يقولون أننى "بنت جدعة .. وراجل" .... كنت أريد أن أكون "بنت" بس من غير جدعة ولا راجل

شعب غبى

أول مرة أنزل من بيتى النهاردة وأنا بتمنى من جوة قلبى ان رجليا دى تكون ماشية على أرض تانية غير مصر وناس تانين غير المصريين دول .. حتى لو كانت البلد التانية دى اسرائيل .... والله اسرائيل

محستش بحزن قطعنى من جوايا زى النهاردة ... متكلمتش مع حد فى حاجة لأنى حاسة بوجع غريب ملوش حل

ليه عملنا فى نفسنا كدة ... ليه نسبة اللى نزلوا يصوتوا لم تتعدى النصف ... هى البلد اللى بنختار رئيسها دى مش بلدنا ولا اسرائيل ... اللى نزلوا 50% بس ليه ...؟؟؟؟!!! المصريين فى الخارج عددهم يتخطى 8000000 مواطن اللى صوت بس 365000 ليه؟؟؟!!! قعدتوا فى البيت تتفرجوا من بعيد ليه؟ .. طب عملتوا ثورة ليه من أساسه لما انتوا معندكوش استعداد لأى تغيير؟

ايه معنى الثورة اللى قعدتوا تغنلوها لمدة سنة ونص؟؟ .. عملتوا بيها وليها ايه؟؟

ليه نزل ناس زى أبو العز الحريرى وحسام عيسى وخالد على وسليم العوا والبسطويسى اللى لا يقدروا يعملوا حملات انتخابية ولا يصرفوا عليها ؟؟ كان هدفهم ايه ؟ ياخدوا حتة من التورتاية هما كمان ؟ طب لما الانتخابات قربت ولقوا ان مفيش أمل اطلاقا لنجاحهم متنزلوش ل حمدين صباحى مثلا ليه ولا حتى عمرو موسى على أسوأ الفروض ليه ... كان هدفهم تفتيت الأصوات والقضاء على مصر نهائيا ... ولا ترك الجمل بما حمل لل كلاب الاخوان اللى هيحولوا البلد لخلافة وملكية تسلم من شخص للتانى جوا الجماعة ويفضلوا طول عمرهم فى الحكم؟

ليه خرجنا حسنى مبارك بقة ؟ ما كان كويس وشغال ومراضى الكل ؟ لما انتوا معندكوش استعداد لا لمشاركة ولا لديمقراطية ولا حرية ما كنتوا سيبتوا البلد زى ما كانت وكان حرام اللى خسرناه من أرواح وفلوس وعيون ورجلين وايدين بشر غلابة ملهمش ذنب غير انهم كانوا عايزين يعملوكوا بنى ءادمين وبس لا أكتر ولا أقل ..

الراجل اللى مضايقنى جدا جدا جدا ونفسى أتف على وشه هوه "البرادعى" لأنه أجبن راجل عرفته فى حياتى ... أول مبادئه فى الحياة هوه "الهروب" والانسحاب ... لما انت مش أد المسئولية من الأول مكنتش تدخل فيها ... كل ما تحصل مشكلة ياخد نفسه ويسافر بره ...بيقعد فى بلاد الأجانب أكتر ما بيقعد فى مصر... وأول ما الاخوان دخلوا الانتخابات انسحب ؟ ... ليه؟ لو انت راجل بجد هتقاتل لحد أخر نقطة فى دمك ... خسرت كسبت مش مهم المهم انك عملت اللى عليك عشان بلدك .... لو كنت كملت فى الانتخابات كانت كل الأصوات اللى اتفتت دى راحتلك انت  ... بس انت مش بيهمك غير نفسك ووضعك وبرستيجك

الكلاب الاخوان هياخدوا البلد يقسموها ويحولوها لخلافة  .. ده يسلم ل ده يسلم ل ده تحت ستار الدين وقال تعالى وقالى الرسول وزبية صلاة وتسبيلة عين ... والغلابة اللى محتاجين ازازة الزيت وكيلوا السكر كتير ... واذا كان عدد الاخوان دلوقتى 4 أو 5 مليون بعد أربع سنين من الحكم هيبقوا عشرين مليون لأن الناس شايفة ان دول بقوا قوة مؤثرة زيهم زى الحزب الوطنى .. وسلملى بقه على مصر
وعلى فكرة اللى هيحكم هيه الجماعة بقيادة المرشد مش "الطرطور" محمد مرسى

أو ممكن تختاروا شفيق زى ما اختارتوه فى المرحلة الأولى ... شفيق مهندس موقعة الجمل والعامل الأساسى فى تهريب ثروة مبارك وعيلته هوه وكل رجال الأعمال ....اللى ساب زكريا عزمى وصفوت الشريف وكل الكلاب التانية تبرطع فى البلد بعد رحيل مبارك ... واللى انتوا أكيد عارفين ان الممول الأساسى لحملته الحزب الوطنى المنحل ... ولا متعرفوش .. طب طلعتوا مبارك ليه لما انتوا هتجيبوا شفيق؟

أنا شايفة انكوا شعب يعشق الذل والمهانة والبهدلة والممرمطة والديكتاتورية والضرب بالجزمة القديمة ... لو ملقيتوش واحد يذلكوا بتصنعوا واحد بايديكوا عشان تقدروا تعيشوا وتتنفسوا كويس ... فا اللى وصلتوا ليه ده أقل حاجة تستهلوها ... اللى صعبان عليا بس الشهداء اللى بيتحرقوا فى قبرهم دلوقتى  ....   
حسبى الله ونعم الوكيل

دفىء

اضطررت خلال الأسبوعين الماضيين الى السفر الى مدينة القاهرة أكثر من مرة للبحث عن شقة بغرض الانتقال اليها أنا وأسرتى بسبب افتتاح شركتنا لفرع جديد هناك ورغبة صاحب الشركة أن أنتقل للعمل مع ال stuff الجديد هناك ..فعرضت الأمر على أمى التى رحبت بشدة بسبب تواجد كل أقاربها من الدرجة الأولى هناك بمدينة القاهرة ولمحت بعينيها فرحة طفل صغير غاب عن أحضان محبيه فترة طويلة ..  وحانت لحظة العودة ..

أدركت من البداية أن رحلة البحث لن تكون هينة فآثرت ألا أجهد زملائى بمشقة المرور اليومى لاصطحابى معهم بسياراتهم واتخذت قرارا "دون علم أمى" بأن أذهب بسيارتى الى مدينة القاهرة وحدى حتى أعتاد ذلك ... وياليتنى لم أتخذ هذا القرار لأنه منذ وضعت قدمى على "البنزين" وقلت "بسم الله الرحمن الرحيم" وبدأت الخيالات والأوهام تطاردنى وبدأ عقلى فى نسج القصص البوليسية "زى قصة النائب البلكيمى" عن كيف ستلاحقنى سيارة مجهولة وتقطع الطريق على بالاتفاق مع سيارة أخرى ويشهرون السلاح بوجهى ثم يسرقون سيارتى وربما يسرقون منى شيئا عزيزا آخر وحاولت ازاحة مثل هذه الأفكار مؤكدة لنفسى أننى لم أجرى عملية تجميل بأنفى ولست من السلفيين ولا من الأخوان "محترفى الكذب والتمثيل" .. ولكن دون فائدة  ... فتوقفت بمدينة "أجا" واتصلت بأحد الزملاء الذى هرول مسرعا الى واتصل بأحد السائقين بالشركة لكى يأتى ويأخذ سيارتى وركبت أنا معه 

كنا نبدأ اليوم منذ الصباح الباكر بعمل جولة ميدانية سريعة بالمكان أو بالمدينة التى سأقيم بها وكلما قابلتنا  لوحة دعاية مكتوب عليها "شقق للتمليك " كنا نتوقف ونتصل بالرقم ونذهب معه للمعاينة ورؤية أكثر من شقة  ... وكنت أسجل بعينى وبيدى أيضا ملاحظاتى عن المكان والمساحة وال view  ثم نتصل بأحد السماسرة الذى رتبنا معه مسبقا ليجهز لنا أكثر من مكان حتى لا يذهب اليوم هباءا

فى كل مرة كنا نذهب بنهاية اليوم لأحد المطاعم لتناول الغذاء بصحبة صديقنا هذا المقيم بالقاهرة و الذى اعتاد أن يتناول الثلاث وجبات بالمطاعم بالرغم من وجود بيت له و زوجة وأولاد!! ولكن دائما ما كنت أشعر أن حياته بها شىء لا أستطيع تحديد ماهيته!!!! ، علمت أنه لم يترك مطعما مشهورا بالقاهرة لم يأكل به ..صغيرا كان أم كبيرا ، فكان عندما يرهقنا البحث والتنقيب عن الشقة الموعودة ونتخذ قرار جماعى بالراحة والغذاء يبدأ هو فى طرح أكثر من 15 مكان لتناول الغذاء مع شرح مفصل لمميزات وعيوب كل مكان بالتفصيل الممل  .. مثلا .. هذا المطعم يقدم أسماك روعة و seafood يجنن ولكن ال service ليست جيدة هناك ... وهذا المطعم كان يقدم مشويات جيدة جدا عندما كانت اللحوم "لحوم برازيلى" أما الآن أصبحوا يقدمون لحوم ولكن "هندى المنشأ" كما يقول هو ...!!!!!! تعجبت كثيرا وسألته كيف لك أن تعرف أنها "هندى" أم "برازيلى"  ... "مش لحوم وخلاص ولا ايه؟ !! ولا أنا اللى حمارة" ... فاستنتجت بعد شرحه الطويل لكل مطاعم القاهرة أنه "محترف مطاعم" لا لشىء الا لأنه "بيفطر ويتغدى وبيتعشى" بهذه المطاعم ...!!

