اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 21 يوليو 2010

حكومة..ولا ضمير... ولا دين ؟؟؟!!!!!!!

الشركة عندنا كانت عايزة تجيب حد يعمل صيانة لكل أجهزة التكييف الموجودة بالشركة لأن الشركة اللى كانت بتيجى تعمل الصيانة قبل كدة كانت تييجى وتمشى ونلاقى التكييفات زى ما هيه..!!!

ف أنا اقترحت عليهم -(كالعادة يعنى مبريحش نفسى)- اقترحت عليهم اسم شركة صيانة تكييفات كبيرة ومحترمة تيجى تعمل الصيانة .... وتوليت أنا مهمة الاتصال بيهم والاتفاق معاهم ف السكرتيرة اديتنى ميعاد بعد 5 أيام من الاتصال (ناخد دورنا يعنى)...

المهم جه المهندس المحترم فى الميعاد ... راجل ملتحى كدة وعلامة الصلاة أد كدة فى دماغه.... المهم الراجل بدأ أعمال الصيانة.. وكان بيوجه كل كلامه ليا أنا مباشرة على أساس انى أنا اللى عاملة order الصيانة بالتليفون...

خلص الصيانة لكل تكييفات الشركة... وبعدين جه قاللى الحساب 800جنيه يا آنسة شيماء؟؟!!! ... أختكوا طبعا بطيخة فى الحاجات دى ... معرفش يعنى صيانة التكييفات دى بكام ولا المفروض تبقى ايه.... فقلت له من باب انى أبان بفهم وميستعبطش عليا ..."مش كتير ده يا بشمهندش" .... فقالى وهوه مودى وشه الناحية التانية (لأنه ملتحى)  قاللى : لأ يا آنسة مش كتير ده أنا عمللكوا discount ... وبسرعة من فضلك علشان ألحق صلاة الضهر....!!!!!!!!!!!!!!!!!

قولتله اتفضل فى الحسابات سلم الفاتورة وهما هيدوك حسابك...  قاللى لأ مفيش فاتورة ....!!!! أصل ده "استدعاء"... قولتله استدعاء يعنى ايه؟؟؟ !!!!!...... المهم من هنا لهنا قاللى هعملكوا فاتورة من معايا ... مش عارفة يعنى ايه من معاه؟؟ المهم بعته الحسابات وشوفت أنا  شغلى .....


وقبل ما يمشى جه وادانى رقم الموبايل بتاعه وأكد جامد أوى عليا ان كل ما الشركة بتاعتنا تعوز تعمل صيانة أبقى أكلمه على الموبايل!!!!!


جالى زميل أنا بعتبره من الناس المحترمة فى الشركة (وهما نادرين فى الشركة عندنا) وقاللى : شيماء أنا سألت واحد صاحبى فى التليفون قاللى ان عمل صيانة لعدد ....كذا كذا من التكيفات لا يتعدى 400جنيه فقط ويمكن أقل كمان.... يبقى ليه الراجل ده أخد 800جنيه....؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!!!!!!
أنا حسيت ان فى جردل مياه ساقعة نزل على دماغى وحسيت ان الدنيا بتلف بيا........ قولتله : اذاى؟؟؟ ...أنا..... أنا.... معرفش فى موضوع التكييفات ده أساسا .....أنا كنت عايزة التكييفات تشتغل كويس وبس ....... أنا..... طب ادينى 10 دقايق هكلم الشركة بتاعته


اتصلت بالشركة السكرتيرة قاللتلى 10 دقايق ونكلمك... كلمنى بعدها مدير الشركة عنده وقاللى اذاى؟؟؟؟؟ أكيد هوه عمل صيانة لعدد  تكييفات أكبر من العدد اللى حضرتك عملتى بيه order !!!!! قولتله : لأ يا فندم نفس العدد اللى بلغتكوا بيه هوه اللى عمله صيانة وشحن جهاز واحد فقط...!!!!!

عملت أكتر من تليفون ليهم بمساعدة زميلى المحترم ..... واتصلت بالمهندس اللى أخد ال 800 جنيه على موبايله ... فقعد يلف ويدور .. ويلف ويدور.... ويلف ويدور... ولما زنقته أوى قاللى : "أنا كنت هخلى ال 400 جنيه الفرق دول زى رصيد ليكم فى الشركة عندنا علشان لو احتجتوا تعملوا صيانة تانى ولا حاجة" !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

شوفتوا التفسير المنطقى للأشياء.........!!!!!!!!!!!!!!!!!!!!!!!!!

