اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الثلاثاء، 26 أبريل 2011

ارحموا عزيز قوم ذل...!!!!

الرئيس السابق مبارك راجل عدى ال 80 يعنى ارحموا عزيز قوم ذل ...
هوه كان عمل ايه .. كرامة ايه اللى ضيعها .... ما احنا ماشيين بيها أهوه
ده الراجل اللى عمل الضربة الجوية ورجع لمصر كرامتها
مش ده اللى قضى على الارهاب فى التسعينيات
مش ده اللى وقف الاقتصاد على رجليه
ربنا يشفيك ويعافيك يا مبارك .... آمين
الرسول قال للكفار اللى أذوه .... "اذهبوا فأنتم الطلقاء"
وقالى تعالى ...... وقالى الرسول.....

دى بعض التعليقات اللى بتنزل على معظم المواقع الالكترونية .... ومعظم الاتصالات بالفضائيات ... صحيح مش كتير أوى بس موجودة...

تبقى مصيبة سودة لو اللى بيقول الكلام ده فعلا مؤمن بيه ...

نختلف على الاعتصامات الفئوية وتوقيتاتها ..ماشى
نختلف على سرعة وبطىء المجلس العسكرى فى تنفيذ طلبات الشعب وائتلاف شباب الثورة ...ممكن
نرفض القائمة البيضاء والسودة ونقول نبنى مصر الأول وسيبنا من القوائم دى....جايز

انما نختلف على "الحساب" والعقاب العادل..... لأ ...مينفعش ... نبقى بنهرج... يبقى مكنش فيه داعى لا لثوة ولا شهداء ولا حرق أقسام ولا حل حزب وطنى ولا القضاء على أمن الدولة .. ونروح نولع فى ميدان التحرير عشان نخلص من أى آثار تفكرنا بحاجة ...

عيب أوى لما ناس تطلع فى الفضائيات تقول أحمد عز وشلة الحرامية بيعرضوا مليارات فى مقابل التسوية وغلق الملفات والافراج عنهم ...
طب محدش فكر ان مطالباتهم بالتسوية دى فى حد ذاتها  يعتبر اعتراف ضمنى بارتكاب الجرائم دى ....؟!!!!
عيب لما يطلع الأستاذ الدكتور /يحيى الجمل ويقول بننظر عرض السادة نزلاء طره فى موضوع التسوية ...انت مش من حقك تنظر لأى حاجة خالص لأنك أساسا مبتشوفش... احنا اللى ننظر ونقرر مش انت

عيب لما يبقى رئيس مخلوع نهبنا هوه وولاده ومراته وعيلته وعيلته مراته ونسايبه وجيرانه وخدامينه والجانينة ونقول معلش ده راجل كبير والرسول قال وربنا سبحانه وتعالى قال

عيب عليكوا لما تتسرقوا 30 سنة وتقولوا مسامحين
عيب لما تنسوا شهداء العبارة اللى مكنوش رايحين يتفسحوا فى دول الخليج
عيب لما تنسوا الشهداء العسكريين اللى ماتوا فى حادثة الطيارة واللى مبارك محاوليش حتى يفتح تحقيق ويقول ليه ماتوا
عيب لما تنسوا سكان المقابر
عيب لما تنسوا شهداء الدويقة اللى السادة الوزراء غطوا عليهم بالحجارة مكلفوش خاطرهم يبحثوا عن بقية الجثث على الأقل من باب "اكرام الميت دفنه"
عيب عليكوا تنسوا شهداء القطارات اللى رموا لكل واحد فيهم 2000 جنيه تعويض ...... واقلب
عيب لما تنسوا حادثة بنى مزار اللى السيد الرئيس مكلفش خاطره يعرف مين اللى تاجر بأعضاء أبناء شعبه
عيب لما تنسوا أمثال "خالد سعيد" ... أيوة أمثال ...لأن خالد سعيد ساعده الحظ ان الاعلام غطى حادثته صح فحقه مش هيروح بعد الثورة ... بس فى مليون خالد سعيد مات وادفن ومحدش يعرف عنه حاجة
عيب لما تنسوا الكنائس اللى اتحرقت مش عشان فيه فتنة ...لأ عشان السيد الرئيس وولاده وكلبه حبيب العادلى عايز يلهينا بموضوع الفتنة الطائفية
عيب لما تنسوا تفجيرات شرم الشيخ اللى متورط فيها برده الكلب حبيب العادل هوه وجمال مبارك
عيب لما تنسوا انتخابات مجلس الشعب القذرة
عيب لما تنسوا الشباب اللى انتحر من قلة الشغل وقلة الجواز ...فى الوقت اللى فيه جمال وعلاء بيصيفوا فى جزر الكاريبى وهما أصلا صيع ملهمش لا شغلة ولا مشغلة
عيب لما تنسوا الناس اللى قاعدة فى بيوت من صفيح وبتدخل حمام واحد مشترك فى آخر الشارع
عيب لما تنسوا أكياس الدم الملوثة... والمبيدات المسرطنة.... ومياة الصرف الصحى اللى بيتسقى بيها أكلنا  
عيب لنا تنسوا "جيل المستقبل" و"مفجر ثورة التطوير"  ... و"من أجلك أنت" اللى كان بيتصرف عليهم ملايين من دمنا
عيب لما تنسوا ان مصر كانت هتبقى "ملكية"
عيب لنا تنسوا أراضى مصر اللى اتنهبت واتباعت لشلة الحرامية بتراب الفلوس وبابا مبارك عارف ومطنش
عيب لما تنسوا شركات القطاع العام اللى اتباعت بربع تمنها واتشرد كل العاملين فيها
عيب لما تنسوا أنبوبة البوتاجاز اللى ب 35 جنيه فى الوقت اللى بيتصدر فيه الغاز لاسرائيل ببلاش
عيب لما تنسوا صديق اسرائيل الأول وكلب أمريكا ودلدول أوروبا "مبارك"
عيب لما تنسوا شهداء التحرير وتنسوا قلوب أمهاتهم اللى والعة نار

