اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الخميس، 4 فبراير 2010

خــطـــــــاب


الراسل : رضا المحمدى عارف الشينى


العنوان : قرية معارف مركز قويسنا - بقالة الحاج دسوقى


ويسلم ليد والدنا الحاج( المحمدى عارف)




ملحوظة "تقرأه لوالدى أختنا وجارتنا "وردة"


والدى العزيز الغالى


السلام عليكم ورحمة الله وبركاته

اذيك يابا..واذى أمى واذى اخواتى البنات....انتوا وحشتونى أوى يابا ...أوى....اذى صحتك والنبى...كويس؟ وأمى الغالية عاملة ايه؟؟ وحشانى أوى ياما...أنى الحمد لله كويس ..وصلنا ايطاليا بقالنا ييجى عشر أيام أهوه...ايه البلاد دى يابا...دى ولا الجنة اللى بيقولنا عليها شيخ الجامع....حلاوة ايه ...ونضافة ايه....ولا استقبال الناس لينا...ايه ده؟؟ زى ما يكونوا عارفين انى جاى....باين الواد صلاح ابن سيدى ابراهيم ظبطنى هنا قبل ما آجى ولا ايه؟ .. واحد من المصنع اللى هشتغل فيه جه خادنى بنفسه ووصلنى للسكن اللى هقعد فيه...راجل ابن حلال...هوه أصله لبنانى..هيقعد معايا فى نفس الأوضة فى السكن ...شكرت ربنا ان اللى حيقعد معايا بيكلم عربى ...ما انت عارف يابا أنى لا بعرف ايطالى ولا غيره...والواد صلاح كمان الله يكرمه كل شوية يطلبى ويطمن عليا ويسألنى لو عايز حاجة...ووعدنى هيزورنى فى أقرب فرصة ...ابن حلال الواد ده والله....ولا صاحب المصنع...راجل جدع و طيب زيك كدة يابا....ربنا موقفلى ولاد الحلال زى ماكت دايما بتدعيلى ... الحمد لله!!!!!


معلش يابا أنى عارف انى تعبتكوا معايا انت وأمى ...بس والله ..وحياة الغربة اللى أنى فيها لأعوضك عن قيراطين الأرض اللى بعتهم عشانى...أنى عارف انك مبتحبش تشتغل أجرى فى أرض حد....بس والله يابا لعوضك عنها بخمس فدادين....وبعون الله هبعتلك فى ظرف سنة مبلغ كويس عشان تبنى الدار اللى كان نفسك فيها...أنى بس محتاج شوية وقت كده لحد ما أرستأ نفسى..

وانتى ياما... وحياة دمعتك اللى أنى شايفها دلوقتى وحاسس بيها لأعوضك عن الجاموسة اللى بعتيها بجاموستين...وبدال الحلق اللى بعتيه هجبلك سلسلة وأربع غوايش..ادعيلى بس والنبى ياما ...ادعيلى انتى وأبويا وانتو بتصلو الفجر...أنى محتاج دعوتك دى أوى ياما...ومتقلقيش عليا أنى مبسوط هنا أوى أوى.. وباكل حلو ..وبنام على فرشة زى الفل.....ولا الناس هنا.... تقوليش بلسم ياما.... بركة دعاكى ليا يا غالية

أخيرا....
سلامى للجميع ...سلامى لأختى فايزة والبت هنية...وسلامى لاصحابى مغاورى واسماعيل وتوفيق...العيال دى بتسأل عليكوا ولا لأ يابا أنى موصيهم قبل ما أمشى....!!!!!!


