اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

السبت، 3 يوليو، 2010

مشربتش من نيلها ليه يا "صبـــــرى"؟؟!!!!

بعد عاركة وشكلة لرب السماء مع ماما...وافقت أخيرا تعمل عملية المياه البيضاء وزرع العدسة فى عينها الشمال (زى ما عملت عينها اليمين من سنتين).. الشكلة لأنها مبتحبش الدكاترة زييى ..وطبعا الست عندها حق
المهم اتصلت بالدكتور علشان أحجز فالراجل المحترم اللى قاعد هناك قاللى أول ميعاد للكشف بعد أسبوعين من دلوقتى!!!!!! قلت الله أسبوعين ايه؟؟!!!!  ده أنا ما صدقت الست وافقت ...هرجع أتشاكل تانى كمان أسبوعين ..لأ مش هينفع... المهم يعنى صوت الراجل ده مكنش مريحنى ... قلت اما أطلبه تانى كدة وأشوف .....

طلبته وقلتله مينفعش بعد أسبوعين الميعاد ده بعيد أوى.... فقالى شوفى انتى بقه!!!!!!!!!! !!!!!!!!!!!!!!!!!!!!! أنـــــ ..أنــــــ ...أننننننن أأأأأأأأأه "دى موسيقى تصويرية" لأنى مش مصدقة نفسى..... هوه أنا رايحة مصلحة حكومية هتفتحلى الدرج وأهرش وأغمز وأبج وأديك عمولة ودخان ونسبة وcommission وكل المصطلحات اللى بتؤدى فى الآخر لمعنى واحد (نهب واستغلال)..؟؟؟!!!!!!!!

قلت يا بت اعصرى على نفسك ليمونة.... لو ماما معملتش العملية دى دلوقتى والله ما عادت عملاها بقية عمرها
قلتله ماشى هشوفك  يا "صبــــرى" بس نيجى امتى ... قــــــــــــالى تعالو "انهـــــــــــــاردة" الساعة 7 مساءا - سبحانك يارب - علشان أدخلكوا أول اسم والكشف هيبقى مضاعف ده غير عمولته!!!!!!!!!!!!!!!!!!!!! قلتله : طب الدكتور هيرضى ؟!!.. قاللى :  لأ ما أنا هقولوا انكوا كنتوا حاجزين من أسبوعين !!!!!!!!!!!!!!!!! .. معنى كدة انه هيضرب نص الكشف فى جيبه + العمولة ....!!!!!!

قاللى اسمها ايه الوالدة .... قلتله اسمها....... وعينى ما تشوف الا النور.... كأنه كان فى السجن وربنا أنعم عليه بالافراج (لأن والدتى من عيلة معروفة فى المنصورة)   وهاتك يا أسئلة ..انتوا قرايب أستاذ فلان صاحب معرض كذا؟...  وقرايب أستاذة فلانة دى لسة عاملة العملية دى عندنا الأسبوع اللى فات انما ست ايه ايديها "فرطة"...... قولت فى عقل بالى آآآآآآآآآآآآآآآآآآآآآآآه ياريتنى ما كنت قولتله اسمها كنت خبطه أى اسم وخلاص

المهم روحنا بالليل ودخلنا أول ناس وشوفت بعينى اللى بيعمله مع الناس الكبار فى السن الغلابة اللى مش بيدفعوا وشخطه فيهم.... قولت الله هوه أنا لو كنت مدفعتش كنت هاجى وأسيبله "أمى يبهدلها كدة زيهم" ؟

عملت التحاليل الازمة وروحت أنا أوديها علشان الدكتور يشوفها ... ف برده كان عايز فلوس....!!!!!

