اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 24 يناير، 2010

اتصل على 0900



المنبه ضرب الساعة 7.15 الصبح رايحة أفتح عينى لقيت ايدين ماسكة عينى بحواجبى ومكلبشة فيهم كأنهم هيهربوا ...قولت مين ؟؟؟!! مين؟؟؟!!!! وأنا بصوت بصوت عالى ..لقيتها أختى بتقولى عاوزة تفتحى عينيكى؟؟!!! ...قولتلها أيوة يا زفتة ابعدى عنى وسيبى عينى... قالتلى : اتصلى على 09005555


قمت قايمة عشان أجرى وراها ...بدور على الشبشب الأرنوب البمنبى اللذيذ بتاعى .....ملقتهوش...لقيتها واقفة وماسكة الباب ومدخلة راسها بس وبتقولى ..عاوزة الشبشب....اتصلى على 09008888


طلعت أجرى وراها فى الشقة عشان آخد بتارى ...آه ...مش ممكن حد يعمل فيا فصل كدة وأسكت....هيه طيبة وبتسكت....أنا لأ... أنا شعنونة...فى وسط الجرى وحاورينى يا كيكة....جرس الباب ضرب بقول مين لقيتها "أم حلمى" بتاعة اللبن اللى بتيجيلنا الأحد والأربعاء من كل أسبوع... قمت نادهة على ماما ... فماما قالتلها : والنبى يا "أم حلمى" تبقى تيجى ثلاث أيام فى الأسبوع بدل اتنين...يعنى خليها الحد والأربعاء والجمعة... "فأم حلمى" قالت لها ....لأ.. لو عايزانى الجمعة اتصلى على 09006666 ...ماما قالت لها : ايه؟؟ انتى اجننتى يا ست انتى ولا ايه؟؟؟


سبتهم أنا فى حوار الجنان والهبل اللى حط على "أم حلمى" وقلت ألحق أغسل وشى وأسنانى وألبس عشان أروح الشغل...بفتح الحنفية ملقتش مية....ولقيت أختى واقفة وماسكة المحبس وبتقولى عاوزة مية؟؟!!! اتصلى على 09004444


قمت سايبة المية والحمام والحنفية وطلعت عشان أجرى وراها لقيت الساعة داخلة على تمانية ....قلت يا بت الحقى البسى بدل ما بتمضى تأخير كل يوم ...وبعدين ابقى خدى طارك بالليل...رحت ألبس لقيت طنط "مسمار مقطوم" اللى ساكنة فوقينا بتنده على بتاع الأنابيب ...-هيه الوحيدة اللى مرديتش تركب غاز فى العمارة- بتقوله هاتلى أنبوبة يا بنى... قالها : اتصلى على 09003333 هتخشى السحب ويمكن تكسبى أنبوبة هدية يا حاجة... قالتله ايه؟؟؟؟!!!! .. بيقول ايه ده يا ولاد؟؟؟!!!! ... الواد ده أهبل ولا ايه؟؟؟!!! وهاتك يا نده عليا ... يا شيماء .... يا مشمشة ... والنبى يا حبيبتى تشوفى الواد ده بيقول ايه؟؟؟!!! أنا عايزة أنبوبة ..الأكل على النار...وأنا ولا كأنى هنا....!!!! أنا هلبس.... ولا هجرى ورا أختى.... ولا هشوف طنط "مسمار مقطوم".


فتحت التليفزيون ...قلت يسلينى وأنا بلبس...لقيت "سرحان" لسة مموتش "نفيسة" لحد دلوقتى

والبارد الساقع الغتت "كرومبو" لسة معرفش مين اللى سرق فروة الخروف


ولقيت 100 تليفزيون.... و100 موبايل.... و100 لاب توب.... قلت أحمدك يارب عوضت صبرى خير


ولقيت واحد بيرسم صورة أحمد السقا وبيقول بطل أفلام "مافيا" والجزيرة" و"تيتو" و"أفريكانو" يبقى مين؟؟؟!!!! قعدت ساعة أفكر يا ترى بيكلم عن مين؟؟؟!!!.. وفى الآخر معرفتش...!!!


