اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

السبت، 26 مايو 2012

شعب غبى

أول مرة أنزل من بيتى النهاردة وأنا بتمنى من جوة قلبى ان رجليا دى تكون ماشية على أرض تانية غير مصر وناس تانين غير المصريين دول .. حتى لو كانت البلد التانية دى اسرائيل .... والله اسرائيل

محستش بحزن قطعنى من جوايا زى النهاردة ... متكلمتش مع حد فى حاجة لأنى حاسة بوجع غريب ملوش حل

ليه عملنا فى نفسنا كدة ... ليه نسبة اللى نزلوا يصوتوا لم تتعدى النصف ... هى البلد اللى بنختار رئيسها دى مش بلدنا ولا اسرائيل ... اللى نزلوا 50% بس ليه ...؟؟؟؟!!! المصريين فى الخارج عددهم يتخطى 8000000 مواطن اللى صوت بس 365000 ليه؟؟؟!!! قعدتوا فى البيت تتفرجوا من بعيد ليه؟ .. طب عملتوا ثورة ليه من أساسه لما انتوا معندكوش استعداد لأى تغيير؟

ايه معنى الثورة اللى قعدتوا تغنلوها لمدة سنة ونص؟؟ .. عملتوا بيها وليها ايه؟؟

ليه نزل ناس زى أبو العز الحريرى وحسام عيسى وخالد على وسليم العوا والبسطويسى اللى لا يقدروا يعملوا حملات انتخابية ولا يصرفوا عليها ؟؟ كان هدفهم ايه ؟ ياخدوا حتة من التورتاية هما كمان ؟ طب لما الانتخابات قربت ولقوا ان مفيش أمل اطلاقا لنجاحهم متنزلوش ل حمدين صباحى مثلا ليه ولا حتى عمرو موسى على أسوأ الفروض ليه ... كان هدفهم تفتيت الأصوات والقضاء على مصر نهائيا ... ولا ترك الجمل بما حمل لل كلاب الاخوان اللى هيحولوا البلد لخلافة وملكية تسلم من شخص للتانى جوا الجماعة ويفضلوا طول عمرهم فى الحكم؟

ليه خرجنا حسنى مبارك بقة ؟ ما كان كويس وشغال ومراضى الكل ؟ لما انتوا معندكوش استعداد لا لمشاركة ولا لديمقراطية ولا حرية ما كنتوا سيبتوا البلد زى ما كانت وكان حرام اللى خسرناه من أرواح وفلوس وعيون ورجلين وايدين بشر غلابة ملهمش ذنب غير انهم كانوا عايزين يعملوكوا بنى ءادمين وبس لا أكتر ولا أقل ..

الراجل اللى مضايقنى جدا جدا جدا ونفسى أتف على وشه هوه "البرادعى" لأنه أجبن راجل عرفته فى حياتى ... أول مبادئه فى الحياة هوه "الهروب" والانسحاب ... لما انت مش أد المسئولية من الأول مكنتش تدخل فيها ... كل ما تحصل مشكلة ياخد نفسه ويسافر بره ...بيقعد فى بلاد الأجانب أكتر ما بيقعد فى مصر... وأول ما الاخوان دخلوا الانتخابات انسحب ؟ ... ليه؟ لو انت راجل بجد هتقاتل لحد أخر نقطة فى دمك ... خسرت كسبت مش مهم المهم انك عملت اللى عليك عشان بلدك .... لو كنت كملت فى الانتخابات كانت كل الأصوات اللى اتفتت دى راحتلك انت  ... بس انت مش بيهمك غير نفسك ووضعك وبرستيجك

الكلاب الاخوان هياخدوا البلد يقسموها ويحولوها لخلافة  .. ده يسلم ل ده يسلم ل ده تحت ستار الدين وقال تعالى وقالى الرسول وزبية صلاة وتسبيلة عين ... والغلابة اللى محتاجين ازازة الزيت وكيلوا السكر كتير ... واذا كان عدد الاخوان دلوقتى 4 أو 5 مليون بعد أربع سنين من الحكم هيبقوا عشرين مليون لأن الناس شايفة ان دول بقوا قوة مؤثرة زيهم زى الحزب الوطنى .. وسلملى بقه على مصر
وعلى فكرة اللى هيحكم هيه الجماعة بقيادة المرشد مش "الطرطور" محمد مرسى

