اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الثلاثاء، 9 فبراير 2010

حوار لن يذاع



لقاءنا انهاردة هيكون مع أ/ أحمد أبو الحقل وزير الخارجية المصرى




المذيعة : أهلا بحضرتك معالى الوزير


الوزير : أهلا بيكى يا ستى




المذيعة : الحقيقة مش عارفة أبتدى منين..بس خلينا فى البداية نعرف اذاى حضرتك وصلت لمنصب وزير الخارجية بالرغم ان حضرتك حاصل على بكالوريوس تجارة؟؟!!!!!
الوزير : فى الواقع ...أنا كنت قاعد بفطر جبنة "قريش" وعسل "أبو لهب" لقيتهم بيطلوبونى وبيقولولى هنديك حقيبة الخارجية ومعاها زمزمية ومقلمة وعلبة ألوان وكراسة رسم....قولت كويس أهو الواحد يتسلى ...


المذيعة : الكثير من السياسيين بيأخذ على حضرتك عدم وضوح انتماءك الفكرى والسياسى والحزبى؟؟
الوزير : ااايه؟؟؟!!!....أومال "حزب وداد قلبى يا بوى " ده ايه...؟؟!!! مش حزب؟؟؟!!! ده أنا من المؤسسين البارزين فيه..!!!!


المذيعة : أول ما حضرتك استلمت حقيبة الخارجية كنت نموذج للدبلوماسى "الكلاسيكى"..الميال لتوخى "الحـيطـة" والحذر وانتقاء الكلمات بعناية زائدة؟؟ ايه تعليق حضرتك...؟؟؟
الوزير : أنا قولتلهم يفتحوا فيها شباك ...هما اللى أصروا يهدوها...!!!
المذيعة : هيه ايه يا فندم اللى هدوها؟؟؟
الوزير : "الحــيطــة"....أصلها كانت حايشة الشمس والهواء ... فأخيرا أخدت القرار المناسب وقولتلهم يهدوها...
وبعدين "الحــذر" ده لأنى فى كل تعاملاتى الخارجية دايما بطبق القاعدة السياسية الحكيمة (امشى عدل ..يحتار عدوك فيك..)


المذيعة : الكثير من "المحللين" السياسيين يرون أن تصريحات معاليك النارية الغير مدروسة "الغارقة فى العمومية" أدت الى أزمات سياسية خطيرة..وشوهت العلاقات البلوماسية مع العديد من الدول؟؟


الوزير : لأ من فضلك أنا عايز أعلق على نقطة نقطة...




أولا...أنا عاوز أعرف "المحللين" دول حللوا فين ؟؟...فى "معمل البرج"... ولا معمل "المختبر" لأن الموضوع ده يفرق معايا جامد..؟؟


ثانيا..."التصريحات بتاعتى "غارقة فى العمومية" عشان تتشطف كويس..وتنضف حلو...بعد ما تكون اتغسلت ب "تـايــد" يغسل أكثر بياضا ومن غير اضافات والله...!!


ثالثا...نقطة انى "شوهت العلاقات الدبلوماسية"....احنا علاقتنا بلبنان كويسة جدا وقوية عشان اللى "يتشوه" يقوم مسافر لبنان يعمل عملية تجميل ...و شفط وحقن وتكبير وتصغير ....وبعدين احنا وقعنا معاهم "اتفاقية" ..اللى هيروح الأول هياخد خصم...والعرض سارى حتى نفاذ الكمية....




المذيعة....معانا اتصال تليفونى....ألو... أيوة يا فندم اتفضل سيادة الوزير معاك...


شخص غلبان : ايوة....ايوة يا بيه.... والنبى يا بيه ابنى محبوس فى السجون السعودية....ومش عارف ليه؟؟...بقاله ييجى شهرين ونص.. وغلبت أجرى من الخارجية للسفـــارة ...لهنا لهنا...ومفيش فايدة...والنبى يا بيه ابنى غلبان ما عمل حاجة....ده كان مسافر عشان يشتغل....والنبى ...يا بيه.....والنــــ.......




الوزير : بص يا حاج...ابنك يستاهل السجن ده...ويبقى كتر خيرهم والله لو ضربوه كمان....وانت كمان تستاهل تتعاقب زيه؟؟


الشخص الغلبان : أنى يا بيه؟؟... ليه..؟؟؟!!!!!!!!!!!


