اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأحد، 20 فبراير، 2011

عايزين تفسير ....

1-ايه سبب تواجد الرئيس السابق مبارك فى شرم الشيخ وجميع المواقع والصحف تؤكد انه هوه وابنه على اتصال بالناس اللى ماسكة البلد دلوقتى وأكيد على رأسهم ظله الذى لم يفارقه "محمد سيد طنطاوى" ..... بجانب ان الرئيس السابق يتمتع بكافة المزايا اللى كان يتمتع بيها أثناء ما كان رئيس  .. حراسة وأمن وسفرجية وجناينية وخدم وحشم والحياة وردية ومزهزهة زى ما هية  .... ليه؟!!!

2-ليه لحد دلوقتى متمش تغيير "محمد سيد طنطاوى " وزير الدفاع اللى ولائه الأول لمبارك؟

3-فى مواقع وجرايد كتير تؤكد استمرار تواجد زكريا عزمى رئيس ديوان الرئيس السابق هو وعمر سليمان وشخصيات كثيرة من الحرس القديم داخل القصر الجمهورى وبيمارسوا مهامهم عادى جدا .!!!!!!! ياريت حد يقولى مهام ايه اللى بيمرسوها وقاعدين هناك لسه ليه وبيقدموا تقارير لمين بالظبط؟؟!!!!!!!!!!!!

4-الفريق أحمد شفيق "اللى أنا شخصيا بحترمه" وحاسة انه مسك البلد فى وقت غلط صرح امبارح وقال ان الوزارة تم تشكيلها كالآتى :
* ثلث الوزارة هوه اللى اختار وزراءها بنفسه
*الثلث التانى هو مش راضى أوى عنهم بس فى معاهم ملفات معلقة ف محدش يقدر يكمل غيرهم وبعد كدة سيتم تغييرهم
*الثلث الأخير هو لم يقم باختيارهم و مضطر يسيبهم ...... ايه مضطر دى؟ .... يعنى ايه مضطر ؟ .. ومين اللى غاصب عليك؟ ... ده اللى بيحكم مصر دلوقتى انت والجيش .... يبقى يعنى ايه مضطر ؟ ... هيه البلد لسه اللى بيديرها مبارك واللى حصل ده كان مسلسل ولا ايه بالظبط ؟!!!!!!!!!!!!!!!!!!!! 

5- السيد أحمد نظيف مازال حتى الآن محتفظ بالسيارات المدرعة اللى منحته اياها رئاسة الوزراء هو وزوجته .. ومازال محتفظ برجال الأمن الشخصى والسفرجية والجناينى والسواق وأمن الفلل بتاعته هو وأبناءه  ... مع العلم ان رواتب الناس دى اللى بيدفعها رئاسة الوزراء حتى الآن !!!!!!!!!!!! ... ياريت حد يوضح لنا ليه وعشان ايه .... ومحدش بيحاسب الناس دى ليه؟؟؟ وياترى مين غيره محتفظ بكل حاجة وبيمارس حياته الطبيعية بفلوسنا ؟!!!!!!!!!!!!!!

6-ايه اللى دخل "الشيخ القرضاوى" فى السياسة؟!!! ماشى هوه شيخ جليل وعالم محترم نبجله ونحترمه وعلى دماغنا من فوق .... وماشى برده ان لازم كل واحد يؤدى دوره فى المرحلة الحرجة دى  ... بس يؤدى دوره فى اللى بيفهم فيه ... انت مالك انت نفتح المعابر مع الفلسطينيين ولا نقفلها ...انت تفهم ايه فى الأمور دى... كان المفروض تطلع تقول للناس اشتغلوا ...اعملوا..... ايه اقتراحتكوا عشان مصر تطلع من الأزمة  ... تعالوا نبنى وننضف البلد .... انما سياسة ... ابعد عنها الله يكرمك احنا مش ناقصين... سيبها لحد زى  محمد حسنين هيكل مثلا ...

