اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الثلاثاء، 12 أكتوبر 2010

مفيش لا دم ولا احساس...

كنت ماشية من جنب استاد المنصورة لقيت زحمة كبيرة جدا جدا على البوابة الرئيسية والبوابة الجانبية كمان وناس قاعدة على جانبى الشارع ... وفيه أمن كدة واقف مش عارفة بيحميهم ولا بينظمهم ولا ايه .... عرفت ان كل بوابة من البوابتين كان فيها مرشح من مرشحى مجلس الشعب ومؤيديه ...

لو سمعتوا وشوفتوا الناس كانت شايلة المرشح على أكتافها وبتهتف بسيادته ازاى مش هتصدقوا .... من جوا جوا صميم قلبهم .. لو سمعتوا بالروح والدم اللى كانوا بيقولوها ... أعتقد ان ماما وأختى سمعوها وهما فى البيت ...كم بشر غير طبيعى كان واقف ..
وكل البشر دول معندهمش ريحة الدم ولا الاحساس.... أيوة..... عفوا يعنى شوية زبالة عايزين ضرب النار .... بتهتفوا على ايه ولمين؟؟ .... الشخص الغبى اللى بتهتفوا ليه ده عملكوا ايه ؟... اللى قبله طيب عمل ايه؟ .... طيب لما يدخل المجلس الموقر هيعملكوا ايه؟... بعد ما تخلص الانتخابات هتشوفوه؟؟ لو روحتوا تقابلوه هيقابلكوا؟.. لو قصدتوه فى خدمة ولا وظيفة ولا علاج على نفقة الدولة هينفذ طلبكوا؟؟ ... دفعلكوا كام ؟ كل واحد 200جنيه مثلا؟ ...500 جنيه ...؟ هتصرفوهم على أربع سنين ال 500 جنيه دول لحد الانتخابات اللى جاية؟ ..  أكلكوا لحمة وفتة ؟... هتهضموهم على كام سنة ...!!!!!!

مفيش دم ولا احساس خالص ولا انتوا مش من البلد دى .... كيلو الطماطم بقى ب 10 و 12 جنيه ... كيلو اللحمة بقى ب 80 جنيه ....كيلو البطاطس ب 5جنيه ...والعيش والسمنة والزيت والسكر وكل حاجة زادت الضعف وانتوا بتهتفوا .... الايجارات اللى زادت وبتزيد مع تجديد العقد من سنة لسنة ..... برده ده ميخصكوش..... أنا مش فاهمة ... محدش يقولى أصل دول غلابة وأكيد عاملين لهم غسيل مخ ..... دول أكتر من 600 فرد ..كلهم عاملين لهم غسيل مخ ... كلهم مبيشفوش ولا بيحسوا ولا بيفهموا ..ايه اتعموا خلاص ..

دول شوية زباله واكلنها والعة..... بيطلعوا على أكتافكم وقبل ما يثبتوا رجليهم فى المجلس بيدوسوا عل رقبتكم بالجزمة القديمة لأنكوا خلاص متلزمهمش...

أنا عارفة انهم هيكسبوا هيكسبوا  بالتزوير .... بس يعنى يكون فى شوية دم ... شوية صغيرين ...حتى على الأقل عشان بابا "مبارك" وماما سوزان يعرفوا ان "المــــواطن" ..."المواطن"..."المواطن"  - "ومن أجلك أنت" اللى قاعدين يغنوها طول النهار دى ملهاش وجود.. يعرفوا ان طفح الكيل... ولا يمكن بقة معتش عندكوا دم من قلة الأكل .....!!!!!!!!!!!

هناك 16 تعليقًا:

Kontiki يقول...

ايوة كدا قولى وافضحى عمايل كل انتخابات دول غلابة على بلطجية وكل واحد بيقول ان شاء الله تولع بس ياخد كيس اللحمة والكام جنية ولسة انتخابات الرياسة اذا كان الوريث له هتيفة من دلوقت علية العوض اهم حاجة الاكل يفضل اسعارة تزيد عشان ثورة الجياع تقرب

Humman being يقول...

kontiki...
ياريت يا كونت ... ياريت تقوم ثورة الجياع دى ...نفسى أحس ان الناس دى بتحس.. حاسة ان جسمهم نحس على كدة أسعار تغلى .... أكل يولع...ايجارات تزيد ...وظايف مفيش .. وهما رد الفعل واحد ..لا مبالاة

Tears يقول...

يا حبيبتى دول نتاج الاعلام و التعليم و الفقر و كل ده بيعمل غباء و عمى مخليهم بيضحوا بنفسهم و بمستقبل عيالهم عشان جنيهات قليلة و لا زجاجة زيت

تصدقى ايام انتخابات الرئاسة كنت فى اسكندرية و شفت واحد حزب وطنى بيدى كل مواطن يرشح مبارك فرخة و واحد تانى فى الماكس كان بيدى جاتوه و طبعا الغلابة اتلموا عليه

اما بقى فى سيدى جابر فكان واحد حزب وطنى واقف يقول للغلابة اللى مش ح ينتخب الرئيس مبارك ح اكتب اسمه و ح يطلع عينه

دى تمثيلية و لو كان فيه رجالة كانوا بقوا يد واحدة و قاطعوا الانتخابات تماما

ابراهيم رزق يقول...

