اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الاثنين، 2 نوفمبر، 2009

يتربى فى عزو

عمو "عزو" ربنا ما يحرمنا منه يارب بيقول ان الشعب المصرى هيطق من الرفاهية ...هينفجر من من مستوى
المعيشة الشاهق .....هيطرشق من "العز" اللى بيبرطع فيه يمين وشمال والدليل " الدامغ" والقاطع والأكيد على كدة
الكلام اللى قاله عمو عزو ..وأكد اننا باذن الله مش هنسمعه من أى حد تانى غيره (مش عارفة ليه .. يمكن هنموت بعدها ولا حاجة؟؟ .. الله أعلم!!!!..) أنا بس مش متأكدة اذا كان كل حديثه ده كان عن مصر ولا "مقاطعة تانية" ؟!!!... على العموم ده هنعمله سؤال مسابقتا فى نهاية الفضفضة.... المهم... سبب الرخاء بقه الآتى :
  • مصر فى الخمس سنين اللى فاتت ماشية لأدام
  • اقتصادها بقى قوى
  • مستوى المعيشة فيها ارتفع
  • متوسط الدخل السنوى الحقيقى للفرد ..زاد
  • الموظفين مرتباتهم زادت 100%
  • اتنين مليون من أهلنا اللى بيشتغلوا فى المحليات مرتباتهم زادت فوق ال 100% .. ب 50% كمان
  • مليون مصرى اشتروا سيارات جديدة فى الخمس سنيين اللى فاتت
  • 250 ألف سيارة اشتراها المصريين فى 2008
  • أكثر من 200 ألف أسرة اشترت وحدات اسكان اقتصادى أو متوسط وعملت احلال وتجديد لبيوتها فى الريف
  • معدلات الالتحاق بالتعليم الخاص بتزيد زيادة كبيرة
  • 3.5 مليون فرصة عمل فى 4 سنوات - فى سنة 2008 لوحدها 700 ألف فرصة عمل... منهم 600 ألف اتأمن عليهم فى التأمينات الاجتماعية.
أنا مش عارفة والله العظيم الافتراء بتاع الشعب المصرى ده ايه ؟؟؟...... كم الرخاء والرفاهية ده كله وبرده مفيش فايدة؟؟!!!!!!!!!! يقولوا فين ؟.. مين؟؟!!....مش شايفين حاجة ولا حاسين بحاجة ؟ خلاص كلكوا بقيتوا خريجى " مدارس النور والأمل" .." العمى"كاسى على عنيكوا .. أمال زيادة المرتبات 150% وديتوها فين ؟ صرفتوها فى ايه ؟ أكيد فى weekend ما أنا عارفاكو غاويين "العين السخنة وشرم"-... بلاش .... ال 250 ألف سيارة فارهة دول راحوا فييييييين ؟!!!!! ايه عملتوهم ميدالية؟؟!! ولا هتنكروا الخير اللى بقيتوا فيه وتقولوا ده طلعت عربيات بالريموت - ولا المساكن الفارهة السوبر لوكس....افتروا بقى على الراجل وقولوا محصلش .. ده متابعكوا... حتى فى الريف قاعدين تعملوا احلال وتجديد وتشطيب سوبر لوكس... اشى باركيه وحمامات شاكوزى وسقف معلق.. يا ساتر .. نفسى مرة أسمع منكوا كلمة " الحمد لله" .
وكله كوم "ومفجر ثورة التطوير والتحديث " ده كوم تانى .. يار ب استرها بسترك الكبير وميفجرش حاجة تانية .. كفاية علينا التطوير والتحديث .. لحسن تفجيرين فى الراس يوجع .
نشكر الله عز وجل اننا مسمعناش الكلام ده ومش هنسمعه من حد تانى يا عمو "عزو" لأننا لو كنا سمعناه من اتنين تلاتة كمان غيرك كان حصلنا "تفجير ثورى مكثف فى المخ" حاجة كدة شبه "مفجر ثورة التطوير والتحديث" - بقى مقياس تقدم وازدهار أى شعب تقاس بعدد السيارات اللى اشتراها وكم الالتحاق بالتعليم الخاص - أهى دى المصيبة الكبيرة فعلا .. كون الناس تسيب التعليم العادى الحكومى وتروح للخاص معناها ان التعليم الحكومى فى تدهور شنيع ونسبة الأغبياء والساقطين والفاشلين فى مصر فى ازدهار كبير - كمان مين اللى قال لحضرتك ان كل العربيات اللى بتتكلم عنها اللى اشتراها زوات الدخل المتوسط وتحت المتوسط؟؟؟!! مش الطبقة الارستقراطية؟؟!!!!!!! عند حضرتك احصائية بأسماء ومستوى معيشة كل فرد فيهم .
نرجو من سيادتكم التكرم برصد الآتى:
  • عدد الشباب المهاجرين يوميا بمراكب غير صالحة للاستخدام الآدمى الى ايطاليا وغيرها
  • عدد الشباب خريجى الجامعات اللى قاعدين على القهاوى "بلاش نتعبك ونقولك ارصد اللى قاعدين على سيابر الانترنت".
  • عدد البنى آدمين اللى قاعدين فى بيوت من الصفيح
  • عدد البنى آدمين الذين لا يصلهم ماء أو كهرباء
  • عدد البنى آدمين اللى قاعدين فى مناطق جبلية زى الدويقة وغيرها معرضة للانهيار فى أى لحظة .
  • عدد الأفراد ساكنى المقابر .. وياريت والنبى تعد كل غرفة فيها كام شخص ...معلش تعبينك معانا دايما .
  • عدد العوانس والعانسين .."حلوة عانسين دى"
  • عدد المرضى اللى بيموتوا قبل ما ييجى عليهم الدور فى العلاج
  • عدد الناس اللى قاعدة فى مناطق ايواء جماعى "وخيم" لحد ما ربنا يفرجها كام
  • رصد وتقييم حجم وكم الفساد والرشاوى والمحسوبية فى جميع القطاعات.. اللى خلاص خرج عن نطاق التقييم "معتش ينفع يتقيم"
معلش طلب أخير ... ياريت تبقى تشوف ولو حلقة واحدة من حلقات برنامج "واحد من الناس" بتاع عمرو الليثى" ... أنا عارفة انت مبتحبش البرامج اللى بتفترى "على التطوير والتحديث" من غير سبب دى .. بس معلش مرة واحدة متضرش...بجملة .
بتهيألى كفاية كدة انهاردة ولا ايه ؟؟!!!!!!!!!!!!!!!!!!!!!!!!!
**سؤال مسابقتنا...." أستاذ أحمد عز" فى حديثه عن "ثورة التطوير والتحديث" اللى اتفجرت مؤخرا كان بيتكلم عن بلد ايه؟!!
لو عرفتوا الاجابة اتصلو على 0900999999 وجوايزنا كثيرة (100شقة فارهة اسكان متوسط - 200عربية من ال 250ألف بتوع 2008 - 500فرصة عمل بزيادة 150% فى المرتب من بتوع 2008) يلا كل ما تتصل أكتر .. فرصتك فى الفوز أكبر .

هناك تعليقان (2):

winner يقول...

كان بيتكلم عن دولة (كوسالاندا)

Shaimaa يقول...

عندك حق winner "كوسة" لاندا