اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 7 يوليو، 2010

رحمة ربى بى

لا أعرف هل وجودك بخريطة عمرى هو رحمة ربى بى ؟؟!!! أم هو قدر محتوم سجل منذ قديم الأزل...علاقتى بك علاقة خااااااااصة جدا لا أعرف لها مسمى حتى الآن ...علاقة تتخطى حاجز "الدم" والقرابة من الدرجة الأولى ... هى علاقة مختلفة ...

أشعر معك بمنتهى الحب...حتى ان لم تبوحى به... ولكن كل نظرة خوف وحنان وعطف تصرح بها عينيك ... تصرخ "بحبك أوى"..

عندما أمرض أحيانا تغفو أمى بحكم السن والكبر... وأغفو أنا من شدة الألم ....أما أنت ..فلا ... أشعر بعينيك حائرة ما بين جبينى ..و يدى...و قدمى تجس هنا وتمسح هناك .. وما تبرح تستكين الا عندما أقسم أنى بخير... 

عندما تأتيك ملابس جديدة ...فتقسمى أن لن يرتديها أحد فى البداية الا أنا (لأنك تعلمى مدى عشقى للموضة)... فأقسم  أنها لك ولن أرتديها الا بعدك.... وفى النهاية أنصاع لتوسلات قلب يهوى اسعادى...

لا تنادينى الا ب "عمرى".... نادرا ما تنطق اسمى "شيماء" الا أمام الغرباء... أما اسمى الحقيقى عندها هو "عمرى " أو "عمر قلبى من جوة" كما تقولها دائما...

تقرأنى قبل أنا أنطق بحرف..... أحيانا تضيق الدنيا بى ... فأنوء بدموعى بعيدا عن أمى...وأرتدى القناع الكاذب فأغمر وجهى بابتسامة عريضة مصحوبة بمزاحى المعتاد معها ....حتى لا أحملها ما لا تطيق...... فتأخذنى أختى الغالية.... ونتنحى بعيدا عن أمى وتسبق عينيها لسانها متسائلة : مالك ؟؟؟؟؟ فيغمرنى الكبرياء قائلة : مفيش حاجة.... فتثبت عينيها على عينى الكاذبة الهاربة وتقول : مااااااااااالك.... فيتلاشى القناع...ولا أملك الا الانهيار والبكاء بين أحضان تمتص حزنى.. وتذيب كربى... وتمحو ضيق صدرى....

عندما يأتينى عريس ممن يودون السفر والاقامة بالخارج... أشعر فورا برعشة تجتاحها... وأقسم أنى أسمع نبضات قلبها الخائف من الفراق الذى أعلم جيدا انه لو حدث لسوف يقضى علينا نحن الاثنتين.... ولذلك ألغى الموضوع بالكامل حتى لو كان العريس "لقطه" كما يقولون.... ولا أندم- أتعرفين لماذا يا أغلى من رأت عينى؟ - لأننى أعلم أنه سيأتينى نصيبى فى ميعاد معلوم ومكتوب ... لأنى أسمع دوى دعواتك لى والتى يتصدرها دائما رجاء من الله أن أتزوج معك فى نفس بلد اقامتنا وألا أفارقك.... 
أتودين معرفة السبب الحقيقيى؟؟!!!! هو أننى لن أتحمل فراقك ... تماما كما لن تتحملى ... ولذلك لن أقدم على الفراق مهما حدث .. وسوف يتولى أمرى ربى... هو مولاى ..وأعلم بحالى.....

أنت مصدر التفاؤل الوحيد بعمرى...لا أعرف من أين تأتين بهذا الكم اللانهائى من الأمل والتفاؤال....تظلم الحياة...وتغلق الأبواب...وتسدل الستائر...فيأتى صوتك متهاديا فرحا حاملا البشرى بقرب الفرج ودنو الفرحة وتحقيق الأمل...وثقة فى الله لم ولن أرى مثلها ما حييت

أحيانا يعطينا الله نعم كثيرة ويحرمنا من أخرى .. ولكن مع وجود أخت مثلك لا أشعر مطلقا بنقص فى شىء ... عندما تتكالب على المشاكل والأزمات أتذكر وجودك وابتسامتك التى تقابلنى يوميا بعد طول عناء بالعمل...أنسى الأزمات ...وأتذكر حبك واهتمامك وذوبانك بداخلى فأعلم أن الله يكافئنى بوجودك بحياتى ولن ...لن... يخزلنى مطلقا.. 

 أشعر أن هناك خيط ضعيف لا يراه أحد الا أنا وأنت فقط ولا يعلم به الا الله.... خيط يمكن أن نسميه "خيط الحياة"... أعتقد.. لا. .. أؤمن... أن عمرى وعمرك يرتبط كل منهما بالآخر.. فاذا أتى يوم قدر فيه أنا لا تكونى على قيد الحياة...سأغادر أنا الأخرى فى صمت.. لأنه لا يعقل أن يعيش بشر بدون رحمة الله ...وأنت حقا رحمة ربى بى...

