اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الخميس، 21 يناير، 2010

فى البلكونة...مين؟؟؟!!!!

بعد الخبرة الطويلة العظيمة الكبيرة الضخمة القوية -"ده على أساس ان عندى 95 سنة وماشية فى ال 101" - اللى حضرتى مريت بيها اكتشفت اننا لما بنكون بنمر "بمشكلة" معينة أو حدث مثلا..... بتبقى وجهة نظرنا ضيقة قوى بالنسبة" للحل" وقتها.......
بنبقى مش شايفين كل حاجة صح زى ما المفروض تكون......
بتبقى نظرتنا محدودة أوى ......
وقتها مبنسمعش غير وجهة نظر نفسنا وفقط.... بسبب الضغوط اللى بتبقى علينا وقتها....
بيبقى عندنا تسرع فى الحكم سواء بالسلب أو الايجاب... برده من خلال فتحة صغيرة أوى عينينا بس هيه اللى شايفاها....
مبنبقاش مدركين أوى كل الأحداث اللى حوالينا ولا فاهمنها كلها صح ...يمكن فاهمين جزء منها....
ليه بقى...؟؟؟؟!!!!!.... لأننا لسه جوا الحدث نفسه بال Ups وال downs بتاعته .. كلمة تشيلنا وكلمة تهبدنا...
الموضوع ده عامل بالظبط زى حد واقف فى وسط "شاكلة" مثلا........ ايد تضربه... وايد تزأه..... وايد تشده..... وايد تخبطه توقعه فى الأرض...
وهوه مش ملاحق يصد مين ولا يضرب مين ولا يقاوم مين ؟؟؟ لأنه ببساطه مش شايف أوى ... وكل حاجة عمالة تحصله على خوانة
فمش ملاحق ياعينى لا يصد ولا يرد
بس بقى... فى فوق "فى البلكونة" فى الدور التانى فى واحد واقف شايف الوضوع من فوق ...من بعيد...برؤية شاملة ..واضحة...
رؤية أشمل لمت كل الحدث من فوق
والحد ده عمال يندهله من فوق ويقوله : حاسب اللى جاى من على يمينك....بص بسرعة فى شومة على شمالك
خد بالك فى طوبة هتخبط دماغك......الحق اللى جاى من وراك....وفى الآخر هتلاقيه بيقولك على مخرج تجرى منه أو ينزل هوه بسرعة ويحوش عنك لأنه ببساطة عرف قدرات كل اللى ضربوك وعرف أسلوبهم كويس وحفظه وعرف المدخل منين والمخرج اذاى...!!!
فتخرج فى ايده وانت مش خايف ...... بتخرج وانت متشبس أوى بايديه ...وهوه مش مكتفى بس بمسك ايدك... لأ ....ده مصر يحضنك..ويشوف ايه بيوجعك ويروح بيك لأقرب مستشفى ...ويقولك كلمتين حلوين كأنك انت شجيع السيما اللى ضربت مش انضربت ... ويحاول يشرحلك ان الظروف بس هيه اللى وقعتك فى المشكلة دى.....واذاى ستر ربنا وعملك الكويس هوه اللى نجاك
وينهى الحوار بدعوة من القلب تزيل مرارة الحدث كله كأن لم يكن...!!!!
بعد كدة لما بنقعد مع نفسنا ونفتكر الحدث ده "واحنا لوحدنا" هتلاقيك بتكلم نفسك ...وتقول ..الله!!!!! ..ده فلان ده عمل كذا علشان كان يقصد كذا....وفلان التانى ده كان يقصدنى أنا لما قال كذا.... وفلان التالت ده آآآآه منه...!!! شوف قال ايه !!!!!!!!! ده أنا كنت فاكراه كذا....وهكذا
نطلع من ده...ان الواحد لازم يفكر بهدوء شديد وبعيد عن أى ضغوط لما يمر بأى مشكلة أو حدث......
الحاجة التانية اللى أنا مؤمنة بيها جدا ......ان الشخص اللى واقف "فى البلكونة" ده وبياخد بايدينا دايما ويوجهنا صح..... هما... أمهاتنا و آباءنا ربنا ما يحرمناش منهم ....آمين

هناك 14 تعليقًا:

أميرة الأحلام يقول...

شوشو الجميله ..
حلو جدااااااااا الموضوع ده بجد
عندك حق في كل كلمه قولتيها دايما الي بيبقى بره اى موضوع او مشكله بتبقى رؤيتهم مختلفه تماما عن الي جواها
ودايما كانت تتقالي الكلمه دى احنا شايفين الي انتى مش شايفاه عشان احنا بره الموضوع
بجد تسلم ايدك يا قمر
موضوع جميل
ليكى منى كل الحب ياجميل

winner يقول...



إيه الحكاية بقى.
كل الكلام ده لف و دوران حوالين الموضوع.
مين بقى اللي في البلكونة!!؟

:)

بالمناسبة "متشبس" دي جاية من الشيبسي يعني!
أصلها بالثاء >> متشبث.
:)






هي وظروفها يقول...