 المهم اتصلت بيا شركة الصيانة واعتذروا جامد جدا جدا وأصروا انه هوه بنفسه هييجى يجيب ال 400جنيه... فهوه رفض وأصر يسيب الفلوس فى فرعنا التانى ومرضاش ييجى الفرع اللى أنا فيه!!!!!

الموضوع ده اتحل من سكات ما بينى وبين زميلى المحترم من غير ما حد فى الشركة يعرف..... (لأنه يعرفنى كويس) ... واتصل هوه بنفسه بالناس وبالمهندس لحد ما اتأكد انه حرامى ونصاب...

السؤال دلوقتى .... كان هيبقى ايه منظرى قدام الشركة لو أصحاب النفوس السوداء ال black اللى نفسهم يمسكوا عليا غلطة عرفوا بالموضوع ده؟؟؟؟؟ .... كانوا هيقولوا ايه ؟؟؟!!!! هيقولوا دى أكيد قسمت معاه..... آه..... ما هو مفيش تفسير تانى عند النفوس السودة غير كدة ...

اللى هيموتنى دلوقتى أكتر من حاجة :
*أولا : أنا مش بجمع كل الملتحين أو بعيب فيهم... لأن أكيد مش كلهم كدة...... بس ليه؟؟؟؟؟؟

حد يجاوبنى من فضلكم ..... ليه؟؟

1-احنا دايما نعيب فى (الحكومة).... هل الحكومة هيه اللى قالتلوا اسرق وانصب وارتشى؟؟!!... ولا المطلوب منها تمشى رقيب ولا عسكرى ورا كل مواطن.... أيوة فى فساد..... بس الفساد فى قلوبنا وعقولنا ونفوسنا احنا....

2-ولا المشكلة مشكلة (ضمير) ...ماااااااااااااااااااااااااااات وادفن من زماااااااااااااااان .... ومعدتش تفرق بقه دقن ولا سبحة ولا صلاة....ولا ديكور.... قدامى نهيبة... أنهبها ....وأجرى بسرعة علشان ألحق غيرها

3- ولا مشكلة "تدين" ظاهرى... طب خلينا ننسى بقى الدقن والسبحة وصلاة الضهر..... احنا مش ديننا حرم السرقة والنصب والنهب والرشوة والفساد...و....و....و.... احنا بنقرأ الكلام ده ومبنطبقوش ليه..... بنقبل الحرام وندخلوا على ولادنا وحياتنا بمنتهى السهولة ليه.... بنشوه ديننا بأفعالنا ونسىء اليه ليه ؟؟؟  ..طب لو مش الدين هوه الرادع ...يبقى ايه الرادع فى أمة الشىء الوحيد اللى بيحركها ويأثر فيها هو "الـــديـــــن".

أنا مش مستغربة الراجل ده ولا حاجة لأنى عارفة ان فى منه كتيييييييييييييييير .... بس سألت نفسى السؤال ده ... مشكلة الراجل ده ايه؟؟ ..... عنده قلة دين ... ولا قلة ضمير.... ولا حكومة سايبة بلا ظابط ولا رابط

هناك 25 تعليقًا:

Kontiki يقول...

لا مش حكومة المرة دى والدين مش هو الوازع الخلقى الاكبر للبشر عشان يكونوا نضاف وعندهم مبدأ الراجل دة معندوش راتب يكفية ولا بياخد حقة من شركتة عشان كدة لازم يحط ايدة فى جيب العميل اللى يقع تحت ايدة بس دة مش مبرر للسرقة دة تفسير لان اللى عملة نصب و سرقة و خداع ناس ومن الصنف دة كتير جدا فى مجال الحرفيين و المهنيين

Baskouta يقول...

