الدعوة عامة..وهتبقى لمة..

الصورة التحفة اللى قدام حضاراتكو دى واحدة من collection جامد جدا بقالى سنتين بشتغل فيه علشان أعمل بيه معرض كبير يحضره صفوة المجتمع من وزراء "أولهم طبعا الفنان الكبير الجامد فاروق حسنى" أهوه يمكن لما يشوف لوح معرضى تخفف عنه بلوة اليونيسكو المسيحة - وكمان هيكون فى فنانين وصحفيين وناس تقيلة ..مش فى الوزن لأ فى المكانة طبعا . والدعوة عامة طبعا للجميع ..المعرض ان شاء الله هيكون فوق سطوح بيتنا فى الفترة من 32 أكتوبر الى 41 نوفمبر .. أرض المعارض "المكنونة - المنصورة" .

ال collection كله فن سيريالى .... ايه... ؟ مش سيريالى.. خلاص تجريدى ...ايه مش تجريدى.. طب ماشيها تكعيبى ...ولا تكعيبى......بص بقة انت تتفرج وتشترى لوحتين تلاتة كدة وانت ساكت .. يعنى اشمعنى أنا يعنى اللى بتدققوا معاها؟!!!!!! ما الفنان "فاروق حسنى" كل شهرين يعمل معرض مليان بلاوى سودة ..قصدى تحف نادرة زى دى ولا حد بيكلمه....جت عليا يعنى!!!!!!!!!!!!.

اللوحة دى بقة بالذات أقربهم لقلبى- هما طبعا كلهم أبنائى- بس اللوحة دى بالذات رسمتها فى لحظة الهام كنت مستلقية كدة على ضهرى وجالى الوحى مرة واحدة .قمت فتحه قرطاس اللب اللى كنت بقذقذ فيه ونتشت قلم الكحل من أختى .. وهاتك يا فن ....طللعت كبت كل السنين اللى فاتت وهم العرسان اللى يغموا النفس اللى رايحين جايين عليا فيها.

اللوحة دى منبثقة من الفكر اللاشعورى المتمركز على القرار اللاارادى المتشعب من الفكرة الثلاثية الأبعاد رباعية التركيز اسطوانية الموقف... حد فاهم حاجة؟؟!!! ...والمصحف ما أعرف أقولها تانى!!
الخطوط السودة اللى بالعرض والطول دى.. ده كان "عمل" معمول لأنكل "فاروق حسنى" ومتعلق فى رجل نملة وده اللى خلاه ميفوزش "باليونسكو" بس مكناش لحقنا نفكه عند شيخ.. "الخطوط الرفيعة " بقه دى الأمل الضعيف اللى لسة جوا أنكل "فاروق" بمساندة السيد الرئيس أو ابنه القادم ليه علشان يفضل وزير ثقافة "مدى الحياة" ربنا يدى للجميع طولة العمر.. (محدش يقول يارب) .

آآآآآآآآآآآآآآآآآآآآآآآآآآآآآآه ارحمنا يارب برحمتك الواسعة وصبرنا..
أنا بستغرب والله على الناس اللى تقطع من وقتها ساعتين تلاتة علشان تروح تحضر معارض لوح مليانة شخبطة ... لأ وايه تدفع شىء وشويات فى اللوحة...ويقف بالساعة قدام اللوحة يتغزل فى جمالها ..وهوه والله ما هو فاهم منها أى حاجة ... بس علشان يبقى واد أرستقراطى والناس تقول عليه "ابن ناس" لازم يجيب لوحتين تلاتة شخابيط من دول يحطهم فى البيت.. وهوه فى قرارة نفسه بيتف عليها فى الرايحة والجاية ..ويبرطم ما بينه وما بين نفسه.."انت كنت اتهبلت فى عقلك عشان تشترى البلاء الأزرق ده" ...فتظبطه المدام وتقوله:" انت بتكلم نفسك".. فيقوم متشاكل معاها شكله لرب السماء ويحط هم فلوس "اللوحة " فيها هيه يا عينى.

طب لو عجباك أوى.. هات ورقة واديها لابنك الصغير هيعملك أحلى فن سيريالى وجودى تكعيبى تجريدى وأهوه جحا أولى بلحم طوره وتوفر القرشين دول علشان "مارينا" مثلا.