توقفت كثيرا عند هذا الرجل .. ولم أسمع جيدا معظم الحوار الذى كان يدور على ترابيزة الغذاء من تقييم للشقق ومساحاتها.. مرورا بالحالة الاقتصادية والسياسية لمصر  وصولا للحوارات الشخصية عن حياة كل منا .. كنت أومىء برأسى بالموافقة على معظم الحديث الذى لم أسمعه مع ابتسامة مصطنعة فى الوقت الذى كان يعترينى فيه برودة غريبة تكتسح جسدى لدرجة شعرت عندها أن أصابعى بدأت تأخذ لونا أزرق مع هزة ملحوظة بأحد قدمى لمحها زميل لى فهمس بصوت منخفض جدا "مالك" ؟ ... فلم أجيب" ....!!!!!

ملحوظة صغيرة : المكان كان مكيف ودافىء ... ولكن..........

لم أتذوق أى مما تناولته بأى من هذه المطاعم الكبيرة بالرغم أننى أنا من اختار هذه الأكلات بعيدا عن توجيهاته هو وشرحه المحترف المفصل ...لا لأنها كانت سيئة ... بالعكس كانت جميلة جدا وأنا أحبها فى الأساس ..... ولكن .... لم أجد أو أشعر بأى دفىء بهذه الأماكن .. تذكرت أمى وأختى وهم ينتظروننى يوميا للعودة من العمل فى السادسة مساءا وأحيانا السابعة بدون غذاء حتى نجلس معا ونأكل ونتناقش ونحكى حكايات ظلت محبوسة طيلة 9 ساعات بداخلنا لكى نتقاسمها معا ونضحك ...ودائما ما تشاركنا ابنة أختى ذات "العام الواحد" بالغذاء لا لتأكل بالطبع .. ولكن لتعبث بهذا وذاك ونظل ننزع هذا من يدها ونضحك على شقاوتها مرة ونصرخ الأخرى.. ولا مانع من أن أنتزع أنا منها "بوسة" كبيرة وهى مشغولة بالعبث بالأطباق ..... وهكذا

حياة ...حب....دفىء.... نعم دفىء جميل يغلف هذه الحياة ليملأها حياااااااااااااااااااة ... دفىء لم أجده اطلاقا بهذه المطاعم التى يمتدحها صديقنا ... دفىءلا يساوى أموال العالم أجمع...

عندما تسربت برودة حياة صديقنا هذا الى جسدى ظللت أفكر كثيرا عن السبب الذى يدفع شخص مثله ليعيش حياة "باردة"  خاوية بهذا الشكل - مع العلم أنه يقنع نفسه ومن حوله أنه أسعد شخص بالكون- ولكنى قرأت ما وراء حديثه ورأيت حزنا كبيرا يتوارى وراء ابتسامة عريضة مصطنعة لا توحى بسنتيمتر واحد سعادة.

بالطبع لم ولن أسأله من المسئول عن شكل حياته الكئيب هذا لأن هذا ليس من شأنى .... ولكننى ظللت أحمد الله عز وجل على حب أمى وأختى ودفىء أحضانهم التى تنتظرنى وتستقبلنى وتحتوينى وتغمرنى بدفىء لا أريد من ربى غيره .... الحمد لله على دفىء حياتى . 

مجلس الشعب العرة

أيوة مجلس شعب "عـــرة" بكسر العين ... ايه ده؟ ايه التخلف العقلى اللى بيعملوه السادة النواب ده ... بقالهم 3 أيام بيناقشوا القضية المهمة الحساسة اللى هتأثر على مستقبل مصر والأجيال القادمة ألا وهى "اعتذار النائب زياد العليمى للشيخ حسان والمشير" ... !!!!!!!!!!!!!!!! ومظاهرات مؤيدة ..ومظاهرات معارضة ... وفاكسات رايحة وتلغرافات جاية ...

ومش ده الموضوع الحساس الوحيد ...لأ ..ده فى مواضيع تانية حساسة جدا ومش محتاجة طلبات احاطة وبس لأ دى محتاجة لجنة من بتوع تقصى الحقائق الكتير جدااااااا دى  ... زى مثلا المسمار اللى كان فى كرسى السيد النائب ... والسيد النائب اللى كان ريقه ناشف والكتاتنى اداله واحدة "هولز" ... أما الآذان بقة ده قضية تانية ده اللى هيقيس مدى تطبيقهم للشريعة ومقدار التقوى عند كل نائب .

منتهى الغباء والتخلف .. للأسف المجلس ده لا يمت للثورة ب صلة .. ده مجلس مسلوق اتعمل فى شهر والاخوان وبقية الاحزاب التانية لموا أى بشر ...."أى بشر" لا ليهم فى "الثور ولا فى الطحين" وقالولهم تعالوا هنعملكوا نواب ...حتى منظرهم وشكلهم يغم بلد ...

- مصطفى بكرى قال على البرادعى خاين وعميل تحت قبة البرلمان ومتحولش للتحقيق .. وزياد العليمى ده "اللى أنا معرفوش أساسا والله" انتقد الشيخ حسان والمشير بره البرلمان كمواطن عادى واتحول للتحقيق .. لأ والموضوع كبيير ... وكل واحد بيقول رأيه ... والشيخ حسان بيقول "عفوت عن العليمى" ..الحمد لله انه عفا ... بس أنا رأيى بقه تجلدوه فى وسط المجلس أو "الرجم حتى الموت" ...

-من امتى يا كتاتنى بيتم التحويل للتحقيق بناءا على كم الفاكسات والتلغرافات ... هتمشى المجلس بالتلغرافات ولا بالقانون
*خلاص حلييتوا الأزمة الاقتصادية وجيبتوا فلوسنا اللى اتسرقت واتهربت ومش راجعة ؟؟!!!!
*عرفتوا من ورا مجزرة بورسعيد ... وليه تم تشريح "جثتين اتنين بس" والباقى تم دفنهم مباشرة؟؟؟ .
*شوفتوا حل للاحتقان الطائفى ومين اللى واقف وراه؟
*مسألتوش مين ورا قرار صرف 4 مليون جنيه على مستشفى طره عشان الرئيس "المحشى" يتنقل هناك ...؟ أيوة الرئيس المحشى كل اللى بيتصرف عليه ده وتقولولى  "مخلوع" .... لأ "محشى" ؟
*شوفتوا حل للمحاكمة "الكوميدية" الهزلية اللى بقالها كام شهر شغالة وفى الآخر هنطلع احنا اللى قتلنا المتظاهرين بالنبلة وهو كان بيحوش عنهم وعامل ساتر قدامهم هوه وولاده والعصابة اللى معاه!!!!!!
*مقدمتوش طلب احاطة لاعادة المحاكمة على الكوارث التانية اللى عملها ليه ؟؟؟؟ ... هوه قتل المتظاهرين وبس؟؟؟؟ معملش حاجة تانية ؟؟؟ .. ومش بيتحاكم محاكمة عسكرية ليه؟؟؟؟!!!!
*المهندس الأساسى لكل كوارث مصر هو "صفوت الشريف وزكريا عزمى" ..محدش سأل بيتحاكموا على ايه؟ على الفيلل والقصور وبس ؟ مصائب صفوت الشريف عمرها 45 سنة مش 30 بس ... هيتساب كدة برده؟

تكالب "الاخوان والسلفيين" على المناصب هما وأمثالهم خلاهم يدفعوا بأشخاص أقصى منصب كانوا ممكن يتقلدوه هو عمال نظافة وليسوا نواب برلمان ..... هذا المجلس لا يمثل الشعب مطلقا  .. ولا يمثل الثورة أيضا .. هو يمثل نفسه لنفسه ومع نفسه  ... ف رجاءا تغيير اسمه الى "مجلس العاهات" أو "مجلس نفسه".