ولقيت واحد جايب طبق فيه "جبنة" و"عيش" و"خيار" ومسدس .. وبيسأل ايه الاختلاف اللى فى الصورة؟؟!!! ...قولت ليه بس بتصعبوها كدة... وبعد تفكير عميق لقيته طبعا "الخيار"...!!!!!! "المسدس" بنعمله صينية فى الفرن مع البطاطس


ولقيت واحد بيسأل على مسلسل "لن أعيش فى جلباب أبى " اللى شغال دلوقتى على "دريم" وبانوراما دراما 1 - بيسأل المسلسل اللى هوه بطولة نور الشريف و"عبلة كامل" ده... مين البطلة اللى كانت قدام نور الشريف؟؟؟!!!! قولت لأ بقه ... ده تعجيز...آه.... ايه الأسئلة الصعبة دى... متسهلوها شوية ...وفى وسط م أنا سرحانة وهيمانة فى 0900 0900 0900 الكتيييير دى لقيت الساعة داخلة على 8.20 لقيتنى بجرى ورا نفسى....


توكلت على الله وقلت أنزل لقيت ماما بتنده عليا وبتدينى شنطة فيها قطعة قماش وبتقولى ابقى فوتيها على الأتيليه اللى ورانا وأنا هبقى أروحله آخر النهار ....ومتنسيش تفوتى على "أم مسعد" تقوليلها على الحاجات...."أم مسعد" دى زوجة البواب متعهدة الذهاب للسوق بتجيب كل حاجة من خضار ل...ل... وبتاخد نسبة....


نزلت ولسة بقول لطنط " أم مسعد ..عاوزين "كرنبة يا أم مسعد و اتنين كيلو طماطم ومتنسيش الشبت والبقدونس... فقامت قالتلى ...لو عاوزة أى حاجة بعد كدة اتصلى على 09001111 وحاجتك هتوصلك ان شاء الله فى خلال 24 ساعة من توقيت اجراء المكالمة..قولت الله ...هوه فيه ايه ؟؟؟!! عفريت 0900 أصاب العمارة ولا ايه؟؟.... قولت يا بت مش وقته ...روحى الشغل ولما ترجعى ...ابقى اصرفى العفريت مش وقته دلوقتى.....

عديت بسرعة على الأتيليه ولسه بديله قطعة القماش قالى ... اختيار التفاصيل من تاييرات لبلوزات كلها دلوقتى يا آنسة على 2300 اتصلى واختارى التفصيلة اللى مامتك عاوزاها وبلغينى بيها ... قولتله ..الله .. هوه مش (2300) ده رقم خالدة الذكر "عود القصب" ...مدام زعزوعة ... قصدى مدام "أمينة شلباية"؟؟؟ ايه؟؟!!! انت سرقته منها ؟؟؟ قالى لأ .....أنا اشتركت معاها فيه وباخد نسبة......

حسيت انى هجنن ايه اللى حصل؟؟؟!!! ...البلد اتجننت كلها وأنا مش عارفة ولا ايه؟؟؟؟!!!! شكل العفريت بتاع 0900 اللى سكن بيتنا عمل جروب على الفيس بوك وموزع المهام على زمايله؟؟؟!!!!!


اللى شاغل بالى بس دلوقتى مين اللى عمل 0900 دى؟؟؟!!!


ياريت لو عرفت الاجابة ..تتصل فورا على الخط الساخن 09009999999999

هناك 23 تعليقًا:

أميرة الأحلام يقول...

شوشوووووو....
هههههههههههههههههههههههههههههههههه
يانهار ابيض بجد موضوع جميل جدااااااااا ياشوشو والله
فعلا انا مش عارفه ايه الي حصل في البلد دى هو ناقص فعلا يعملوا زى ما بتقولي كده وتبقى كل حاجه في حياتنا 0900
انتى عارفه قد ايه الاسئله والمسابقات الي بيجيبوها دى بترفزنى جدا وبترفع ضغطى من التفاهه الي فيها ومن استخفافهم بعقول الناس الي بتتفرج عليها
اقول ايه
ربنا يرحمنا برحمته من 0900 والى بتعمله في الناس
دايما يا شوشو مواضعيك جميله قوي ومميزه
ربنا يخليكى ويحققلك كل امانيكى
ونفرح بيكى قريب ياقمر
بس اوعى ما تعزميناش
ومن غير ما نقولك لو عايزه تعزمينا اتصلي على 0900
ههههههه
بالتوفيق دايما يا حبيبتى

أميرة الأحلام يقول...

اه شكلي كده زهقتك باول كرسي ده ههههههه

Shaimaa يقول...

