اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 28 فبراير 2010

تصويت

فى موضوع هام يا جماعة بفكر فيه من مدة طويلة ومحيرنى شوية ....قلت آخد رأيكم فيه ونعمل زى تصويت كدة نجمع فيه الآراء بحيث نعرف كام واحد "مـــــع" ..... وكام واحد   "ضـــــد"

افترض ان فى واحدة متقدملها عريسين فى وقت واحد  ...كالآتى :

1- الأول  : واحد ابن ناس ... مش غنى يعنى والشبح على الباب والفيلا فى مارينا ودادى وفافى وكاكى والنظام ده  ..لأ.. انسان عادى متوسط يعنى ... جامعى ........يشغل منصب معقول ..والده فلان الفلانى اللى بيشغل منصب كذا فى المكان الفلانى... والدته أيضا سيدة عامله وهى من عائلة كذا الكبيرة جدا ... وأخوه الكبير بيشتغل كذا فى بنك كذا... ومتجوز فلانة بنت فلان مدير بنك كذا ... وأخته الصغيرة طالبة فى كلية كذا ...وخاله فلان ... وعمه علان.... وابن عمته ترتان ابن ترتانة.......................... الشاب ده مؤدب وكويس وابن ناس وبيصلى وعارف ربنا.....ولما بعتنا سألنا عليه كل الناس والجيران وأصحابه فى الشغل كالعادة شكرت أوى فيه ولما جه يخطب جاب معاه مامته وباباه وخاله وعمه وأخوه الكبير ومراته ....ماشى الكلام....؟؟؟!!!!!!!!! مــــــاااااااااااشى

2- العريس التانى : مجهول الأب والأم... متربى فى احدى "دور رعاية الأيتام".... له اسم ثلاثى مجازا كدة عشان المدرسة والدراسة......جامعى........... بيشتغل فى شركة.... محدش يعرف لا أبوه ولا أمه ولا خالته ولا عمته ولا سته ولا جده ولا اخواته ولا أى حاجة عن أى حاجة غير انهم لقوه محطوط قدام باب دار الرعاية ده ....وبس .... لما راح يخطب (نفس البنت) أخد معاه مشرفة من مشرفات الدار........وباين عليه ابن حلال... والست المشرفة بتشكر فيه جامد... بس هوه من الآخر ....لقيط......

التصويت بقه على ايه .......
تفتكروا لو العريسين دول متقدمين لواحدة فيكوا أو أخت حضرتك...أو بنت خالتك أو بنت خالك...أو أخت صاحبتك...أو جارتكوا...أو بنت عمك...أو بنت عمتك.... أو بنت خالة أخت مراة عمة ست سيادتك..... وجم يسألوك أو يسألوكى هيكون رأيك ايه؟؟؟؟؟؟!!!

مع العلم.... وده شروط أساسية فى التصويت :

1- الموضوع ده لا يخصنى أنا شخصيا لا من قريب ولا من بعيد
2-بعد ما تصوتوا وتختاروا عريس من الاتنين هقولوكوا أنا عاملة التصويت ده ليه وعايزة أوصل لايه ... لأنها قضية مهمة جدا جدا وشاغلة بالى أوى
3- أصحاب العقول المنغلقة اللى مبيعجبهمش الكلام بتاعى ميصوتوش خالص
4-محدش يبص اطلاقا على تعليق الآخر عشان ميتأثرش بيه ...أرجوكم
5- مش عاوزة اختيار "شعــــــــارات" .....بمعنى.... تغمضوا عينيكوا لمدة دقيقة وتتخيلوا نفسكوا مكان البنت دى ... أو حضرتك تتخيل نفسك أبوها أو أخوها أو خالها أو عمها أو جدها ...من الآخر بنت يهمك أمرها ...وتفكر كويس بمنطق العائلات المصرية الشرقية السائدة اللى بتمثل الأغلبية العظمى ......وبعدين تقول رأيك بحيادية ووضوح و تقرر هتختار مين ...بــــلاش شعارات والنبى.
6- العريسين نفس السن وتقريبا شكلهم قريب من بعض ...طول ايه ورجولة ايه...عشان نقفل باب الشكل خالص
7- حاجة مهمة كمان ... ياريت اللى يعرف ياخد رأى والده أو والدته يبقى كتر خيره .. لأن دول أولا خبرتهم أكبر مننا كلنا بكتييييييييير .... ثانيا فى الأول والآخر هما أصحاب القرار فى جواز بنتهم....

