اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 29 مايو، 2011

فضفضة ...

اقصاء وزير الخارجية الى مقبرة "جامعة الدول العربية" ... هو اصرار على التقوقع وافساح الطريق لقيادة عربية أخرى متسلقة وفاشلة مثل السعودية وقطر
************
ازاى ننتظر من شرطة لم تحقق فى مقتل واحد منها وهو الشهيد "محمد البطران" ولم تكرمه شهيدا لا هو ولا أسرته وتعتم تماما على كل أدلة مقتله...ازاى ننتظر منها التحقيق بحيادية وعدل فى قتل المتظاهرين؟؟؟؟؟!!!
**********
بعد الثورة عملنا توكيل للمجلس العسكرى فى تسيير أمور البلاد ... يعنى هما محاميين بالنيابة عننا .... ازاى محامى يتخذ قرارت ويلغى قضايا ويحط قوانين من غير ما يرجع لموكله؟؟؟؟؟؟!!!! عجبى
**********
رسالة من الصحافة والاعلام الى الرئيس المخلوع مبارك :"بعيد عنك حياتى عذاب ..متبعدنيش بعيد عنك" ... متقدروش ومتعرفوش تعيشوا وتشتغلوا باحترام ... تأثير مبارك فيكم أكبر بكتييييير من تأثير أى ثورة حرية ...
*************
أثبتتت مليونية الغضب أن من يسموا أنفسهم اخوان ما هم الا "حرابى- جمع حرباء... تعيش على اصطياد المواقف القذرة..وتتلون حسب الموقف الذى تعيش فيه .. وأثبتت أيضا أن الخطأ الوحيد للثورة هو اعطاء الفرصة لأمثالهم للخروج من الشقوق
*************
النائب العام راجل صاحب مزاج .... بيحقق مع ناس ناس .... وبيسجن ناس ناس ... على رأى خالد الذكر عدوية .... حبة فووق وحبة تحت...
************
صبحى صالح "عضو جماعة الأخوان المسلمين" : الأخوات الفاضلات من الضرورى أن يتزوجن من اخوان فضلاء ...... والعلمانيون كفرة..... واليبراليون كفرة ... وهما بس اللى مسلمين مؤدبين متربيين ولاد ناس... 
أخيرا اكتشفت حسنة واحدة ل مبارك وهى جعل هؤلاء "جماعة محظورة" 
*************
أرى ضرورة ذهاب المجلس العسكرى بالكامل لطبيب "أنف وأذن وحنجرة" لأن واضح ان محدش فيهم بيسمع خالص .. وسمعنا يا بنى الست أم كلثوم .... للصبر حدود
**************
مصدر موثوق بيقول انه يتم التعظيم لحبيب العادلى داخل السجن من قبل كل قيادات السجن ..... يحيا حبيب العادلى ... يحيا حبيب العادلى .... وفى ستين داهية الشهداء ...  قيادات الشرطة  لحبيب العادلى : "أنساك يا سلام ..أنساك ده كلام"
**************
الشرطة المصرية ..قمر له ليالى .. بيطلع يسحل ويضرب المتظاهرين أدام السفارة الاسرائيلية ... ويختفى من كل شوارع مصر عند تواجد البلطجية .... يمكن مكسوف؟؟!!! أنا بسأل أمى دلوقتى ... أسقيه ينوبنا ثواب ولا أرد الباب ..ياما ...أما 
**************
يقول الدكتور عمار حسن ... عصام شرف وزير من "التحرير"... ووزراء حكومته من "مصطفى كامل" .... انت راجل محترم ....
*************
تتم محاكمة المدنيين محاكمة عسكرية والظباط اللى قتلوا المتظاهرين محاكمة مدنية .... "يمهل ولا يهمل"
*************
يتم اختيار وتحديد القاضى قبل المحاكمة وقبل اختيار الدائرة اللى هيتحاكم أمامها الوزراء والحرامية اللى سرقوا البلد ....  برافو...... هوه ده التطور الطبيعى للحاجة الساقعة
************
أخيرا نداء من "الشعب المصرى" الى الشرطة المصرية على لسان شيرين عبد الوهاب... انت آخر واحد فى الدنيا دى ممكن أبكى عليه"... زى أى خاين والخيانة باينة جوا عينيه"

هناك 11 تعليقًا:

IMSA يقول...

