اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الخميس، 5 مايو 2011

عجايب...!!!!!

مرتضى منصور : خرج من السجن ومرشح نفسه لرئاسة الجمهورية ...أنا كنت عارفة ان المنصب ده هيلم
بس نصيحة لوجه الله ..."العباسية" محتجاك أكتر ... فيه أوضة Double بحرى ترد الروح محجوزة باسمك
سرير ليك وسرير للقذافى تدخلوها مع بعض "زنقى ...زنقى" مع مراعاة ربط لسانك فى السرير لعدم ازعاج 
السادة النزلاء.... ... ومتقلقش خالص هنعملك اذاعة داخليه تطلع تهبهب فيها كل يوم زى ما انت عايز وهنذيع الفقرات دى على "موجة كوميدى" كل يوم جمعة ها ..... هتعملى سى دى امتى؟
 ******
جمال مبارط "عطس" ... علاء عمل بيبى فى التواليت.... فتحى سرور نظر بامتعاض... أحمد عز لابس شورت
أما أحمد شفيق الحمد والشكر ليك يارب "قصر شوية"
كلام فاضى مالى الجرايد كل يوم وكأن التفاهة بقت "سلو بلدنا"
عايزين حق الشهداء.....فلوسنا اللى اتسرقت....كرامتنا اللى اتهانت ....حكم قضائى يشفى الصدور
انما الشورت والبيبى خليهم للصحفيين الفاضيين
 ********
ال سيت كوم الكوميدى بتاع "بن لادن " رفه عننا والله بعد 3 شهور "الجزيرة ...العربية...الحرة "  يااااه ..الحمد لله الواحد كان هيضرب مشوار ل "دريم بارك" أهو "دوبى يقابلك بالترحاب" جه لحد عندنا ... بس أنا فاكرة اننا كنا طيرنا العصفورة اللى كنا دقنها على قفانا من فترة كبيرة .... يمكن بقى عمو أوباما معرفش يحقق ال Change....Change...Change. اللى كان بيغنيها كل يوم قال يالله العصفورة أسهل وربنا ما يحرمنا من قلبه الرهيف اللى مش عايزنا نشوف صور بن لادن وهوه مقتول ...مع ان الصورة دى كانت تقضى وربنا ستار حليم.. 

******
اللواء العيسوى نفسيته تعبانة ودمه محروق من نشر صور علاء مبارك  وفتحى سرور والمغربى داخل السجن وهيفتح تحقيق ..... ربنا يقدرك على فعل الخير .... طب معندكش نيه تفتح حاجة تانية ؟!!! ... يعنى مش ناوى تلم البلطجية وتنزل الشرطة اللى واخده على خاطرها وتضبط البلد بقى ولا انت فاضى بس لمعاينة سجن طرة اللى مينفعش خااااااااااااااااالص لاستقبال مبارك ده على أساس ان عنده "سل رئوى" ...ربنا يخليك لمصر
***************
عمرو موسى منشكح وفاشخ بؤه من الودن دى للودن دى بمناسبة "المصالحة الفليسطينية" ... ربنا يسعد أيامك دايما .... فى مثل بيقول "اللى اختشوا ...ماتوا" .... كان المفورض تكسف من نفسك ...بقالك 10 سنين أمين عام لجامعة الدول العربية ... ومعرفتش حتى تقعد الطرفين على تربيزة مفاوضات .... أكيد العيب كان فى التربيزة
**************
لوووووووووووووووووووولى ... فاروق حسنى طلع برىء مسرقش حاجة خالص لا هوه ولا شيخ المنصر "مفيد شهاب"  ... الراجل كان بياكل من عرق جبينه  ...كل يوم الصبح يجيب ورقة بيضاء ويقعد يشخبط  قصدى يرسم فن تكعيبى منبسق من الفكر اللاشعورى المتمركز على  شلولخ ... زى اللوحة التحفة دى اللى بتثبت تأثره ب فن "نبش الفراخ"
******
يوم 05-05 تعاطفك لوحده مش كفاية ..... ولع شمعة .... "شغل الناصر صلاح الدين" .... اسمع "اخترناك" ... اتشحتف ونزل دمعتين ...أى حاجة تدل على "قلة الأصل"   يووووووووه  قصدى "رد الجميل" ... ده مش يوم عادى ... ده يوم فارق فى تاريخك يا مصر .... ده اليوم اللى أثبتنا فيه ان "الصبر على البلاء من شيم المصريين"