كفاية كدا ... ولا أقول كمان .... اتحرق دمكوا ولا لسة ... أنا عايزاه يتحرق عشان تحسوا

عايزة كل واحد يغمض عينه لمدة 5 دقائق بس ويشوف مصر تحت قيادة علاء مبارك وسوزان ثابت كان هيبقى شكلها ايه

لو مبارك وولاده ومراته وبقية شلة الحرامية متحاسبوش دى هتبقى زريعة لكل واحد بعد كدة يعمل اللى هوه عايزة وبعدين يدفعلنا "فدية" ويحط فى بؤنا جزمة قديمة ... آه مش بيدفع ... أى رئيس أو وزير هييجى من بعدهم هيعمل اللى هوه عايزه وبعدين يدفع ويغنى أغنية "الضربة الجوية وخدماته سلما وحربا" ... وأنا أبوكوا وارحموا عزيز قوم ذل .. وفتشنى فتش ..... والاسطوانة الخايبة اللى بتتغنى ... وتموت مصر تانى

لأ... مش هيحصل ... والفلوس هتيجى .. وهيتحاسب زى أى مواطن ... وياريت المجلس العسكرى يلغى شوية من الجيش اللى حطه يحرسه ده ... لأنه مواطن عادى .... وينقله وبسرعة لسجن طره لأنه معندوش حاجة أساسا  وصحته أحسن مننا ..وبلاش سلبطة ... وأى دولة هتتدخل فى شئوننا الداخلية هيكون ردنا الشفوى والعملى قوى.. 

وبلاش وحياة أبوكم نغمة قالى تعالى وقالى الرسول دى .. بلاش السكة دى ... السرقة والنهب والقتل والتجويع ميرضيش ربنا ونهى عنهم فى كل كتبه السماوية .. ف بلاش سكة غسيل المخ دى معدتش بتجيب نتيجة معانا

هناك 15 تعليقًا:

Kontiki يقول...

و الله يا شيمو من عنوان البوست هى دى الاخلاق اللى بفكر فيها عزيز قوم ذل يتحاسب اة يتهان لأ خدمنا برضة فى يوم ونحط احتمال ولو 1% انه كان مغيب بسبب اللى حوالية يالا ربنا مع مصر وشكرا لاخلاقك العالية الغير انتقامية كما ارى الجميع الان للاسف.

Humman being يقول...

kontiki..
شكلى هخيب ظنك الحسن الطيب ده فيا وأقولك ان العنوان اللى أنا كاتباه ده "تريقة" على حسنى مبارك وعلى كل حد بيقول ده راجل مسن وكبير وحرام سامحوه بقة

أنا ليا وجهة نظر شخصية وممكن تكون غلط
حسنى مبارك حارب .. ماشى ... ما هوه كان موظف بيقوم بعمله وقتها اللى بياخد عليه مرتب
قام بضربة جوية .. ماشى... بس يعنى مكنش لوحده ومقمش بالليلة كلها وضحى بنفسه ...
وبعدين فى ناس حاربت واستشهدت وقامت ببطولات منعرفش عنها حاجة ... ومجرد التكريم حتى مش بياخدوه لأن ببساطة محدش يعرف عنهم حاجة .. دول جنود مجهولين

بس حسنى مبارك احنا كافأناه أكبر مكافأة ألا وهى حكم بلد كبير زى مصر

أى حاجة عملها ... عملها عشان هيه دى وظيفته ... مش بيمن علينا يعنى ...