أو ممكن تختاروا شفيق زى ما اختارتوه فى المرحلة الأولى ... شفيق مهندس موقعة الجمل والعامل الأساسى فى تهريب ثروة مبارك وعيلته هوه وكل رجال الأعمال ....اللى ساب زكريا عزمى وصفوت الشريف وكل الكلاب التانية تبرطع فى البلد بعد رحيل مبارك ... واللى انتوا أكيد عارفين ان الممول الأساسى لحملته الحزب الوطنى المنحل ... ولا متعرفوش .. طب طلعتوا مبارك ليه لما انتوا هتجيبوا شفيق؟

أنا شايفة انكوا شعب يعشق الذل والمهانة والبهدلة والممرمطة والديكتاتورية والضرب بالجزمة القديمة ... لو ملقيتوش واحد يذلكوا بتصنعوا واحد بايديكوا عشان تقدروا تعيشوا وتتنفسوا كويس ... فا اللى وصلتوا ليه ده أقل حاجة تستهلوها ... اللى صعبان عليا بس الشهداء اللى بيتحرقوا فى قبرهم دلوقتى  ....   
حسبى الله ونعم الوكيل

هناك 23 تعليقًا:

Baskouta يقول...

كلنا هذا الوجع يا شيماااااء .. انا مقهورة وطول الطريق وانا راجعة من الشغل كل مااشوف بوستر لحمدين ... قلبي يتعصر حسرة على حلم ببلد افضل
ومش متخيلة ان اتحط في موقف اني اختار مابين سفاح ومكتب ارشاد
يااااااارب
رحمتك

على فكرة
انتي وحشتيني خااااااااالص

Baskouta يقول...
أزال المؤلف هذا التعليق.
Humman being يقول...

Baskouta
وحشتينى جدا جدا جداااااااااااااا
حاسة اننا متكتفين وواقفين قدام طريق مسدود من الناحيتين ... صعبان عليا أوى اللى ماتوا .... صعبان عليا شماتة حسنى مبارك فينا رجعنا للصفر من تانى ..
أملى الوحيد فى قبول طعونات "حمدين صباحى"

وحشتينى ونفسى أطمن عليكى ... يارب تكونى بخير

Kontiki يقول...

اسئلة مهمة جدا يا شيماء
لية نزل عدد قليل من الناس
عارفة انا انتخبت احمد شفيق لاسباب منها انى كارهه الفوضى او غيرة مش دى القضية بس لما اديتة صوتى اختى قالتلى دة مش حيكسب انتى كدة بترمى صوتك فى الزبالة عارفة كنت عارفة انى برمى صوتى وعارفة ان ولائى مش لفوضى قهرتنى على بلدى ولا لمرشحين هتيفة بيركبوا الموجة عشان منصب ولا ولائى لحزب اسلامجى او سلفى بالعكس اتشتمت واتهنت وخسرت صحابى عشان الثورة ومشفتش منها فى الاخر الا مجالس السفهاء شعب وشورى وشراء اصوات بالزيت والسكر عشان كدا اخترت شفيق اهو رجل جنتل :) وكدا كدا محدش حيرشحة غيرى :) وفوجئت زيك بالظبط انه كسب !! يعنى واضح ان فى زييى كتير ؟!!! انا اتصدمت زى الثورجية بالظبط فين ثورتكو بقى ؟ اية التفتيت اللى احنا فية دى ! فين مصر من دة كلة ؟ لو ثورتكو قامت عشان الناس و الشعب المطحون اهو الشعب بيختار بين ازازاة الزيت وكيس السكر ومنفعه وقتية او بيختار اعادة نظام قديم كان مريحلة دماغه وخلاص ! ياريت تكونى عرفتى لية من اول يوم واحنا بنصرخ وبنقول مينفعش يناير نقمة مش نعمه وعلى رأى سليمان بيه ( بط هوين ) روقى يا شيمو :)

Tears يقول...

