اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 22 فبراير 2012

مجلس الشعب العرة

أيوة مجلس شعب "عـــرة" بكسر العين ... ايه ده؟ ايه التخلف العقلى اللى بيعملوه السادة النواب ده ... بقالهم 3 أيام بيناقشوا القضية المهمة الحساسة اللى هتأثر على مستقبل مصر والأجيال القادمة ألا وهى "اعتذار النائب زياد العليمى للشيخ حسان والمشير" ... !!!!!!!!!!!!!!!! ومظاهرات مؤيدة ..ومظاهرات معارضة ... وفاكسات رايحة وتلغرافات جاية ...

ومش ده الموضوع الحساس الوحيد ...لأ ..ده فى مواضيع تانية حساسة جدا ومش محتاجة طلبات احاطة وبس لأ دى محتاجة لجنة من بتوع تقصى الحقائق الكتير جدااااااا دى  ... زى مثلا المسمار اللى كان فى كرسى السيد النائب ... والسيد النائب اللى كان ريقه ناشف والكتاتنى اداله واحدة "هولز" ... أما الآذان بقة ده قضية تانية ده اللى هيقيس مدى تطبيقهم للشريعة ومقدار التقوى عند كل نائب .

منتهى الغباء والتخلف .. للأسف المجلس ده لا يمت للثورة ب صلة .. ده مجلس مسلوق اتعمل فى شهر والاخوان وبقية الاحزاب التانية لموا أى بشر ...."أى بشر" لا ليهم فى "الثور ولا فى الطحين" وقالولهم تعالوا هنعملكوا نواب ...حتى منظرهم وشكلهم يغم بلد ...

- مصطفى بكرى قال على البرادعى خاين وعميل تحت قبة البرلمان ومتحولش للتحقيق .. وزياد العليمى ده "اللى أنا معرفوش أساسا والله" انتقد الشيخ حسان والمشير بره البرلمان كمواطن عادى واتحول للتحقيق .. لأ والموضوع كبيير ... وكل واحد بيقول رأيه ... والشيخ حسان بيقول "عفوت عن العليمى" ..الحمد لله انه عفا ... بس أنا رأيى بقه تجلدوه فى وسط المجلس أو "الرجم حتى الموت" ...

-من امتى يا كتاتنى بيتم التحويل للتحقيق بناءا على كم الفاكسات والتلغرافات ... هتمشى المجلس بالتلغرافات ولا بالقانون
*خلاص حلييتوا الأزمة الاقتصادية وجيبتوا فلوسنا اللى اتسرقت واتهربت ومش راجعة ؟؟!!!!
*عرفتوا من ورا مجزرة بورسعيد ... وليه تم تشريح "جثتين اتنين بس" والباقى تم دفنهم مباشرة؟؟؟ .
*شوفتوا حل للاحتقان الطائفى ومين اللى واقف وراه؟
*مسألتوش مين ورا قرار صرف 4 مليون جنيه على مستشفى طره عشان الرئيس "المحشى" يتنقل هناك ...؟ أيوة الرئيس المحشى كل اللى بيتصرف عليه ده وتقولولى  "مخلوع" .... لأ "محشى" ؟
*شوفتوا حل للمحاكمة "الكوميدية" الهزلية اللى بقالها كام شهر شغالة وفى الآخر هنطلع احنا اللى قتلنا المتظاهرين بالنبلة وهو كان بيحوش عنهم وعامل ساتر قدامهم هوه وولاده والعصابة اللى معاه!!!!!!
*مقدمتوش طلب احاطة لاعادة المحاكمة على الكوارث التانية اللى عملها ليه ؟؟؟؟ ... هوه قتل المتظاهرين وبس؟؟؟؟ معملش حاجة تانية ؟؟؟ .. ومش بيتحاكم محاكمة عسكرية ليه؟؟؟؟!!!!
*المهندس الأساسى لكل كوارث مصر هو "صفوت الشريف وزكريا عزمى" ..محدش سأل بيتحاكموا على ايه؟ على الفيلل والقصور وبس ؟ مصائب صفوت الشريف عمرها 45 سنة مش 30 بس ... هيتساب كدة برده؟

تكالب "الاخوان والسلفيين" على المناصب هما وأمثالهم خلاهم يدفعوا بأشخاص أقصى منصب كانوا ممكن يتقلدوه هو عمال نظافة وليسوا نواب برلمان ..... هذا المجلس لا يمثل الشعب مطلقا  .. ولا يمثل الثورة أيضا .. هو يمثل نفسه لنفسه ومع نفسه  ... ف رجاءا تغيير اسمه الى "مجلس العاهات" أو "مجلس نفسه".

الواضح أن قدر المصريين الأزلى هو الصبر على الابتلاء

هناك تعليقان (2):

Baskouta يقول...

عارفة
انتي وحشتيني اوي يا شيماء
لا بجد مفتقداكي مش عارفة ازاي

وعارفة كمان انا بطلت اتفرج على المسرحيات دي من زمان
كل حاجة بقت ماسخة واوقات بيبقى افضل اننا نبقى مغيبين شوية
ومش عارفين

انا مبقيتش عاملة نفسي مش عارفة
لا بقيت مش عارفة اصلا
علشان مش عاوزة اعرف او اتعب

سيبك انتي

انتي وحشاني كدة ليه؟
مع انك في صلاتي ودعواتي دايما

خللي بالك منك
وماتغيبيش

Humman being يقول...

Baskouta...
انتى اللى وحشانى بجد يا حبيبة قلبى ووحشانى كمية التسامح والتصالح والحب اللى جواكى واللى معدتش موجودة

عارفة والله يا بسكوتة أنا بقيت بعمل كدة زيك كتير ..بعمل مش شايفة ولا سامعة عشان كدة بغييب شويتين يمكن ننسى أو نتناسى اللى احنا فيه

أيوة متنسنيش فى صلاتك يا حبيبتى الله يخليكى

ربنا يريح قلبك ويفرج كربك وينولك أكتر أكتر أكتر من اللى نفسك فيه