الواضح أن قدر المصريين الأزلى هو الصبر على الابتلاء

حداد وبس..مفيش كلام يتقال

أنا... امرأة..وفقط

"بحبك أوى".... "وحشتنى".... "انت أحلى حاجة فى عمرى" ...  هكذا تكون نص رسائلى اليك التى لا تجد صدى سوى دوى صمت موحش يدمى كرامتى ويدمينى .... تصل اليك فيرتفع هرمون الذكورة الى أعلى مستوياته عندك... وتهوى أنوثتى الى ما بعد القاع فأحاول جاهدة انقاذها بضغط زر Delete ولا أدرى وقتها هل هذ محاولة منى لانقاذ أنوثة مجهضة أم اقناع لعقلى أنا ما فعلته خيال لم يحدث من الأساس

هل "حرمان" + وحدة = "ضعف"  ؟!!!! هكذا أسأل قلبى دائما.... فتجيب مشاعرى ... هل أنتى  "رسول"؟ ف أجيب ..."لا"... فتستطرد : اذن نحن بشر ...ان لم نبحث عن الحب فسوف يطاردنا هو ... نقاوم ... نهرب.. نتناسى ، ونظل نشجب المسمى "بالاحساس" ... وندين من تدعى " العاطفة" ... ونحجب تلك " الاشتياق" ونقنع أنفسنا جاهدين أننا رهبان فى محراب الحياة ....  وفجأة ... تخور القوى ... وتستسلم المشاعر... وتذوب الأقنعة عندما يأمرنا اله الحب ويفرض سطوته ... ف يتلاشى الحرمان وتغتال الوحدة ... ونطلق العنان لمشاعرنا ...
هكذا تجاهد مشاعرى فى اقناعى بمشروعية حبى لك ... الذى أراه أنا خطيئة

أتساءل أحيانا عن منطقية حبى لك.... فأكتشف من وحى سذاجتى المعتادة أنه "حب اللامنطق واللامشروعية".. أتعرف لماذا؟ ... لأنك أنت وحدك المنوط بارساء وتثبيت معطيات وقواعد هذا الحب ف يصبح "منطقى"... وأنت وحدك من يمتلك سلطة اعطاءه صبغة الشرعية المفقودة .... ولكن تأبى أنت كالعادة ... وأستمر أنا فى حبى الطفولى.. 

أسمع من هنا وهناك كلمات ونصائح الحكماء الكاذبة المغلفة برزانة عقل مصطنعة عن خطيئة حبى لك  ... ف أتعجب من كثرة الأقنعة البالية التى لا تستر حتى صاحبها ... وأتجاهل فحوى هذا الهراء الذى لا يسمن ولا يغنى من جوع ... وأستمع فقط لعقلى الذى يعافر فى ايجاد تفسير ل "لامبالاتك" ... وحل "لاندفاعى"...

لا أجد ......

أمقت لامبالاتك ... وأبغض بشدة "اندفاعى"  ... وأحبك ..وفقط

محتاجة رأى محايد

محتاجة أسمع رأى محايد فى موضوع كدة.. رأى بعيد عن أمى وأختى.. وبعيد عن دماغى اللى أحيانا بتفكر غلط ... وبعيد عن "التردد" اللى مش عارفة أتخلص منه..
واحد زميلى فى الشغل اتقدملى مرتين ورفضته .... نص زمايلنا فى الشغل بيقولولى ده ولد كويس وابن حلال والنص التانى بيقولى لأ مينفعكيش....

هتكلم بصراحة عشان أسمع رأى مباشر ومش هخبى حاجة ...
مميزاته الظاهرة اللى الكل مجمع عليها انه مؤدب جدا ..محترم.... جامعى زييى.... أخلاقة كويسة ... وبيصلى "ولو ان دى مش مقياس عندى لأن فى ناس كتير علامة الصلاة هتفلق دماغهم وهما شوية زبالة".... لا مرتشى ولا نصاب زى بقية العالم الزبالة اللى اتقدمولى قبل كدة... ومابين قوسين "بيحبنى" زى ما زمايلنا بيقولوا... شكله كويس ومظهره كويس ... وفى حاله تماما مش بتاع مشاكل.

العيوب بقه .... منطوى جدا جدا جدا بيكلم كلمة كل 3 ساعات ومش اجتماعى اطلاقا لدرجة انه مسار تريقة فى الشركة أحيانا.. ... غير طموح اطلاقا ... عايز يفضل كدة محلك سر وبارك الله فيما رزق ومادمنا بناكل وبنشرب خلاص(بروطة يعنى) ... مستواه الاجتماعى أقل منى ... مستواه المادى أقل منى ... أنا بتكلم بصراحة ووضوح عشان أسمع رأيكم بوضوح.. كمان فى صفة بتخنقنى بصراحة اللى هيه الحساسية زيادة عن اللزوم وعلطول مقموص وأنا مبحبش الناس اللى محبكاها كدة... وكئيب كدة شوية

نيجى ليا أنا بقى ... بتكلم 200 كلمة فى الدقيقة.... بصراحة وبأمانة مبحبوش زى ما هو بيحبنى وقولتله الكلام ده لما اتقدملى.... عندى طموح هيقسم السماء اللى فوق دى نصين ... عايزة أبقى وأكون وأغير وأوصل و..و..و.. بحب الراجل اللى هوه شعلة نشاط ... عصبية أنا وجنونة ومتقلبة وكل ساعة بحال..... وعندى صفة مهببة مش لاقيالها علاج ألا وهى "التردد"...
منيش ملهوفة على الجواز اطلاقا ومش كلام برسم نفسى يعنى ..لأ .... مش فى دماغى ولا بفكر فى سن ولا كلام الناس اللى مش بتريح نفسها وتعليقاتهم ... لأ.... بالعكس تماما حاسة اننا مرتاحة جدا كدة الحد الوحيد اللى مش مستريح هيه "أمى" وأختى ..حاسة انهم هيجوزونى أول قطة معدية فى الشارع وشايليين الهم بسببى مش قادرة أفهم ليه ... ومحدش يقولى اعملى صلاة استخارة لأنى عملتها وشوفته فى الحلم بيتشاكل معايا شاكلة لرب السماء وبنقطع بعض ... بس فى ملحوظة مهمة .. أنا كل اللى بيحصلى طول اليوم بحلم بيه كله كله بالليل وبالتفصيل ومشاعرى بتحكم أحلامى .... وأنا طبيعى رفضاه مرتين فلازم أحلم كدة.... ف ده مش مقياس.

المهم يعنى عايزة أسمع رأى محايد بيفهم وبيفكر صح يقولى الصح ايه؟ وياريت لو فى علاج للتردد يبقى كتر خيركم

أيمن نور البطل الضحية المغلوب على أمره

أيمن نور

هل زويل مرشح المشير؟!

الثلاثاء، 3 يناير 2012 - 08:02

لوحات الموزاييك تتكون من آلاف من القطع الصغيرة التى تتلاصق بعضها بجوار البعض، لتكون لوحة ذات معنى، وشكل. وفى كل لوحة، هناك قطعة صغيرة- غالباً هى الأخيرة- تسمى بالقطعة «الذهبية» التى تكمل صورة اللوحة.

وليس بالضرورة أن تكون القطعة الذهبية، من الذهب، أو الفضة، أو العاج، أو الفسيفساء فهى فى الغالب قطعة عادية كغيرها من آلاف القطع، لكنها تستمد قيمتها من كون الصانع قرر أن يدخرها لتكون الأخيرة، ليكمل بها عمله، ويتم بها صنعته، ويقبض بعدها أجره.

فهل سيكون الدكتور أحمد زويل، هو هذه القطعة التى يكمل بها المجلس العسكرى، لوحة الموزاييك السياسى، قبل الانتخابات الرئاسية القادمة، ويستريح؟!

لم لا؟! ولم نعم؟! وللإجابة، نتوقف أمام تقرير خبرى نشر منذ ساعات قليلة.

فالزميل أحمد عيد، الصحفى بجريدة «التحرير» يميل للإجابة بنعم، فى تقرير إخبارى نشره أمس، الاثنين، أشار فيه لأنباء- شبه مؤكدة- عن تعديل دستورى لشروط الترشح للرئاسة، لإزالة عدة عقبات حالت دون طرح اسم زويل، كمرشح محتمل، عقب الاستفتاء على تعديلات الدستور أبرز هذه العقبات القانونية، التى تمنع زويل من الترشح- للآن- كونه يحمل الجنسية الأمريكية، والعقبة الثانية أنه متزوج من سيدة غير مصرية، بالمخالفة للنص الدستورى المعدل، والإعلان الدستورى الأخير، وكلاهما اشترط ألا يكون الرئيس سبق له التجنس بجنسية أخرى، وأن تكون زوجته مصرية!!

يساند ما ذهب إليه الخبر المنشور بالأمس، أنباء مؤكدة، عن لقاءات متعددة- غير معلنة- بين المشير طنطاوى، وزويل، أعلن عنها مُؤخراً لقاء 20 ديسمبر، الذى أعقبه لقاء آخر، بين زويل والجنزورى، وحضور إعلامى مكثف لزويل من خلال لقاءات عمد فيها لتبنى خطاب يتماشى مع سياسات وتوجهات المجلس العسكرى، وربما داعم لها!!

ويعارض ما ذهب إليه الخبر المنشور بالأمس، صعوبة تجاوز إحدى العقبتين الدستوريتين، لترشح زويل، فإذا كان منطقيا، إلغاء شرط جنسية الزوجة، بوصفه تزيدا غير مبرر، وربما كان مفصلاً لإقصاء زويل من المنافسة- فى وقت سابق- إلا أن شرط عدم جواز أن يكون المرشح لرئاسة الجمهورية، سبق له التجنس بجنسية غير مصرية، هو شرط مستقر فى العديد من الدساتير وله ما يبرره فى حالة الرئيس، خلافا لحالة النائب فى البرلمان الذى يقبل منه التخلى عن الجنسية الثانية قبل تقديم طلب الترشح للبرلمان.