تملي اللي بره المشكله يبقي شايف من فوق المربع كله وشايف الخلل في انهي ضلع بالظبط
يمكن لان اللي في المشكله غاليا بيبقي فيه ضلع او اكتر مش شايفهم

والاب والام في حياتنا ممكن فعلا يكونو الحد ده
بما ليهم من خبره وعمر وتجار ومواقف وحلول وبدائل حلول

بس احنا نديهم الفرصه ونخليهم يشوفونا من فوق
لانهم ستر وغطا علينا واكيد محش هيخاف علينا ولا يحبلنا الخير زيهم
ربنا يبارك في والدتك ويرحم والدك
ويوفقك لكل خير
بس اشمعني ضربه مثل بخناقه
انتي حاسه انك هتتخانقي قريب ولا ايه؟؟؟؟

الوفية للأبـــد -- مها أحمد يقول...

ابه الحلاوة دي يا شوشو و الله بجد موضوعك حلو اوي و جه بتشبيه موضوع احلى و احلى

و فعلا اهالينا هم اكتر ناس بيوقفوا جنبنا و قت الشدة
و تسلمي يا قمر على الموضوع ده
بس بجد مش لاقية كلام اقوله و الله

اصل تعبانة شوية و قلت اقوم اشوف المدونات كده

يللا خلي بالك من نفسك لتقعي من البلكونة
ههههههههههههههههههه

مع خالص حبي يا قمر

abo-omar elmasry يقول...

شيماء العزيزة: موضوعك واسلوبك جميل ويصل بأقرب الطرق للعقل، وإن كنت أختلف مع مضمونه بعض الشئ لأنى أرى أن كل منا يرى الحياة برؤيته ووجهة نظره ولهذا فتقيمنا للمعانى يختلف من شخص لأخر ولايوجد صواب أو خطأ إنما هى نظرتنا وأختيارتنا ولايصح لأخر أن يرى لى ماأراه لنفسى أو يحس إحساسى لنفس الموضوع ولهذا لايمكنه أخذ قرار لى ولكن يصح دائما النصيحة ويظل عاقبة القرار لصاحبه... سعدت بمرورى بكلماتك ولكى منى كل تقدير وأحترام.

Shaimaa يقول...

مرمورة الجميلة
طب أعمل ايه فى الذوق والتشريف اللى دايما بيكون أول واحدة ده
يارب يكون انهاردة أسعد يوم فى حياتك أول يوم شغل ...ويكون معاكى أحلى cast فى الدنيا علشان انتى تستاهلى كل خير
بالتوفيق دايما يا مرمورة

Shaimaa يقول...

winner
ده يتوقف على الشيبسى ده بايه..يا سلام لو بالكباب ..يبقى يجنن
شرفتنى بالزيارة

Shaimaa يقول...

وليد..وليد..منور العالم
"خناقة" علشان الواحد ميبقاش ملاحق يضرب مين ولا يصد مين... وشكلى داخلة خناقة فعلا قريب مع الولد بتاع البوفيه عندنا فى الشركة...كلنا بننده عليه وهوه علطول عامل مش سامع
ابقى تعالى حوش عنى يا وليد

Shaimaa يقول...

مهموهة الجميلة
ألف سلامة عليكى يا قمر ..ان شالله اللى يكرهوكى
خدى بالك من نفسك

Shaimaa يقول...

أبو عمر المصرى
ميرسى جدا على ذوقك .. وأحترم جدا وجهة نظرك
أنا بس كنت عايزة أقول انهم بفرق السن والخبرة واحتكاكهم بأنماط مختلفة من البشر بقى عندهم خبرة كبيرة عننا ...ودايما نصيحتهم هتبقى من القلب ..لأنهم بيحبونا من غير أغراض
شرفتنى بالزيارة

حصان المرجيحة يقول...

6-الابن اللي مابيخدش بنصيحة اهله ميعرفش ان اكبر شركات في العالم لما بيطلبو حد يشتغل عندهم بيشترطو الخبرة و انت رايح تاخدلي بنصيحة واحد صاحبك لسه متخرج في الحياة و سايب نصيحة اهلك اللي عندهم خبرة وخايفين عليك من غير مقابل يابني (ابعد عن الدوشة)
دي نقطة في موضوع كتبته فنا متفق معاكي جدا جدا
و ياريت كلنا نسمع الكلام ده و نفهمة
شكرا علي موضصوعك الجميل

Shaimaa يقول...

حصان المرجيحة
كدة نبقى بصرة
ههههههه
شكرا على تعليقك...وربنا يخليهم لينا ومنتحرمش من وقوفهم جنبنا ونصيحتهم لينا أبدا

هي وظروفها يقول...

تلاقيكو مش مظبطين معاه ان الأوفس بوي الي عندنا مظبطه لو قلتله هاتلي شاي سجاير كابتشينو في منت بيجيبلي

خدو بالكو منو وهو هيتعدل ويبطل تنفيض اقله عشرايه كل شهر

Shaimaa يقول...

صح والله عندك حق يا وليد لو ظبطناه ودانه هتسلك وهيسمع كويس ...معتش حاجة بتمشى دلوقتى من غير تظبيط