انا مش مستغربة
انا موافقة جدا على ان الفساد اللي سيطر على البلد هو فساد نابع من القلوب اللى فسدت وقبلت على نفسها الحرام على كافة المستويات
مسئولين صغيرين وكبار
محدش بيضرب حد على ايده علشان يخليه يرتشي
وعمر الحاجة وضيق ذات اليد ما كان مبرر للحرام
الفساد بجد بقا ان الضمير مات والناس بقيت بتقبل الحرام
الحرام في كل حاجة
الحرام في الفلوس اللي بتيجي بالنصب والنهب
الحرام في العمل على ايذاء الاخرين
الحرام في عدم مراعاة الاخرين
الحرام بقا كتير
والناس بقت بتقبله
والدين بيفسد لما الضمير بيفسد
لان ببساطة محدش رقيب على حد في امور دينه ربنا بس رقيب
فبالتالي الكل بيعمل اللى عاوزه طالما هو امام الناس متخفي في مظهر التدين

كل حاجة فيها فساد
والفساد نابع من قلوب ناس بتقعد تشتكي من الفساد وهم اصل الفساد
ربنا يحمينا
من قبول الحرام
ربنا يحمينا من فساد القلوب
لان بجد لما القلب بيفسد كل حاجة بتفسد

تحياتي

mrmr يقول...

الصوره دى كتير
وهذا يدل على الضمير الميت
مش قله راتبه ولا هو مش مكفى الاحتياجات الضروريه
عايزه اقولك ان ناس كتير قوى بتاخذ بالمثل القائل ( البحر يحب الزياده ) يعنى لو قلنا انه مش لاقى ياكل ولا ياكل عياله يمكن نلتمس العذر بالرغم انه عذر اقبح من ذنب
لكن الناس بتطلع الى اكبر من كده

صوره التقوى اللى هو عليها ما هى الا ماسك يخفى وراءه عمليات النصب والسرقه
ربنا يهدى عبيده ويسعدك

نـــــور يقول...

لا انتى خلطتى الامور ببعضها
غلطت ده مش معناها خالص ان الحكومة بريئة من الذنب ليه بقى؟
لان كلنا بنغلط حتى الملتحيين بصرف النظر انه ممكن يكون ملتحى منظر وممكن يكون ملتحى عن اقتناع انه لازم يلتحى وشايف ان ده بيع والبيع تراضى
انا قلتلك التكلفة وانت دفعتلى واحنا الاتنين راضيين يبقى خلاص وكده يبقى مالى حلال
انا مابدافعش عنه انا بناقش فكر
الحكومة بقى بما اننا بشر وبنغلط هما كمان بشر بس غلطاتنا احنا مابتأثرش فى حد اوى عشان احنا صلا صغيرين ومش مسئولين ولو مسئولين بتظهر على اللى احنا مسئولين عنهم بس
انما هما مسئولين عن شعب بحاله
الغلطة اللى بيغلطوها بيسمع اثرها فى 80مليون بنى ادم يبقى ماينفعش مقارنتك

انا مش بعفيه من الذنب ومش بعفى الحكومة
لكل امرئ على نفسه بصيرة

اسفه للتطويل :)

Humman being يقول...

Kontiki
عندك حق يا كونت ... الناس دى كتييير .. يبقى لازم الواحد يمشى عينيه فى وسط راسه وينام مفتح عين ومغمض عين

Humman being يقول...

Baskouta

"محدش بيضرب حد على ايده عشان يخليه يرتشى"

بالظبط ده اللى أنا عايزة أقوله يا بسكوته... صاحب الشغل ..أو المصنع... أو الشركة مش شايفنا ولا يمكن يقدر يراقبنا طول الوقت ... انما لو عندنا ضمير هنعمله شغله 100% صح أحسن ما هوه نفسه هيعمله... مش هنرنشى ... ولا هنتخد حتجة مش بتاعتنا أو مش من حقنا

مفيش حكومة بتقول لحد اسرق....أيوة فى ناس كتير مرتبتها ضعيفة جدا ..بس ده مش مبرر للسرقة والنهب..
الضمير هوه المحرك

Humman being يقول...

mrmr
ربنا يخليك..
ربنا يكفينا كلنا شرهم... ولو وقعنا تحت ايدهم يقدرنا عليهم ويكشفهم لينا بسرعة...
شرفتنى بالزيارة

Humman being يقول...

نـــور..

