اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الاثنين، 14 فبراير، 2011

كن فيكون ....


فوضى ..... ده هوه التعبير الصحيح لما نمر به الآن .... غادر مبارك ...تنحى مبارك .... اتخلع مبارك هوه وعصابة الحرامية الفاسدين الفاسقين اللى خربوا البلد وشفطوها ... ولسة هنسمع أسماء كمان كبيرة الأيام الجاية..... جميل

ولكن ...
أن تتحول البلد الى " فوضى " هذا ما لم ولن نسمح بيه ....
كل اللى عايز حاجة دلوقتى .... تبقى دلوقتى ..... ويعمل اعتصام ويضرب عن العمل ويسيب مكتبه ومصالح الناس ويعتصم فى الشارع.... والمسئولين يكون رد فعلهم اغلاق المكان ده لحين فض الاعتصام ...  

اللى عايز شقة يولع فى مبنى المحافظة وعربية المحافظ ويعتصم ..
اللى عايز علاوة ....يضرب عن العمل ويعتصم
اللى عايز يتجوز .... يلقق بالطوب .. ويعتصم
اللى مخنوق من مديره .... يعتصم
اللى عايز مرتبه يزيد...... يعتصم
اللى عايز يتثبت فى وظيفة.....  يعتصم
اللى عايز يتنقل لشغل قريب من بيته .... يعتصم
اللى اتأخرت الحوافز بتاعته .... يعتصم
اللى عايز يترقى .... يعتصم
اللى عايز يتساوى بفلان اللى فى وزارة كذا .... يعتصم
اللى عايز يقلل ساعات العمل .... يعتصم
اللى عايز يتأمن عليه فى شغله .... يعتصم
اللى عايز حد يهرشله فى أقفاه يعتصم ......!!!!!!!!!!!!!!!!!!

*وتكون النتيجة حرق المكان وتخريبه اللى هوه أساسا اتبنى بفلوسنا .... وهيعيدوا بناءه تانى برده من فلوسنا ودمنا

كل المطالب اللى فوق دى مشروعة 100% ... (ما عدا الهرش طبعا) ....بس يعنى دلوقتى حالا ... حالا .... الثانية دى ...كن فيكون ...
مبارك تنحى يوم 11-02-2011 ... النهاردة 14-02-2011 يعنى بقاله 3 أيام بس مش 3 سنين....

لازم نفهم حاجة مهمة  .. اننا استلمنا البلد من مبارك وعصابته تكاد تكون خرابة منهوبة .... الخرابة دى محتاجة صبر ...محتاجة عمل وجهد وتكاتف أيدى عشان نوقفها على رجليها ...عشان ترجع مصر اللى كانت ....محتاجة مجهود مننا كلنا ... كـــلنا .... العامل والمهندس والفلاح والصحفى والمذيع والسباك والدكتور والعالم  .... كـــــلنا لازم نشتغل ..

النائب العام راجل محترم ومش ساكت .... ومش هيسيب أى حد متورط أو له صلة من قريب أو بعيد بالفساد .... وأدينا كل يوم بنسمع أسماء جديدة بتقع (ولو انى مسمعتش اسم صفوت الشريف لحد دلوقتى وده محزنى جدا ... بس أكيد جاى) ....

فى ناس كانت زعلانة أوى ومتأثرة انى بتكلم عن اقتصاد البلد وتراجعنا سنوات كثيرة للوراء فى خلال ال 18 يوم بتوع الثورة ... وكأنى غيرت الجنسية وبقيت اسرائيلية ..... وكأنى كنت بقول لشباب الثوار تراجعوا والنبى ... بابا مبارك معملش حاجة .... والراجل عشرة عمر حتى لو حرامى معلش ربنا هيحاسبه .... سيبوه بقية العمر رئيس لينا ينبكوا ثواب فيه وفينا والنبى .... مما يدل على قصر نظر ومحدودية تفكير ناس كتير ... أنا بتكلم عن الناس اللى اتأثر وهيتأثر اقتصادها  عانت أد ايه... عشان نيجى زى النهاردة ونقول هنعمل ليهم ايه؟ ... لما يمشى مبارك ويغور ايه اللى المفروض يتعمل ..