اتحددت العملية الثلاثاء اللى بعده فى مستشفى خاص.... اتصلت بيه على الموبايل علشان نروح على ميعاد العملية.. عملى فيلم عربى ان الدكتور مش هييجى غير متأخر وتعالو الساعة 11 بالليل ... قولتله (هشــــــــــــــــوفك يا صبرى ) قاللى خلاص تعالوا الساعة 7 على المستشفى....
وصلنا المستشفى واحنا طالعين فى الأسانسير ... عامل الأسانسير قالنا طالعين لدكتور مين؟؟؟ قولناله دكتور فلان ... قالنا قصدكوا دكتور صبـــــرى؟؟ .... ما هوه صبرى هوه المتحكم فى كل حاجة الدكتور بيعمل العملية بس...!!!!!

دخلنا الغرفة بتاعتنا وكلمته جه ... اديتله "المعلوم" فقام رميه على الطربيزة وقاللى ..... ايه ده يا آنسة ...؟؟؟؟ ده مينفعش ..... أنا ما بخددتش أقل من كذا..... (تسعيرة يعنى)......شايفة بره فيه كام واحد ... أنا هدخلكوا قبلهم كلهم!!!!!!!... اديتله المعلوم .... ودخلت والدتى وعملت العملية... وأنا خارجة عرفت من السكرتيرة ان الدكتور جه بدرى جدا ..... وان ده كان ميعادنا طبيعى يعنى هوه مدخلناش مكان حد ولا حاجة....

روحنا بعدها 3 مرات  فى العيادة ... متابعة للعملية... وكان كل مرة بياخد المعلوم علشان يدخلنا فى ميعادنا الطبيعى وميقعدناش للساعة 12 بالليل زى ما بيعمل مع الناس التانية...

الغريبة انى كنت كل ما أروح المشوار ده مع ماما أنزل ألاقى عسكرى  المرور لازق لى مخالفة على العربية ... بالرغم انى بكون ركنة فى مكان مش مخالف... وأفضل أدور على الأستاذ العسكرى عشان أديله حاجة هوه كمان عشان يشيل المخالفة..... لدرجة ساعات كنت بقول ..."الله... هوه الراجل العسكرى ده متفق مع "صبرى" عليا ولا ايه؟؟؟؟؟!!!!!! فعرفت بعد كدة ان الشارع ده "مصيدة " لبتوع المرور بيصطادوا فيه العربيات وياخدوا "ايتاوات " .... قصدوا مخالفات".....

ملحوظة مهمة : صبرى كان عامل نغمة الموبايل بتاعه  النغمة دى "اللهم ارحمنا فوق الأرض... وتحت الأرض ...ويوم العرض عليك"... الموبايل ده بتاع عقد الصفقات.... كنت كل ما أسمع النغمة دى... أقوله... "ربنا يخدك فوق الأرض .... وتدفن فى أسفل السافلين تحت الأرض .......ويولع فيك يوم العرض عليه".

عايزة أقولكوا ان لولا "أمى" ... ولولا انى محبهاش تتبهدل ..... ولا كلب زى ده يكلمها كلمة .....أنا كنت ضربته بالجزمة القديمة

وأنا من مزنقى ده بقول..... يااااااااااااااااااااااااااااااااااااااااااااااااااااا حبيبتى يا مصرورتى......

هناك 20 تعليقًا:

Kontiki يقول...

حمد لله على سلامة الوالدة
مكنتيش دفعتى هو اللى خلق الدكتور دة مخلقش غيرة !وبعدين خلى الاتفاق مع الدكتور مش مع السكرتير طالما هو سمسار ومعندوش ضمير كدا احلى حاجة النغمة الدينى لزوم المنظرة عشان ربنا يبارك فى الرشوة ناس تقرف جتهم البلا

Shaimaa يقول...

Kont حبيبتى

المشكلة ان نجاح العملية دى متوقف على دكتور يكون كويس ... وده سألنا عليه كل الناس أجمعوا انه كويس
الغريبة ان الدكتور ده فاتح من زمان والسكرتير ده معاه من زمان برده
السؤال بقه ... هل الدكتور بعد كل السنسن دى مجالوش ولا شكوى من المرضى بسبب صبرى ده؟؟؟؟.. ولا ايه الحكاية بالظبط؟؟؟!!!!!! غريبة مش كدة

هي وظروفها يقول...