شيماء :
اقل ما يمكن ان يقال لكِ هو
مــــــــــبـــدعــــة ..
وتحليلك رائع
//
تحياتي وتقبلي مروري

Tears يقول...

احنا ح نضحك على بعض و لا مكسوفين نقول ايوه عندنا اربعين مليون أمى و بيتم التدليس عليهم باسم الدين و ايوه عندنا اكتر من نصف الشعب تحت خط الفقر و بيتم استغلال ده و رشوتهم و ايوه اللى عمل الثورة مش اكتر من 18 مليون و ايوه العسكر اللى وقفوا يتفرجوا واحنا بنقتل تحالفوا مع التيار الدينى اللى جزء منه رفض المشاركة فى بداية الثورة و جزء منه كان بيحرم الخروج على الحاكم و ايوه مصر لو فضلنا ماشيين فى الطريق ده داخلة على مصير ايران و طالبان او السعودية فى افضل الاحوال و يبقى رجعنا للعصور ما قبل الوسطى

غير معرف يقول...

اتفق تماما مع كلام تيرز و اضيف ان معظم الشعب المصرى متحامل على الثورة او ضدها لانهم رافضيين فكرة التغيير و الاصلاح و الانتخابات عندهم موسم بيكسبوا فيه قرشين او يا كلوا للحمه عشان كده الاخوان استفادوا من التجارب دى بانهم وزعوا زيت و سكر على البسطاء عشان يقولوا نعم فى الاستفتاء

ابراهيم رزق يقول...

ابصم و امضى

ابراهيم رزق

Ms Venus يقول...

فى الجون يا شيماء

Tears يقول...

كل سنة و انتى طيبة :)

Ms Venus يقول...

قافلة التعليقات يا شيماء

كل دى غيبة

على العموم كويس انك طمنتينا عليكى

كل سنة وانتى طيبة

غير معرف يقول...

خروج الاخوان من المعتقلات و ليس الشقوق ليس على هوى البعض امثال الحرمية و الفاسدين و الشرميط و العاهرات

غير معرف يقول...

نجاح الاخوان فى نقابة الاطباء و المعلمين و قريبا المهندسين اكبر رد على اتهام الشعب بالجهل و التخلف بسب اختيارهم الاخوان ولا يكونو وزعو على الاطباء و المعلمين كيلو زيت و كيس سكر الا انكم انتم الجهلاء و لكنكم لا تشعرون

غير معرف يقول...

فى المانيا قام متطرف بقتل مروة الشربينى هل يعنى ذلك ان كل الشعب الالمانى متطرف بالطبع لا ان اتى سائح فى مصر و صادف سائق نصاب اخذ منة ضعف الاجرة هل يعنى ذلك ان المصرين كلهم نصابين ان قابلك شخص اخوانى و ترك تاثيرا سئ فى حياتك الا يمثل ذلك الشخص نفسة فقط لما كره الجميع اما بالنسبة لكلام صبحى صالح فهو لا يكفر احد و لكن المثل بيقول الطيور على اشكالها تقع يعنى مثلا الاخت الاخوانية لو حبت تخرج فى العيد الماضى عيد الفطر مع خطيبها الى اين سوف تقترح الذهاب قد تكون ندوة دينية او زيارة عائلية و لكن الاخت العلمانية او اليبرالية اكيد راح تطلب الذهاب الى السينما لمشاهدة مونيا اللى مكسرة الدنيا وديع او شارع الهرم ربنا يهدى الجميع اخوانى و علمانى

Shaimaa يقول...

غير معرف
وداخل عندى تحت مسمى "غير معرف ليه" ولا الزبالة أمثالك ملهمش اسم

متبقاش تدخل عند العلمانيين تانى وابقى لنفسك بالهداية مش مستنيين دعوة من أمثالك