المفروض فى رأيى هو الآتى :
1-ندى فرصة للجيش ينفذ بياناته وخططه للأيام الجاية - ما عدا مطلب واحد ألا وهو الافراج عن كل كل كل المعتقلين فى ثورة 25 يناير
2- ندى فرصة للحكومة الحالية تشتغل مع تغيير بعض الوزراء اللى مينفعش يستنوا زى أحمد أبو الغيط وسامح بيه فهمى مثلا 
3- كل حد و أى حد بيشتغل فى مكان ما يشتغل بمنتهى منتهى الضمير ولو اقدر يزود ساعتين من عنده يعوض بيها صاحب العمل يبقى كتر خيره... ولو يتنازل عن حوافز الشهر ده واللى جاى(ده للقطاع الخاص) يكون كويس (مش شعارات حقيقة)
4- لو قدرنا نشترك فى حملة "وائل غنيم" فى جمع مبالغ من رجال الأعمال لتصليح ما تم حرقه وتدميره يكون شىء عظيم... عايزين تشتغلوا مع نفسكوا ماشى
5- الجيش والحكومة برده يساعدونا شوية ولو مؤقتا ... لو فى حد تم تعيينه بواسطة من أحمد نظيف أو بقية أفراد العصابة وهما عارفينه انه اتعين بمحسوبية وبمرتب خيالى..... والحد ده مستفذ الناس .... يوقفوه عن العمل ..يترفد يعنى ... بس بشكل فورى عشان الناس تهدى شوية
6- يتعمل رقم مجانى لكل وزارة ... ورقم آخر خاص بالقطاع الخاص للابلاغ عن أى فساد  .... عشان ننضف البلد أول بأول
7- نعدم ونقتل ونغتال ونخنق ونموت "السلحفـــاة" اللى خنقتنا سنين .... يعنى بلاش البطىء الممل فى اتخاذ القرارات المصيرية مش بس فى الفترة الحساسة دى .... لأ ....يبقى القرار فورى بس برده مدروس بحنكة الأساتذة الكبار
8-حاجة كمان مهمة جدا معدناش عايزين المطبخ السياسى يبقى "مغارة على بابا" ميعرفش اللى فيها غير الرئيس والوزراء ... لأ ... عايزين نبقى عارفين بكل وأى حاجة بتحصل فى البلد ...مؤتمر صحفى كل أسبوع ... صحف رسمية محترمة ونزيهة تنشر كل حاجة ...مناقشة واشراك صفوة شباب الثورة فى كل القرارت ... كدة يعنى 

بلدنا كانت مخطوفة ورجعت .... هتلاقى عينيها حمرة وورمة من قلة النوم ... خسة جامد من كتر اللى نهشوا لحمها ... لسة ضربات القلب مش منتظمة ... حاسة السمع لسة بدءة تشتغل.... معصم ايديها أحمر ومتقطع ومتسلخ من الرباط اللى كانت مربوطة بيه ..فى آثار كدمات زرقاء فى كل أنحاء جسمها من كتر التعذيب ... بس محدش عرف ينتهك عرضها ...... لسة محافظة على نفسها بالرغم من كل اللى شافته ....
تعالوا احنا بقة ناخد بايديها واحدة واحدة ... هيه دخلت غرفة الانعاش عشان نلحقها فى الفترة من 25 يناير حتى 11-02-2011 لسة خارجة يعنى من يومين .. يبقى حرام لما نقولها قومى اجرى وشيلى وحطى  وسابقى الزمن

واحدة واحدة أرجوكم ... متخلوش حد يشمت فينا أول حرف من اسمه  (م ب ا ر ك) متخلهوش يقول لما سيبتها خربت

رجاءا اللى عنده أى مقترح جديد يضيفه على الحاجات اللى فوق دى يقولها وياريت نحاول نعمل صفحة على الفيس بوك نقترح هنعمل ايه الفترة الجاية وننفذ ده بطريقة سريعة
وبلاش نفرط فى البلد بعد ما رجعت... عايزين نبنيها مش نهدها

هناك 10 تعليقات:

MaNoO يقول...

