اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 2 يناير 2011

حـــداد مع Ms Venus....


عايزين نهدا كدة ... وناخد نفس عميق ....
هدينا .....؟؟؟ ..... الحمد لله نكلم بقى كدة بالعقل

بقالنا كام سنة عايشين احنا واخواتنا المسيحين فى بلد واحدة فى مدارس واحدة فى عمارات واحدة فى شغل واحد ؟
الاجابة : من يوم ما ربنا خلقنا

عمرنا اتعاملنا مع بعض بمنطق مسلم ومسيحى أو حتى سألنا بعض عن ديانتنا ؟
الاجابة : لأ محصلش .... ومش هيحصل

يبقى ايه اللى حصل ؟ ...ايه الجديد؟؟
الجديد ان فى قوى معينة عايزة تهد مصر  ... ومش لاقية باب تدخل منه ... بس برده مش أى باب .... لازم يكون باب يضربوا منه 100 عصفور بحجر واحد ... زعزعة الأمن ... زرع الفتنة .... ضرب الاقتصاد فى مقتل ... زرع الكره الأبدى.. بالظبط زى ما بيعملوا فى العراق وفلسطين ولبنان كمان ...

العراق والعة نار حروب طائفية بيموت فيها آلاف .... هما قالوا هنوجع دماغنا ونموت جنودنا ونخسر أرواح وأموال ونخسر احترام العالم ليه .... احنا نخبطهم فى بعض .... نزرع الفتنة بينهم بهدوء ودهاء معروف منذ قديم الأزل وبس  ... ونسيبهم بقة يموتوا هما بعض...

نفس الحكاية عملاها اسرائيل بين فتح وحماس وغيرها من الحركات الفيلسطينية ... يقعدوا يحاربوا ويخسروا ويستنفزوا اقتصادهم والعالم يتف فى وشهم ليه... هما يزرعوا الفتن ما بين الفصائل الفلسطينية بدهاء مطلق ويسيبوهم بقى ياكلوا فى بعض .. وبدل ما يحرروا بلدهم ويحاربوا المغتصب المحتل ... يتشغلوا فى حروب داخلية ويموتوا هما بعض ببعض ... وتطلع اسرائيل بريئة قدام العالم..

فى مصر ...  فكروا كويس واختاروا السكة دى "المسلمين والمسيحيين" ...يفجروا الكنيسة ويموت عشرات الأبرياء وبعد كدة نمسك احنا فى بعض ونموت بعض .... ويحصل فتنة وقتل ودمار وكره
مش كلام تليفزيون والله بس فعلا المقصود من التفجيرات دى مصر .... اللى ماتوا مش بس مسيحيين  ... لأ فى 8 مسلمين وجرحى كتير من الطرفين ..

الحدث جلل وأبدا أبدا مش هيروح دمهم هدر ... مش بس عشان مسيحيين... لأ عشان هما مصريين ..... عشان مصريين فى المقام الأول ...
عايزة كمان أقول حاجة مهمة احنا كمصريين منعرفش "ثقافة الدم" دى ... بمعنى .... عمرنا ما اتربينا ولا اتعودنا اننا لما نكون مبنحبش فلان أو بنكرهه - وده افتراض غير موجود وغير وارد - نقوم نقتله .... لأ ... مفيش الثقافة دى

فينا ناس متزمتين كمسلمين ممكن ..... فيه فى الأخوة المسيحيين متزمتين برده ..جايز ..... عشان احنا فى الآخر بشر... بس لا مسلمين ولا مسيحيين يعرفوا القتل .....  عشان احنا طول عمرنا مع بعض وهنفضل كدة مهما عملوا ...

مش هبعد عن ايفللين ولا ماريان ولا ايرينى ولا سالى ولا ms venus .... مش هنبطل نروح للدكتور ملاك ولا الدكتور فادى.... مش هنمشى من شركتنا أ/ عماد ولا مدام ايزيس ... مش هبطل أودى كحك لطنط جيهان وآخد منها أحلى كيك ....