على كل حال.. أنا دائماً أميل لعدم إرهاق إرادة الناس، بشروط مسبقة، تصادر عليها، وأؤمن بأن الإقصاء المسبق، اعتداء مسبق على إرادة الناس، والأفضل دائماً هو الاحتكام للصندوق الانتخابى، ليختار الناس بإرادتهم الحرة، من يمثلهم ويحكمهم، شريطة أن يكون هذا المنطق هو السائد للجميع ولا يكون إعماله انتقائياً على سبيل الاستثناء والتفصيل!!

ليس عيبا- بحق زويل- أن يكون له علاقة- أو حتى صداقة- شخصية بالمشير حسين طنطاوى، ولا يجب أن يخصم هذا من رصيد الرجل- وهو رصيد كبير- لكن العيب كل العيب أن يضيف هذا لرصيده، أو لفرصه فى السباق، الذى يتحتم على المشير، أن يكون لديه مسافات واحدة ومتساوية من جميع المتسابقين فيه!! أو يترك هذه المسؤولية الانتقالية لمن لديه هذه المسافة!

ليس سراً أننى لم أكن ضد شخص الدكتور زويل أو ترشحه للرئاسة- وقد حرصت على حضور أول ندوة عامة أقامها- قبل الثورة بعام- بمكتبة الإسكندرية، تأكيداً لهذه الروح.. وأكاشفكم بسر أننا أرسلنا عام 2009 رسالة من حزب الغد تطلب منه العودة لمصر، والبقاء فيها، والتواصل مع القوى الوطنية، والارتباط بها «إذا كان جاداً فى فكرة الترشح للرئاسة»، لكن الرجل اعتذر!! ولم يكن شريكا، ولا داعماً للثورة.

أهلا بكل مرشح يأتى من رحم الشعب وإرادته!! وليس سهلاً.. أن نقبل أن يحكمنا الجيش بالوكالة!!
نقلا عن اليوم السابع

أيمن نور ... تحاول جاهدا أن تثبت أنك رجل محترم  بشرحك المستمر لأعمالك وانجازاتك وكفاحك ونضالك... وكونك ضحية مغلوبة على أمرها .... ولكن سرعان ما يقع القناع وتتكشف الحقائق رغما عنك
لا تستغل كره الناس للمشير الآن ... زويل ليس مثلك ..... زويل رجل واضح ومباشر اذا كان ينوى الترشح سيصرح مباشرة بذلك .... وتأكد اذا انحصر اختيارنا بينك أنت وعمرو موسى من ناحية وزويل فى الجهة الأخرى ... تأكد تمام اليقين أننا سنختار زويل

استراحة

> "http://www.youtube-nocookie.com/embed/xHkq1edcbk4?rel=0"

رسالة الى المشير طنطاوى..

ارحــــل أنت ومجلسك اللاعسكرى واللاوطنى ...لن نقبل بوجود ديكتاتور جديد...يكفى ما عانينا من طغيان ديكتاتورى سابق... لن نقبل باجهاض الثورة.. ولن نبقى على طاغية جديد... الآن فقط ندرك أن النظام لم يسقط..

بحطت ايدك

بحطت ايدك ...ده تعبير كانت تستخدمه جدتى رحمها الله عندما تصف رجل أو امرأة بدون شخصية أو يقوده الأخرون أو أحيانا يكون "تنبل" لا يحب الحركة ... وأعتقد أن اختيار المجلس العسكرى ل كمال الجنزورى هو اختيار لرجل :

• "بحطت ايدهم" أو فلنقل رجل طيع على "أد ايديهم" روح يا "كمال" تعالى يا "كمال" حتى لا يفقدوا سيطرتهم
• بحث فى الماضى اللعين وكأننا شعب بلا مستقبل
• الرفض التام لأى تغيير أو روح جديدة حتى نظل نسير على خطى البيروقراطية بثبات
• الخوف من الدماء الجديدة مثل البرادعى و حمدين صباحى ... هيحركوا المياه الراكدة ويصحوا البلد ويرجعوا الأمن وأعتقد المجلس العسكرى مش عايز كدة 

* أعتقد ان كان فيه صفقة خبيثة بين "الأخوان" والمجلس العسكرى بخصوص الانتخابات لا أعرف تفاصيلها  ولا أريد

*المجلس العسكرى "لم" البلطجية فى يومين الانتخابات وكأن مكنش فيه بلطجية أساسا بيخربوا فى البلد بقالهم 9 شهور ..... ورجعوا تانى طلقوهم علينا .... الله ؟ .... ما انتوا قادرين تلموهم وترجعوا الأمن أهه أومال ملمتهمش من 9 شهور ليه؟؟؟؟؟؟؟؟!!!!!!!!

* سؤال برىء للاخوان.... بتجيبوا الفلوس دى كلها منين؟؟؟؟ معلش أصل أنا مبهورة والله باليفط ال 30 متر فى 50 متر الجلد اللى مالية الشوارع غير دعاية التليفزيون غير الفلوس اللى بتروح البيوت للناس والسردقات والبدل الاسموكن.... بتجيبوا الفلوس دى كلها منين ؟... طب مش كان أولى تعالجوا بيها الناس الغلابة وتطلعوا الأمهات المسجونين بفلوس جهاز بناتهم من السجن وتجوزوا العوانس؟؟؟؟؟!!!!! وثوابكوا هيكون الجنة برده زى الانتخابات 

* وزير التضامن الاجتماعى جودة عبد الخالق  كان هيضرب المذيع امبارح بالجزمة بس ربنا ستر لأن المذيع كان معاه على التليفون مش قاعد قدامه .. وكل ده عشان المذيع قاله "الناس بتموت بعض عشان أنابيب الغاز" ..... وأرجع فخامته السبب فى قلة أنابيب البوتاجاز الى "غياب الأمن" وزعق فى المذيع وقاله متهيجش الناس وتقعد تتكلم كدة لوحدك
مازال يسير على خطى "المخلوع" ....... ربنا ينتقم من فخامتك يا سيادة الوزير 

*الجنزورى جاب 13 وزير من وزارة شرف ... أومال مشيتوا "شرف" ليه ؟؟ هيه المشكلة يعنى كانت فى شرف ولا فى المجلس العسكرى اللى مش بيدى صلاحيات لحد وغاوى ديكتاتورية 

* عدم سن قانون "دور العبادة حتى الآن احدى أدوات المجلس العسكرى لنشر الفوض وغياب الأمن  

الى المجلس العسكرى

مجلس الشعب القادم سيكون :
%50 حزب وطنى + %50 اخــــــوان ....!!!!! ولا عزاء للمصريين

الى المجلس العسكرى : من يخون وطنه وشعبه بهذا الشكل غير مؤتمن على حماية حدوده

free of

كثر من يتشبثون بطرف ثيابى ... ولا أجد أنا حتى من ألمس طرف جلبابه

يرانى كثيرون امرأة قوية ...صلبة ... عنيدة ... جبل لا يقهر ....!!! .... وأرانى هشة ... ضعيفة... تترنح ما بين جدران عالية بغرفة مظلمة ... تتخفى خلف قناع "القوة"... لأنى.... "مبحبش حد يشوف أى دموع فى عينيا ..عشان لا أصعب عليه ولا يزعل عليا".

بركان ... كثيرا ما يثور .. قليلا ما يهدأ ... هكذا أرانى من الداخل
ابتسامة عريضة ... ضحكة مجلجلة...      هكذا أنا من الخارج


"غصة" ... أتعجب لبلاغة هذه الكلمة التى تعبر عن شعورى تجاه أقرب الأقربون لقلبى ... أشعر أنى المخطأة.. أما هم ف ليسوا مذنبون ....لأنى تماديت فى حبى اللامحدود لهم الذى قادنى بعنف وقسوة الى "ندم" لا أحب الشعور به.. فى الوقت الذى لم أعطى لعقلى الفرصة فيه لكى يرى الجانب الآخر منهم ... أو بالأحرى يرى أدق تفاصيلهم!!!!

يريدنى هؤلاء كما يهوون أنا أكون بمحيط حياتهم ... ولا يستطيعون التخلى عن هذا "القالب الثابت" الذى تم ايداعى به  ... ولا يفكر أو حتى يتسائل أحد منهم  ماذا أريد أنا ؟؟؟ .... أو "هل يريحنى هذا القالب" ؟؟؟؟!!!!!!!!!!!

أعلم أنى المخطئة والمسئولة عن جميع سلوكيات "هـــــؤلاء"  التى تجرحنى بعمق حد الموت .... وأشعر أيضا أنى "أنا" من برمجت حواسى على رؤية "هؤلاء" ملائكة وفقط ... وكلما تعثرت فى عيب ضخم أقفز وأثب من فوقه حتى لا أراه فكانت النتيجة = ...............................

حياة بدون بشر "كئيبة" .. وبهم جريمة

أريد أن أصبح free of ... نعم .... free of  مسئولية  أولا ثم.......free of عقل... وفكر...... وقواعد ....وقيود .... ومجتمع ..... وعمل .. ونجاح ... وفشل... وتفكير....وخوف... ورغبة.... وواجب... وألم...وحب...وكره

رسالة الى قلبى....... : "أريد أن أطلق لك العنان ...كى  تطير ...تنطلق... تحلق بعيييدا جدا لأفق لامحدود....  ولكن.... لا سبيل"...