كل سنة وانتى طيبة يا عمرى وأختى وصاحبتى وبنتى وكل حاجة ليا فى الدنيا...مش لاقية كلام يوفيكى حقك.. بس انتى أكيد من كوكب تانى غيرنا .... انتى أحسن منى فى كل حاجة ..أطيب منى... ومتساحمة أكتر منى... وحنينة ونقية جدا جدا جدا ....وأنا فرحانة أوى أوى أوى انك أحسن منى كل حاجة..

ياااااااااااااااااااااااااااااااااااااااااارب ما تحرمنى منها

هناك 25 تعليقًا:

نـــــــــــــور يقول...

:)
الله لا يحرمكوا من بعض
بس :)

Kontiki يقول...

الكلام دة يا شيماء اللى بيتقال علية من القلب للقلب
كل سنة وهى طيبة وكل كلمة انتى كاتباها انا حاساها عشان تشبة كتير علاقتى باخواتى البنات :)

Shaimaa يقول...

نــــــــور
آمين ..آمين...آمين
خالص تقديرى

Shaimaa يقول...

kont الغالية جدا
ربنا ما يحرمك منهم يا كونت...

ياااااه كفاية أوى الواحد يبقى عنده ولو شخص واحد فى الدنيا يحبه أوى كدة ويحس بيه ويخاف عليه ...ده بالدنيا كلها

دمتى بخير وسعادة وأمل دايما يارب

Tamer Nabil يقول...

ربنا يخليكم لبعض

وكل سنة وهيا طيبة وبخير

مع خالص تحياتى

ندى الياسمين يقول...

الله على الجمال

ربنا يخليكم لبعض يارب

طب ما تسلفيهالي شويه ما انا اسمي شيماء برضه
ههههههههههههههه

كل سنه وانتم طيبين

Shaimaa يقول...

tamer nabil

ربنا يخليك ... وانت طيب

شكرا لمرور حضرتك
خالص تقديرى

Shaimaa يقول...

ندى الياسمين...

وانتى طيبة يا حبيبتى... بس انتى فعلا عندك أختين أنا وهيه... بس هنعمل قفلة كدة يا مشموشة

خالص حبى

emymony يقول...

ربنا يخليكم لبعض يارب
فعلا الاخوات دول رباط قلب ونبض لحب الحياة
ربنا مايحرمكم من بعض ابدا ابدا
ويسعدكم يارب
تحياتى وحبى

بنت وولد يقول...

الله عليكى
انتى كده خلتينى ازعل اكتر ان مليش اخت بنت
طول عمرى نفسى فيها عشان اقول عنها الكلام اللى انتى قولتيه على اختك ده

ربنا يخليكوا لبعض و يبعد عنكم الزعل
و الفرقه
و يزود الحب بيينكم دايما

amirelhob يقول...

ربنا ما يحرمكم من بعض

جميل اوى اننا نحس ان فى حد فى حياتنا ليه مكانه غير طبيعيه وغير عاديه عندنا

جميل لما نلقى فى قلب بيدق لينا فى روح عايشه عشانا فى ايد مرفوعه غير ايدنا وبردو بتدعى لينا

بوست جميل اوى فى معانى وكلمات تبين قد ايه الحب بينكم

ربنا يخليكم لبعض ويحققلكم امنياتكم

ومن قلبى بتمنلكم كل خير وسعاده وصحه وتوفيق وفرح وابتسامه تدوم يا رب طول العمر

Shaimaa يقول...

بنت وولد
ازاى بقى تزعلى ان ملكيش أخت بنت ..أومال أنا روحت فين؟؟!!

والله فعلا أحلى حاجة فى الدنيا لما يكون للواحد أخت ويكون سنها قريب من سنك وتكون حنينة كدة زى نور عينى أختى ... والله هتحسى انك خلاص لا محتاجة أصدقاء ولا قرايب .. هيه بالدنيا

نورتينى بالزيارة
خالص تقديرى

Shaimaa يقول...

amiralhob

ربنا يخليك على الكلام الجميل ده.. انت فعلا وصفت أختى صح... لولا ايديها المرفوعة ليا بالدعاء دى أكيد مكنتش عشت.
شكرا على مرورك
خالص تحياتى

غير معرف يقول...
أزال أحد مشرفي المدونة هذا التعليق.
Shaimaa يقول...

الأخ الغير معرف...
انت غير معرف ليه مش تخليك أد كلامك وتظهر كدة وتقول انت مين ولو انى عارفاك كويس جدا.. مفيش حد متابع تعليقاتى وغاوى ييجى يعلق عليها فى غير موضعها بغباء غير سيادتك

لو قعدت 100 سنة أفهم سيادتك أكيد مش هتفهم حاجة ..ايه اللى جاب الجواز فى السبانخ....

