اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 11 يناير، 2012

محتاجة رأى محايد

محتاجة أسمع رأى محايد فى موضوع كدة.. رأى بعيد عن أمى وأختى.. وبعيد عن دماغى اللى أحيانا بتفكر غلط ... وبعيد عن "التردد" اللى مش عارفة أتخلص منه..
واحد زميلى فى الشغل اتقدملى مرتين ورفضته .... نص زمايلنا فى الشغل بيقولولى ده ولد كويس وابن حلال والنص التانى بيقولى لأ مينفعكيش....

هتكلم بصراحة عشان أسمع رأى مباشر ومش هخبى حاجة ...
مميزاته الظاهرة اللى الكل مجمع عليها انه مؤدب جدا ..محترم.... جامعى زييى.... أخلاقة كويسة ... وبيصلى "ولو ان دى مش مقياس عندى لأن فى ناس كتير علامة الصلاة هتفلق دماغهم وهما شوية زبالة".... لا مرتشى ولا نصاب زى بقية العالم الزبالة اللى اتقدمولى قبل كدة... ومابين قوسين "بيحبنى" زى ما زمايلنا بيقولوا... شكله كويس ومظهره كويس ... وفى حاله تماما مش بتاع مشاكل.

العيوب بقه .... منطوى جدا جدا جدا بيكلم كلمة كل 3 ساعات ومش اجتماعى اطلاقا لدرجة انه مسار تريقة فى الشركة أحيانا.. ... غير طموح اطلاقا ... عايز يفضل كدة محلك سر وبارك الله فيما رزق ومادمنا بناكل وبنشرب خلاص(بروطة يعنى) ... مستواه الاجتماعى أقل منى ... مستواه المادى أقل منى ... أنا بتكلم بصراحة ووضوح عشان أسمع رأيكم بوضوح.. كمان فى صفة بتخنقنى بصراحة اللى هيه الحساسية زيادة عن اللزوم وعلطول مقموص وأنا مبحبش الناس اللى محبكاها كدة... وكئيب كدة شوية

نيجى ليا أنا بقى ... بتكلم 200 كلمة فى الدقيقة.... بصراحة وبأمانة مبحبوش زى ما هو بيحبنى وقولتله الكلام ده لما اتقدملى.... عندى طموح هيقسم السماء اللى فوق دى نصين ... عايزة أبقى وأكون وأغير وأوصل و..و..و.. بحب الراجل اللى هوه شعلة نشاط ... عصبية أنا وجنونة ومتقلبة وكل ساعة بحال..... وعندى صفة مهببة مش لاقيالها علاج ألا وهى "التردد"...
منيش ملهوفة على الجواز اطلاقا ومش كلام برسم نفسى يعنى ..لأ .... مش فى دماغى ولا بفكر فى سن ولا كلام الناس اللى مش بتريح نفسها وتعليقاتهم ... لأ.... بالعكس تماما حاسة اننا مرتاحة جدا كدة الحد الوحيد اللى مش مستريح هيه "أمى" وأختى ..حاسة انهم هيجوزونى أول قطة معدية فى الشارع وشايليين الهم بسببى مش قادرة أفهم ليه ... ومحدش يقولى اعملى صلاة استخارة لأنى عملتها وشوفته فى الحلم بيتشاكل معايا شاكلة لرب السماء وبنقطع بعض ... بس فى ملحوظة مهمة .. أنا كل اللى بيحصلى طول اليوم بحلم بيه كله كله بالليل وبالتفصيل ومشاعرى بتحكم أحلامى .... وأنا طبيعى رفضاه مرتين فلازم أحلم كدة.... ف ده مش مقياس.

المهم يعنى عايزة أسمع رأى محايد بيفهم وبيفكر صح يقولى الصح ايه؟ وياريت لو فى علاج للتردد يبقى كتر خيركم

هناك 10 تعليقات:

mohamed amer يقول...

ممكن اقول رأيي مع اني مش فت اوي ومش بفهم ولا بفكر صح علي طول يعني
هيا مشكلتك التردد ... ودي ممكن توقعك في مشاكل كتير
هوا بصراحه طالما اتقدملك مرتين يبقي بيحبك ودي حاجه كويسه
بس كلامك عنه بيقول كدا ان انتي اصلا مش عايزاه وقلبك مقفول من ناحيته
بس ماتحكميش عليه من خلال تصرفاته في الشغل , ممكن تسألي عليه مع اهله عامل ازاي ومع اصحابه وحاولي تعرفيه اكتر
وبعد كدا متهيالي قرارك حيبقي سهل
اما التردد ده محتاج علاج نفسي
ممكن اجبلك ارقام دكاتره لو عايزة؟

Baskouta يقول...