أريد أن أجرى ل "هناك" ... وأبتعد ... لا أعرف بعد "ماهية  "هناك" هذا ..  ولكنى أتشوق للذهاب اليه وحدى فأجد فى انتظارى "حضن" أبكى وأصرخ به حد الانفجار    

فضفضة ...

اقصاء وزير الخارجية الى مقبرة "جامعة الدول العربية" ... هو اصرار على التقوقع وافساح الطريق لقيادة عربية أخرى متسلقة وفاشلة مثل السعودية وقطر

************

ازاى ننتظر من شرطة لم تحقق فى مقتل واحد منها وهو الشهيد "محمد البطران" ولم تكرمه شهيدا لا هو ولا أسرته وتعتم تماما على كل أدلة مقتله...ازاى ننتظر منها التحقيق بحيادية وعدل فى قتل المتظاهرين؟؟؟؟؟!!!

**********

بعد الثورة عملنا توكيل للمجلس العسكرى فى تسيير أمور البلاد ... يعنى هما محاميين بالنيابة عننا .... ازاى محامى يتخذ قرارت ويلغى قضايا ويحط قوانين من غير ما يرجع لموكله؟؟؟؟؟؟!!!! عجبى

**********

رسالة من الصحافة والاعلام الى الرئيس المخلوع مبارك :"بعيد عنك حياتى عذاب ..متبعدنيش بعيد عنك" ... متقدروش ومتعرفوش تعيشوا وتشتغلوا باحترام ... تأثير مبارك فيكم أكبر بكتييييير من تأثير أى ثورة حرية ...

*************

أثبتتت مليونية الغضب أن من يسموا أنفسهم اخوان ما هم الا "حرابى- جمع حرباء... تعيش على اصطياد المواقف القذرة..وتتلون حسب الموقف الذى تعيش فيه .. وأثبتت أيضا أن الخطأ الوحيد للثورة هو اعطاء الفرصة لأمثالهم للخروج من الشقوق

*************

النائب العام راجل صاحب مزاج .... بيحقق مع ناس ناس .... وبيسجن ناس ناس ... على رأى خالد الذكر عدوية .... حبة فووق وحبة تحت...

************
صبحى صالح "عضو جماعة الأخوان المسلمين" : الأخوات الفاضلات من الضرورى أن يتزوجن من اخوان فضلاء ...... والعلمانيون كفرة..... واليبراليون كفرة ... وهما بس اللى مسلمين مؤدبين متربيين ولاد ناس... 
أخيرا اكتشفت حسنة واحدة ل مبارك وهى جعل هؤلاء "جماعة محظورة" 
*************

أرى ضرورة ذهاب المجلس العسكرى بالكامل لطبيب "أنف وأذن وحنجرة" لأن واضح ان محدش فيهم بيسمع خالص .. وسمعنا يا بنى الست أم كلثوم .... للصبر حدود

**************

مصدر موثوق بيقول انه يتم التعظيم لحبيب العادلى داخل السجن من قبل كل قيادات السجن ..... يحيا حبيب العادلى ... يحيا حبيب العادلى .... وفى ستين داهية الشهداء ...  قيادات الشرطة  لحبيب العادلى : "أنساك يا سلام ..أنساك ده كلام"

**************

الشرطة المصرية ..قمر له ليالى .. بيطلع يسحل ويضرب المتظاهرين أدام السفارة الاسرائيلية ... ويختفى من كل شوارع مصر عند تواجد البلطجية .... يمكن مكسوف؟؟!!! أنا بسأل أمى دلوقتى ... أسقيه ينوبنا ثواب ولا أرد الباب ..ياما ...أما 

**************

يقول الدكتور عمار حسن ... عصام شرف وزير من "التحرير"... ووزراء حكومته من "مصطفى كامل" .... انت راجل محترم ....

*************

تتم محاكمة المدنيين محاكمة عسكرية والظباط اللى قتلوا المتظاهرين محاكمة مدنية .... "يمهل ولا يهمل"

*************

يتم اختيار وتحديد القاضى قبل المحاكمة وقبل اختيار الدائرة اللى هيتحاكم أمامها الوزراء والحرامية اللى سرقوا البلد ....  برافو...... هوه ده التطور الطبيعى للحاجة الساقعة

************

أخيرا نداء من "الشعب المصرى" الى الشرطة المصرية على لسان شيرين عبد الوهاب... انت آخر واحد فى الدنيا دى ممكن أبكى عليه"... زى أى خاين والخيانة باينة جوا عينيه"

كلام فاضى ومسخرة....

استقبل منذ قليل المستشار عاصم الجوهري، رئيس جهاز الكسب غير المشروع، المحامي فريد الديب، محامي سوزان مبارك، زوجة الرئيس المخلوع، بعد قبول الجهاز للتسوية المقدمة منها، وذلك للتباحث حول إقرار تسوية جديدة تتعلق بمبارك، وهو ما أكده المستشار خالد سليم، عضو لجنة التحقيق مع عائلة مبارك، في تصريحات خاصة للفجر.

وكان الجوهري قد أكد في وقت سابق، أن الجهاز ملتزم بتحقيق العدالة وسيادة القانون، وأنه لا أحد فوق القانون، مهما بلغ سلطانه ونفوذه، مضيفا أن عضو لجنة التحقيق الذى باشر التحقيق مع سوزان ثابت يوم الجمعة الماضي، واجهها بما أسفرت عنه تحريات الأجهزة الرقابية، من امتلاكها لفيلا وحسابات فى البنوك، وانها نفت ذلك، وقررت أن الفيلا المملوكة لإحدى الجهات السيادية فى الدولة، وأن الأرصدة الموجودة فى الحسابات غير مملوكة لها، وأنها تبرعات من الداخل والخارج، صدرت لها بشيكات باعتبار أنها حرم رئيس الجمهورية، لإنفاقها على أوجه النشاط الخيرى والاجتماعي، وأنها تقر بتنازلها عنها.

وأضاف الجوهري أن محامى سوزان ثابت حضر إلى مقر الجهاز اليوم، وقدم مذكرة ومستندات تؤكد أن الفيلا ليست مملوكة لها، كما قدمت توكيلا للجهاز غير قابل للإلغاء، بتنازلها عن جميع الأرصدة فى حساباتها، سواء كانت جارية أو وديعة أو توفير، أو غير ذلك، لصالح الدولة ممثلة فى وزارة المالية، مشيرا إلى أن هذه الاموال تقدر بـ 24مليون جنيه.

ومن جهة أخرى، نفى الجوهري في تصريحات خاصة للفجر، ما نقلته مواقع إخبارية على شبكة الانترنت، بشأن إصدار النائب العام قرارا بالإفراج عن سوزان مبارك، مؤكدا ان القرار يخص جهاز الكسب غير المشروع منفردا.

خلاص الكوسة اتطبخت ... وحقنا وحق الشهداء راح ... فتحى سرور طلع مخدش حاجة .. والست سوزان جابت اللى يثبت انها مخدتش حاجة  يدوب 24 مليون ... وجوزها كمان هيطبخها مع فريد الديب والمجلس العسكرى حامى المسخرة دى .... وباعتين يجيبولها فريق طبى من مصر ودكاترة نفسيين ليها ولجوزهاعشان نفسيتها تتحسنن... وبكرة علاء وجمال كمان يطلعوا كانوا بيصرفوا من مصروفهم الشخصى اللى بابا كان بيديهملهم .... ومعنديش كلام تانى .... ولا عاد ينفع نكتب حاجة تانية ... خلاص كفاية كدة

من يدفع مصر الى الفوضى ؟؟!!!

بقلم: علاء الأسوانى

فى الشهر الماضى ذهبت لتناول العشاء بمنطقة الحسين، تبادلت الحديث مع العاملين بالمطعم ففوجئت بأحدهم يقول:

ــ إذا ذهبت إلى ميدان الحسين فاحترس لأنه أصبح مليئا بالبلطجية والمجرمين.

ولما سألته «لماذا لا تقبض الشرطة عليهم؟» قال:

ــ لقد سألت أمين شرطة من المنطقة فقال لى إنه يعرف كل هؤلاء المشبوهين واحدا واحدا، لكن لديه تعليمات بألا يتعرض لهم مهما فعلوا. واقعة أخرى حدثت للكاتب المعروف مدحت العدل، الذى كان فى شرم الشيخ وفوجئ ببعض البلطجية يتحرشون جنسيا ببعض السائحات فذهب يشكوهم إلى ضباط الشرطة الموجودين فى المنطقة فقالوا له:

ــ قبل الثورة كنا نقبض على هؤلاء المتحرشين ونرحّلهم من المدينة لكننا الآن ممنوع علينا التعامل معهم.