ابقوا خلوا جارتنا وردة تبعتلى جواب فيه أخباركوا عشان أطمن عليكوا
والسلام عليكم ورحمة الله وبركاته


ورقة مرفقة تقرأها "وردة"


وردة ..اذيك يا بت ...وحشتينى يا روح الروح....
عايز أقولك ان أنى......أنى.....أنى مسجون هنا فى ايطاليا من ساعة ما وصلت....!!!!!! ...بس أوعى تقولى لأبويا ولا لأمى ولا حد من اخواتى الكلام ده... المركب كان عليها ييجى 300 نفر...وصلنا الشط بأعجوبة...كنت بتشاهد على نفسى كل شوية .... وقبل ما أنزل من المركب قطعت جواز السفر بتاعى ورميته فى المية...أول ما وصلنا البلد لا لقيت الراجل "محرز" السمسار ولا لقيت حد من بلدنا يغيثنى...حتى الواد "صلاح" ابن سيدى ابراهيم ....طلبته رد عليا وأول ما سمع صوتى قفل السكة....وبعد ما وصلنا بكام ساعة لقينا عربية مليانة بوليس وقاعدين يرطنوا بالايطالى ..اللى فهمتوا انهم عايزين البسبور...وأنى طبعا رميته فى المية....زى ما الواد صلاح قالى....قلتلهم برده ان أنى فلسطينى عشان يسبونى أمشى وأشتغل زى ما الواد صلاح قالى ...بس مفيش فايدة .....احنا 150 واحد قاعدين فى زنزانة واحدة...وكل يوم يدوروا فينا الضرب...واحد مننا عرف يهرب اديتله الجواب ده وكتبتله العنوان عشان يبعتهلكوا


مش عارف ملطشة معانا ليه كدة يا وردة...ده أنى معايا عيال غلابة أوى يا بت..... كت فاكر ان البلاد دى هتسعنا عن بلدنا....يااااااااااااااااااااااه....ياااه يا بت على اللى أنى فيه.....بس برده رجعت قلت...اذا كانت بلدى مش مسعيانى...!!!!!!!!!!.......تبقى بلاد الغرب هتسعنى ليه؟؟؟!!!!!!


مش عاوز أربطك جنبى يا ورد ...أنى مش عارف ربنا هيفرج سجنى امتى؟؟؟ ولا هيعملوا فينا ايه ؟؟؟!!! أنى كمان لا يمكن أرجع البلد تانى وأنى شايل حسرتى وخيبتى لأبويا ولأمى....ان شالله أموت هنا!!!!!... يالله.... وأهو يبقى بناقص فم يطعموه....كفاية عليهم هـــم اخواتى البنات....


أوعى تقولى لأبويا ولا لأمى حاجة لحسن يطبوا ساكتين....واذا قالولك تكتبيلى جواب ...اكتبى جواب وعينيه معاكى على انك يعنى بعتيه


وقطعى الورقة دى بعد ما تقرأيها... وابقى طلى عليهم من وقت للتانى...


ادعيلى يا بت...ادعيلى أوى من قلبك.... ومعلش مطلعتش أد كلمتى....


والسلام ختام


رضـــــــــــــــــــــــــــــا


تمـــــــت

هناك 15 تعليقًا:

أميرة الأحلام يقول...

شوشو ياقمر..
وحشانى والله فينك من زمان يارب تكونى بخير
دى مأساه ناس كتير قوي بتسافر بطرق غير مشروعه بره مصر وبيبقوا متخيلين انهم هيعرفوا يعيشوا هناك وهيحققوا احلامهم بعيد عن بلدهم
الموضوع ده انتشر كتير قوي الايام دى
وللاسف محدش بيتعظ من حد وبيزيد يوم عن يوم
مهما كانت العيشه بره مافيش احسن من احساس الامان الي هنحسه واحنا في بلدنا وعايشين فيها
تسلمى يا جميل على الموضوع الحلو ده

Humman being يقول...

مرمورة الأحلام...
طب أعمل ايه طيب....دايما كدة تشرفينى أول تعليق
متحرمش من ذوقك يا حبيبتى ..وأنا بخير ...يارب انتى كمان تكونى بخير وسعيدة وفرحانة ومبسوطة فى حياتك وفى شغلك يارب دايما

Tears يقول...