مساء الخير يا شيمو

بعد ازيك والف مليون حمد الله ع السلامه لماما

وربنا يبارك فيها وف عينها وحياتها

ثم اما بعد
صبري وهو كل الصابرين من امثاله هما الللي شربو من نيلها
صبري شاب بار بامه اللي هي مصر
انما اللي زي اي حد طبيعي نادر الحدوث شرب وهيشرب من كيعانه وتتقفع مرارته
كلنا بنستغل بعض بصوره عجيبه
واللي بيطول مليم وبيفرمه ف جيبه
صبري هارش اليله وعارف ازاي يبر امه ويراضي اعدائها
احنا بقينا من الاعداء يا شيماااااااااااااء
يخرب بيت ام كل صبري
الهي يا كل صبري يصرف الفلوس دي علي العيا
وبما اني ساعه مغربيه ولاني هقوم اصلي ناااو
هدعي لمصر اللي بقت مرات ابونا انها ترحمنا شويه من عيالها ونيلها وحساس جيلها وكلاب حكمها واللي بينهبوا خيرها ومستغلين شعبها ونهيبين اي مصلحه تحت شعار الجنيه يا عزيزي هو الهدف وخليك طبيعي ومرتشي ومنافق تبقي طبيعي مش مختلف
فل عليكي

ندى الياسمين يقول...

طب ليه ما قولتيش للدكتور على سبيل الغلاسه

انا اساسا لما حد بيعمل معايا كده باشتم الدكتور والعيشه والى عايشنها واشوف غيره

اخر مره كانت دكتور اساسا مش زحمه وانا عارفه بس شايف نفسه لاسباب معينه
وكنت باحجز عشان مريم تعبانه
الست الى هناك فتحت معايا تحقيق
وانتى يعنى لازم تيجى على اخر لحظه واول حجز بعد اسبوع

انا بقى ما عنديش تفاهم رصيت لها شويه هى والى مشغلها وقلتلها شكرا مش عايزه العلاج الى يجى من خلقة امثالكم

حاجه بقت تقرف والله

ندى الياسمين يقول...

اه والف سلامه على مامتك

ربنا يشفيها ان شاء الله

سوري اصل انا دماغي بايظه الايام دي

ويكا يقول...

ههههههههههه

انتى نسيتى تقولى
وعجبى

فى الاخر

emymony يقول...

حمدلله على سلامه مامتك
ربنا يكمل شفاها على خير
بالنسبه لصبرى ربناااااااااا قادر عليه هو والله زيه
بس فعلا بقت كله حاجه بتمشى بالاسلوب ده
تناولنى اديك
تنفض لى بالجزمه وارميك
ربنا يرحمنا ويهدى النفوس
تحياتى

Shaimaa يقول...

هى وظروفها

وليد الدوغرى الراجل الجدع
منور الدنيا
(يخرب بيت كل صبرى ويصرف الفلوس دى كلها على العيا) اللهم آمين آمين آمين يا وليد

لو أصبح فعلا هوه ده الطبيعى يا وليد "وأعتقد فعلا انه كدة" يبقى البقاء لله عليكى يا مصر
نورتينى

Shaimaa يقول...

ندى الياسمين
الله يسلمك يا ندنودة
والله يا ندى أنا عندى احساس ان الدكتور نفسه عارف ومطنش .. ماهوه مش ممكن يكون بيشتغل عنده من أكتر من 7 سنين مثلا وميكونش حد من المرضى اشتكى لحد دلوقتى...... وبعدين أنا عملت حساب المتابعة بعد كدة ... لو الدكتور زعقله ممكن يحط أمى فى دماغه ولا حاجة

وألف سلامة على مريومة وأجازة مصيف سعيدة

Shaimaa يقول...