نسيبه ...لأ ... نرحمه .. لأ ... عارفة ليه ... عشان هوه مرحمناش ولا حس بأى حد بيعانى من شعبه

مقولة انه كان ميعرفش واللى حواليه هما اللى كانوا وحشين ... دى فى حد ذاتها جريمة لازم يتحاسب عليها ... لأنه كان بيحكم بلد مش "كفر" فى بلدهم
وبعدين فى وجود الفضائيات والصحف والانترنت مفيش حد مبيعرفش حاجة الا اذا كان هوه اللى عايز ميعرفش

ف احنا مش هنرحمه لا هوه ولا العائلة الكريمة

مش عارفة تقدى ايه بموضوع يتهان؟... ده هوه قاعد فى مستشفى 5 نجوم واللى نصحه بكدة المحامى بتاعه فريد الديب ..قاله مثل انك عيان عشان متدخلش السجن ....

شريرة أنا صح؟

Ms Venus يقول...

معاكى يا شيمو انه عمل كل المصايب السوداء دى كلها ويمكن اكتر منها كمان ومظهرش لسه لينا وجايز نكتشفه بعدين

ولكن تعالى نفكر ايه اهم دلوقتى

تعرفى لو اخدوه وشنقوه فى ميدان عام

مش هيرجع لاى مظلوم من المظاليم الكتيررررررررررر اللى اتظلموا ولو واحد من المليون من حقه

ولا اللى مات هيرجع

وولا اللى جاله مرض هيتشفى

رأى الخاص

اننا نبص لبكرة ونلحق مصر

انتى شايفة اللى بيحصل دلوقتى وشايفة الصراعات الرهيبة اللى بتحصل

غير حال الناس والشارع

مبقاش فى كبير واللى يطق فى عقله حاجة بيعملها

وكله ماشى يقول انا قدرت اخلع الرئيس يبقى هقدر اعمل اى حاجة

وابسط مثال مشكلة قنا

يبقى نبص لبكرة ونلحق مستقبلنا

بدل ما نفضل مشعلقين عينينا على امبارح

وماشين واحنا بنبص ورانا

لاننا هنقع


وردة لعيونك يا احلى شيمووو

سَارةٌ يقول...

مِش عـآرفـه رَبنا قَد إيه غضبان عليه .. إنه يحصل فِيه كِده !!

إن رَئيسْ جُمهوريه يتهان بالشكل ده..
مَحصلتش !!
..
مش عارفه الناس دي كلها كانت فين من ربنا وهيا بتسرق وتعبيْ ..

التعـآطفْ يتركن على جمبْ ..
لإنه مش هيوقف البلد من تاني على رجليها !!
:)
..
عجبني البُوست الشديد جداً ده .. :D:D

IMSA يقول...

شيماء :
بخصوص العفو عن حسني لكبر سنه ويعز من يشاء ويذل من يشاء كلام جميل وقول الله ورسوله ايضا يجب الاقتداء به ولذلك يجب ان نقتدي بـ " من لا يرحم لا يُرحَم "
من لم يرحم شعبه لا يستحق الرحمة من شعبه ، بخصوص ان التسوية وتركه وهذا الكلام اللذيذ الظريف لكبر سنه ، لا يحتسب لان من سيخطئ مستقبلا سيقول عمري وسني وضعفي وشيخوختي ، وهذا الكلام اللذيذ الخطأ خطأ أيا كان من ارتكبه وايا كان عمره .
الرحمة والرأفة فيمن يستحق وليس من لا يستحق لا ادعو الى اهانته واذلاله ولكن اتمنى ان يلاقي محاكمة عادلة فإن لم تكن عدالة الارض كافية فعدالة السماء اقوى واعتقد ان ما حدث له ايذانا بعدالة السماء التي اتمنى ان تتحقق على الارض .
//
تحياتي لكِ واتمنى قبول ردي وتعليقي

Tears يقول...