اطلاقا.. مفيش تطويل أنا فعلا حابة أسمع تفسيركم

أنا مش بعفى الحكومة أو بحط كل الذنب على الضمير أو الدين

أيوة صح الحكومة عليها دور كبير .. ولو كانت وفرت لكل الناس مرتب كويس.. وعيشة معقزلة مكنش ده بقه الحال
بس افرضى ان الراجل ده مرتبه كويس .. وقاعد فى شقة معقوله... وعنده دخل تانى مش بطال.... وبالرغم من ده كله مصر يسرق..مصر يرتشى... مصر ياخد حاجة مش من حقه .. يبقى ايه السبب؟؟؟...
طب ليه جوانا معتش زى "المظاهر اللى بره" ايه اللى جابره على اللحية والصلاة... عشان لازم من الديكور قدام الناس... ولا عشان هوه فعلا ملتزم وصادق مع نفسه

عارفة... أنا حاسة انه عبارة عن خليط ممزوج مع بعضه...قلة دين...قلة ضمير + حكومة سايبة

شرفتينى بالزيارة

خالص تحياتى

Tears يقول...

عزيزتى شيماء ذات العقل الجميل

بجد مش ح اعرف اعلق بحاجة بس ادعوكى لقراءه ده

http://www.almasry-alyoum.com/article2.aspx?ArticleID=260070&IssueID=1811

Humman being يقول...

tears

أهى النماذج اللى مذكورة فى المقال ده هيه اللى جابتنا ورا ... ولسه

Humman being يقول...

tears

أهى النماذج اللى مذكورة فى المقال ده هيه اللى جابتنا ورا ... ولسه

هي وظروفها يقول...

مش مشكله ملهاش حل الا حاله واحده يا نغير نفسنا ليحصل استبدال اصل الحرام كله بقينا نعمله واللي ربنا بعته انبياء تغير من الوضع ده
وبما ان عهد الانبياء انتهي بنزول تكليف سيدنا محمد صلي الله عليه وسلم

يبقي خلاص بقي يا نغير يا هنتغير

الا صحيح يا شيمو هو ممكن كان مذنوق ف قرشين فقال ياخدهم سلف ويبقي يردهم اننتي ليه نيتك جايبه علي حاجه غلط

كلنا بقينا وحشين كلنا بقينا اصحاب مباديء واوزل ما تحكم المصلحه تلاقينا بعنا الكلام والمباديء ف اقرب محطه
شوفت وهشوف وانا بنفسي ومن ضمن اسباب تعب دماغي اني اصريت مره اغير من وضع معين وعملت صاحب ضمير التيار جرفني ولولا ستر ربنا كان حالي هيبقي اصعب من الملتحي الكداب اللي اتعاملتي معاه

اصل قله الضمير بقت فهلوه

والمحافظه علي اللقمه الحلال بقت خيابه وبما ان المجتمع الا من رحم ربي اتملي مكر وذئابه كل حلمي يتمثل ف شيء واحد
اللهم استرنا فوق الأرض وتحت الأرض ويوم العرض عليك يااااااااااااااااارب

halaS demahoM يقول...

يا نهار ابيض
الواحد حاسس انه بقاله 6 شهور مقراش مواضيع
من ساعه ما البلوج التاني اتقفل
المهم
واجابة علي كلام معاليكم المزكور اعلاه
بصي انتي لمستي كل اطراف المشكله بس نسيتي حاجه مهمه يمكن تكون هيا السبب الرئيسي لكل حاجه بتحصل دلوقت من وجهة نظري
اولا الثلاث اطراف اللي زكرتيهم في الموضوع هم اطراف في المشكله دي فعلا
فالحكومه
مقلتش لحد اسرق
بس الراجل ده لو مرتاح ماديا استحاله يعمل حاجه زي كده
فالحكومه تتحمل جزء من المشكله دي
والضمير
بقت الصوره العامه للضمير هي نفس الصوره المذكوره اعلاه
فلما واحد يعمل كده ... شئ عادي في منه كتير
بالعكس دا يمكن لو حد جت له فرصه يعمل كده ومعملش
الناس كلها تلومه
صحابه في الشغل علي مراته في البيت
يحس انه اذنب لو معملش كده
ووصل بيه الامر الي ان ضميره اصبح مشابه لباقي الضمائر
اما عن الدين
انا ممكن استبعد الدين من المشكله دي
مش عشان حاجه والله
بس دسنا الاسلامي كلنا عارفينه انه استحاله يحثنا علي النصب والاحتيال
كلنا عارفين انه حرام ومينفعش
وما بني علي حرام فهو حرام
بس الدين مش مشكله
لان في اوروبا وامريكا واليابان والحتت المحترمه دي
وغم انهم معندهمش دين زي دينا
الا انهم عمرهم ما يعملوا كده
دا انا سمعت ان في وزيره في اليابان استقالت عشان في موظف تحت ايدها خد رشوه
والرشوه دي ايه؟؟؟
مضرب هوكي
يعني حاجه ب30 جنيه مصري

فالمشكله الاساسيه
هيا المبادئ
مبقاش في مبادئ
وده طبعا ناشئ عن التربيه الغلط
وان كل واحد بيربي ولاده انهم مظلومين في الدوله
فكل واحد يطلع بمصلحه من هنا علي مصلحه من هناك ويقولك ده حقي
المشكله يا عزيزتي ماهي الا مشكلة تربيه ومبادئ
س ل ا م ي

halaS demahoM يقول...