مـــاااااااااااااااااااااااااااااااااااااااااااااااااشى


أنا مش فاهمة انتوا قاعدين تبحلقوا فيا كدة ليه؟؟؟!!!!! أول مرة تشوفونى..... ما أنا قارفاكوا فى عيشيتكوا كل يوم ... يعنى مفيش جديد..... يعنى تتفضلوا كل واحد يبص فى الكيبورد بتاعته....و تركزوا كدة وانتو بتجاوبوا الامتحان وخدوا وقتكوا .......وقت الاجابة مفتوح ليوم الأربعاء......
أظن مفيش امتحان أحسن من كدة..... بس اللى هيغش ان شاء الله ..........والمصحف ربنا هيـــــ .......... ولا بلاش ربنا هوه اللى شاهد عليكوا وخلاص
أشوفكوا الأربعاء

هناك 17 تعليقًا:

الشعب لابد له من حكومه تشكمه يقول...

الرسول عليه افضل الصلاه والسلام قال:

تخيروا انسابكم فان العرق دساس.....

إيمان يقول...

ههههههه انا مش ببحلق انا بافكر
ماتزقيش كده
الاول لاصله ونسبه
واكيد التانى له نصيبه اللى يتوافق معاه

Tears يقول...

شيماء انا مش ح اكلم بمنطق العائلات المصرية لان مش كل العائلات منطقهم زى بعض و لا كل الناس بتفكر بنفس الطريقة لان احنا نفسنا طريقه تفكيرنا بتختلف مع تراكم الخبرات و التجارب و السنين و النضج...الخ

انا ح حط نفسى مكان البنت اللى بتكلمى عنها و بما انى مش قاصر و بلغت فى تعليمى و عملى ما أهلنى لتدريس طلبة الجامعه و بحتك فعلا بالشباب دول فلى خبرة معقولة حتى لو مش كبيرة

فاعتقد انى استطيع اتخاذ قرار فردى دون الحديث عن العائلات لان زى ما قلنا فيه اختلافات حسب كل عيلة و حسب درجة استقلاليتك

انا شايفة ان أهم حاجة فى العريس انتى لم تذكريها ابدا اصلا و هى دى المعيار عندى مش عيلته لانى مش ح اجوز العيلة...

صحيح ح شوفهم و المفروض طبعا انهم مش مجرمين لكن دى قضية مش محورية دلوقتى

اهم حاجة هى عقل الانسان و ثقافته و فكره...معنى الرجولة عندى له مفهوم خاص و كاتباه فى تدوينه مبروزاها فى جانب من المدونة

ما كتير المفروض انهم ولاد ناس و تلاقى الواحد من دول دماغه تقرف و ناقص تطلع دود عليكى و انتى قاعده

طيب ح اديكى مثل حى...كنت بتناقش مع عميد فرع احدى الكليات الخاصة الشهيرة و هو شاب فى اواخر التلاتينات و حاصل على الدكتوراه فى الرياضة البحته و من عيله بس اول ما بدا يعبر عن رايه فى المرأه و قضياها و الله العظيم بدات اشوفه فى عينيه مجرد بلاعه و اتفتحت مع ان شكله كرجل وسيم و انيق و كل حاجة حلوة عايزة تقوليها بس فى عينى كان بلاعةو انتى عارفه البلاعه ممكن تطلع ايه
!!

شوفى الزواج حياة متكاملة و مهم فيها التكافء و هو كالاتى:

تكافء فكرى و روحي...افكارنا مش متصادمة

تكافء اجتماعى...ما ينفعش يبقى والدى طبيب و كذلك كل عائلتى بتشغل مناصب و مهن معينه و اجوز ابن عم على البواب مع كامل احترامى لعم على و كفاحة و اخلاقه بس مش ح ينفع يبقى جد ولادى و يكون فيه تفاوت طبقى

تكافء تعليمى...معايا ماجستير و شهادات اخرى و ناوية على الدكتوراه مش ح ينفع اجوز واحد معاه اقل من بكالوريوس