شيماء حبيبتي

النص الاولاني اللي هو المميزات
عبارة عن الشكل الظاهري لاي عريس كويس

اما النص التاني فهي دي مجموعة الطباع اللي هتكملي معاها حياتك

فبالتالي يبقى النص التاني هو الاهم

وبما ان الجزء ده المتعلق بالطباع ده من الواضح جدا انه طباعه معظمها وان مكانتش كلها مش عجباكي

يبقى انتي عندك النتيجة واضحة
وبالتالي ممكن اقولك لا مينفعش تكملي مع انسان فيه طباع كلها عكس طباعك

لكن في حاجة واحدة ممكن تخليني اقولك حاولي مرة كمان تقربي منه

الحاجة دي هي حبه ليكي وانه شاريكي رغم رفضك ليه

دي حاجات تستاهل انك تدي فرصة انك تقربي اكتر يمكن تلاقي طباع حلوة توازن الطباع اللي انتوا مختلفين فيها

تستاهل انك تديله فرصة

اتمنى يكون ردي او احساسي واصلك

ربنا حبيبتي يكتبلك كل خير ويهديكي للي فيه خير ليكي

هدعيلك حبيبتي زي ما بدعي لنفسي

وصف الاحساس يقول...
أزال المؤلف هذا التعليق.
وصف الاحساس يقول...

الحياه الزوجيه مش حاجه ممكن ترسميها علي مزاجك
جايز تحطي مقدمات احتمالات جايز تفكري تبقي ازاي احسن في كل الاحوال
بس ما تنفعش ابدا تستمر الا اما تكوني انتي بتحبيه زي ما هو بيحبك بالظبط او اكتر
ارسمي المثلث من فوق
حياه زوجيه بينك وبينه بس
انتي وهو والبيت
انتي وهو والبيت والشغل
انتي وهو والبيت والشغل واهله واهلك
انتي وهو والبيت والشغل واهله واهلك والناس
انتي وهو والبيت واهلك واهله والشغل والناس والاولاد
اول صف محتاج حب متبادل
تاني صف محتاج وضع مادي يكون هو احسن منك لان الراجل هو ال بيصرف علي البيت ولو حصل العكس بيسقط من عين مراته وحياتها معاه بتبقي جحيم
تالت صف ضيفي علي ال فات انك بتشتغلي وهو كمان انتي بتوصلي لفين وهو لفين وده هيترتب عليه ايه احترام مكانه تقدير
رابع صف اهلك هيتعامل معاهم ازاي وهما هيتعاملو معاه ازاي ونفس الحكايه معاكي
خامس صف الناس هتبصلكو ازاي انتي وهو مع بعض
فاضل الاولاد هتزرعي فيهم ايه وهو هياثر فيهم ازاي
بصي لاول المثلث ال هي اهم نقطه في الموضوع
مش قادره اقولك اديله فرصه لان ده ممكن ما تقدريش تطلعي منه لان اهلك عاي7ينك تتجوزي باي طريقه
بس نصيحه بجد اوعي تيجي علي نفسك في حاجه تاثر علي نفسيتك في المستقبل
القرار قرارك لوحدك
خدي قرارك بنفسك
من غير اي تاثير من حد
ربنا يوفقك

ياره عبدالله يقول...

السلام عليكم ورحمه الله وبركاته
موضوعك محير جدا
وانا مش هقدر افيدك فيه خالص
بس معرفش رديت عليكى ليه
بس انا شايفا ان موضوع زى ده مينفعش تخدى فى راي غير رايك انتى وبس
وزى مقلتى انك مش مستعجله ومش ملهوفه على الجواز
فالنصحيه الى اقدر اديهالك انك تفكرى
وتفكرى كويس جدا قبل متاخدى اى قرار
ومتخديش حد لمجرد انه بيحبك وبس
الحب مش بيدوم ولو انتى مش حبا او حاسه انه مش هيكون راجل وتحسى برجولته معاكى ونقطة احترامك ليه انا شايفاها انها اهم حاجه
لازم تكون بتحترمى وتحسى بالامان معاه عشان مستقبلكم
ربنا معاكى وتقدرى تحلى مشكلتك فى اقرب فرصة ان شاء الله
وربنا يقدملك الى فيه الخير

قهوة بالفانيليا - شيماء علي يقول...

فجوة في طريقةالتفكير .. ( الطموح و عدمه )
فجوة اجتماعية و مادية ..
قبول مش موجود ..
يبقى خلاص .. انتهى يا شيماء .

sabry abo-omar يقول...

طبعا ماحدش بياخد رأى حد فى موضوع تقبل انسان أخر.. لكن هاجيبلك من الآخر على كلامك مش ينفع تكون علاقة ناجحة بينكم... الأهم من كدة مش تندمى على أى قرار تاخديه ومش تبصى وراكى ولو استقريتى انه لا.... يبقى مش تفكرى تانى وخلصت بقى...

Shaimaa يقول...

Mohamed Amer
Baskouta
وصف الاحساس
ياره عبدالله
قهوة بالفانيليا- شيماء على
sabry abo omar
كل الناس المحترمة ... اللى تعبت نفسها وأخدت من وقتها ولو دقائق علشان تساعدنى وتقول رأيها ..بشكركوا كلكوا جدا جدا جدا

كل حد فيكم قال رأى بجد فى وجهة نظر صح وتستحق التفكير
أنا هفكر صح وهاخد وقتى مش هستعجل مهما زاد زن ماما وأختى ... لأنها حياة ومستقبل مش فستان بشتريه وشوية وأغيره ... لأ دى حياة أبدية

شكرا لمساعدتكم جميعا

Kontiki يقول...

check ur mail

Shaimaa يقول...

Kontiki..
thankssssss for everything my dear friend