مش هنبقى عراق تانى مهما عملتوا ... عشان خاطرى كل اخواتنا المسيحيين .... اسمعوا لنداء العقل ..... أبدا مش بقول اننا هنسيب حق اللى ماتوا .... لأ دول اخواتنا وأمهاتنا آباءنا ودمنا وكل حاجة بس متدوش فرصة لحد يحقق غرضه ويدخل بيننا  ..... أرجوكم مش عايزين نبقى عراق تانى ....
احنا معاكى يا Venus بقلبنا وعقلنا وروحنا وحبنا وتعازينا وكل حاجة.. وعلى استعداد تام لعمل أى شىء لأسر الضحايا ... مش شعارات ... لأ حقيقة وفعل ...

خالص التعازى

هناك 10 تعليقات:

Tears يقول...

معاكى فى كل كلمة و بضم صوتى لصوتك بس ح اضيف ان فيه خاين كبير جدا بينا و بيتواطىء على الشعب كله مش قضية مسيحيين و مسلمين

التطرف اللى سمح بيه فى القنوات و الزوايا و الجامعة و ملصقات الشوارع و فى اماكن كتير اوى هو النظام السياسي عشان يلهى الناس و يخليهم يمسكوا فى بعض بدل ما يطالبوا بحقوق و حرية

و برضة نفس النظام ده هو اللى بيسمح للقوى الخارجية تعمل اللى هى عايزة بمزاجه و اوعى تصدقي ان الامن ما كانش يعرف يمنع اللى حصل لان اصلا القاعدة ارسلت تهديد صريح و نشر فى الصحف من شهرين و حددوا اليوم و الاماكن المستهدفة و برضة ما كانش فيه امن متواجد

طيب مالفتش نظرك ان قبلها فى حادث انهيار مصنع اسكندرية سابوا الناس تتبهدل و يادوب بعد سبع ساعات راحت الاسعاف بينما فى حرائق غايات اسرائيل كانت مصر اول يد تساعدهم

طيب بلاش

شفتى ازمة السكر اللى كانت فى اسرائيل الشهر اللى فات فمبارك امر بارسال المخزون بتاعنا ليهم عشان السعر عندهم ما يغلاش و النتيجة ان الناس فى مصر اتبهدلت و مالقتش سكر

شفتى الغاز اللى بيتباع بسعر باقل من سعره العالمى لاسرائيل و بنخسر فى تمنه و النظام رافض ينفذ حكم المحكمة بايقافه

شفتى تصريح نتنياهو ان مبارح اهم صديق لاسرائيل؟

تصريحات رئيس المخابرات الاسرائيلى السابق فى مذكراته المنشورة

''''لقد تطور العمل فى مصر حسب الخطط المرسومة منذ عام 1979. فقد أحدثنا اختراقات سياسية وأمنية واقتصادية فى أكثر من موقع، (((( ونجحنا فى تصعيد التوتر والاحتقان الطائفى والاجتماعى لتوليد بيئة متصارعة متوترة دائماً ومنقسمة إلى أكثر من شطر ))))" ~ عاموس يادلين (( رئيس المخابرات العسكرية الإسرائيلية السابق ))...

ياريت نربط ده باعترافات الجاسوس المصرى الاخيرة اللى قال فيها ان اسرائيل لها عملاء فى مناصب مهمة عندنا و بتبث فتاوى متطرفة و تساعد على تغذية الارهاب و بتمولة و الدليل ان الاحصائيات بتقول ان القاعدة قتلت من المسلمين و العرب اكثر من غيرهم و لم يحدث ان قاموا بتفجير واحد ضد اسرائيل او يهود

الداخلية همها تأمين النظام السياسي و بس

و طول ما الشعب ده او جزء منه بيايد الحزب الوطنى و بيحشدوا عشانه فى كل انتخابات طول ما ح نفضل فى كده و ماحدش ح يبقاله سعر لا مسيحي و لا مسلم

و اعتقد التزوير من اجل انجاح النائب عبد الرحيم الغول اللى تسبب فى كارثة نجع حمادى العيد اللى فات ابلغ رسالة ان ماحدش له سعر و لاحظ ان لسه لم يعاقب حد من الجناه فى نجع جمادى بينما مثلا فيه قضايا اخرى كان الحكم فيها سريع جدا

على فكرة قله من المسيحيين فهموا امبارح ده اخيييييرا و عشان كده لما الانبا يؤانس بدأ فى توجيه كلمة شكر لمبارك بعض الشباب كانوا ح يضربوه و اسأل اللى كان حاضر و شاف