تكافء مادى...ده تقريبى لان ما ينفعش اكون عايشة فى بيت اهلى او من شغلى فى مستوى معين و اهبط معاه مائة درجة

كل الحاجات دى مهمه و ضرورية بس اهم حاجة عقله خاصة و انتى بتقولى متدين لانى مش فاهمه يعنى ايه متدين؟

طيب انا بصلى و اصوم يعنى من الاخر بعمل الاركان الخمسه و باتقن عملى و باحسن معاملة الناس...ابقى مصنفه ايه ربع متدينه و لما اتنقب و لا اربى دقنى او اتلف بقماش اكفن بيه عقلى ولا امشى بخيمة ح اخد لقب متدينه مثلا؟

لو عقل العريس مجهول العائلة كان افضل و افكارة وجدتها تتفق و مفهومى للتحضر و الدين بشكل افضل من الاخر فطبيعى ساختاره لان الحب هو ان أحب عقله اولا و يحب هو عقلى و ليحب عقلى يجب ان يحترمه و يعرف انى لست جسد بل روح و عقل ...انسان قبل كل شىء

اعتذر عن الاطالة و اتمنى ان تكون فكرتى واضحة

تحياتى يا شيماء

كيكى عوووووو يقول...

مالك بس متنرفزة ليه؟؟
اهدى
اهدى هجبلك شيكولاته
ممممممممممممممممممممممممم
مممممممممممممممممممممم
بفكر ايه بقى سبينى افكر برااااااااحه؟؟
اقول الصراحه من اول ما شوفت العريسين
انا علطول اخترت رقم 2
ممكن تكون مشاعرى سيطرت عليه بس لو انا فى الموقف دة هختاره مادام كويس اوى مش هيهمنى موضوع انه ملوش اهل مادام عارف ربنا خالص
الواحدة محتاجه ايه تانى
وايه يعنى لقيط؟؟؟ تفتكرى من الى عليه الذنب فى الحوار دة
انا شخصيا هختاره
وخلص الحوار يا افندم
وعلى بركه الله
لولوولولىىىىىىىىىىىىىى

الطيــر العاشـق يقول...

مشمشه
الحمد ل بجد أنا مش هكون متسلطه ولا قلبي عطووف لدرجة اني مش هعرف أفكر بس بجد الاختيار صعب لأننا أوقات كتير بنتمني حاجات ونلاقيها في كام شخص

بس الحقيقه هخلي الاختيار ليها هيا واللي ترتاح ليه وتحس فعلا انه اللي يستاهل انها تكون معاه
الحب فعلا بيعمل معجزااات كتيره وكبير جدا
هوه ده رأيي المتواضع

mhmdwahab يقول...