أنا بتكلم عن البشر ككل ربنا قال "لكم دينكم ولى دين" وبعدين أنا بقول مش أول ما نشوفهم نقول يااااااااااع ... لو ربنا مكنش عايزهم مكنش خلقهم من الأول مجبتش سيرة جواز يا حشرى...

وبعدين دول مش ليهم رب هوه اللى خلقهم ... ولا انت برده سيادتك اللى هتحاسبهم... ربنا هوه اللى يحكم عليهم اذا كانوا هيقبلهم برحمته الواسعة ولا يدخلهم الجنة... أنا ببتكلم على العلاقات البشرية ... ده اذا كنت بتفهم أساسا

وبعدين انت مالك ... انت مالك يا حشرى.. مش من حقك يا حشرى تعلق على رأيى ولا تصادر عليه.. ولا حتى تقراه... صاحبة المدونة اللى هيه "TEARS هيه بس اللى من حقها انها تقرا التعليق بتاعى يا حشرى .. مفيش فايدة فى المتخلفين عقليا دول

أول مرة أبقى قليلة الذوق كدة... بس فضلت مهذبة كتيييير وآدى النتيجة يا حشرى ... يا حشرى ... يا باراشوت

Tears يقول...

ربنا يخليكوا لبعض دايما :)

انتى بنت جدعة اوى و عقلك محترم و ياريت كل الشباب زيك يا بنتى
................


ملاحظة ان الدبان اللى بيلف فى المدونات وصلك من ردك على اخر تعليق..بلاش تفورى دمك و تأكدى ان الغالبية كويسيين و ناس محترمة بس دول كام واحد اساسا ماحدش بينشرلهم تعليقاتهم عشان كده بيدخلوا يتطفلوا فى كل حته و بيحاولوا يفرضوا نفسهم لان كرامتهم مش بتهمهم فى سبيل انهم يكلموا حد فينا جايز اوى لا يجرؤا فى الواقع انهم يكلموه لان مستواهم واضح اوى


دمتى جميلة ...قوية و حره

عايش... ولكن !!!! يقول...

ربنا يخليكوا لبعض
:)
وميحرمكوش من بعض

Shaimaa يقول...

tears
شكرا يا تيرز

أنا بس بلاقى ناس كتييير أصحاب فكر وكلمة وعقلية محترمة بيضطروا يقفلوا المدونات بتاعتهم ويلغوها تماما بسبب الناس دى وبسبب التعليقات المتخلفة دى

بزعل جدا لما نتحرم من قلم وعقل وفكر محترم بسبب الغباء والتطفل

دمتى بخير دايما

Shaimaa يقول...

!!!! عايش... ولكن..

آمين أمين آمين...

شكرا جزيلا لمرورك
خالص تقديرى

momken يقول...

الله...ايه البوست الجميل ده


اللهم امين


تحياتى

mrmr يقول...

ربنا يباركلك فيها ويخليكوا لبعض
وكل سنه وانتوا بالف صحه وسعاده
ربنا يبارك فى حياتك ويسعد اوقاتك

Shaimaa يقول...

momken

شكرا ربنا يخليك
شرفتنى بالزيارة
خالص تقديرى

Shaimaa يقول...

mrmr..
ربنا يخليك ...متشكرة جدا على ذوقك العالى ده... وربنا يخليلك كل وأى حد قريب منك وبتحبه

خالص تقديرى

محمد التركى يقول...

السلام عليكم ورحمه الله وبركاته
الأخت العزيزه/ شيماء
مدونتك جميله جدا جدا
وموضوعاتك كلها بسم الله ماشاء الله جميله وبتدل على ثقافتك

ربنا يارب يخليكو لبعض
شئ جميل أن الواحد يتعلق بشخص قريب منه ويصبح كل دنيته ويضيع فرص كتير علشان يكون بالقرب منه
وتأكدى أن ربنا سبحانه وتعاله هيعوضك خير جدا ونصيبك هيكون أحسن من الفرص ديه كلها
علشان قلبك الطيب المخلص اللى لمسته فى كلامك
ويارب مايحرمكو من بعض ابدا

ده كان مرورى الاول وليس الأخير
ويارب تتقبلى مرورى وماكنش ضايقتك بتعليقى
ويسعدنى جدا مرورك بمدونتى

تقبلى تحياتى لشخصك الطيب
محمد التركى

Shaimaa يقول...

أ/ محمد التركى
وعليكم السلام

شكرا جزيلا لمرور حضرتك .. وحقيقى نورتنى بالزيارة ... وأبدا مضايقتنيش اطلاقا..

خالص تقديرى