زهقتينى.... ده انتى دايما مشرفانى ومنورانى بأول كرسى
يارب نحضر فرحك انتى قريب جدا على حد يستاهلك وهاجى من غير عزومة ومن غير م أتصل عل 0900 يا أحلى مرمورة فى الدنيا

الطيــر العاشـق يقول...

معلشي يا مشمشه سامحيني يعني ماهو من كتر الضحك مش عارفه أنا بقول ايه؟؟؟

سامحيني من سؤالي لأني مش جوه البلد ؟؟؟ مش هعرف أتصل عليكي علشان أستفسر بس بجد هوه الكلام ده بجد ...... ولا ايه.؟

ههههههههه سامحيني والله

winner يقول...



كان يا مكان يا سعد يا إكرام و ما يحلى الكلام إلا بذكر النبي عليه الصلاة و السلام.
كان فيه واحد حب يضحك على الناس لأنه لقيهم ناس طيبين، هُبل من الآخر. فكر في فكرة جهنمية، قال احنا نعمل مسابقة جايزتها ألف جنيه، و نخلي الناس تتصل، و تمن المكالمة جنيه و نص، نص لشركة الاتصالات و جنيه لينا، و كل ميت ألف واحد يتصلوا نخلي واحد يكسب، يعني كل ما يكسبوا ميت ألف جنيه يطلعوا منها ألف جنيه.

و الفكرة انتشرت و اتعملت كتير. و الناس الطيبة برضه بتتصل على أمل إنهم يكونوا من الواحد في المليون اللي يكسب.

الظاهرة دي مش هتنتهي غير لما الناس تبطل هبل و عبط و كل واحد يلتفت لشغله و يبطل يستنى الثروة اللي هتهبط عليه من السما.

هي وظروفها يقول...

ههههههههههههه

خايف اصحي من النوم ملقيش مصر واسال عليها برده يقولوي اتصل 0900

ساعتها هلاقي القفص برده شاغل الخط اصلها بقت وسيه

ربنا يستر وميجلكيش عريس
يكون كسبان فلوسه من كرومبو والنصيبه لو طلع كرومبو نفسه هو العريس

Shaimaa يقول...

الطير العاشق
لأ يا حبيبتى ..طبعا كل الحوار ده خيال...الشخصيات حقيقية زى أختى وأم مسعد وجارتى بس ده تخيل للى ممكن يحصل فى المستقبل- بس طبعا افتحى أى قناة فضائية هتلاقى كرومبو والخيار والحاجات دى كتييير وبجد
المهم انك نورتى المدونة بالزيارة ويارب متكونش آخر مرة

Shaimaa يقول...

winner
والله اللى بيتصل قليل أوى أوى .. ببساطة لأن فاتورة التليفون بييجى فيها 36 جنيه اشتراك
6.5 دمغة
6.75 ضريبة مبيعات
يعنى بتلاقى نفسك دفعت 50 جنيه كدة من غير ما تكون لسة اتكلمت ولا كلمة

Shaimaa يقول...

آآآآآآه والله ياوليد ي... م أنا موعودة بكل العاهات... وهوه ده بقه اللى فاضل عريس ويطلع كرومبو بس ساعتها ماما هتتفطش وتسيب البلد بقه
هههههههه

ربنا يخليك ويسمعنا عنك خير قريب وتكون انتقلت للشغل الجديد

الوفية للأبـــد -- مها أحمد يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
بجد احمد بيجري ورايا في الشقة بيقولي بتضحكي كده ليه و صوتك مسمع الدنيا
قلتله لو عايز تعرف اتصل على 0900
ههههههههههههههههههههههههههههه
جري ورايا اكتر و اخدت علقة بس ضرب الحبيب زي اكل الزبيب
هههههههههههههههههههههههههه

ضحكتيني اوي يا شوشو انتي عسل اوي يا حبيبتي و الله

و الله بجد بجد مش عارفة اتكلم من الضحك بس انتي فعلا صورتي الموضوع بطريقة جميلة جدا و فعلا الموضوع ده كتر اوي و الله
و شكرا انك نبهتينا لمدام قصب
اصل كل ما بشوفها في التليفزيون برجع و بفكر اوقات اني احذف قناة دريم علشان ما اشوفهاش
ههههههههههههههههههههههههههههه
بس لما بشوفها بقول على نفسي ملكة جمال
ههههههههههههههههههههههههه

تسلميلي يا حبيبتي و بجد دمك خفيف و كل يوم بحبك اكتر من الاول
اتمنى نكون اصحاب و ليا الشرف و الله

مع خالص حبي و حبي و حبي ليكي يا قمر

Shaimaa يقول...