ويكا

ما أنا سيبتها ليكوا انتوا بقه

شرفتنى بالزيارة

Shaimaa يقول...

emymony

الله يسلمك يا ايمى...
ربنا يرحمنا فعلا من أممثالهم.... خايفة نكون احنا نفسنا اللى بنكبر الناس دى لما بنوافق نديهم .... بس والله الدافع الوحيد أمى... ولما الموضوع يتعلق بالصحة كمان بنضطر نقبل حاجات كتير احنا متأكدين انها غلط
خالص حبى وتحياتى

Shaimaa يقول...
أزال المؤلف هذا التعليق.
مهموهـــــــة يقول...

شوشو شوشو شوشو شوشو شوشو شوشو شوشو حبيبة قلبي انا وروحي وعمري
واحشااااااااااااااااااااااااااااني موت موت موت موت موت موت موت موت موت يا قلبي
بجد نفسي اكلمك والله

والف الف الف مليون سلامة لماما وربنا يشفيها ويحفظها من كل شر يا رب وتنور دنيتكم دايما يا رب

اما عن عم صبري
فكان المفروض تغيري العنوان

صبري علشان شرب من نيلها اتسمم بعيد عنك وبقى كده

لكن لو ما كانش شرب كان زمانه بقى كويس

وبجد اي حد زي صبري ده المفروض يولعوا فيه بجاز

ابقي ابعتيلي قوليلي الدكتور ده عيادته فين يمكن اكون اعرفه
ههههههههههههههههههههههههههههه
وساعتها ابعتله كام صبري على كيف كيفك
ههههههههههههههههههههههههه

وحشتيني يا قمر

خالص حبي وتقديري

Shaimaa يقول...

مهمووووووووووووووووووهة

انتى كمان وحشانى جدا والله.... ويارب تكونى حققتى الل نفسك فيه من الشغل

ياريت تبعتيله اتنين تلاتة صبرى زيه يخلصونا منه
بالتوفيق دايما يا حبيبتى وسلامى لماما وأحمد

Desert cat يقول...

انتى اول مرة تتعاملى مع الاشكال دى ولا ايه ؟
ماهو معروف عدة الشغل دايما نغمة دينية او زبيبة وجلابية
اما المرور فدول لا يقلوا عن امين الشرطة اللى قاعد فى الفسم لو رجتى تعملى محضر لو دفعتى يحوله جناية وانتى واقفه مدفعتيش يبقى ادارى ويتحفظ وضاع حقك للأبد
دلوقتى شعار المصريين استغل مجال عملك اسوء استغلال ميصعبش عليك حد ولا تعمل حساب لاى حد .. وقيسى بقى على كدا بننصب على بعض وبنسرق بعض امال لو حد جاى من بره وحسوا لغته مختلفة شوية .. ده احنا من الافعال دى خلاص بقينا مفضوحين فى كل مكان

Shaimaa يقول...

desert cat
الحقيقة يا "كات" أنا بحاول بقدر الامكان أهرب من أى حاجة توصلنى فى الآخر انى أدخل مصلحة حكومية.....
بس أنا عارفة ان البلاوى دول بقوا فى كل مكان .... بس التجارة فى المرض هيه اللى بتصدم

خالص تقديرى

Tears يقول...

اسلوبك حلو اوى و مسلى للقارىء جدا


دمتى بخير و حب دايما

mrmr يقول...

عذرا
لعدم التعليق
فهذه دعوه خاصه
http://jokes-egyptian.blogspot.com

77Math. يقول...

ليه ما حاولتيش تكلمي الدكاترة أو أي حد أعلى منه؟

Shaimaa يقول...

77math
والله يا حماس أنا عندى احساس ان الدكتور نفسه عارف بكل ده ومطنش وعامل مش شايف.... لو مكنتش أمى هيه صاحبة الموضوع كنت قلبت الدنيا عليه..

شكرا على المرور
خالص تقديرى