الوزير : عشـــان ما شربتش من نيـــــلهـــا....طب جربت تغنيلــــهــــا...!!!!؟؟....جربت..؟؟؟؟؟؟..




المذيعة : بمناسبة الحاج الغلبان....السفارات بتاعتنا فى الخارج والمشاكل اللى بيواجها المصريين....وتجاوزات البعثات الدبلوماسية وتجاهلهم التام لمشاكل المصريين التى وصلت لحد الضرب والاهانة والجلد والحرق.....كل ده والسفارات "لا حياة لمن تنـــادى"...!!


الوزير : مين اللى قال لحضرتك انه لا حــياة لمن "تنــــادى"؟؟...أومال الواد اللى بعته ماسك ميكروفون وعمال "ينـــادى" على المصريين فرد فرد فى كل دولة ده ايه..؟؟؟ ...اللى يرد منهم بيديله "شومـــة + سنجة" عشان اللى يكلمه ..على دماغه علطول....ميستناش لا سفارة ولا غيره تجيبله حقه..!!


وبعدبن فى مشروع قرار فى مجلس الشعب هيصدق عليه قريب... بتحويل كل مبــانى السفارات فى كل الدول لمبنى منقسم لقسمين :




1-الجزأ الأول : مستشفى يتعالج فيها كل اللى يضرب أو يتحرق أو يجلد ..والكشف بأجر رمزى... والدواء مجانى ان شاء الله


2- الجزء التانى : هنعمله ان شاء الله "مــــلاهى" يروحوا عن نفسهم فيها بعد ما يضربو.. أظن كدة عدانا العيب وقزح... ولا ايه؟؟!!!!.


المذيعة : فى دول كتير بتنتقد زيارة "وزيرة الخارجية الاسرائيلية" لمصر قبيل الحرب على غزة ما يشير بأصابع الاتهام لمصر بمعرفتها المسبقة بموعد الحرب....؟؟؟؟


الوزير : لأ يا فندم الموضوع مش كدة....الموضوع ان الريس حس ان اسرائيل مقبلة على الخطوة دى...فقال هتولى الست دى...دى حاجة..الحاجة التانية ..أنا جاتلى رؤيا فى المنام ان فى "وحـــــش" بيهجم على "كتكوت" ... فكلمت الشيخ سيد بتاع تفسير الأحلام على الخط الساخن الملهلب فقالى : تفسير الحلم ده ان اسرائيل هتهجم على فلسطين.........ده غير تأكيد "أم ابراهيم" بتاعة الودع لما شافتلى الفنجان يومها.....


المذيعة : أجمع العديد من السياسيين انه فى عهد سيادتكم تعانى مصر من حالة "ترهــل" عام أصاب الأداء السياسى الخارجى لمصر..و"بهـتان" واضح للصورة المصرية كقوة اقليمية فى المنطقة.. مما دفع بعض الدول الى محاولة انتزاع "الريــــــادة" منها؟؟؟


الوزير : أولا ..."البهتــان" ده حاصل علشان "الريسيفر" والطبق اللى عندهم صينى مش ألمانى عشان كدة مش شايفين الصورة كويس




ثانيا .. "التــرهـــل" ده محتاج شوية تمارين للبطن والدهر هيروح علطول ..لو ما رحش... يتصلوا عل الخط الساخن بتاع أ/ "ممدوح فرج" بتاع الرجيم اللى بيشخط فى الناس ده...وان شاء الله شخطة واحدة منه هتضيع كل الترهلات.. واحتمال تضيع حاجات تانية برده..


موضوع (الزيــــادة) والحوافز دى بقه ممكن تكلمى فيها وزيرة القوى العاملة ...مليش فيها دى...!!!


المذيعة : أنا بقول لحضرتك "الريــــادة" مش الزيــادة...!!!




الوزير : آه..آسف .... احنا الريادة بتاعتنا زى ما هيه فى (القللى ..وعابدين....والجيزة) على رأى "اللمـــبى"...واللى هيقرب منها هنكسر رجله ورقبته.....وبعدين كل واحد بعد كده يبقى يسيب "ريادته" فى البيت قبل ما ينزل ...زى (لغاليغو) كده بالظبط...أنا مش مسئول عن (لغاليغ) حد ....قصدى...ريادة حد....