7-الاخوان المسلمين كانوا فى جرة وطلعوا لبرة ولا أنا غلطانة؟؟؟!!!!!!!! ايه حكاية حنفية التصريحات اللى حطت عليهم دى؟!!! معاهدة سلام ايه اللى محتاجة اعادة نظر؟ ... مالكوا انتوا ومال معاهدة السلام مع اسرائيل ؟؟!!!!  .... طب بلاش .... هننقذ اقتصاد البلد ونحاول نوقفها على رجليها ولا نتكلم فى معاهدة السلام دلوقتى .... هننتخب رئيس ونغير دستور ونعمل انتخابات ولا نغير معاهدة السلام.... طيب زعلانين انتوا أوى عشان فلسطين ... ماشى .. بس مش ملاحظين ان أصحاب البلد نفسهم اللى هما الفصائل الفليسطينية سايبين البلد والعدو الاسرائيل وقاعدين يتشكلوا ويموتوا فى بعض ... اذا كانوا مش راضيين يقعدوا على ترابيزة مفاوضات عشان يتصلحوا مع بعض يبقى هيقعدوا مع العدو يتفاوضوا ازاى؟؟؟؟؟ ...وبعدين دايما بلاقى عندكوا شهامة ناحية الفلسطينيين  ... كل مدة تجمعوا بطاطين وأكل ودواء و..و.... وتبعتوهم ... طيب ما فى ناس قاعدة فى المقابر بتنام مع الميتين وفى ناس تانية نايمة فى بيوت من غير سقف وتحتها مجارى ... وفى ناس بتنام فى بيوت من الصفيح وبتقضى حاجتها فى الشارع ..... مبتفكروش فى الناس دى ليه؟؟؟ ... ياريت تكونوا حزب محترم محايد وتبطلوا تعملوا أوصية على حد ولا تفرضوا رأيكوا على حد ولا تصرحوا بحاجة بغباء معهود ....

8- ايه الناس اللى قاعدة طول النهار فى الفضائيات تشتم فى بعضها دى ؟!!!! .. وايه القائمة السودة والبيضاء دى؟ .... هوه احنا فاضيين للدرجة دى  ... عندنا فراغ بنسلى نفسنا .... الشباب الصغير قاعد يقترح مشاريع من "مشروع نضافة"  .... ل "كيفية اعادة السياحة لمصر" ... ل "محاولة عمل رقم موحد للابلاغ عن الفساد" .......الخ .... ومش بيقترحوا بس لأ بينفذوا .... وفى ناس تانية لسة بتعمل قوائم وبتدور على "ضد" و"مع" مع ان كلنا مصريين فى الآخر ... مفيناش اسرائيلين يعنى حتى لو اختلفنا فى نظرتنا للثورة ... وبعدين ده أول مبادىء الثورة الديمقراطية يبقى ليه نسيب البلد واعادة بناء اقتصادها ونعمل قوائم؟؟؟؟!!!!!!!!!!!!!!!!!!! 

9- هوه "صفوت الشريف" برىء معملش حاجة خالص ولا ايه ؟؟؟!!! ليه متساب حى يرزق يأكل يشرب يلعب يصرف يرمح ؟؟؟؟ معملش حاجة خالص أس الفساد ده ولا ايه؟؟؟؟؟؟؟؟؟؟؟؟؟؟؟؟؟؟؟؟؟؟؟    

هناك 5 تعليقات:

غير معرف يقول...

Read to understand

https://www.facebook.com/notes/mohammed-farouk-agamy/dwlt-alfsad-lm-tsqt-bd-haaaaaaaaaaam-jda/10150098962379055

http://elw3yalarabi.org/modules.php?name=News&file=article&sid=9435

Shaimaa يقول...

غير معروف ....
يا مصيبتى السودة المهببة بزفت ... ايه اللى انت كاتبه ده؟؟ ... ومين وايه اللى يثبت انه فعلا صح مش مجرد كلام؟؟؟ ...
ده انت خبطت فى كل وأى حاجة وأى حد ... ده شوية شوية كنت هتقولى فتحى عينيكى انتى مواطنة مصرية بس عايشة فى اسرائيل
لأ ..لأ .. لأ أنا عايزة اللى يثبت كلامك ده بالدليل القاطع ... اللى بتقوله ده خطيير جداااااااااا وأنا بصراحة كدة مش مصدقاه أبدا ومش هصدقه
انت مصرى فعلا؟؟؟؟؟ ... أنا شكه فيك والله

Shaimaa يقول...
أزال المؤلف هذا التعليق.
Ms Venus يقول...

شيماء


صدقينى انا مرعوبة

وخايفة من اللى جاى اوى


ربنا يستر

Shaimaa يقول...

Ms Venus....
من ساعة ما قريت الكلام اللى فى الينك ده يا فينوس وأنا حاسة انى تعبانة جدا وخايفة أوى أوى لأبعد الحدود... برده مش قادرة أصدق

يارب يا فينوس يستر على اللى جاى يارب