السلام عليكم
لا ادرى ان كان النساء من عامة الناس فى الستنيات يلبسن المينى او المكرو جيب الا فى الافلام المصرية فى ذلك الوقت و التى كانت من اعمال منقولة و ليست من الواقع المصرى و لم تعالج سينمائيا و قدمت بنفس الواقع الاجنبى على سبيل المثال قال الفنان عزت العلاليلى فى احدى المقابلات التليفزيونية ان هذا الاعمال كانت تظهر ان كل بيت مصرى بة بار خمارة و ان المراءة المصرية تدير منزلها من القمار و الزوج مهاود و الاولاد فى فساد تمام ثم سأل و هل هذا هو الواقع بالطبع لا و هل فى الاساس كان النساء من عامة الناس يعملن فى هذة الفترة لالا لان الاسرة المصرية فى هذة الفترة كانت لا تزال بالعادات القديمة التى تحض على ان الاب او الزوج هو المسئول عن الاسرة و الام مسئولة عن البيت بخلاف الان و الذى تحول و انقلب كل شىء راسا على عقب فنجد ان الام او البنت هى المسئولة عن كل شىء و الرجل يا فى البيت نائم او على القهوة
و لا ننسى دور اليسار المصرى الذى حكم مصر فى ذلك الفترة و الذى قيد كل ما هو اسلامى و صبغ مصر بصبغة غريبة عن لونها الطبيعى و السوال هل لبس المينى او الميكرو جيب حلال ام حرام اعرف انك انسانة محترمة و مسلمة على خلق نسأل انفسنا ماذا كان يلبس امهات المؤمنين او بلاش دى لو هنقول انهم زوجات الرسول علية السلام طيب ماذا كان يلبس عامة الناس فى عهد الرسول صلى الله علية وسلم هل كان يلبسن المينى و الميكرو هل المفروض ان نتبع من الغربى العلمانى ام بما اننا مسلمين نتبع اوامر الله و سنة رسولة. هى عندها كل ما يمت بصلة الى الاسلام و التدين جريمة يعاقب علية.حتى الشيخ الشعراوى.
بالنسبة الى موضوعك فهناك عوامل عديدة
من بينها ان العريس من الملجاء لن يكون لة اهل طيب لما يبقى فى اولاد ان شاء الله مين يكون عزوتهم و اهلهم الاولاد سوف يشعرون بالوحدة الا اذا كان اهل الام ذو عزوة و اخوتها كثيرون لتعويض ذلك بالنسبة الى الاب لى تجربة شخصية كانت جدتى بعد وفاة جدى و كبر اولادها تعيش بمفردها و احبت ان تربى طفل يونس من وحدتها فقامت بتربية طفل ليس لة نسب و احسنت تربيتة فكبر بيننا و كانة من العائلة و دخل الجامعة و كان شخصية جميلة و عندما احب الارتباط من بيننا فى العائلة فمثلا تقدم الى اختى و الى بيت عمتى رفض تماما ليس لانة من عديمى الاصل ولكن كان شعورهم الية انة اخ فكان تربيتة و نشاتة فى وسط العائلم كا اخ للبنات حتى ان اختى كانت تشرح لى ذلك بقولها انها لا تنظر الية ابدا على انة راجل غريب و لا توجد نحوة اى عاطفة
المهم بعد مرور الايام تزوج من واحدة من الجيران و لا اخفى عليك ان الكثيرات ممن رفضوة ندموة علية لانة ببساطة كان مهذب و نقدر نقول مكسور بخلاف ازواجهم من العائلات و هذة الايام البنت بتحب الرجل ان يكون مقصوص ريشة بالمعنى البلدى
المهم لا ارى ذكر لكلمة حب او مشاعر فى اختيارها اليست بضرورة
و اعتذر عن الاطالة و التوفيق من الله يسعدنى مرورك عندى

مهموهة أحمد يقول...

شوشو حبيبتي يا قمر .......
ايه يا عم التصويت و الكلام الجامد ده
بس انتي غلطانة بجد كان المفروض تعملي خطوط تليفونية للناس علشان تقول رايها
يعني مثلا
9999 9999 99999 999999 0900

المهم انا هتكلم عن الموضوع ده كما لو ان العروسة اختي الوحيدة اللي بتمنالها الخير يا رب

بجد و بعد ما سالت ماما و بابا و احمد
لقيت ان العريس الاول افضل مش علشان العيلة و كده
لا علشان الراجل مهما كان اهله لهم قيمة في حياته و في حياة شريكة حياته

اكيد ده مش تقليل من العريس التاني
بس بردو تلاقينا في الحاجات دي بنقول اللي نعرفه احسن من اللي ما نعرفوش
و على الاقل الراجل لو حصل منه حاجة غلط نلاقي حد من اهله نعاتبه يخلوه يعقل و يصالحوا بينه و بين مراته لو حصل بينهم مشاكل

كمان العلاقات الاسرية ليها جانب كبير في حياتنا و الله

عموما من الاخر و بعد ما اخدت راي الجمهور و سالت صديق ماما و بابا و حذفت اجابة من الاتنين
اخترت العريس الاولاني

و اتمنى نعرف منك بقى يوم الاربعاء ايه اللي هيحصل

خالص حبي و تقديري وواحشاني موت خالص

Ahmed Fayez يقول...



موضوع قوي يا شيماء.

لو البنت دي بنتي أنا هكون عاوز لها أحسن واحد في الدنيا.
إذا كان الاتنين زي بعض في كل حاجة ما عدا إن واحد عنده أهل و التاني معندوش أهل (لقيط) أنا هختار اللي عنده أهل (مع احترامي الكامل للشخص الآخر).

الشخص اللي عنده أهل عنده حاجة زيادة.
عنده ناس كبيرة الواحد ممكن يرجعلهم (اللي ملوش كبير بيشتريله كبير).
عنده عزوة.
أولادهم هيلاقوا أهل لأبوهم و قرايب.
هيكون له نسب معروف و واضح.