ده واقع

لقد قتلوا الانتماء قتلا بشعا...البلد اصبحت اتنين واحده شعبها كتير فقير و مطحون و مالوش حقوق و بتمتهن كرامته بره و جوه و واحدة شعبها فى مارينا واكل حق الباقى

دى نتيجة النظام الديكتاتورى الفاسد و سلبيه و خضوع و ذل و هوان هذا الشعب الساكت

بعد بحث طويل وصلت لحقيقة ان شعبنا يستاهل كده و زيادة

ان الله لا يغير ما بقوم حتى يغيروا ما بأنفسهم

Humman being يقول...

tears
عندك حق ...مصر مقسومة نصفين
نص فى مارينا وشرم ومش عارف يودى الفلوس فين
والنص التانى تحت الأرض...
بس أنا حاسة ان كلنا مشتركين فى الغلط...الحكومة والنظام ورجال الأعمال واحنا بسكوتنا عليهم...احنا مبدأناش نعمل مظاهرات ونعترض على أوضاع كتيرة غلط غير من سنتين تلاتة بس
فخلاص هما أخدوا علينا ساكتين....الاعتراض ده سمة جديدة مش واخدين عليها

ربنا يرحمنا

Humman being يقول...

وليد...
كان نفسى بلدنا تبقى أحن علينا من البلاد دى ....نفسى تحس بينا...
لما شوفت فى برنامج واحد من الناس " يوم الخميس ...شاب خريج علوم بتقدير جيد جدا وعمل دبلومة بتقدير جيد جدا وعمل ماجيستير ومقدرش يكمله....وكل ده وهوه بيشتغل "عــــامـــل محـــارة" والله العظيم عيطت جامد وفرحت لما عرفت انه اتعين ...بس الشاب ده قدر يوصل للبرنامج ويوصل صوته ....ياترى فيه زيه أد ايه متفوقين ومش عارفين يوصلوا لحاجة ؟؟؟؟!!!!!

ghada mOhsen يقول...

ااااااااه ياقلبى من كل اللى بيحصل ده

بجد ياشيماء بالضبط ده اللى بيحصل

انا بحب كتير اللى يقعد فى بلده ويسعى فيها ...

شوفى بقى لما يروح بلد اجنبى ويخلى اهله يبيعوا اللى وراهم واللى قدامهم وفى النهايه يتمنى الموت لنفسه

ربنا يهدى شباب الامه العربيه يارب

تسلمى بجد
... ;) ,,, ;) ...

إيمان يقول...

ياااااااه تحسى ان الكلام ده زى خطاب الوداع بيسافر ويتغرب ويرجع مكفن وفى صندوق خشب
ده عيب الهجرة الغير شرعيه لو كل شىء يجى فى النور مكنش دا بقا حالهم وكان يبقى ليهم كرامه فى اى مكان يرحوه بس نرجع ونقول اللوم مش عليهم لما مايلاقيش فى بلده الحضن الدافى والامان اكيد هيلجأ لغيرها ويقول رزق هنا رزق هناك واسعى ياعبد وانا اسعى معاك
قصص ورويات واللى شحطط اهله وياه واللى سافر وسرق علشان يعيش واللى سافر هربان بملايين وفى الاخر رجع يقول بلدى اولى بيه ولا مال ولا جاه يقدروا يعوضونى عنها
بدايه غلط وظروف بتدفع للغربه وكل شىء له تمن ومفيش حاجه بقت تيجى بالساهل

Ahmed Fayez يقول...




ليه الهم و النكد ده!

أنا بقعد فترات مش عاوز أقرا أخبار، أو اعمل نفسي مش واخد بالي عشان أعرف أعيش.
ازاي الواحد يفكر في كل الهم اللي الناس عايشينه و يجيله نفس ياكل و لا يعيش!

