اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الاثنين، 14 يونيو 2010


الشخص اللى فوق ده هوه الانسان الوحيد اللى قدر يرجعنى للتدوين
كنت واخدة قرار مكتبش حاجة تانى
لأن مفيش حاجة عادت تستاهل الكتابة
بس من ساعة ما شفت صورته وأنا منمتش بقالى يومين
حاسة ان جسمى كله سخن ونبضى مش مظبوط وحاسة ان كل أعضاء جسمى
وأولهم دماغى فيها وجع رهيب ممزوج بذهول وعدم تركيز

والدتى بتعيط عليه كأنه ابنها ومفيش فى بقها غير كلمة "منهم لله"
"منهم لله" "الكلمة جامعة شاملة"بلغة المنطق" كل وأى حد... وربنا يعلم بنيتها

مفيش كلام ممكن أقوله أحسن من اللى اتكتب فى كل مدونات مصر
ولا أحسن من اللى اتكتب فى الجرايد واللى اتقال فى كل الفضائيات

بس عايزة أقول للرئيس حسنى مبارك والسيد حبيب العادلى والسيد جمال مبارك
والسيد أحمد عز والسيد هشام طلعت مصطفى والسيد صفوت الشريف
وجميع السادة أعضاء الحزب الوطنى
عايزة أقولكم كلمتين اتنين
1- احنا لسه بعقلنا "يعنى أى تفسير هيتقال من هروب من خدمة عسكرية ..لحيازة سلاح أبيض
لتحرش بالفتيات... لأحكام سابقة...لحيازة مخدرات..للفافة بانجو
كل ده ..... مش لاقية كلمة توفيكوا حقكم
بس اعرفوا كويس "اننا لسه بعقولنا" ومهما عملوتوا مش هنتنازل عنها
2- تانى حاجة .... هقولكوا كلمة أمى "منكوا لله"  

هناك 16 تعليقًا:

Kontiki يقول...

منهم لجهنم ولمزبلة التاريخ وثورة الشعب والمقصلة امين

Tears يقول...

لو فضل الشعب يقول منهم لله يبقى يستحقهم و يستحق اكثر منهم لان اكيد الله غضبان على الشعب لانه تنازل عن انسانيته

الله لا يغير ما بقوم حتى يغيروا ما بأنفسهم


على فكرة فى برنامج مانشبيت اظهروا شهادة ادائة الخدمة العسكرية و بسبوره ايضا مثبت فيه ده بختم حكومى

هي وظروفها يقول...

انهارده ف برنامج مصر انهارده جابوا مكالمه لكبير الاطباء الشرعيين بيقول بروح امه ان حالد توفي نتيجه اسفكسيا الخنق اسفخص عليك وعلي اللي عينوك
وشه اللي بايظ ده من اثار ابتلاع ورقه بانجوا يا يا كلاب ربنا يرحمك يا خالد ويرضي عنك ويغفر لك

حمد الله ع السلامه يا شيماء والحمد لله انك بخير

فاتيما يقول...

قولى للوالدة ربنا يبارك فيها
و يسمع منها هيا
و كل الامهات الاتى دعت على الظالمين بمجرد ما سمعوا قصة خالد و شافوا صورته

ربنا يجعل خالد رمز
و موته ميكونش هدر ابدا


حمدلله على سلامتك
و انتى كمان وحشتينا

blue-wave يقول...

صدقينى ربنا كبير ومش هايسيبهم

mrmr يقول...

حسبى الله ونعم الوكيل
ربنا موجووووود وحينتقم منهم باذن الله

دعوه وليه فى نص الليل مش فى ساعه عصريه

Humman being يقول...

kontki
يارب يا كونت .. آمين
معلش اتأخرت فى الرد النت عطلان بقاله 4 أيام أو أكتر
وحشتيييييييييييييييييييينى

Humman being يقول...

tears
أيوة أنا شوفت البرنامج ده

مش عارفة أقولك ايه... بس احنا فعلا اللى فى ايدينا الحل .. بس 90% مننا يا تيرز سلبى وماشى جنب الحيط... وخنقنهم بالبطالة و..و.. علشان محدش يفكر ولا يتحرك

Humman being يقول...