**************
تم اقالة د/ السباعى كبير الأطباء الشرعيين .... أساسا عشان تصريحاته عن صحة الرئيس ... انما توقيعه على تقرير مقتل خالد سعيد المزور من كااااااااااام شهر .... وتقرير موت الشهداء فى ميدان التحرير على انه سكتة قلبية مش رميا بالرصاص دى حاجات جانبية ثانوية "كمالة عدد" .... مسك مكانه بقه النائب المباشر بالتزكية مش عشان نضيف وخبرة وينفع يمسك منصب حساس زى ده ..لأ ...عشان يتملا المكان ده وخلاص
أظن الراجل اللى مسك مكانه ده هيحتفظ بلسانه فى الثلاجة لحسن يزلف بكلمة كدة ولا كدة تطيره من مكانه
مؤسسة الطب الشرعى دى بالكامل عايز "مليارية" مش مليونية عشان تنضف
*************
البابا شنودة ردا على مظاهرات السلفيين .... "حبوا أعداءكم" ..... وبعدين؟ هنفضل نطبطب نطبطب مش هنتغير أبدا  ... عايزين رجال دين مسلم ومسيحى أقوياء جامدين مثقفين واعيين يحلوا كل حاجة من جذورها ويبقى ليهم دور قوى وفى نفس الوقت محايد ميفرضوش علينا حاجة وخصوصا الاستكانة والرضاء بالواقع

***************
الصحفيين : الكورة يا د/ شرف ... هتفوق امتى وتحل مشاكلها ؟؟.... الفتنة الطائفية .... هتحلها امتى؟!! ... قنا هتسيبها كدة ؟؟؟..... شيلت محافظ قنا ليه يا حكومة ضعيفة ؟!!!... البصل اتسرق امبارح من بلكونتنا وديته فين يا د/شرف  ؟؟؟!!! 
أنا لو مكانك يا د/ شرف أطلع من هدومى وأرفض رفضا باتا قطعيا أدخلها تانى ....
الرحمة شوية يا صحافة صفراء -وبطولات زائفة- المفروض تتنقى وتتغربل بس البركة فى جدو "يحيى الجمل" هوه اللى اختار قياداتكم الغير كفىء واشترك فى اختيار المحافظين ...
بس برده مش هسيبك يا د/ شرف الا لما تقر وتعترف بمكان البصل...!!!!!!   


هناك 12 تعليقًا:

IMSA يقول...