أخيرا.... تنتقد الكثير من الدول غياب مصر عن الملف السودانى وقضية "دارفور"؟؟؟..ايه تعليق معاليك..؟؟


اولا...أنا لسه عامل جولة كبيرة امبارح زرت فيها "دار أم اسماعيل" ..و"دار سيدى ابراهيم" و"دار خالتى فهيمة"..وروحت معدى على "دار فور" لقيتها زى الفل والله ..وبتسلم عليكو كتير....يبقى فين الغياب ده .. دول ناس حاقدة عليا..!!!






*عايزك تعرفى حاجة مهمة انتى وكل الشعب المصرى ... الأمة العربية دى كلها عاملة زى صوابع الايد الواحدة ...لو لقدر الله صباع منهم جاتله "واوا" ولا حاجة ...."مصــــر" الشقيقة الكبرى بتكون أول واحدة "تـبــــوس الواوا أح" على رأى السيدة الفاضلة "هيفاء وهبى"...وأنا من موقعى ده بقول ..نحن لا ندخر أى جهد من أجل القضية العربية ...وان شاء الله....طول ما لسه فيا نفس أصرح تصريحات.... وطول ما صحتى مساعدانى أبتكر اجابات.... وطول ما "البؤجة" ...قصدى "الحقيبة الدبلوماسية" على ضهرى ..وزمزميتى فى ايدى ومصروفى فى جيبى...ولساااااااااانى شغال...لن أتوانى عنى انى أجيب مصر ورا...قصدى أدفعها لقدام.....!!!




المذيعة : شكرا يا فندم على وقت حضرتك


الوزير : الشكر ليكى يا ستى

هناك 26 تعليقًا:

Tears يقول...

مش بس وزير الخارجية انما هذا حال كل الوزراء

كلهم وزراء بالصدفة و لعل أفضل من جسد هذا هو الفنان أحمد زكى فى فيلم معالي الوزير

لا تنتظرى منهم فكر او عمل فهؤلاء سكرتارية للرئيس كما قال نظيف بنفسه فى أحد أبرز زلات لسانه

Ahmed Fayez يقول...

يعني نجهز العيش و الحلاوة !

Humman being يقول...

tears

يعنى نقول لكى الله يا مصر ...زى ما بيقولوا

شكرا لمرورك

Humman being يقول...

winner

انت شايف ايه؟؟؟!!!!

إيمان يقول...

يلا ياشيماء ههههههههههه هنصيف فى ابو زعبل
والله يابنتى الدنيا اتقلب حالها والثقافه جابت اخرها مين بجد اللى يستاهل المناصب الهامه طيب لو استهالها من حيت القدرة على الادراة هل هيكون قنوع ويراعى ربنا ولا لاء
حيرة وخلبطيطه وكله ماشى ومسلم ومحدش دراى بحاجه وكل اما نقول تغير نفرح انه اللى جاى ممكن يكون احسن انما بننصدم ونقول مفيش شىء بيتغير واللى جاى جاى موهوم عايزة يملى بطنه وفرصته وجت لحد عنده يستغلها قبل فوات الاوان.
زى امبارح قرارات علاج لوزراء فى الدوله يتعالجوا بفلوس الدوله وقرارين واكتر فى السنه امال سابوا ايه للغلابه لما المبلغ المحدد للعلاج ياخده وزير علشان يسافر بره يعمل مساج لرقبته ولا يحط كريم
حاجه تشل وتجيب الضغط واكيد فى امل ان فى شرفاء زى اللى كشف عن القرارات دى
تحياتى وحبى ياقمرايه

Humman being يقول...

ميمو ...منورة يا حبيبتى
"أكيد فى أمل فى شرفاء" حلوة أوى الجملة دى...فى وسط كل الاحباطات
واللا ضمير اللى احنا عايشين فيه ده هنحاول نصبر نفسنا بالجملة دى
ميرسى لمرورك يا ميمو

هي وظروفها يقول...

ههههههههههههههههه

اسلوبك في عرض الحوار ضحكني

ايه بقي الراجل ابو الغيط ده

بصراحه كان نفسي

هو اللي يزورالمسجد الاقصي


مش احمد ماهر


ساعتها كان مش يحصل فيه اللي حصل

لماهر لا.....دول هيخلوه عبره لمن لا يعتمر

وبعدين البؤجه الدبلوماسيه

بقت باله استعمال خارج

وبييجي معاها كتالوج

لالاستخدام الأمثل

ودليل علي ثقافه الراجل الوسعه

عمل شنيشه في الجدار

ونها الحوار
بطريقتها المعروفه سلفا

اللي يطلع من بقي

مش هيريحكم يا زباله وأدي دقني

Humman being يقول...