هذا الكلام كاذب بالطبع، فلا يوجد ما يمنع ضباط الشرطة من تطبيق القانون، لكنهم ببساطة لا يريدون أن يؤدوا واجبهم. كل يوم تحدث اعتداءات على أرواح المصريين وأعراضهم وممتلكاتهم بواسطة البلطجية بينما ضباط الشرطة لا يفعلون شيئا لمنع الجريمة. البلطجية يهاجمون كل شىء فى مصر، بدءا من أقسام الشرطة إلى قاعات المحاكم حتى المستشفيات والكنائس. عندما اقتحم البلطجية المسلحون مستشفى المطرية أطلقوا الرصاص وروعوا الأطباء والمرضى على مدى أربع ساعات، وأصابوا طبيبا بجرح غائر فى قدمه، وقتلوا أحد المرضى ثم خرجوا من المستشفى بينما ضباط الشرطة يتفرجون عليهم بهدوء.. الخلاصة أن الشرطة فى مصر معطلة، ضباط الشرطة لا يريدون حماية الناس ويتقاعسون عن أداء واجبهم.. وأسباب ذلك متعددة:

أولا: هناك عامل نفسى. ضباط شرطة كثيرون تربوا على ثقافة الاستعلاء على المواطنين، والأمن بالنسبة إليهم لا يتحقق إلا بالضرب والقمع والتعذيب، وهؤلاء يعتبرون نجاح الثورة هزيمة لهم ويحسون بأنهم انكسروا أمام الناس لأنهم كانوا يعتبرون أنفسهم فوق القانون ولا يعرفون كيف يتعاملون مع المواطنين باحترام، وبالتالى فهم يتقاعسون عن حماية المصريين كأنما يعاقبونهم على قيامهم بالثورة أو كأنهم يريدونهم أن يختاروا بين أمرين: إما قمع الشرطة وإهاناتها وإما ترويع البلطجية والخارجين على القانون.

ثانيا: ضباط شرطة كثيرون مارسوا الفساد فى العهد البائد، وكانوا يربحون أموالا طائلة بطريقة غير شرعية، وهؤلاء قضت الثورة على مكاسبهم، وبالتالى لم يعد لديهم باعث حقيقى على العمل لأنهم تعودوا على دخول مرتفعة فأصبح عليهم أن يعيشوا على رواتبهم فقط.

ثالثا: سوء الإدارة. وزير الداخلية اللواء منصور عيسوى رجل طيب ونظيف اليد لكنه فشل حتى الآن فى تطهير جهاز الشرطة وإرجاعه إلى حالته الطبيعية، معظم مساعدى وزير الداخلية الحالى هم أنفسهم مساعدو الوزير الأسبق الذى يحاكم الآن بتهمة الفساد وقتل المتظاهرين. مديرو الأمن الذين يحاكمون بتهمة قتل المتظاهرين لم يتم إيقافهم عن العمل، بل إن أحدهم وهو اللواء فاروق لاشين، مدير الأمن السابق فى محافظة الشرقية، أحيل إلى المحاكمة بتهمة قتل المتظاهرين وبدلاً من إيقافه عن العمل تمت ترقيته بتعيينه مديرا لأمن الجيزة. إن هذه الأوضاع الشاذة تفسر كثيرا مما يحدث فى مصر الآن. ماذا نتوقع من ضابط شرطة يحاكم بتهمة القتل وهو لايزال يعمل فى منصبه؟! ألا يمكن أن يستعمل سلطته من أجل إفساد الأدلة التى تدينه؟!..

الغريب أن ضباط أمن الدولة الذين مارسوا التعذيب سنوات لايزال كثيرون منهم يعملون فى وظائفهم كأن لم يكن، ولكن بعد أن تغير اسم جهاز أمن الدولة إلى «الأمن الوطنى».. ماذا نتوقع من ضابط تتلخص خبرته كلها فى ضرب المواطنين وتعليقهم من أقدامهم كالذبائح وصعقهم بالكهرباء..؟! هل يمكن أن يتحول هذا الضابط بين يوم وليلة من جلاد إلى محقق يحترم القانون وحقوق الإنسان..؟
بالطبع، هناك ضباط شرطة كثيرون لم يمارسوا الفساد ولا التعذيب ولم يقتلوا المتظاهرين، وقد كون هؤلاء الضباط الشرفاء «ائتلاف ضباط الشرطة» وقدموا إلى الوزير عيسوى اقتراحات محددة حتى يقوم بتطهير الشرطة من الفاسدين، لكن الوزير للأسف لم يستفد بمقترحاتهم ولم ينفذ منها شيئا.

على أن ما تشهده مصر من أحداث خطيرة لا يرجع فقط إلى غياب الشرطة.. فثمة مؤامرة يتم تنفيذها خطوة خطوة حتى تنزلق مصر إلى فوضى شاملة تمهيدا لشىء ما يريد أعداء الثورة تنفيذه. هذه المؤامرة تشترك فيها عناصر داخلية وخارجية. إن رموز النظام السابق المحبوسين الآن تمهيدا لمحاكمتهم، وأتباعهم فى الخارج، مستعدون لإنفاق الملايين من أجل تخريب مصر انتقاما من الثورة التى خلعتهم من السلطة وألقت بهم فى السجون، وهم بلاشك يتعاونون مع ضباط أمن الدولة الذين يملكون كل ما يلزم من أدوات التخريب: المعلومات الدقيقة عن كل مؤسسات المجتمع المصرى والخبرة والسلاح والعملاء المدسوسون فى كل مكان.

العناصر الداخلية التى تتآمر على الثورة معروفة، أما العناصر الخارجية فأولها إسرائيل التى دافعت عن حليفها المخلص حسنى مبارك إلى اللحظة الأخيرة، إسرائيل أعلنت بوضوح استياءها من تغير السياسة الخارجية لمصر بعد الثورة.. مصر الآن، لأول مرة منذ عقود، تحقق مصالحها الوطنية دون اعتبار لما تريده إسرائيل.. مصر تتفاوض من أجل بيع الغاز لإسرائيل بسعر عادل، وقد قررت فتح معبر رفح من أجل فك الحصار عن الفلسطينيين فى غزة، وهى تعمل على استعادة علاقاتها المقطوعة مع إيران، وقد نجحت فى عقد مصالحة بين الفصائل الفلسطينية.. من السذاجة أن نتصور أن إسرائيل التى تملك واحدا من أقوى أجهزة المخابرات فى العالم سوف تقف مكتوفة الأيدى وهى ترى مصر تنهض وتتحول إلى دولة ديمقراطية قوية تهدد المصالح الإسرائيلية هناك أيضا بعض العائلات الحاكمة فى دول الخليج التى دافعت عن حسنى مبارك وفعلت المستحيل حتى تمنع محاكمته. هذه الأنظمة الخليجية تكره الثورة المصرية وتدافع عن حسنى مبارك ليس فقط لأنه كان صديقا لهم وليس فقط لأنه وأفراد أسرته كانوا شركاء فى مشروعات مالية عملاقة مع بعض أمراء الخليج، بل لعل السبب الأهم أنهم يعلمون أن مصر تقدم دائما النموذج للعالم العربى كله، وبالتالى فإن خلع الرئيس الظالم الفاسد فى مصر ثم مثوله أمام محاكمة عادلة وإدانته ستؤدى بالتأكيد إلى تصدير الثورة إلى تلك البلاد النفطية التى مازالت تعيش فى مرحلة القبيلة حيث الحاكم هو شيخ القبيلة والأب ورمز الدولة الذى لا يجوز أبدا الخروج عليه أو توجيه النقد لسياساته مهما كانت فاسدة وظالمة.. بقى أن نعلم أن الجماعات السلفية فى مصر كانت على مدى عقود وثيقة الصلة بجهاز أمن الدولة وبالنظام السعودى معا، الأمر الذى قد يفسر لماذا تلعب هذه الجماعات الآن دورا رئيسيا فى مسلسل التخريب.

بقى اعتبار مهم: لقد قامت القوات المسلحة المصرية بحماية الثورة المصرية وتعهدت بتنفيذ كل مطالبها.. هذا الدور العظيم للجيش المصرى لن ينساه المصريون أبدا، لكن تعامل الجيش مع أحداث الشغب كثيرا ما تغير من حادثة إلى أخرى بطريقة غير مفهومة.. لقد قامت الشرطة العسكرية بفض اعتصام طلبة كلية الإعلام فى جامعة القاهرة با لقوة واستعملت العصى الكهربائية لإخراجهم، وبنفس الطريقة قبضت الشرطة العسكرية يوم 9 مارس الماضى على المتظاهرين فى ميدان التحرير الذين تم تقديمهم إلى محاكمة عسكرية قضت بحبسهم لفترات تتراوح بين عام وثلاثة أعوام..

هذا الاستعمال المسرف للقوة لم يلجأ إليه الجيش فى حوادث أكثر خطورة، ففى محافظة قنا قطع المواطنون خط قطار الصعيد وعطلوا الطرق السريعة كلها فلم تمنعهم الشرطة العسكرية ولم تقبض عليهم، وقامت بعض الجماعات السلفية فى قنا أيضا بالاعتداء على مواطن قبطى وقطع أذنه فلم يقبض على الفاعل ولم يقدم إلى المحاكمة وتم الاكتفاء بمجلس صلح تنازل فيه القبطى عن حقوقه، وقد تم هدم كنيسة فى أطفيح فلم تقبض الشرطة العسكرية على مواطن واحد من الذين ارتكبوا الجريمة ولم تمنعهم من ارتكابها.