بالعكس البرادعى طلع الوحيد اللى صح جدا لما رفض يشترك فى المهزلة دى و كان عارف ان ح يحصل لعب لان مافيش خمسة مليون خسيس فى البلد عشان يدوا شفيق انما فيه امن دولة و امن مركزى بيضرب بطاقات رقم قومى

رديت على الباقى عندى لان هنا كل ما اكتب يحصل عطل و يضيع التعليق

انا فرحانة اوى بيكم كلكم و انى رجعتلكم لانى حاسة معاكم بدفء و كنت بتخنق بعيد

قلم رصاص يقول...

على فكرة حسام عيسى لم يترشح للرئاسو D:

فيه رد على تعليق حضرتك عندي, ياريت تضطلعي عليه

شكرا

MaNoO يقول...

القهر والصدمه اللى وقعنا فيه واللى سببه كلنا بلا استثناء من اخوان طماعين لنخبه سياسيه فاشله لشباب معرفش يعمل ايه من بعد 11 فبراير بس صدقينى الشعب بتاعنا مش غبى والله ماغبى الشعب بتاعنا 40 فى الميه من اللى نزلوا اختاروا الثوره ولا الاخوان ولا القلول ودى حاجه بالنسبه لشعب عايش السنين كلها فى الظلم حاجه كويسه شوفى فى كتاب لمهاتير محمد صاحب النهضه فى ماليزيا بيحكى عن صفات الشعب الماليزى قبل النهضه هتلاقى كلها صفات الشعب بتاعنا الظلم واحد فى اى مكان وبيصنع صفات وحده فى اى مكان ومع ذلك انا بشوف أمل فى كل اللى بيحصل الامل ان عمر ما الاخوان هيعلنوا الخلافه الا لو احنا وافقنا بكدا والأمل انا لشارع فيه قوتين اسمهم انصار حمدين وانصار ابو الفتوح ..الثوره امل واحنا لسه معملناش حاجه لسه فى نظام فاسد قائم وعمرنا ما هنبدله بنظام احنا مش واثقين فيه بس على الأقل نبقى واثقين من جوانا ان احنا الصوت احنا التأثير احنا القوه ومنعبش لسه بدرى عما نوصل للى عايزينه البلد دى مش هيكمها ديكتاتور تانى طول ما فيها صوتنا

Humman being يقول...

Kontiki...
والله أنا حاسة ان الموضوع مترتب يا "كونت" من البداية مع المحلس العسكرى اللى عايز يخرج خروج "آمن" والوحيد اللى يقدر يحققله ده هو شفيق ونزلوه مخصوص قدام الاخوان عشان يكسب
أنا صعبان عليا جدا اللى ماتوا وأهاليهم وخراب بيوتهم ... كل دول استشهدوا عشان يجى شفيق
نفسى نفوق من الغمة دى ...ياااااااااااااااااااااااااااااااااااارب

Humman being يقول...

tears...
كان نفسى يقاتل ويقف ويحارب ويدافع عن البلد حتى لو خسر كفاية شرف المحاولة ... "صباحى" دلوقتى بطل شعبى مش عشان هوه راجل خطير وفظيع وملوش حل وعقل جبار .. لأ ... بس وقف لحد آخر لحظة وناضل بأقل امكانيات لدرجة ان معظم الناس هيه اللى صرفت على حملته مش هوه .. لما حس انه ممكن ميكسبش خاف على برستيجه مخفش على البلد وطبعا أيمن نور الطبال طبل وراه وانسحب زيه

متغبيش تانى

Humman being يقول...

قلم رصاص ..
أنا الحقيقة أقصد حسام خير الله بتاع المخابرات بس مكنتش فاكرة اسمه ... يااااريت كان حسام عيسى اترشح مكنش ده بقه حالنا

شكرا لمرورك وهشوف التعليق عندك

Humman being يقول...