مهموهة حبيبة قلبى وروحى
ده شرف ليا أنا يا حبيبتى انى أكون صديقة ليكى
أنا بشكر المدونة دى انها عرفتنى على ناس محترمة أوى وحبوبة أوى وقلبها جمييييل أوى زيكوا
ربنا ميحرمنيش منك يا حبيبتى ويحققلك كل اللى بتتمنيه يارب

ghada mOhsen يقول...

ههههههههههههههه شيماء ..

بجد ضحكتينى اووووووى ...
يالهوىىىىى على الحاجات العجيبه اللى بثينا عايشين وسطيها كله بقى لا سلكى
ههههههههههههه

والله 0900 دى شايله الحمل كله .. لو عايزه تاكلى تشربى تلبسى تنامى تصحى تخسى تتخنى تتجوزى تتطلقى تتفسحى ن شاء الله حتى تاخدى علقه هايقلولك اتصلى على 0900 هههههههههههههههههههههههه

بجد تسلمى موضوع تحفه اوووووووى

... ;) ,,, ;) ...

الطيــر العاشـق يقول...

هههههههههههه يا قمر واخده بالي من الموضوع

بس بجد خياااااالك هوه اللي كان محيرني شويه بجد صورتي موضوعك حلو جداااااا بطريقه جامده جداااا


وعلي رأي( ستي أمااثل ) رزق الهبل ع المجانين ......

بجد حلوة قوي

Tears يقول...

اسلوبك الساخر شيق جدا و لديكى لمسه فنيه متميزة :)

Shaimaa يقول...

غادة...شكرا على كلامك الجميل وزيارتك اللى دايما منورانى
ميرسى يا حبيبتى

Shaimaa يقول...

الطير العاشق
نتمنى نشوفك قريب جدا فى مصر
خالص حبى

الطيــر العاشـق يقول...

ياااااااااارب يكون في الصيف بإذن الله وطبعا أتمني اللقاء

Tears يقول...

شيماء سعدت جدا بتعليقاتك فى مدونتى و بصراحة فوجئت ان عقلك كبير كده و فكرك راقى لهذه الدرجة

بجد فخورة اوى بيكى لان نادرا ما بنلاقى حد بيفكر اصلا فمابالك لو برقى اوى زيك

تدويناتك ساخرة و جميلة بس لم اكتشف منها عقلك المستنير الذى انطلق معلقا عندى

اعتقد انك محتاجة تكلمى شوية جد على مدونتك عشان الناس تعرف ان وراء كل ده عقل مفكر و راقى مش بس شخصية مرحة

Shaimaa يقول...

tears
مش مجاملة بس صدقينى أنا اللى مبسوطة ان فى بنت مصرية عندها دماغ صح وبتفكر بطريقة مختلفة
عارفة وفاهمة وحاسة الدين صح
فاهمة معنى "رجولة" صح
شايفة "الحب" من وجهة نظر واقعية دماغك فيها شبه كبير من صاحبة مدونة "يوميات عانس" عبير سليمان ذات القلم المميز
باتوفيق دايما

حصان المرجيحة يقول...

بجد جميلة
بس تعرفي انا ممكن اعمل الموضوع ده لمراتي لما اتجوز
مثلا لما تحب اجيبلها حاجة تتصل و تضغط علي 1
و لما تحب اني اعكنن عليها تضغط 2
و لما تحب تروح لامها تضغط cancel
و لما تحب تعيش معايا علي طول تضغط علي اعصابي
تسلم ايدك

Shaimaa يقول...

حصان المرجيحة
ههههههه
كدة انت ناوى تتجوز ست "ديجيتال"
منور المدونة دايما
شكرا على مرورك

emymony يقول...

هههههههههههههههههههه جامده جدا جدا وماما بتقولى عايزة تنجحى يافاشله اتصلى على 00 كعكتين بسكر هههههههههههه انا زهقت من الاعلانات بتاعته الاتصال وجوايز لناس بيبقوا وهميين بيخدعونا والله بس اسلوبك الفكاهى جميل اوى
تحياتى
ايمى

Shaimaa يقول...

ايمى ميرسى يا حبيبتى وان شاء الله هتنجحى من غير 0900 بدعوات ماما بس
خالص حبى