هى وظروفها
ربنا يخليك ميرسى يا وليد وشكرا جدا جدا على سؤالك
مش غريب عليك الشهامة

Humman being يقول...

فاتيما
ويبارك فيكى يا حبيبتى .. ويرحم خالد برحمته

انت كمان وحشتينى... يارب يكون يوسف بألف خير

Humman being يقول...

blue wave
أكيد مش هيسيبهم.. وربنا يقوينا احنا كمان ونقدر نعمل حاجة
شرفتنى بالزيارة

Humman being يقول...

mrmr
ربنا يستجيب مننا جميعا ويرحمه

خالص تقديرى

ghada mOhsen يقول...

ربنا على الظالم
وربنا عمروا مارح يضيع حقه ولا حق غيروا

ربنا كبير على الكل

ولكل شي نهايه ...
............
بجد إنتي وحشاني وكوني طمنينا عليكي
من فتره للتانيه ماتقطعينا كده مره
واحده ياشيماء ...

تحياتي الملونه لكي أختي

... ;) ,,, ;) ...

Humman being يقول...

ghada mohsen
أكيد مش هيضيع حقه يا غادة.. الشهادة اللى قدموها مزورة وفيها صورتين وختمين وصادرة من قسمين شرطة وده دليل قاطع انها مزورة

شوفى ربنا ....

المهم والله انتوا وحشتونى كلكوا
ميرسى يا حبيبتى على سؤالك واهتمامك
خالص تقديرى

momken يقول...

بصى

كلنا مش خالد الله يرحمه

لكن انا شايف كل الناس معلقه على موضوع التعذيب والتشوهات

الاول عاوزين نتاكد

هل فعلا خالد عنده قضايا مخدرات زى ماقالوا؟؟؟
هل هو فعلا خلصت الجيش بشهاده خدمه رديئه زى ماهو موجود فى الجروب بتاعه على الفيس بوك؟؟؟

هل فعلا هو بيتاجر او بيتعاطى مخدرات؟؟؟

الحجات دى لازم نقف عندها الاول

وطبعا حتى لو كان خالد مجرم..فهو انسان ومواطن مصرى
مينفعش استخدام العنف ضده ولا قتله لو كان اتقتل

انا ضد استغلال السلطه..وضد العنف بكل اشكاله وانواعه

لكنى ايضا مكونتش منتظر ان خالد يموت فى ساحه جهاد
او فى مظاهره ضد اسرائيل..او ضد المسيئين للرسول

خالد الله يرحمه لو الكلام الى اتقال عنه صحيح يبقى الطبيعى انه يموت فى خناقه بين بلطجيه ..او فى مطارده من بينه وبين الشرطه

لكن لو الكلام مش صحيح

يبقى حسبنا الله ونعم الوكيل

الى اعرفه ان التشريح مستحيل يخلع سنان وبكسر فك ويبهدل وش بالشكل
ده

والى يداعى ان التشريح السبب يبقى بيسرح بينا

الموت هنسلم ان سببه الخنق طيب السحجات والكمات والورم وكسر السنان ياسياده المدعى العام جم منين

انا ولا مع خالد ولا ضده
انا عاوز اعرف بس
واثق فى حد يتكلم كلام يرضى ربنا

ِ
تحياتىِ

Humman being يقول...

momken
فعلا لو كان مجرم كان المفروض والطبيعى انه يتحاكم زى أى مواطن عادى ... أو بلاش كلمة مواطن بتاعة الحزب الوطنى دى ... يتحاسب ويتحاكم محاكمة نزيهة زى أى شخص عادى .. ولو كان ثبت ادانته وأخد اعدام أكيد مكناش هنزعل

شكرا لمرورك
خالص تقديرى