ManoO..
انا همسك فى كلامك ده وهتشعبط فيه .. ان أبدا مفيش حاجة هتحصل ولا هتكون الا لو "كنا احنا عايزين كدة"

نفسى بس يا مانو نتخلص من "الروتين" والتنبلة اللى زرعها فينا حسنى مبارك .. عارف يوم الانتخابات كل ما أسأل حد انتخبت ؟ .. يقولى لأ مش رايح .. أقوله ليه يقولى يعنى صوتى هوه اللى هيفرق ؟ !!!!!!
أيوة هيفرق وهيفرق جامد ... نفسى نخرج من شرنقة حسنى مبارك ونفوق
شكرا على مرورك

Humman being يقول...

اندروميدا ....
تحليلك صح ... نزاع مابين القوى السياسية ... والدولة الدينية والمدنية .... مازلنا نعانى من ضعف شديد قاتل فى الجانب الدينى ... ضعف بيخلى كل من هب ودب يخترق الجانب ده بآية قرآنية أو حديث شريف نهلل احنا بعده ونكبر من غير حتى من نعرف هوية البنى ءادم ده هل هو أهل للنصح ولا لأ ... أعتقد لو احنا طبقنا ديينا صح بعيدا عن المزايدات وفصلناه عن السياسة محدش هيقدر يخترق الجانب ده تانى ولا هيكون هناك ستار يتخفى وراءه أشكال مثل الاخوان المسلمين ينتظرون الانقضاض على الغنائم تحت ستار الدين

أنا مصرية ومحبش أقول على نفسى وأهلى أغبية ..بس تصور امبارح بتكلم مع شاب جامعى ناضج كامل بيقولى صباحى مين ده اللى انتى لسه عايزاه ده أول شغلة يشتغلها هيه رئيس جمهورية!!!! انما شفيق باشا ابن باشا على الأقل برستيج
أعمل ايه لما أسمع الكلام ده؟

مفيش اطالة شرفتنى بالزيارة
شكرا

Tears يقول...

شيماء

ايمن نور ما انسحبش انما منع من اللجنة العليا عشان الاحكام لم تسقط زى خيرت الشاطر

لسه شايفة ان البرادعى ادرك ان اللعبه مش شريفة و ماحبش يدخل فى قذارتها و ده اللى شايفنه و لا انتى مقتنعه ان شفيق اللى بيضرب بالجزمة فى كل حته ناجح فعلا؟

Tears يقول...

شيماء

ايمن نور ما انسحبش انما منع من اللجنة العليا عشان الاحكام لم تسقط زى خيرت الشاطر

لسه شايفة ان البرادعى ادرك ان اللعبه مش شريفة و ماحبش يدخل فى قذارتها و ده اللى شايفنه و لا انتى مقتنعه ان شفيق اللى بيضرب بالجزمة فى كل حته ناجح فعلا؟

Tears يقول...

شيماء

ايمن نور ما انسحبش انما منع من اللجنة العليا عشان الاحكام لم تسقط زى خيرت الشاطر

لسه شايفة ان البرادعى ادرك ان اللعبه مش شريفة و ماحبش يدخل فى قذارتها و ده اللى شايفنه و لا انتى مقتنعه ان شفيق اللى بيضرب بالجزمة فى كل حته ناجح فعلا؟

Tears يقول...

شيماء

ايمن نور ما انسحبش انما منع من اللجنة العليا عشان الاحكام لم تسقط زى خيرت الشاطر

لسه شايفة ان البرادعى ادرك ان اللعبه مش شريفة و ماحبش يدخل فى قذارتها و ده اللى شايفنه و لا انتى مقتنعه ان شفيق اللى بيضرب بالجزمة فى كل حته ناجح فعلا؟

Tears يقول...

شيماء

ايمن نور ما انسحبش انما منع من اللجنة العليا عشان الاحكام لم تسقط زى خيرت الشاطر

لسه شايفة ان البرادعى ادرك ان اللعبه مش شريفة و ماحبش يدخل فى قذارتها و ده اللى شايفنه و لا انتى مقتنعه ان شفيق اللى بيضرب بالجزمة فى كل حته ناجح فعلا؟

Tarkieb يقول...