بس خلاص.


كيكى عوووووو يقول...

رسيتى على ايه ياقمر فى التصويت؟؟
انا عارفة انه ملوش علاقة بيكى
بس لازم اطمئن على مستقبلى

صبرني يارب يقول...

ايه ده اسمك على اسمي ومن المنصوره
وادي تقريبا فى العمر

اعترفي بسرعه كنتى فى مدرسة ايه اكيد كنتى قاعده جمبي
ههههههههههههههههههههه


اول مره اجي هنا

وادلو بدلوي فى هذا الاستفتاء العظيم


اختار طبعا الى من عيله ومعروف اصله وفصله وله اهل

لاعتبارات كتيره جدا جدا
بس مش هناقش بقى الا لما نعرف النتيجه

تحياتي ليكى

mhmdwahab يقول...
أزال أحد مشرفي المدونة هذا التعليق.
mhmdwahab يقول...
أزال أحد مشرفي المدونة هذا التعليق.
حصان المرجيحة يقول...

هاستأذنك اخد و ادي في الموضوع في دماغي
و مع حد خبرة
و ابقي ارد عليكي

Humman being يقول...

أ/ محمد عبد الوهاب
أنا بس يا فندم بضرب مثال "بدخول الخلاء لا أكثر .. قصدى أقول ديننا أكبر من كدة

أنا متشكرة جدا على تشريف حضرتك ليا وتعليقك عندى بجد حاجة تشرفنى ... بس ليا طلب صغير لو مفيش فيه قلة ذوق ... أنا لما بعلق عند حضرتك أو عند أى حد برجع أدخل تانى علشان أشوف رد صاحب المدونة على تعليقى فيياريت بعد اذن حضرتك تعلق على كلامى عند حضرتك وأنا بدخل دايما أشوف رد صاحب المدونة
أنا بس حابة يبقى الردود اللى جاية كلها على نفس الموضوع اللى أنا طارحاه
شكرا جزيلا على زيارتك ويسعدنى تكرارها يا فندم

mhmdwahab يقول...

ليس قلة زوق ابدا
وطلبك مجاب ليس بين الاصدقاء حرج وربنا ما يجيب زعل ابدا

أميرة الأحلام يقول...

شوشو ياجميل
ايه الامتحان الصعب ده
انا مش هعرف اجاوب
بجد موضوع محير اوى
بس انا رايي ان الحكم في الاول والاخر هيكون لافضليه كل واحد فيهم على التانى مش بالشكل ولا بالفلوس المهم الاخلاق والدين وطريقه التفكير
مش ذنب العريس التانى انه خرج للدنيا لقيط
ممكن يكون لقيط فعلا بس تفكيره وثقافته واخلاقه تجعله في الكفه الرابحه عن اى حد تانى
ده رايي
وبجد الموضوع محير جدااا
ربنا يوفقك يارب ونسمع عنك دايما كل خير ياحبيبتى

فاروق سحير ( فاروق بن النيل ) يقول...

فاروقى بن النيل ...
أولا عندى ولدين الكبير مهندس والصغير طبيب وعايزين يجوزا أى إنى حاكون ذا خبرة كما قلتى
ثانيا : حاخد رأى البنت
ثالثا : حاقولها رأيي ومامتها تقولها رأيها طبعا رأيي هو أن أختار الأول لأن
عادة المجتمع والبيئة والأسرة له تأثير كبير على شخصية الإنسان وتؤثر فى نفسيته ومبادئه وأخلاقه .
معرفش رأى زوجتى لكنه أعتقد مثل رأيي
رابعا :لقد شهادت زواج جماعى لفتيات وفتيان من دور الأيتام وكان عددهم حوالى 22 وكانت محافظة المنوفية قد قامت بإجراءات الفرح من بدلة العريس وفستان العروسة وخلافه وهدية ثلاجة وغسالة أوتوماتيك وفرحت لهم كثيرا وكان الزواج فى حديقة عامة بمدينة منوف وكانوا سعداء جدا لأنهم متفاهمين فى كل شيئ ومتفقين ومتناسقين بظروفهم وهذا هو الأهم فى موضوعك ولاداعى للشعارات الجوفاء.farouksam.blogspot.com