أيوااااااا انتى كدا صح ونرتب افكارنا يبقى احنا كلنا بنسساعد بعض لان افعلا مش عايزين حد يشمت فينا
سياسيا وخلاص عندنا ثقه فى الجيش وان شاء الله هينفذ كل حاجه
اقتصاديا اولا الفساد الفساد الفساد محدش يكسل يبلغ عن رشوه عشان مصلحته تمشى خلاص الحجه اللى كنا بقولها ان البلد كلها كدا خلصت لا ياسيدى لو حصل كدا هيبقى بسببك وبسببى انا وبس
بلاش نسحب فلوس من البنوك عشان خاطرى ونحاول نشترى فى البورصه ولو حتى ب 100 جنيه والناس المعتصمين فى اى مجال ان شاء الله هننزلهم كمجموعه شباب ونتكلم معاهم كل واحد فى محافظته
كنا بنقول الشعب يريد اسقاط النظام
نبقى اصحاب تفكير وفكر بقى لان الانسان الناجح اما بيحقق حاجه بيفكر فى اللى بعدها
دلوقتى الشعب يريد بناء النظام
عندنا من الكودار ما يكفى لدوله متحضره خلال سنين بسيطه ودا مش كلام تفاؤل لا دا كلام العالم كله والامثله ادامنا وحده وحده ومع بعض
كل واحد فى مكانه تكمل الدائره ونرد لمصر الجميل

Ms Venus يقول...

ايوة يا شيمااء

قولتى اللى جوايا كله


وزى ما كنت بنادى واقول دايما

عاوزين ديمقراطية وحرية لازم الاول نعررف نستخدمها


مش عمال على بطال مظاهرات واضرابات

وكان الصوت العالى هو الحل

بلدنا بقى يا عالم يلا نخاف عليها


كل عيد حب وانتى بخير يا شيمو

وجهة نظري يقول...

المفروض بقى مدام شعب جدع كدة وبنقدر نعمل كل حاجة، يبقى نبتدي نتدور على التجار إلي ماصين دمنا بقالهم سنوات هما يغتنوا وإحنا نجوع وبيعملوا ثروات وأرباح خيالية على حسابنا. الحاجة تتكلف جنيه وتتباع بعشرة. لازم مقاطعة التجار تاجر تاجر، نعمل إنذار إن كل حاجة ترخص ٣٥ - ٦٠٪ حسب السلعة، والي مش حينفذ نقاطعه، إسبوع اتنين تلاتة لحد ماينفذ أو يقفل. والله أول واحد حيتعمل فيه كدة كله حيبقى زي الكلب، يعني حيكونوا أشرس من الكلب إلي راح؟

قلم رصاص يقول...

كلامك رائع جدا احييكي عليه
وصفتي الوضع بشكل جامع مانع زي مابيقولوا

انا فعلا اللي يعنيني جدا اليومين دول اعطاء فرصة للجيش ينفذ كل تعهد بيه ومنتظرينه منه ..واي طلبات تانيه هتتحق بمجرد المطالبة بيها عبر القنوات الطبيعية بقى ..وكفاية اعتصامات على الفاضيه والمليانه عشان البلد مش ناقصه خانقه..خاصة وان استمرار الاعتصامات على النحو دا هيشوه صورة الثوره ودا انا خايف منه الصراحه..خاصة في عيون الناس الكبيره في السن اللي ميعرفوش غير الاستقرار من وجهة نظرهم.

والحديث عن الاقتصاد يطول شرحه ان شاء الله هانزل بيه بوست عندي قريب

شكرا لطرحك البناء

وتحيا مصر والمصرينن
^^

Kontiki يقول...

مقلتش انا حاجة من عندى مش قلت خايفة من الفوضى وقلتيلى لأ اللى جاى احسن مش قلت شعرة بين الفوضى و الديموقراطية و شعبنا مش واخد انه يكون ديموقراطى وانما هو فوضوضى بجدارة و قولتولى لأ انتى غلط و عدوة الثورة و الثوار ومستفيدة من النظام .. لسة اللى جاى اصعب واكثر فوضة وابقوا اتفرجوا على السودان اللى حتفتح ملف حلايب واسمعوا تانى تصريحات رئيس الوزراء الاسرائيلى امبارح و حسوا شوية برجال الجيش المنهك فى الداخل مع وجود اخطار فى الخارج و الشعب كلة طالع يعتصم لمطالب شخصية !! تحملوا نتيجة الثورة عفوا الفوضى !

Shaimaa يقول...

