عن التصريحات دى زى محنا مش راضيين عن تصريحات الازهر وشيوخه السابق واللاحق
لأنها مشمومة وباين سببها

متحرقيش دمك

القبطى الحق لو قادر يشارك
هينزل يشارك ولو اتحرق ممتلكاته
والمسلم الحقيقى لو قادر يشارك
برضو هينزل
محدش هيستنى فتوى
من ناس بيحركها كلمة من اولى الأامر وبيوقفهم كلمة



فمتقعديش زى ما بيقول المثل
تستنى السمنة .. من بطن النملة
بس

رووووق يا جميل

Humman being يقول...

Tears...
ياريتهم ميكلموش باسم الدين بقى يا تيرز ولا يضربوا أمثال من الانجيل ولا القرآن وياريت يتكلموا عن نفسهم هما بس ميدعوش حد لحاجة
انت ك قسيس أو راعى كنيسة أو شيخ أو امام خايف على منصبك خليك انت فى نفسك متدعوش الناس لحاجة تقلل منك وتصغرك ... عيب
وبعدين عايز تدعى لحاجة (انت مش مخير فيها وحد ضاغط عليك) قول أنا بدعو المصريين ... مش الشباب المسيحى

Humman being يقول...

فـــاروق ابن النــيـــل...
لما حد بينزل مظاهرة ولا بيعمل أى عمل حتى لة كان اختراع للبشرية مش بيكون فى دماغه أبدا ده للمسلم ... ودى للمسيحى
تونس زى ما حضرتك بتقول نجحت عشان مفيش فيها العقول دى... يبقى نستنى كدة ونقف مع نفسنا وننضف العقول دى الأول وبعدين نفكر فى النظام اللى احنا خلقناه وكبرناه لحد ما بقى ديكتاتور بايدينا
يارب نشوف الشباب ده اللى يقدر ويعرف ان الدين جوانا والوطن بتاعنا كلنا ومينفعش نخلط الاتنين مع بعض

Humman being يقول...

فاتيما ...
ازيك انتى ؟

أنا فعلا دمى محروق وبجد مش قادرة أهدا ... لأن اللى بيتقال فى كل وسائل الاعلام ان المسلمين واخدين حقوقهم والمسيحيين مهضوم حقهم ... وفين الكنيسة الفلانية ... فين منصب كذا ... ده بيعمل غسيل مخ للشباب القبطى

ماشى...
ناخد الموضوع بالراحة..
عندنا أفراد بيسموا نفسهم دعاة وهما أغبية سواء كانوا من أتباع النظام أو تجار دين؟ .... أيوة فى... بس دول شريحة مش كل الناس

المسيحيين عندهم برده ناس متزمتين وناس بتحابى للنظام عشان تحافظ على منصبها وبيتاجروا بالدين .. أيوة فى

منحطش راسنا فى الرمل ونقول احنا ضحايا وبس

عمرك سمعتى أى مسئول مسيحى رفيع المستوى بينتقد النظام وبيدعو لثورة عليه؟ عمرك

وبعدين نطلع نقول التفرقة وحقوقنا .... لما ننادى بعدم نهب وسلب ممتلكات يبقى منقولش مسيحية بس ... نقول ممتلكات مصر ....
أنا متأكدة ان الشباب القبطى ضد الأفكار دى وأنا نشرت البوست ده عشان كدة عشان يعرفوا ان زى ما بعض رجال الدين عندنا أغبية وتجار عندهم هما كمان أغبية وتجار دين والمفروض محدش يسمع لهم
لو البلد ولعت محدش هيفرق بين كنيسة وجامع ... هتولع كلها
ولو استقرت هتستقر كلها مش هنقول لأ بلاش القبطيين أصلهم مطلعوش فى المظاهرة

sal يقول...

معاك يا شيماء
المثبطون والمنافقون بالكومة وعلى كافة المستويات

مسلم مسيحى كله محصل بعضه
دا طبيعىة نفسية الانسان المقهور
يفضل خايف طول حياته
يخاف من القادم المجهول ويفتكر ان الامان فى دوام الحال
طبعا المتشدقين بالدين والمتحدثين الرسميين
ازهر او كنيسة دول موظفين من النظام
عشان يأكلوا مخ الناس الغلابة
يارب شباب مصر كله يكون فاهم الالاعيب دى
على فكرة انا اتفاجأت بمدونين كنت احسبهم ذى عقلية ناضجة
لقيتهم يقولوا بلاش فوضى واحنا غير تونس وكلام محبط وسلبى
مش عايز اشتم


تحياتى وتقديرى

Ms Venus يقول...

محدش قال كده فى الكنيسة يا شيماء


لو الكلام ده صح كنت هقولك فعلا اتنبه


لكن انا فى كنيستى محدش ابدا قال كده


وكل انسان حر

متصدقيش كلام النت

عاوزة تاخدى كلام صح تسمعيه من صاحبه ويبقى قدامك كده بيتكلم

غير كده انا عن نفسى مستحيل اصدق

ده ردى على ان الكنيسة بترفض


بالنسبة بقى للثورة نفسها مش هقول رأى فيها لانى اصلا مش مقتنعة ان ممكن يحصل حاجة وهى مترتبة ومعروفة

طب ازاى ؟

Ms Venus يقول...