يا نهار ابيض
الواحد حاسس انه بقاله 6 شهور مقراش مواضيع
من ساعه ما البلوج التاني اتقفل
المهم
واجابة علي كلام معاليكم المزكور اعلاه
بصي انتي لمستي كل اطراف المشكله بس نسيتي حاجه مهمه يمكن تكون هيا السبب الرئيسي لكل حاجه بتحصل دلوقت من وجهة نظري
اولا الثلاث اطراف اللي زكرتيهم في الموضوع هم اطراف في المشكله دي فعلا
فالحكومه
مقلتش لحد اسرق
بس الراجل ده لو مرتاح ماديا استحاله يعمل حاجه زي كده
فالحكومه تتحمل جزء من المشكله دي
والضمير
بقت الصوره العامه للضمير هي نفس الصوره المذكوره اعلاه
فلما واحد يعمل كده ... شئ عادي في منه كتير
بالعكس دا يمكن لو حد جت له فرصه يعمل كده ومعملش
الناس كلها تلومه
صحابه في الشغل علي مراته في البيت
يحس انه اذنب لو معملش كده
ووصل بيه الامر الي ان ضميره اصبح مشابه لباقي الضمائر
اما عن الدين
انا ممكن استبعد الدين من المشكله دي
مش عشان حاجه والله
بس دسنا الاسلامي كلنا عارفينه انه استحاله يحثنا علي النصب والاحتيال
كلنا عارفين انه حرام ومينفعش
وما بني علي حرام فهو حرام
بس الدين مش مشكله
لان في اوروبا وامريكا واليابان والحتت المحترمه دي
وغم انهم معندهمش دين زي دينا
الا انهم عمرهم ما يعملوا كده
دا انا سمعت ان في وزيره في اليابان استقالت عشان في موظف تحت ايدها خد رشوه
والرشوه دي ايه؟؟؟
مضرب هوكي
يعني حاجه ب30 جنيه مصري

halaS demahoM يقول...

فالمشكله الاساسيه
هيا المبادئ
مبقاش في مبادئ
وده طبعا ناشئ عن التربيه الغلط
وان كل واحد بيربي ولاده انهم مظلومين في الدوله
فكل واحد يطلع بمصلحه من هنا علي مصلحه من هناك ويقولك ده حقي
المشكله يا عزيزتي ماهي الا مشكلة تربيه ومبادئ
س ل ا م ي

محمد التركى يقول...

السلام عليكم
أختى العزيزه
شيماء

والله كل لما أجى وأدخل عندك المدونه أتعلم حاجه

البوست ده علمنى أكتر من حاجه
العيب
دكلمه جامده قوى بس ياترى نعرف قيمتها
الصلاه تنهى عن الفحشاء والمنكر
اللهى ربنا يولع فيك بقى بيقولك بسرعه ورايح اصلى ومش قادر يبظر ليكى وحرامى
طيب يخاف ويختشى ويتقى ربنا
معلش أصله مايعرفش ربنا ولا يعرف العيب
العيب فينا مش فى حد تانى
وكمان
العيب فى الحكومه علشان هى القضوه لينا
ومش بتحاسب الحراميه الكبار
زى أعضاء مجلس الشعب اللى خدو الدعم بتاع الكراسى المتحركه للغلابه اللى عندهم شلل وراحو يبعهوم فى ليبيا
أخس على ديه بلد

أقصره ربنا يولع فى كل ظالم

تقبلى تحياتى
محمد التركى

Humman being يقول...