شيماء :
بجد برافو ، 10/10 بوست رائع اسمحي لي اعلق عندك - بستئذن ما هعلق لاني رزل -
مرتضى منصور خرج من السجن - تقريبا ملقيوش السيديهات واهي فكرة نلاقي سيديهات لكل المرشحين للرئاسة على الله تصيب مع " عمرو موسى ، ومرشح السلفية والاخوان واي واحد عايز ضرر مصر والمصريين " وربنا يكون في عون القذافي ليكون ليه سي دي مع اخونا مرتضى احساسي ان الراجل دا معاه سي دي لكل البشر الا شخص واحد - مرتضى منصور - .
//
الشورت والبي بي وعطسة جمال اهم 100 مرة من الطلبات لان ريما رجعت لعادتها القديمة .
//
بن لادن والسيت كوت بتاعه دا يخلي الواحد يسأل هم كانوا فاكرين انهم هيضحكوا علينا بقصة موته المزيفة ، ولا انه شهيد والكلام الاهبل دا . يمكن عشان اوباما خسر في المقارنة بتاعة الترشيح للانتخابات ؟
//
اللواء العيسوي ، احم ربنا يعينك وترجع لنا الشرطة في خدمة الشعب ومش حاجة تانية ؟
//
عمرو موسى صورة طبق الاصل من حسني مبارك ، وسلمي لي على الترابيزة او الكرسي اللي هو كان قاعد عليه شكله بيحب الكراسي ..
//
فاروق حسني برئ من الكسب الغير مشروع طب المستشار اللي كان بياخد مبلغ وقدره والفلوس اللي كانت سيبة في وزارة الثقافة وسرقة لوحة الخشخاش ، والسجادة الاثرية اللي فارشها في مكتبه دا كله هيعمل بيه ايه ؟
مفيد شهاب شغال من عرق جبينه ، ما حط القانون وقبل منه نظام الجامعات في جيبه يا خوفي ليعمل عملية ترقيع لبنطلونه بعد ما الدستور اتغير ..
//
5/5 يوم التضامن للمنافقين والهبل والعبط ، بضم الهاء والعين ..
//
بخصوص رجال الدين يجب توضيح المفهوم السليم للاسلام بدل الجماعات المتخلفة ، سواء كانت في الاسلام او المسيحية ..
بابا شنودة حبوا اعداءكم ، وانت رمز ديني لمصر كلها ..
//
الصحفيين اخص لهم كلمة واحدة هو ممتاز القط ، اسامة سرايا ، والكبار دول ما اتحكموش ليه بتهمة الكذب الدولي ..
//
تحياتي لكِ يا شيماء اسف على الاطالة والرزالة في التعليق .

Tears يقول...

حلو اوى يا شيماء

مرتضى منصور اترشح مخصوص عشان يتم استضافته فى البرامج لانه مريض بحب الظهور

ماينفعش وزير داخلية يبقى عنده 80 سنة و الدليل اللى حاصل دلوقتى

MaNoO يقول...

ههههههههههههههه بوست تحفه بجد ونعلق بقى بمزاج كدا
مرتضى يامرتضى مش فهمه الراجل دا يا ما عبيط يا اما عبيط برده
الصحافه بقى عندنا فشل فيها زريع سواء المقروءه او المرئيه عايزه تنضيف فى العقول مش تنضيف للفساد بس
تصدقى عجبنى منظر عمرو موسى فى المصالحه شبه ابو العريس اللى ملوش شخصيه يوم الفرح بس كنت مبسوط بمصر ودا اهم حاجه عندى
ولو سمحتى بقى بلاش نتكلم عن الفن المعظم بتاع الكابت فاروق حسنى دا نجم
دكتور عصام شرف بقى ربنا يقويه ويقدره

Ms Venus يقول...

حبوا اعدائكم دى بيقولها لينا احنا يا شيمووو علشان لما بنشوف اهانة وشتيمة وقلة ادب على رمز دينى عندنا وبلا سبب وبكل بجاحة ووقاحة فى مظاهرات وواقفين يتفرجوا كل اولى الامر

ميروحش بقى الشباب القبطى يشتبك ويرد عن رمز كنيستهم وتتحول لحرب اهلية

مظاهرات السلفية بقت شىء غير محتمل اتفرجى عليهم على اليوتيوب وعلى الفاظهم اللى بيقولوها هتعرفى

ولازم يقولنا حبوا اعدائكم علشان البلد متولعش

Ms Venus يقول...

صحيح يا شيموو هو قال اغفروا مقالش حبوا اعدائكم :)

لان اخواتنا عمرهم ما هيبقوا اعداء


ههههههههههههه سامحينى على الغلاسة

ابراهيم رزق يقول...

متفق معك كثيرا مختلف معكى قليلا
برجاء متابعة اخر بوست لى

لكن اهم شىء نرحم د عصام شرف لا يمكن حد يعرف يشتغل و هو تحت الاضواء 24 ساعة حتى و هو فى الحمام و بعدين مرتضى سليط اللسان مش عاجبه د عصام شرف طب انت تعجب مين
و بعدين مين دول احمد و امير و اميرة اللى فالق اهلنا بيهم و الله شكل احمد ابنه ده هيعدى جمال فى الغتاتة

تحياتى

Humman being يقول...

IMSA....
اطلاقاااااا مفيش اطالة ولا حاجة ...حضرتك تعلق زى ما انت عايز ... ياريت يبقى فيها عقول مستنيرة زيك كدة كتير..
خالص تقديرى

Humman being يقول...