اقرى و دورى ح تلاقى ان فى الوثائق الامريكية اللى بيفرج عنها بعد سنوات ان الملك حسين مثلا كان له راتب سنوى من جهاز المخابرات عندهم و كان بيبلغ بكل شىء و فى نفس الوقت فى نفس الوثائق ان همه كانوا شاريين مسئولين كبار فى الاتحاد السوفيتى بيخربوا من جوه

اسفه على الاطاله بس الموضوع اكبر كتير من اننا نلبسه فى القاعدة و نسكت خاصة ان القاعدة برضى بتشتغل لصالح اسرائيل و الدليل انها لم تقتل فى عمرها يهودى واحد و لا عملية واحدة فى اسرائيل و اغلبه ضد المسلمين فى باكستان و افغانستان و العراق

Humman being يقول...

tears
عايزة أقولك ان مصر دلوقتى من غير رئيس ...دى حقيقة مفيش رئيس لمصر ...ده راجل منظر كدة بس هوه والحاشية اللى حواليه وبقية النظام مش فاضيين للبلد وللأمن وحمياتنادول فاضيين بس للسرقة والنهب والتهليب

وهما أهلوا البلد لكدة ... خلوا مجلس الشعب كله حزب وطنى... قضوا على كل المعارضة داخل وخارج مجلس الشعب ...

كل الظروف حواليهم بقت جاهزة لمزيد من السرقة بس فى هدوء بقة من غير أصوات مزعجة ...

بالنسبة للجاسوس اللى مسكوه ده فى عنده كلام متناقض كتير ... وحاسه فيه حاجة مش مظبوطة مش عارفة هيه ايه؟

فى حاجة تانية مهمة برده يا تتيرز ... الأقباط عليهم عامل كبير ...
الأقباط داخل مصر بيطبطبوا على النظام وبيقولوا آمين
وأقباط المهجر بيولعوا فيها نار وبيدسوا الفتن وعايزين يدخلوا كل القوى الخارجية فى مشاكلهم وده فى حد ذاته غلط فى غلط
احنا الاتنين مسئولين عن الغلط

MaNoO يقول...

معاكى فى كل كلمه قلتيها احنا كدا والله من غير شعارات ولا اى حاجه بصاحب الواحد واقعد بالسنه عما اعرف انه مسيحى الكلام دا كله جديد علينا واحنا اقوى منه انا قلتها وهقولها والله احنا شعب اقوى من كل دا وان شاء الله هنقدر نتعدى المرحله دى كلنا هنبقى مع بعض ودا الحل الوحيد اعيادهم جايه وكلنا بندفعهم وبنهنى ولو طلبت ننزل نقف معاهم لان فى حاجه محدش واخد باله منها ان حمايه دور العباده هي واجب علينا كلنا وان مكانتش الحكومه قادره احنا ننزل ياري اجعل هذا البلد امنا كما كان وسيكون
يارب الشعب دا يستحق كل خير
يارب

Humman being يقول...

MaNoO...
ياريت الناس كلها تفهم كدة مسلمين ومسيحيين ويعرفوا ويتأكدوا اننا لو موقفناش مع بعض دلوقتى يبقى حققنا للفاعل الحقيقى غرضه والبلد هتضييع

شرفتنى جدا بالزياره
خالص تقديرى

Houda Belabd يقول...

You'll always stay a good example for Arabs.

Humman being يقول...

Houda Belabd...
thanks a lot Houda ..appreciate yr visit
best regards

Kontiki يقول...

ازيك
انا كويسة الحمد لله لكن غيرت شغلى وفى حاجات كتير لازم اعملها و انت فاهمة الحادثة خليتنى مكتئبة جدا جدا

Humman being يقول...

Kontiki...
الحمد لله انك بخير

Ms Venus يقول...

اشكرك من قلبى يا شيماء


اعذرينى على التأخير والغياب

Humman being يقول...

ms Venus..نشكر بعض يا حبيبتى لما نكون اتنين ... احنا مش اتنين احنا واحد ...ده مش كلام أغانى لأ ..دى حقيقة احنا واحد وهنفضل كدة الوجع واحد والفرح واحد
يارب يكون آخر ألم نحس بيه