هى وظروفها...
وليد الدوغرى المحترم..
والله كلامك بيخوفنى أكتر يا وليد...يمكن عشان واقعى أوى وحقيقى أوى .. (قلة الضمير بقت فهلوة) ...بقت صنعة وحرفة والشاطر اللى ينبغ فيها أكتر

بس كلامك 100% صح "ان الله لا يغير ما بقوم حتى يغيروا ما بأنفسهم"
المطلوب اننا اللى نتغير...تبقى النتيجة واحدة .. العيب الأكبر فينا احنا دى مش شعارات دى حقيقة

نورتنى كالعادة

خالص تقديرى

Humman being يقول...

هو الشريط فاضى ولا احنا اللى مش سامعين..

أولا حلو اسم مدونتك وجديد

ثانيا ..عجبتنى أوى الحتة اللى بتقول فيها ان الغرب أوروبا وأمريكا واليابان معندهمش ديننا الاسلامى ومش بيعملوا كدة..
السؤال دلوقتى... ليه الناس دى بتطبق ديننا واحنا لأ...
كلامك صح ديننا لا يمكن يحثنا على السرقة والاحتيال... بس لازم يكون رادع لينا ...الدين والفتاوى بقت هى المحرك الوحيد لكل أمور حياتنا ....

..المبادىء فعلا جزأ مهم فى المشكلة... لو كل واحد فينا اتربى على قيم صح اتزرعت فيه صح أكيد مش هيعمل كدة..

تبقى المشكلة خليط من الدين والضمير والمبادىء والحكومة كمان.

شرفتنى بالزيارة
خالص تحياتى

Humman being يقول...

محمد التركى...

هوه ده بالظبط اللى كنت عايزه أوصله... لو مكنش الظهر اللى هوه رايح يصليه ده يردعه ويمنعه عن الفحشاء والمنكر والسرقة والنصب... أومال ايه اللى هيمنعه تانى ....؟؟؟؟!!!!!!!

بس يا جماعة فى النهاية زى ما حسيت من كلامكو كلكوا ان الحكاية عبارة عن خليط من قلة الدين + وقلة الضمير + قلة مبادىء + حكومة كلها حرامية نهبها البلد وشافطة دمها ومجوعة شعبها+ سياسة "الفهلوة" واحترافها من معظم الناس

شرفتنى بالزيارة
خالص تقديرى

شفـقــة و إحســــان يقول...

المشكلة هى انعدام الضمير والاخلاق للاسف الناس مبقاش عندها اى مانع فى اى حاجة المهم الفلوس
بس احمدى ربنا انك كشفتيه

Humman being يقول...

شفقة واحسان..
أيوة والله أنا بحمد ربنا جدا جدا ان كشفته والموضوع اتلم بسرعة ...الحمد لله..

خالص تحياتى

ghada mOhsen يقول...

أاااااااه ياشوشو وجعتيلي قلبي بالبوست ده ...

ربنا يهدينا جميعا .. بجد نفوس مريضه لأبعد الحدود ...
وبجد عشان ربنا بيحبك فبيوقفلك ولاد الحلال ..
وربنا يحفظك دايما من كل سوء ...

..................
بجد واحشاااااااااني
وبعتذر على الغياب كلها بسبب إمتحاناتي إللي نهت عليا ...

ياااارب تكونب بخير
تحياتي الملونه لعيونك
^_^

شمس النهار يقول...

اولا شكرا علي دعائك لي وتعليقك عند ندي الياسمين

ثانيا
النصابين الاول كانوا معروفين
دلوقتي اختلفوا
بقا الشكل والموضه الدقن والسبحه
والنقاب

وطبعا ده انعكس علي نظرة المجتمع للدقن والنقاب
بالبلدي ولاد الحرام ماخلوش لولاد الحلال حاجه

يعني الموضوع كله اختلاف شكل النصاب

اما المجتمع كاكل
اصبح الدين طقوس فقط وليس عقيدة واخلاق ومعاملات

يعني نصلي نصوم نسبح ونقرا قران
ولكن فعل مافيش

لكن في النهايه ان الله يدافع عن الذين امنوا
وربنا جعل الحقيقه تنكشف لك وحماكي من المقلب
:))
كل سنه وانتي طيبه

Humman being يقول...

شمس النهار..
كل يزم بيمر بيأكدلى وجهة نظرك دى يا شمس ... الدين تحول الى لبس وطقوس ظاهرية وفقط.... انما تطبيق سلوك صح ..مفيش

كل سنة وانتى بألف خير
شرفتينى

Humman being يقول...

غادة ...
كل سنة وانتى طيبة يا حبيبتى
وميرسى لمرورك ...دايما مشرفانى

خالص حبى