اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الاثنين، 18 أكتوبر، 2010

مكالمة السيد الرئيس...!!!!!!!!!!!!!!!!!!


كل شهر أو شهرين كدة أقرأ ان السيد الرئيس أجرى مكالمة هاتفية بفلان بعد ما شاهد برنامج كذا ... أو تدخل بنفسه لحل مشكلة كذا بعد لما عرف ان الموضوع كبر مثلا ..


من الأمثلة على كدا تدخله فى موضوح البنت الطالبة اللى كانت كاتبة موضوع انشاء عن التغيير وسياسة البلد اللى كانت البنت هتتحرم من الامتحان ويمكن الاعتقال بسببه ..
وآخر المكالمات دى اجراءه لمكالمة هاتفية بأحد الجنود القدامى بعد ما شافه فى برنامج صباح دريم وهوه بيقول انه رفض رشوة مليون جنيه ده سنة حاجة وسبعين ...فاتصل الريس عشان يهنيه على بطولته وقناعته وسمو أخلاقه وانه مثال يحتذى بيه ...


والأمثلة من نوعية المكالمات دى كتييييير ....


حلو أوى اهتمام الرئيس واتصاله بنفسه وتدخله لحل أى حاجة أو تشجيع أى شخص ....
ولكن ......
أنا شايفة الموضوع بشكل مختلف تماما .... شايفة ان فى حاجات أهم بكتيييير جدا من موضوع" التعبير" اللى كتبته البنت ومن المدرس الغبى اللى وقف عند الموضوع العادى ده بغباء مصرى معهود ..... شايفة كمان ان فى مشاكل أكبر وأهم وأخطر من الراجل اللى رفض الرشوة من 25 سنة ... أيوة هوه بطل مقلناش حاجة .... بس خلاص أخد نياشين واتكرم على كل الأصعدة ... فكان كفاية ده جدا .... ولا ايه؟؟؟!!!!!!


فى كوارث ومصايب ومشاكل بتيجى كل يوم فى الجرايد وفى التليفزيون الصبح وبالليل ... وبتبقى محتاجة ولو ربع مكالمة من دول تنهى معاناة أحياء وبلاد ومحافظات كاملة يعيش فيها أكتر من 7 مليون فرد  والرئيس لا بيدخل ولا بيتصل و بتفضل الكارثة على ما هى عليه وعلى المتضرر اللجوء لنفسه .. وابقى قابلنى ....

حد ممكن يقولى دلوقتى ومين اللى قال لحضرتك ان الريس مش بيدخل ويتصل ويحرك المياه الراكدة .... مش كل حاجة بيعملها الريس لازم تتذاع ..."دعونا نعمل فى صمت" - أرد على الأخ ده وأقوله ...الدليل ان الريس لم يتدخل ان الأزمة والمشكلة بتفضل قائمة والناس بتعانى مش بس لمدة شهر أو اتنين... لأ.... لسنين ..وسنين .. وسنين .... ولا حياة لمن تنادى... والبلد خلاص على حافة الهاوية ... ولا ايه؟؟!!!!!!!

طيب بلاش يتدخل بعمل مكالمة لحل الكوارث والمصايب والمشاكل .... بلاش دى..... نبعد شوية عن الجانب المظلم الأسود المهبب ده ... بلاش تشاؤم على رأى أنكل "أحمد عز" ... خلينا فى الجانب المشرق المزهزه ....
فى شباب ورجالة ودكاترة ومهندسين كل مدة كدة يطلعوا يا حبايبى فى برنامج العاشرة مساءا أو 90 دقيقة أو الحياة اليوم ... وحاضن يا حبيبى مشروع عبارة عن اختراع  "س" أو "ص" أو "ع" .... ويقعد يشرح لمدة ساعة أقعد يشتغل فيه كام سنة ... ويحلف 100 يمين ان الاختراع ده هيوفر طاقة كذا ... ومجهود كذا ...ووقت كذا...وصديق للبيئة ... وبدل ما بنصرف على كذا ده كام مليون ..الاختراع ده هيوفر الكام مليون دول ... وانه سجله وأخد براءة اختراع ....بس الحمد لله الاختراع دلوقتى فى الدرج ومحدش سمعه ولا هيسمعه باذن الله تعالى - وهيفضل المشروع فى الدرج الى أن :
  1.  ربنا يكرمه وتشوفه شركة أجنبية فى دولة أوروبية وتشترى منه حق تنفيذ المشروع ويستفيد بيه الأجانب .... والراجل يهج من مصر خالص
  2. أو  يتوفاه الله تعالى ... ويفضل المشروع فى الدرج بس برده بيبقى طلع من الموضوع ده بحاجة مهمة جدا ألا وهى ان ربنا كرمه "وطلـــــع فى الـتليفزيـــــــون" ....
بس عندى حل تالت مختلف تماما "اننا نولع فى الدرج ده تماما يمكن نرتاح"

ليه سيادة الرئيس مش بيدخل فى الحاجات المهمة دى ؟!!!! ..... ليه دايما الاتصالات بتبقى ملهاش موقع من الاعراب .... ولا لازم المشاكل والكوارث تفضل قائمة عشان نتلهى فيها عن حاجات تانية ؟؟!!!!!!!!!!!!!!