مجموعة من الجهلاء بيساعدوا مجموعة من الوصولين الجهلاء ده ابن الدايره و ده رجل الخرومات وده بيستخدم الدين و ده بيستخدم الاموال و حرب شعارات و مصالح انتى عارفة ساعات كنت احب اتسلى اروح اتفرج على موتمر انتخابى و اقعداضحك ولكنه ضحك كالبكاء
مطلوب فقط من عضو المجلس فقط الرقابة و التشريع والله العظيم لو عمل كده بضمير و علم لصلحت الاحوال
تحياتى ابراهيم رزق

Ms Venus يقول...

حاجة تجيب الضغط والله

معاكى حق قى كل كلامك بس انتى قولتى جملة فى اخر البوست يمكن صح


معندهمش دم علشان مش بياكلوا

الشعب كله بقى بلا احساس

ربنا يرحمناااااااااا

eng_semsem يقول...

هي ده الانتخابات بقالها 30 سنه ايه الجديد وكل مره هي الحكايه نفسها ومش هتتغير الا لما ناس كتير تمشي ويتغير نظام البلد ويعرفوا ان في شعب لازم يختار

داليـ ـ ـ ـ ـ ـ ــــا يقول...

يابنتى والنبى متحصرنيش انا بشوف اكتر من ده
اصلى شغاله مع واحد مرشح للعضويه
وتعالى اتفرجى عليه يالهوى الناس يابنتى يتقف تحى له كأنه الريس
ونفسهم يسلموا عليه ويلمسوا ايديه مش عارفه على ايه
انكت بئه فى نفسى واقعد اقول هبل وميعرفهوش ماحنا الا شغالين معاه عارفينه وارفانين من الا خلفوه
ربنا ياخدهم كلهم

فاروق سحير ( فاروق بن النيل ) يقول...

شوية فضفضة........
مين قالك إن فيه حد فى مصر كلها عنده دم موش الدم خلاص مابقاش كرات بيضاء ولا حمراء لأن الأهلى والزمالك خلاص مالهومش لزمة خلاص والشعب بطل يتنافس ويشجعهم كرات الدم خلاص بقت زيت طعمية مغلى لما باظ وعفن ولا بقى زفت زى الموجود على الأسفلت المغشوش من المحليات إنتى متصورة إن المرشح ده عند ضمير وجاى يصلح الكون داهوه جاى عشان يساعد الحكومة على خرابها ويقعد معاهم على تلها وعشان كده جايب الصايعين البلطجية اللى مالهومش شغلانه غير الصوت العالى والكذب والنفاق والتهليل له عشان ياخدوا قرشين ياريت ياكلو بيهم دا عشان يشربوا بيهم البلاوى زى البانجو والحشيش والمارجوانا ... إلخ دول من نفس عجينة المرشحين للحكومة الفاسدة البلطجية
ودومتى أختاه

Humman being يقول...

Tears
صح والله ... "لو كان فى رجالة ورجالة صح" كانوا قطعوا الانتخابات دى خالص

Humman being يقول...

ابراهيم رزق..
الكارثة حضرتك انهم بيدخلوا مجلس الشعب ده وهما مش عارفين هوه المفروض بيتعمل فيه ايه المبنى ده
بيدخلوه علشان المنصب والحصانة + ان بيتم اختيارهم باتقان زى الحزب الوطنى بحيث ينفذ خططهم من غير تعليق

خالص تقديرى

Humman being يقول...

Ms venus..
الواحد بس يا فينوس نفسه يفوقوا من الغيبوبة دى ..لو مكنتش لقمة العيش اللى هتفوقهم يبقى ايه اللى هيصحيهم تانى

دمتى بخير

Humman being يقول...

eng_semsem...
الناس بتفضل مطنشة السياسة والبلد واللى فيها عشان لقمة العيش ...دلوقتى لقمة العيش على وشك أن تختفى وبرده اللامبالاة هيه العنوان الرئيسى... يبقى احنا داخلين على مصيبة

شرفتنى بالزيارة

Humman being يقول...

داليا...
شوفتى ... أهى دى النماذج اللى هتمثلنا ... والنبى يا داليا تكتبى أكتر عنه ..من غير ذكر أسماء ولا حاجة ... بس نفسنا نعرف الناس دى أكتر من قريب شكلها ايه

خالص حبى

Humman being يقول...

فاروق ابن النيل...
كل يوم بنروح من سىء لأسوأ ... بلاها انتخابات ومصاريف ... ونوفر فى نفس الوقت البلطجة كمان ... يمكن تنفع الحكومة فى مناسبات تانية

شرفتنى

سندباد يقول...

ولا تحسبن الله بغافل عما يعمل الظالمون
لكل نظام فاسد نهاية ولكل جبار نهاية بشعة والتاريخ يقول ذلك وعندما يتكلم التاريخ يصمت الجميع
ولكن لا يغير الله ما بقوم حتي يغيروا ما باتفسهم
السلبية اكبر داء في الشعوب المغلوبة علي امرها ويمكن الكلام والنقد يكون بداية للتغير
تحياتي في اول زيارة

Humman being يقول...

سندباد ..
ياريت كلامنا ونقدنا للأوضاع دى يغير ولو شوية من اللى احنا فيه

شرفتنى بالزيارة
خالص تقديرى