وليد...
أهلالالالالالالالا ومرحبااااااااا
من أحمد ماهر الى أحمد أبو الغيط ...وربك يعلم ب أحمد اللى لسه هييجى...يا قلبى لا تحزن
ربنا يستر

الطيــر العاشـق يقول...

مشمشة يا قمرة
أنا بقي همووووووت بجد من الضحك من أسلوبك الرائع والساخر وطريقة كلامك مع سيادة الوزير اللي اخرته يقعد يصطاد سمك علي شط الترعه بالكلام اللي بيقوله... وحتي مش عارف ينطقه

وممكن برضه تلاقيه ان يعرف الغفير واتوسط له عند العمده وقام هوه بكل اتصالاته وبقي وزير

والله بجد يسلم دماغك وعقلك وقلمك وكيبوردك كمان
الله عليكي

Unknown يقول...

بعد ما قرأت انا مش عارفة اضحك على الاسلوب الساخر لك ولا ابكى على ما الت اليه الامور فى مصر ؟؟


تحياتى لك وللمدونة الجميلة

مهموهة أحمد يقول...

شوشو يا قمر .......
ايه يا بنتي حواراتك بتعمليها بطريقة اكتر من روعة و الله بتهبل و بموت من الضحك و انا بقرأها


بلدنا دي مولد الكل فيها زاط و زيط
شعب غالبان خايف بيمشي جنب الحيط
حكومة مفترية يهمها الشهرة و السيط
اذا كان سرور و لا نظيف و لا ابو الغيط
و الشرف فيها ده بقى ارفع خيط
ربنا يهديكي يا حكومــة
و تحسي بالناس المحرومـــة

تقبلي خالص حبي يا شوشو وواحشاني خالص و الله

Humman being يقول...

الطير العاشق..
فرفورة حبيبة قلبى...تسلمى انتى يا حبيبتى ويارب دايما منورانى كدة

Humman being يقول...

نهر الحب..
ميرسى على ذوقك ... هى الأحوال تبكى صحيح..بس فى 3 أو 4 سنين اللى فاتت بدأت الناس تصحى شوية نقول بنسبة 35% ..أكيد صغيرة ....بس أهى بداية
شكرا على مرورك
خالص تحياتى لكى

Humman being يقول...

مهموهــــة الجميلة....
أنا اللى حواراتى روعة... أومال الشعر الجميل اللى لايق أوى على البوست ده يبقى ايه؟؟!!
ربنا ميحرمناش من الشعر الحلو ده .... اللى ممكن يكون بداية للتغيير

انتى وحشانى جدا جدا والله..
خالص حبى

أميرة الأحلام يقول...

شوشو حبيبتى عامله ايه
يارب تكونى بخير
معلش انا اتاخرت شويه اصلي مش في البيت اليومين دول اعذرونى
جميل اوى الحوار ده ياشوشو
بس والله كل وزراء مصر المحترمين ما بقوش يفرقوا عن بعض
بلدنا حالها ما يعلم بيه الا ربنا
وكل يوم بتتدهور اكتر عن اليوم الي قبله
ربنا يصلح الاحوال
ربنا يوفقك ياشوشو يا حبيبتى يارب

أحمد عاطف يقول...

اهم ما في الموضوع ان مصر الشقيقة الكبرى

بتبوس الواوا اح اذا اتعور اي صباع من صوابع الايد


والله حوار مسخرة انا متخيل ان الراجل دا ممكن يطلع منه كده فعلا

sabry abo-omar يقول...

أيه الكلام الشديد ده..ربنا يستر
أسلوبك ساخر فعلا بيوصل رأيك بشكل واضح فى قضايا بعفوية ويسر ..ممكن تعملى مواضيع أكتر بنفس الفكرة بس المهم تعطى فرصةللجمهور اللىزينا يسأل برضه وانتى تردى وانتى متقمصة الدور ده.. يعنى نختار شخصية وانتى تبدأى الحوار وتستنى اسئلة اخرى لنفس الشخصية من عند الجمهور اللى هو أحنا وتردى ونشوف رأيك أكتر... دومتى لنا باسلوبك الساخر واراءك القوية.

Humman being يقول...

مرمورة الأحلام حبيبتى ...
مفيش حاجة يا حبيبتى...يارب بس تكونى كويسة ونسمع عنك كل خير يا مرمورة

Humman being يقول...