الحكاية دي بتفكرني بيا أنا شخصياً، أنا برضه أهلي صرفوا عليا فلوس كتير عشان أبقى دكتور في الآخر و شخص له قيمة، مش أنا لوحدي، كل زمايلي في الطب أهليهم صرفوا عليهم دم قلبهم، و مش مستنيين حاجة مننا.
اللي بيضايقني بقى لما ألاقيني مش بذاكر كويس، أو مكسل، أو مليش نفس، أو زهقت و مش قادر أكمل، أفتكرهم و افتكر التعب اللي تعبوه، و الفلوس اللي صرفوها، و القلق اللي قلقوه، و يصعب عليا بعد كل ده إني حتى مافرحهمش.
مع إن الضغط كبير، و الدراسة مرهقة بشكل يجيب كل الأمراض المستخبية، و الأيام و السنين اللي بتمر كتيرة قوي، إلا إني دايماً بقولهم تمام و زي الفل.

تحية كبيرة لكل أب و أم شايلين همنا و احنا صغيرين و كمان و احنا كبار.

بالنسبة للسفر برة، فأنا عندي قناعة إن لو هتسافر برة باحترامك و الأمر محسوبله ألف حساب يبقى سافر على بركة الله، و أرض الله واسعة. إنما السفر اللي ملوش ملامح و من غير وجهة و أي رمية و خلاص دي غلطة كبيرة قوي.




مهموهة أحمد يقول...

شوشو .........

يخرب عقلك يا شوشو انا عيطت و الله و انا بقرأ الرسالة دي
الله على كل كلمة فيها فعلا و الله كل واحد يا عيني بيبقى بيحلم يعوض اهله عن اللي عملوه علشانه بس للاسف بيتمنى يموت برة لما يلاقي الواقع المر قدامه علشان ما يرجعش لاهله و بلده بخيبته

ربنا يرحمنا يرحمته
و يكرم و يوفق شبابنا يا رب

بجد مش لاقية كلام اقوله لاني بعيط بجد

مشاعرها شدتني اوي و تعبتني

مع خالص حبي ليكي يا شوشو يا قمر

Humman being يقول...

غادة...يارب تكونى بخير
يارب فعلا يهدى شباب الأمة ....و يهدى رجال الأعمال ويحسوا بالشباب دول....خلاص معدناش بنقول ربنا يهدى الحكومة عشان "مفيش فايدة"

Humman being يقول...

ايمى ...منورة الدنيا يا حبيبتى

فعلا عندك حق.... اللى بيدفعهم لكدة "الحاجــــة" ومفيش حد بيبقى نفسه يتبهدل ويتذل على ايد حد
ميرسى يا حبيبتى على ذوقك

Humman being يقول...

ايمى ...منورة الدنيا يا حبيبتى

فعلا عندك حق.... اللى بيدفعهم لكدة "الحاجــــة" ومفيش حد بيبقى نفسه يتبهدل ويتذل على ايد حد
ميرسى يا حبيبتى على ذوقك

Humman being يقول...

winner
فعلا تحية كبيرة لكل أمهاتنا وآباءنا اللى دايما بيستحملونا وشايلين همنا بدون انتظار أى مقابل ...وتبقى سعادتهم الحقيقية لما يلاقونا مبسوطين

بالنسبة للسفر ...بتبقى كتيييير أوى الظروف أقوى وأكبر من أى اختيار ....كتييير منهم بيختار الهروب ..هوه أكيد غلط .... بس برده الظروف أقوى

Humman being يقول...

مهموهة حبيبة قلبى...

سلامتك من العياط....أنا مش هكتب حاجة تانية تزعلك....بس القصة دى بتتكرر كل يوم مليون مرة .... و لا البلد حاسة ولا المسئولين......وأعتقد انهم وصلو لمرحلة اللا احساس

ان شاء اللى يزعللك يفطس
منورانى يا حبيبتى
خالص حبى

sal يقول...

اسلوب رائع
ومحتوى اروع
سعدت بمرورى
لك تقديرى