MaNoO..
ياريت يا مانو فعلا تحاولوا فى موضوع الاعتصامات ... ياريت تحاولوا تنظموا لقاء مع المجموعات المعتصمة دى عشان يرجعوا يشتغلوا تانى ويصبروا شوية وكل حاجة هتتعمل بس البلد تقف على رجليها

مقترحاتك هايلة ويارب نحاول نجمعها ونقدر نعمل حاجة
شرفتينى بالزيارة

Shaimaa يقول...

Ms Venus...
حلو تعبير "بلدنابقى" ززز والله حسستينى فعلا اننا كنا عايشين فى بلد غريب مؤقتا وأخيرا رجعنا بلدنا واستقرينا
يارب نعرف نحافظ عليها يا فينوس

كل سنة وكل عيد حب وانتى بصحة وسعادة وخير وأمل

Shaimaa يقول...

وجهة نظرى ..
رأى صح بس ما تيجى نحاصر الموضوع بتاع التجار ده أكتر ونعمل الرقم لكل محافظة خاص ب الابلاغ عن أى فساد وخصوصا الخاص بالسلع الغذائية ويبقى فى موظفين ثابتين مهمتهم التحقيق واتخاذ اللازم فى كدة
اللى محتاج نسف من فوقه لتحته هى ادارة المرور كمان...

شكرا على المرور

Shaimaa يقول...

قلم رصاص ...
شكرا يا فندم ... وفى انتظار البوست القادم عن الاقتصاد الفترة اللى جاية محتاجة عقول مستنيرة تتكلم

Shaimaa يقول...

Kontiki...
طيب تعالى ناخدها واحدة واحدة ..
أولا أنا مكنتش أبدا من الناس اللى عملوا حزبين ... حزب "مع" ... وحزب "ضد" اطلاقا .. لأنى أنا نفسى عانيت من ده .... أنا كنت طول الوقت بقول أيوة ثورة وتنحية نظام بس خلوا بالكم من اقتصاد البلد ... خدوا بالكم من الناس الغلابة اللى ميعرفوش غير هيكلوا النهاردة ولا هيناموا من غير أكل .. دول لا يعرفوا ثورة ولا نظام ولا أيدولوجيات ...
لدرجة انى قولت خلاص يفوض سلطاته ل عمر سليمان(ولو انه كان حل مش صح) وخلاص ... وفى على بيوت الناس اللى اتخربت
انتى عارفة يا كونت احنا اللى بنخلق الفوضى واحنا اللى ممكن ننهيها...

طيب عايزة أسألك انتى حاسة ان اللى حاصل ده طبيعى .... يعنى فجأة كدة كل الناس افتكرت بعد 30 سنة انها مظلومة وخرجت الشارع مرة واحدة ؟ .... أنا حاسة ان ديول النظام هما اللى مخططين ل ده

يبقى الصح منحققش ليهم غرضهم ونحافظ على البلد اللى رجعت

طب انتى عارفة المصيبة الأكبر دلوقتى ايه؟ ... الشباب على الفيس بوك دلوقتى سايبين البلد والاعتصامات والمبانى اللى اتخربت وقاعدين يشتموا فى "وائل غنيم" ويقولوله انت عملت ايه؟ ... احنا كنا فى التحرير بنموت فى الوقت اللى انت كنت فيه فى السجن ...خلاص بقيت نجم كل يوم فى التلفزيون ..

أنا قلت قبل كدة اننا كنا محتاجين ثورة فى العقول والنفوس الأول قبل الثورة السياسية ...
فى حاجات كان يجب يتم بترها فورا حتى تنتظم الأمور زى تغيير الحكومة وزيادة حزم وسيطرةالجيش على كل الأمور

فى ناس كتير كانت فى التحرير عشان عايزين شقة .... وعلاوة ... وحوافز ...كانوا فاكرين حسنى مبارك هيمشى من هنا وبعد كدة هينزل قرار فى ميدان التحرير "اللى نفسه فى حلجة هيخدها وهوه مروح" ... كلام فاضى

فترة وهتعدى ... وتانى أنا بحترم وجهة نظرك ولا أصادر عليها ... فى ناس أغبية لسه عايشين فى "مع" وضد" مع ان أول شعار للثورة كان "حرية" ديمقراطية"