أحمد عاطف...
والله متسبعدش عنه أى حاجة...التصريحات دى هيه الحاجة الوحيدة اللى بيجيدها جدا
شكرا لمرور حضرتك

Humman being يقول...

sabry abo omar...
ميرسى لذوق حضرتك ...
والله حكومة "نظيف" كل شخص فيها محتاج مائة مدونة مليانة حوارات زى دى
ممكن نعمل مدونة مشتركة ونسميها "عجائب وغرائب"
دمت بخير
خالص تقديرى واحترامى

حصان المرجيحة يقول...

لا يا ستي انا مش هاعلق
اصل انا من بتوع جنب الحيط قصدي جوه الحيط ههههههههه

Humman being يقول...

حصان المرجيحة...
لأ...خلاص حضرتك كدة علقت ...واتسجل التعليق...وخير الكلام ما قل ودل...ولو حصلى حاجة هقول حصان المرجيحة شريكى...
هههههههههههههههه

أنا بهزر طبعا
منورنى كالعادة بتعليقاتك المحترمة
خالص تحياتى

ghada mOhsen يقول...

كيفيك شيماء
يارب تكونى بخير
وحلو كتير شكل مدونتك الجديد

........
بجد اسلوبك تحفه اخر حااااجه
والله عماله اقرا واضحك وماما تقول ايه البنت المجنونه دى ..

بجد ياريت تعملى لقاء معاهم كلهم مش ده بس ...

بس صدقينى الايام قربت وكل شى راح يتغير . مستحيل نكمل بالشكل ده ...
لكل شى حد
... ;) ,,, ;) ...

mhmdwahab يقول...

السلام عليكم
"ارغى يا عم الأمور"..زى ما انت عاوز
هذا الكلام يتناقد و يتنافى مع اسلوبك معى انا لا افرض نفسى عليك فانت حرة فمن ترغبى للتحدث معة لكنى استغرب من زعلك من اسلوبى فى الكلام معك على الرغم من انة نفس اسلوبك الساخر من قال انى لم اعجب بكلامك او رايك لكنى فقط لا اتعامل مع المدونين بنفس اسلوب برنماج المسلسلاتى فنان يجامل فنان و ينافق فية هل تحبى ذلك الاسلوب يعنى ادخل اقول يا سلام اية الحلوة دى يا شيمو بدون نقد او راى الشخصى فى المكتوب على العموم اعتذز عن الكتابة او لا ادرى اعتذز عن سوء تعبيرى عن راى ولن افرض نفسى مرة اخرى

Humman being يقول...

ghada mohsen
ميرسى يا حبيبتى على ذوقك

ويارب يتغير كل شىء يا غادة أو حتى نخطى أول خطوة فى طريق التغيير ده
خالص تقديرى

Humman being يقول...

أ/ محمد عبد الوهاب
أنا اطلاقا مبحبش أبدا اللى يدخل يقول "برافو يا شيمو ايه الحلاوة دى" وهوه مش مقتنع اطلاقا بكلامى ...الأفضل ميعلقش خالص ..دى حاجة

الحاجة التانية....حضرتك علقت على البوست اللى فات بطريقة غريبة ..أنا بتكلم عن حالات انسانية بصادفها فى حياتى من أصدقاء وأقارب بتصدم فيهم...لقيتك بتقول انزلى لأرض الواقع...حطة صورة "حمدى قنديل وعايزة تجوزى أحمد زويل ....و..و

أنا مش عاملة البلوج ده علشان أتجوز منه ولا من غيره...اللى ربنا كتبه ليا هشوفه فى وقته وفى أوانه ولو كنت عايزة أتجوز من زمان (أى حد وخلاص) كنت اتجوزت
وبعدين فى حاجات شخصية فى كل بلوج لا أتخطى حدودى مع صاحبها ....زى فى ناس حطه صورة د/أيمن نور لأنها مؤمنة بيه...أنا غير مؤمنة بيه اطلاقا..بس مش معنى كدة انى أدخل وأقول ايه الصورة دى ..مؤمنة بفلان ليه؟؟!!!
(الأمور الشخصية خارج نطاق التقييم والنقد الا اذا طرحها صاحبها للنقاش)

أنا بحب النقد البناء اللى بيتكلم على البوست اللى أنا عملاه...لو مش عاجب القارىء ميعلقش عليه ويشوف غيره وهكذا

يمكن كمان أكون فهمت وجهة نظر حضرتك غلط...يجوز.... وأعتذر عن ذلك

شرفت مدونتى
خالص تقديرى