صحيح أن القوات المسلحة أعادت بناء الكنيسة على نفقتها وهذا تصرف طيب لكن العدل لا يتحقق إلا بتطبيق القانون. مرة أخرى قام السلفيون بإحراق الأضرحة فى أكثر من محافظة فلم يقبض على واحد منهم، الأمر الذى أغرى بعض السلفيين بالتمادى فى أفعالهم فقاموا بمحاصرة الكاتدرائية وهددوا باقتحامها لتحرير السيدة كاميليا شحاتة المسيحية التى يزعمون أنها أسلمت فاحتجزتها الكنيسة. إن اقتحام دور العبادة بالقوة وترويع المصلين الآمنين فى حدود معلوماتى جرائم يعاقب عليها القانون لكن الشرطة العسكرية لم تقبض على شخص واحد من الذين هاجموا الكنائس بل اكتفت بمنعهم من دخولها..

ثم تصاعدت المؤامرة من أجل إحداث الفتنة الطائفية، فبعد أن تبين أن مزاعم السلفيين كاذبة وظهرت كاميليا على قناة تليفزيونية قبطية لتنفى إسلامها وتؤكد أنها ستظل على دينها المسيحى فى اليوم التالى مباشرة تم الترويج لشائعة جديدة مفادها أن سيدة مسيحية أخرى قد أسلمت واختطفتها الكنيسة.. لقد أذاع بعض المواقع على الإنترنت تسجيلا من غرفة بالتوك.. يقوم فيه شخص بتحريض من سماهم بـ«الإخوة المسلمين» على الهجوم على كنيسة مارمينا بإمبابة وهو يصف لهم الطريق إليها ويؤكد لهم أن الأخت المسلمة محتجزة فى بيت بجوار الكنيسة ويدعوهم إلى تفتيش البيت بحثاً عنها ويقول لهم بالحرف:

ــ اهجموا على البيت وأخرجوا كل النصارى منه وفتشوه.. أنتم 300 فرد وتستطيعون أن تفعلوا ذلك بسهولة.

وقد حدث.. فقد هاجمت مجموعات مسلحة مجهولة كنيسة مارمينا وأشعلوا النار فيها ثم انسحبوا وتم تبادل إطلاق النار على مدى ساعات حتى سقط 11 شهيدا، مسلمين ومسيحيين، السؤال هنا: إذا كانت الشرطة المصرية معطلة ولا يمكن الاعتماد عليها فلماذا لم تمنع الشرطة العسكرية البلطجية من الهجوم على الكنيسة؟!. لماذا لم تستعمل العصى الكهربائية لردعهم، كما فعلت مع طلبة كلية الإعلام، وأيهما أخطر: اعتصام سلمى للطلاب، أم اعتداء على الكنيسة وإحراقها؟

إن القوات المسلحة التى طالما حمت مصر واحتضنت الثورة مطالبة الآن بأداء مهمة وطنية جليلة.. أن تنفذ القانون فورا وبحسم على كل من يخالفه.

مصر الآن بين طريقين لا ثالث لهما: إما القانون وإما الفوضى.

عجايب...!!!!!

مرتضى منصور : خرج من السجن ومرشح نفسه لرئاسة الجمهورية ...أنا كنت عارفة ان المنصب ده هيلم

بس نصيحة لوجه الله ..."العباسية" محتجاك أكتر ... فيه أوضة Double بحرى ترد الروح محجوزة باسمك

سرير ليك وسرير للقذافى تدخلوها مع بعض "زنقى ...زنقى" مع مراعاة ربط لسانك فى السرير لعدم ازعاج 

السادة النزلاء.... ... ومتقلقش خالص هنعملك اذاعة داخليه تطلع تهبهب فيها كل يوم زى ما انت عايز وهنذيع الفقرات دى على "موجة كوميدى" كل يوم جمعة ها ..... هتعملى سى دى امتى؟

 ******

جمال مبارط "عطس" ... علاء عمل بيبى فى التواليت.... فتحى سرور نظر بامتعاض... أحمد عز لابس شورت

أما أحمد شفيق الحمد والشكر ليك يارب "قصر شوية"

كلام فاضى مالى الجرايد كل يوم وكأن التفاهة بقت "سلو بلدنا"

عايزين حق الشهداء.....فلوسنا اللى اتسرقت....كرامتنا اللى اتهانت ....حكم قضائى يشفى الصدور

انما الشورت والبيبى خليهم للصحفيين الفاضيين

 ********

ال سيت كوم الكوميدى بتاع "بن لادن " رفه عننا والله بعد 3 شهور "الجزيرة ...العربية...الحرة "  يااااه ..الحمد لله الواحد كان هيضرب مشوار ل "دريم بارك" أهو "دوبى يقابلك بالترحاب" جه لحد عندنا ... بس أنا فاكرة اننا كنا طيرنا العصفورة اللى كنا دقنها على قفانا من فترة كبيرة .... يمكن بقى عمو أوباما معرفش يحقق ال Change....Change...Change. اللى كان بيغنيها كل يوم قال يالله العصفورة أسهل وربنا ما يحرمنا من قلبه الرهيف اللى مش عايزنا نشوف صور بن لادن وهوه مقتول ...مع ان الصورة دى كانت تقضى وربنا ستار حليم.. 

******

اللواء العيسوى نفسيته تعبانة ودمه محروق من نشر صور علاء مبارك  وفتحى سرور والمغربى داخل السجن وهيفتح تحقيق ..... ربنا يقدرك على فعل الخير .... طب معندكش نيه تفتح حاجة تانية ؟!!! ... يعنى مش ناوى تلم البلطجية وتنزل الشرطة اللى واخده على خاطرها وتضبط البلد بقى ولا انت فاضى بس لمعاينة سجن طرة اللى مينفعش خااااااااااااااااالص لاستقبال مبارك ده على أساس ان عنده "سل رئوى" ...ربنا يخليك لمصر

***************

عمرو موسى منشكح وفاشخ بؤه من الودن دى للودن دى بمناسبة "المصالحة الفليسطينية" ... ربنا يسعد أيامك دايما .... فى مثل بيقول "اللى اختشوا ...ماتوا" .... كان المفورض تكسف من نفسك ...بقالك 10 سنين أمين عام لجامعة الدول العربية ... ومعرفتش حتى تقعد الطرفين على تربيزة مفاوضات .... أكيد العيب كان فى التربيزة

**************

لوووووووووووووووووووولى ... فاروق حسنى طلع برىء مسرقش حاجة خالص لا هوه ولا شيخ المنصر "مفيد شهاب"  ... الراجل كان بياكل من عرق جبينه  ...كل يوم الصبح يجيب ورقة بيضاء ويقعد يشخبط  قصدى يرسم فن تكعيبى منبسق من الفكر اللاشعورى المتمركز على  شلولخ ... زى اللوحة التحفة دى اللى بتثبت تأثره ب فن "نبش الفراخ"

******

يوم 05-05 تعاطفك لوحده مش كفاية ..... ولع شمعة .... "شغل الناصر صلاح الدين" .... اسمع "اخترناك" ... اتشحتف ونزل دمعتين ...أى حاجة تدل على "قلة الأصل"   يووووووووه  قصدى "رد الجميل" ... ده مش يوم عادى ... ده يوم فارق فى تاريخك يا مصر .... ده اليوم اللى أثبتنا فيه ان "الصبر على البلاء من شيم المصريين"

**************

تم اقالة د/ السباعى كبير الأطباء الشرعيين .... أساسا عشان تصريحاته عن صحة الرئيس ... انما توقيعه على تقرير مقتل خالد سعيد المزور من كااااااااااام شهر .... وتقرير موت الشهداء فى ميدان التحرير على انه سكتة قلبية مش رميا بالرصاص دى حاجات جانبية ثانوية "كمالة عدد" .... مسك مكانه بقه النائب المباشر بالتزكية مش عشان نضيف وخبرة وينفع يمسك منصب حساس زى ده ..لأ ...عشان يتملا المكان ده وخلاص

أظن الراجل اللى مسك مكانه ده هيحتفظ بلسانه فى الثلاجة لحسن يزلف بكلمة كدة ولا كدة تطيره من مكانه

مؤسسة الطب الشرعى دى بالكامل عايز "مليارية" مش مليونية عشان تنضف

*************

البابا شنودة ردا على مظاهرات السلفيين .... "حبوا أعداءكم" ..... وبعدين؟ هنفضل نطبطب نطبطب مش هنتغير أبدا  ... عايزين رجال دين مسلم ومسيحى أقوياء جامدين مثقفين واعيين يحلوا كل حاجة من جذورها ويبقى ليهم دور قوى وفى نفس الوقت محايد ميفرضوش علينا حاجة وخصوصا الاستكانة والرضاء بالواقع

***************

الصحفيين : الكورة يا د/ شرف ... هتفوق امتى وتحل مشاكلها ؟؟.... الفتنة الطائفية .... هتحلها امتى؟!! ... قنا هتسيبها كدة ؟؟؟..... شيلت محافظ قنا ليه يا حكومة ضعيفة ؟!!!... البصل اتسرق امبارح من بلكونتنا وديته فين يا د/شرف  ؟؟؟!!! 

أنا لو مكانك يا د/ شرف أطلع من هدومى وأرفض رفضا باتا قطعيا أدخلها تانى ....