فى رايي اللى بيقولوا كده مقسمين الى فرق...فريق مدفوع الاجر...فريق مريض بمتلازمة ستكهولم...فريق لا يعرف حقيقة ما فعله مبارك...فريق عديم الدين و ما يعرفش ان الله اهلك قوم كانوا اذا سرق فيهم الفقير اقاموا عليه الحد و سرق فيهم الشريف (الغنى) تركوه...لا يعرفوا انه لا يجوز لاحد ان يشفع فى حد من حدود الله و لا يعرف ان الجزاء من جنس العمل و لا يدرك ان معنى ان لكم فى القصاص حياة يا أولى الالباب

Humman being يقول...

ms venus....
أنا بحترم رأيك جدا
بس تعالى نفكر مع بعض.. احنا داخلين على مرحلة مهمة جدا لازم تبتدى صح .. معاكى ان كل اللى بيطلع فى دماغه حاجة دلوقتى بيعملها وبيقولها وده فى حد ذاته كارثة
بس لو حسنى مبارك وحاشيته متحسبوش صح يبقى مفيش حد هيتحاسب بعد كدة وكل اللى نفسه فى حاجة هيعملها ويخش تانى من باب "أبوكم.. وراجل كبير"

أهالى الشهداء جواهم نار ..مش بس شهداء التحرير .. لأ شهداء العبارة والكنايس وغيره وغيره

ميرسى على الوردة الجميلة ومنورانى دايما يا رقيقة

Humman being يقول...

حبابة بندول...
أيوة ... أنا عايزة نبقى جامدين كدة
ده حق بلد فيها 85 مليون فرد
عايزين نبتدى صح عشان نكمل صح ...
ياريته كان ساب لنا حاجة واحدة تخلينا نعفيه من الحساب ...
شرفتينى

Humman being يقول...

IMSA...
"الرحمة والرأفة فيمن يستحق وليس من لا يستحق لا ادعو الى اهانته واذلاله ولكن اتمنى ان يلاقي محاكمة عادلة فإن لم تكن عدالة الارض كافية فعدالة السماء اقوى واعتقد ان ما حدث له ايذانا بعدالة السماء التي اتمنى ان تتحقق على الارض ."

أهو ده الكلام ... يمهل ولا يهمل
شكرا لمروك الكريم

Humman being يقول...

TEARS....
الكارثة دلوقتى يا تيرز ان فى ناس حاطة لنا اختيارين
1- نحاسبه .. بس مفيش فلوس هترجع
2- منحاسبوش ... ونسترد الفلوس

حاجة غريبة جدا ... يعنى ايه؟ .. هوه مينفعش يتحاسب وناخد فلوسنا كمان ولا لازم نختار حاجة واحدة

اللى مضايقنى تدخل معظم الدول العربية فى شئوننا ..ومساومتهم على فلوسنا اللى هوه مهربها عندهم فى الوقت اللى رئيس الوزرتء بتاعنا بيقول "أمن الخليج خط أحمر" ... مفيش فايدة فيهم هيعيشزا ويموتوا كلاب..
هما برده خايفين لأن انهيار مبارك معناه انهيار ديكتاتوريتهم هما كمان

Ms Venus يقول...

رأئى مش معناه انه مش يتحاكم علشان محدش يفهمنى غلط

انا بس بقول محاكمته مش هى الاهم دلوقتى

لان مصر فى اصعب واضعف احوالها


يتحاكم طبعا لكن مش الاقى كل الجرائد وكل الاخبار اخباره هو واولاده فى السجن

فى مشاكل اهم واخطر من ان يتكتب جمال مكتئب ومبارك رافض الاكل


صح يا شيمو ولا انا غلطانة

ابراهيم رزق يقول...

متفق معكى تماما

يعفى عنه اذا كان قانون العقوبات يوجد به هذه المادة
يعفى من جرائم القتل و السرقة و النهب كل من
تجاوز الثمانون
صاحب اول طلعة جوية
كان رئيس الجمهورية
يعفى عنه اما اذا كان غير موجود فالحق احق ان يتبع
خالص تحياتى

غير معرف يقول...

كل ماكتبتية افتراء علي مبارك وبامكاني ان افند ماكتبتية لكن اهم حاجة ينبغي ان تعرفيها الفوضي الخلاقة تلك هي الخطة الامريكية لتحويل البلاد العربية الي فوضي وبالتالي لم تكن هناك ثورة ولايحزنون لا دي خطة والدليل ان كل الزعماء العرب هيتشالوا الا مش هتشيلوة المظاهرات هتشيلة القوة الامريكية وعايزة تتاكدي صاحبي اي واحدة من بتوع 6 ابريل وهتعرفي كل حاجة والدولارات الا خدوها وياريت تفهمي

Humman being يقول...

ابراهيم رزق...
"الحق أحق أن يتبع"... الله ينور عليك
شكرا لمرورك ..شرفتنى

Humman being يقول...

غير معرف..
وداخل غير معرف ليه ؟؟ .. مبتقولش هويتك ليه؟
لأ أنا حابة أوى انك تفند كلامى ... متمرش على كلامى مرور الكرام كدة ... سيبك من 6 ابريل و10 مايو والأجندة الخارجية والكلام ده... أنا عايزاك تفندلى افتراءاتى بند بند وافتراء افتراء ...
فى انتظارك