Tears...
ربنا يخلصنا من أمثال مرتضى منصور ده واللى على شاكلته
نفسلى أعرف هيه مصر أم 58 مليون مواطن دى مفيش فيها واحد محترم حازم على خلق يبقى وزير داخلية ؟؟؟

Humman being يقول...

MaNoo...
أيووووووة يا مانو.. أنا فرحانة جدا جدا جدا بالدور اللى مصر رجعت تلعبوا تانى ... سعيدة برجوع ريادتنا تانى
فن فاروق حسنى ده بقة تحفة ... وفعلا مبذول فيه مجهود كبير .. !!!!!
مش عارفة مين الهبل اللى كانوا بيشتروه
نورتنى

Humman being يقول...

Ms Venus...
لأ مفيش غلاسة اطلاقا انتى تقولى رأيك بكامل حريتك تماااااااما... العنوان ده كان مكتوب على معظم مواقع الأخبار "البابا شنودة فى عظته الأسبوعية يقول (حبوا أعداءكم) ... وانتى أكيد أدرى برده هوه قال ايه

اللى عايزة أقوله ايه يا فينوس ... معدناش عايزين حلول سطحية لحاجة لا من شيخ الأزهر ولا البابا ولا أى مسئول دينى مهما كان
فيه مظاهرات كبيرة جدا للاطاحة بشيخ الأزهر على فكرة وعاطينه مدة محددة للاصلاح
عايزين أى مشكلة موجودة نقف ونواجه ونتكلم ونحل حلول جزرية
عارفة انى بحب جدااااا "جورج اسحاق" منسق حركة كفاية ... راجل صاحب موقف ورأى .. مصرى صميم .. مفيش حاجة حصلت فى مصر الا وشارك فيها زى "حل مشكلة أزمة مياه النيل فى أثيوبيا مؤخرا" .. ونجيب ساويرس .. وغيره وغيره
لازم نبقى ايجابين ... عهد أقعدوا فى البيت وأطيعوا الحاكم دى خلاص ولت

مصريين ايجابين ... ولسنا مسلمين ومسيحين .. (مصــــريـــين)
نورتينى يا قمر

Humman being يقول...

Ms Venus...
لأ مفيش غلاسة اطلاقا انتى تقولى رأيك بكامل حريتك تماااااااما... العنوان ده كان مكتوب على معظم مواقع الأخبار "البابا شنودة فى عظته الأسبوعية يقول (حبوا أعداءكم) ... وانتى أكيد أدرى برده هوه قال ايه

اللى عايزة أقوله ايه يا فينوس ... معدناش عايزين حلول سطحية لحاجة لا من شيخ الأزهر ولا البابا ولا أى مسئول دينى مهما كان
فيه مظاهرات كبيرة جدا للاطاحة بشيخ الأزهر على فكرة وعاطينه مدة محددة للاصلاح
عايزين أى مشكلة موجودة نقف ونواجه ونتكلم ونحل حلول جزرية
عارفة انى بحب جدااااا "جورج اسحاق" منسق حركة كفاية ... راجل صاحب موقف ورأى .. مصرى صميم .. مفيش حاجة حصلت فى مصر الا وشارك فيها زى "حل مشكلة أزمة مياه النيل فى أثيوبيا مؤخرا" .. ونجيب ساويرس .. وغيره وغيره
لازم نبقى ايجابين ... عهد أقعدوا فى البيت وأطيعوا الحاكم دى خلاص ولت

مصريين ايجابين ... ولسنا مسلمين ومسيحين .. (مصــــريـــين)
نورتينى يا قمر

Humman being يقول...

ابراهيم رزق...
حالا هروح أقرا البوست الأخير

أحمد مرتضى منصورة ده على فكرة صورة طبق الأصل من أبوه .. نفس التفكير نفس طولة اللسان ...نفس الغباء...هما بس بيحبوا يظهروا فى التليفزيون من غير ما يكونوا عارفين هيقولوا ايه أساسا
شكرا على مرورك