كلامك كله رغم صدقه الا انه مردود عليه... من امتى في بلد بينتخب فيها كل الناس؟ وفي يومين كمان؟ طبعا لا...مفيش واحد اعرفه الا وانتخب حمدين ازاي يطلع تالت؟ اكيد تزوير فحرام نظلم الشعب....البرادعي فهم انه الانتخابات تمثيلية وان المجلس عايز واحد عسكري وم الشلة عشان كدة انسحب...الاخوان لسه عشمانيين انهم يكسبو وده في المشمش والمجلس ح يتحل اول ما شفيق يمسك ...

ابراهيم رزق يقول...

انا تقريبا قربت اكفر بالشعب

مع انى طول عمرى مؤمن بالشعب

بس الواضح ان احنا فى وادى و هما فى وادى

هما ورثوا حرية و ثورة متعبوش فيها
مدفعوش دم و شهداء و عرق
عشان كده بمنهى السهولة بيفرطوا فيها

انا مع تيرز فى موضوع البرادعى
هو بيفهم و بيحلل جيدا
معاكى انه مش تصادمى و مقاتل
و دى طبيعة بشر

تحياتى

Humman being يقول...

tears...

أيمن نور لو كان حس بنسبة واحد فى المية ان ممكن يكون فى أمل فى فوزه كان هلل وكبر ولم الدنيا حواليه وعمل شهيد واستقتل
أيمن نور كان مستعد تمام الاستعاد لعمل أى صفقات مع الأخوان أو غيرهم ليفوز بأى شىء أى حتة من التورتاية لأنه أساسا معندوش مبدأ

البرادعى وزنه وحجمه ومكانته بحجم ومكانة ال 13 مرشح
مكانته ودوره فى الثورة مطبوع جوه كل المصريين
انسحابه سهل للمجلس العسكرى ولغيره انه ينفذ اللى عايزه بسهولة - ان كنت حاسة ان الشعب المصرى كان محمى فيه - مينفعش يبقى أسهل وأقرب حل وبلدى بالشكل ده انى أنسحب لأ أكمل وأحارب وايدى فى ايد الناس كلها ... فشلت أنزل معاهم للميدان تانى ... دى مش شعارات بس لو كل واحد فينا اتحارب ينسحب ويسافر البلد هتخرب

أنا مقلتش اطلاقا ان شفيق اللى بيضرب بالجزمة ناجح أو بنى آدم أساسا من أصله ولا عقدت مقارنة ما بينه وبين البرادعى لأن مفيش وجه مقارنة وانتى أكيد قريتى البوست ....

لو كان الانسحاب هوه الحل يبقى مكنش فى داعى للصمود 18 يوم فى الميدان وكانت الناس روحت من أول رصاصة

البلد بتقع معتش ينفع حد يبعد أو ينسحب ..واضح اننا هنبتدى من جديد

Humman being يقول...

Tarkieb...
فعلا مفيش بلد الناس بتنزل بنسبة 100% للتصويت بس برده فى نفس الوقت مينفعش اللى ينزل أقل من خمسين فى المية .... بلاش .. احنا بلد عادى زى أى بلد؟ بمعنى كنا فى استقرار ورخاء وسلام ونازلين الانتخابات ترفيه ؟ ..لأ احنا خارجين من ثورة وحالة البلد زفت يعنى وضعنا مختلف عن أى بلد تانى كان لازم نقطع عليهم الطريق

المجلس العسكرى ده خاين .. خاين ..حسبى الله ونعم الوكيل

Humman being يقول...

ابراهيم رزق ...
لو سكتنا على الحكم اللى صدر انهاردة ده يبقى الشعب المصرى انتهى
حاسة اانا اتبدلنا بقينا شعب تانى رجعنا لللامبالاة بقوة

Mohamed يقول...

عايز ارغى لكن ماسبتوش حاجه ارغى فيها