عايزة أقول حاجة مهمة جدا جداا.....
تدخل الرئيس بنفسه سواء بمكالمة هاتفيه أو بأى طريقة أخرى ده مش معناه حاجة حلوة نتباهى بيها .....لأ ..... دى مصيبة كبيرة ..كبيرة...كبيرة ....تدخل الرئيس بنفسه معناه ان السادة المسئولين "فى الـضـــيــــــاع" ...ان الهيكل الوزارى " مـــلوش لازمة" ..ان الجهات المعنية "بتــــشخـــــــر" .... ان الأجهزة التنفيذية "صـــــــفـــــــــــــــــر" ...... 

هناك 14 تعليقًا:

Kontiki يقول...

عندك حق طبعا مفروض سياسة الدولة متكونش ممثلة فى شخص او فرد هو الرئيس اللى فى ايدة عصاية سحرية المفترض انها سياسة معروفة و قوانين بيخضع لها الجميع ميقدرش الرئيس لمجرد كونة رئيس انه يحل المشاكل بالعصا السحرية بس دة صعب هنا عشان احنا فى دولة حكم الفرد

Tears يقول...

يا بنتى انتى بتصدقى حركات مبارك دى

دى كلها استعرضات لغرض فى نفس يعقوب

هو فيه رئيس دولة بتنهار و الناس على طول فى مظاهرات و اعتصامات و غلاء اسعار و بطالة و مصايب و يسيب كل ده و يقعد مع بطل فيلم حاحا و تفاحة اتفه فنان ساعتين الا ربع

خلاص صلاحيته انتهت و تلاتين سنة حكم غير شرعي كفاية اوى و نتايجه باينه اوى اوى

ده الناس بقت بتدعى عليه علنى

Tears يقول...

يا بنتى انتى بتصدقى حركات مبارك دى

دى كلها استعرضات لغرض فى نفس يعقوب

هو فيه رئيس دولة بتنهار و الناس على طول فى مظاهرات و اعتصامات و غلاء اسعار و بطالة و مصايب و يسيب كل ده و يقعد مع بطل فيلم حاحا و تفاحة اتفه فنان ساعتين الا ربع

خلاص صلاحيته انتهت و تلاتين سنة حكم غير شرعي كفاية اوى و نتايجه باينه اوى اوى

ده الناس بقت بتدعى عليه علنى

Tears يقول...
أزال المؤلف هذا التعليق.
Shaimaa يقول...

Kontki..
مش عارفة هنيبتدى امتى يا كونت نعرف نعمل أى حاجة فى الدنيا ... نفسى نبتدى بس

Shaimaa يقول...

tears
خلى البلد تولع أكتر ما هيه والعة ... هيحصل ايه أكتر من اللى فيها دلوقتى

جمهورية فوضى يقول...

احنا لا عايزينه بتدخل لا فى صغيرة ولا فى كبيرة
احنا عايزينه يحل عننا ويرحمنا بقى

mrmr يقول...

يا حبى دى مجرد ثمثليه علشان نصدقها
وكله مستخفى وراء الستار

Ms Venus يقول...

شوفى

مواقف كتيررررررر اوى اوى كانت البلد بتولع فيها وهو يا بيهنى فريق الكورة يا بيجتمع بالفنانين


مش لازم امثلة محددة لان فى حاجات بتوجع القلب

حاجة تنرفز وتحرق الدم

مش لاقية تعبير يتقال بصراحة

Shaimaa يقول...

جمهورية فوضى ..
يااااااااااااارب

Shaimaa يقول...

mrmr...
اظاهر يا مرمر معتش لاقلى حاجة يعملها

Shaimaa يقول...

Ms Venus...
ما هوة ده بالظبط يا فينوس اللى أنا بقول عليه .... طيب مش هتحل حاجة وهتسبها والعة ...بلاش بقى اللقاءات والمكالمات اللى تحرق الدم دى
ملكة انجلترا مردتش تعمل عيد ميلادها مراعاة للحالة الاقتصادية والنفسية السيئة اللى بيمر بيها شعبها

احنا بقى تلاقى الدويقة واقعة على دماغ أصحابها واحنا بنكرم الفنانين

أحسن تـستاهـل يقول...

بصي يا شيماء.. أنا مش هعلق على كلامك.. إنما انا هقول اننا كل ما الوقت بيقرب من انتخابات الرئاسة هتحسي ان الناس كلامها هيزيد في السياسة.. وكل اللي كان مش هامه هيهمه.. غصب عننا.. انا حاسة اننا بنحس بالاحتقان من وقت للتاني بيزيد بيزيد بيزيد

مها ميهوووو

Shaimaa يقول...

أحسن تستاهل..
مهاميهووووو...

بصى يا مها احنا بنمر بأصعب فترة ... أنا مش محترفة سياسة أوى .. بس احنا مصممناش على التغيير دلوقتى هنقضى بقية عمرنا زى ما احنا كدة ويمكن يسوء الحال أكتر وأكتر
فلازم نحاول بأى طريقة نغير لازم

دمتى بخير