وانتى حاطة صورة البابا شنودة مع انه مقالش كده


نهائياا

لازم تسمعيها بنفسك صدقينى

MaNoO يقول...

انا شفت ليك كدا ..ليه اسم البوست اتخضيت وحسيت ان فى نرفزه طالعه فى وشى اهدى يابنتى اوعى تكونى مستغربه اللى بيحصل ولا اللى بيتقال بس الغريب حكايه الصلاه من اجل الممتلكات دى
بس عارفه فى مشكله فى المعارضه الغبيه المتخلفه اللى مشايه بالبروقراطيه زيها زى الحكومه واحد يقولك هنشارك وواحد يقو مش هنشارك ولما يتحرجوا ويلاقوا ان الشباب فى وش المدفع ينزلوا بالظبط معاهم الاخوان
انا اللى قررته ملناش دعوه بحد ولا ازهر ولا كنيسه احنا شباب وعايزين وهنعمل ولا احزاب كمان مش ناقصه بلاويهم كل واحد فيهم عايز مصلحته برده
روقى بالك محدش هيعيرها الا احنا والله والكلام اللى قالوه مش جديد ايا كانو هما مين ومحدش ييجى يقولى بغلط وفتنه وبتاع اللى بقوله ماشى على المسلمين والمسيحيين اللى معيشينا الدور

Humman being يقول...

sal...
فعلا اللى زى دول مرتزقة "الدين" بالنسبة لهم هوه مصدر أكل العيش فلازم يعملوا كدة
هنفضل عايشين ب فوبيا الخوف دى لحد امتى ياريتنا نفوق

فى شباب مصرى واعى ... وفى ناس نايمة فى العسل أخدوا على التنبلة ..
شكرا لمرورك
خالص تقديرى

Humman being يقول...

Ms Venus....
ياريت يا فينوس ... أنا فى البوست ده قولت ان أكيد ده مش رأى كل المسيحيين ... ببس فى نفس الوقت القائمين على المؤسسات الدينية المسيحية والمسلمة الاتنين معظمهم سلبيين ماشيين على مبدأ (من خاف ..سلم) وده غلط

طب أنا عايزة أسألك على حاجة وأرجوكى تجاوبينى عليها ليه مفيش مشاركة فعلية رسمية من الكنيسة فى "التغيير"؟ يمكن الشباب المسيحى واعى وعارف مصلحة بلده بس احنا (الشعب المصرى ككل) ضعاف جدا من جهة الدين أى حد سواء شيخ أو قسيس بيقول حاجة بنتأثر بيها وبنمشى وراه

Humman being يقول...

MaNoO....
تصدق انت قولت الخلاصة ... ولا أزهلر ولا كنيسة .. احنا مش لينا عقل وايدين ورجلين .. خلاص لا هنمشى ورا المرتزقة دول و تجار الدين دول هنمشى ورا عقلنا احنا لأن احنا اللى بنعانى مش هما

دمت بخير

Humman being يقول...

Ms Venus...
أنا حاطة صورة البابا شنودة ك رمز ... بس فى نفس الوقت عايزة أسمع صوته هوه بيتكلم عن أحوال البلد المنهوبة ... عن مشاكل البطالة... والصحة ... والتعليم المتدهور ... عايزاه يتكلم فى أمور تانية غير أمور الكنيسة ... عايزاه يتكلم عن "مصـــــر" لأنه رمز من الرموز المهمة فيها

الاحلام يقول...

لابد من تغيير انفسنا اولا ثم نطالب يتغيير عام لابد من التخلص من النفاق والرشوه والنميمه والوقيعه
لابد اننا نخلص النيه لله لان الله سبحانه وتعالى لا يغير ما بقوم حتى يغيروا ما بانفسهم .
تقبلى تحياتى الاحــــــــلام

MaNoO يقول...

مش قلتلك ولا جامع ولا كنيسه دى طاقه الشباب شايفه المصريين بجد كانوا عاملين ازاى امبارح برغم انى مكنتش مقتنع بس شاركت

Humman being يقول...

الأحلام...
محتاجين ثورة تغيير لينا احنا الأول .. الخوف بس لنكون أخدنا على كدة ... المرتشى معدتش يقدر يعيش من غير رشوة ولا الفاسد يقدر يعيش من غير سرقة ونهب
شكرا لمرورك

Humman being يقول...

MaNoO....
ربنا معانا يا MaNoO ياااااااااااااااااااااااااارب ..مصر بشبابها ورجالتها

لــــ زهــــــراء ــــولا يقول...

"وسيعقبها فوضي وهيجان ونهب لممتلكات الاقباط لذا فمن باب اولي للأقباط الصلاة والصوم في هذا اليوم من اجل"....

" دي لا تعبر عن وجهة نظر الاقباط ولكنها تعبر عن وجهة نظر فردية تنسب لصاحبها ... المظاهرة اشترك فيها كل المصريين "
لولا

Humman being يقول...

لولا وزهرة...
ياريت نسمع بس للمشايخ والقساوسة المعتدلين ...لصوت العقل
شرفتينى بالزيارة