الرحمة شوية يا صحافة صفراء -وبطولات زائفة- المفروض تتنقى وتتغربل بس البركة فى جدو "يحيى الجمل" هوه اللى اختار قياداتكم الغير كفىء واشترك فى اختيار المحافظين ...

بس برده مش هسيبك يا د/ شرف الا لما تقر وتعترف بمكان البصل...!!!!!!   



ارحموا عزيز قوم ذل...!!!!

الرئيس السابق مبارك راجل عدى ال 80 يعنى ارحموا عزيز قوم ذل ...
هوه كان عمل ايه .. كرامة ايه اللى ضيعها .... ما احنا ماشيين بيها أهوه
ده الراجل اللى عمل الضربة الجوية ورجع لمصر كرامتها
مش ده اللى قضى على الارهاب فى التسعينيات
مش ده اللى وقف الاقتصاد على رجليه
ربنا يشفيك ويعافيك يا مبارك .... آمين
الرسول قال للكفار اللى أذوه .... "اذهبوا فأنتم الطلقاء"
وقالى تعالى ...... وقالى الرسول.....

دى بعض التعليقات اللى بتنزل على معظم المواقع الالكترونية .... ومعظم الاتصالات بالفضائيات ... صحيح مش كتير أوى بس موجودة...

تبقى مصيبة سودة لو اللى بيقول الكلام ده فعلا مؤمن بيه ...

نختلف على الاعتصامات الفئوية وتوقيتاتها ..ماشى
نختلف على سرعة وبطىء المجلس العسكرى فى تنفيذ طلبات الشعب وائتلاف شباب الثورة ...ممكن
نرفض القائمة البيضاء والسودة ونقول نبنى مصر الأول وسيبنا من القوائم دى....جايز

انما نختلف على "الحساب" والعقاب العادل..... لأ ...مينفعش ... نبقى بنهرج... يبقى مكنش فيه داعى لا لثوة ولا شهداء ولا حرق أقسام ولا حل حزب وطنى ولا القضاء على أمن الدولة .. ونروح نولع فى ميدان التحرير عشان نخلص من أى آثار تفكرنا بحاجة ...

عيب أوى لما ناس تطلع فى الفضائيات تقول أحمد عز وشلة الحرامية بيعرضوا مليارات فى مقابل التسوية وغلق الملفات والافراج عنهم ...
طب محدش فكر ان مطالباتهم بالتسوية دى فى حد ذاتها  يعتبر اعتراف ضمنى بارتكاب الجرائم دى ....؟!!!!
عيب لما يطلع الأستاذ الدكتور /يحيى الجمل ويقول بننظر عرض السادة نزلاء طره فى موضوع التسوية ...انت مش من حقك تنظر لأى حاجة خالص لأنك أساسا مبتشوفش... احنا اللى ننظر ونقرر مش انت

عيب لما يبقى رئيس مخلوع نهبنا هوه وولاده ومراته وعيلته وعيلته مراته ونسايبه وجيرانه وخدامينه والجانينة ونقول معلش ده راجل كبير والرسول قال وربنا سبحانه وتعالى قال

عيب عليكوا لما تتسرقوا 30 سنة وتقولوا مسامحين
عيب لما تنسوا شهداء العبارة اللى مكنوش رايحين يتفسحوا فى دول الخليج
عيب لما تنسوا الشهداء العسكريين اللى ماتوا فى حادثة الطيارة واللى مبارك محاوليش حتى يفتح تحقيق ويقول ليه ماتوا
عيب لما تنسوا سكان المقابر
عيب لما تنسوا شهداء الدويقة اللى السادة الوزراء غطوا عليهم بالحجارة مكلفوش خاطرهم يبحثوا عن بقية الجثث على الأقل من باب "اكرام الميت دفنه"
عيب عليكوا تنسوا شهداء القطارات اللى رموا لكل واحد فيهم 2000 جنيه تعويض ...... واقلب
عيب لما تنسوا حادثة بنى مزار اللى السيد الرئيس مكلفش خاطره يعرف مين اللى تاجر بأعضاء أبناء شعبه
عيب لما تنسوا أمثال "خالد سعيد" ... أيوة أمثال ...لأن خالد سعيد ساعده الحظ ان الاعلام غطى حادثته صح فحقه مش هيروح بعد الثورة ... بس فى مليون خالد سعيد مات وادفن ومحدش يعرف عنه حاجة
عيب لما تنسوا الكنائس اللى اتحرقت مش عشان فيه فتنة ...لأ عشان السيد الرئيس وولاده وكلبه حبيب العادلى عايز يلهينا بموضوع الفتنة الطائفية
عيب لما تنسوا تفجيرات شرم الشيخ اللى متورط فيها برده الكلب حبيب العادل هوه وجمال مبارك
عيب لما تنسوا انتخابات مجلس الشعب القذرة
عيب لما تنسوا الشباب اللى انتحر من قلة الشغل وقلة الجواز ...فى الوقت اللى فيه جمال وعلاء بيصيفوا فى جزر الكاريبى وهما أصلا صيع ملهمش لا شغلة ولا مشغلة
عيب لما تنسوا الناس اللى قاعدة فى بيوت من صفيح وبتدخل حمام واحد مشترك فى آخر الشارع
عيب لما تنسوا أكياس الدم الملوثة... والمبيدات المسرطنة.... ومياة الصرف الصحى اللى بيتسقى بيها أكلنا  
عيب لنا تنسوا "جيل المستقبل" و"مفجر ثورة التطوير"  ... و"من أجلك أنت" اللى كان بيتصرف عليهم ملايين من دمنا
عيب لما تنسوا ان مصر كانت هتبقى "ملكية"
عيب لنا تنسوا أراضى مصر اللى اتنهبت واتباعت لشلة الحرامية بتراب الفلوس وبابا مبارك عارف ومطنش
عيب لما تنسوا شركات القطاع العام اللى اتباعت بربع تمنها واتشرد كل العاملين فيها
عيب لما تنسوا أنبوبة البوتاجاز اللى ب 35 جنيه فى الوقت اللى بيتصدر فيه الغاز لاسرائيل ببلاش
عيب لما تنسوا صديق اسرائيل الأول وكلب أمريكا ودلدول أوروبا "مبارك"
عيب لما تنسوا شهداء التحرير وتنسوا قلوب أمهاتهم اللى والعة نار

كفاية كدا ... ولا أقول كمان .... اتحرق دمكوا ولا لسة ... أنا عايزاه يتحرق عشان تحسوا

عايزة كل واحد يغمض عينه لمدة 5 دقائق بس ويشوف مصر تحت قيادة علاء مبارك وسوزان ثابت كان هيبقى شكلها ايه

لو مبارك وولاده ومراته وبقية شلة الحرامية متحاسبوش دى هتبقى زريعة لكل واحد بعد كدة يعمل اللى هوه عايزة وبعدين يدفعلنا "فدية" ويحط فى بؤنا جزمة قديمة ... آه مش بيدفع ... أى رئيس أو وزير هييجى من بعدهم هيعمل اللى هوه عايزه وبعدين يدفع ويغنى أغنية "الضربة الجوية وخدماته سلما وحربا" ... وأنا أبوكوا وارحموا عزيز قوم ذل .. وفتشنى فتش ..... والاسطوانة الخايبة اللى بتتغنى ... وتموت مصر تانى

لأ... مش هيحصل ... والفلوس هتيجى .. وهيتحاسب زى أى مواطن ... وياريت المجلس العسكرى يلغى شوية من الجيش اللى حطه يحرسه ده ... لأنه مواطن عادى .... وينقله وبسرعة لسجن طره لأنه معندوش حاجة أساسا  وصحته أحسن مننا ..وبلاش سلبطة ... وأى دولة هتتدخل فى شئوننا الداخلية هيكون ردنا الشفوى والعملى قوى.. 

وبلاش وحياة أبوكم نغمة قالى تعالى وقالى الرسول دى .. بلاش السكة دى ... السرقة والنهب والقتل والتجويع ميرضيش ربنا ونهى عنهم فى كل كتبه السماوية .. ف بلاش سكة غسيل المخ دى معدتش بتجيب نتيجة معانا

تحية .. وسؤال

الحمد لله ....

وتحية لثورة التطهير الشاملة التى لم تفرق بين رئيس وغفير..

وتحية لروح الشهداء

*******

رسالة ... : الأستاذ فريد الديب المحامى ....ضميرك هيرجع من الأجازة المفتوحة امتى؟؟!! ولا هوه راح فى أجازة ومرجعش تانى؟؟؟؟

 هتدافع عن حبيب العادلى والمواطن حسنى مبارك الاتنين مع بعض ؟... بس تصدق برده مش غريبة . ماهو اللى يقبل يترافع عن حبيب العادلى لازم وضرورى يدافع عن حسنى مبارك

وهنستغرب ليه ما انت قبل كدة قبلت تدافع عن الجاسوس الاسرائيلى "عزام عزام" يبقى مش غريبة تعمل أى حاجة

اللى يلاقى دلع وميدلعش ...يــ ...ايه؟

"الأخوة و الأخوات أبناء شعب مصر..

تألمت كثيراً - و لا أزال - مما أتعرض له أنا وأسرتي من حملات ظالمة وإدعاءات باطلة تستهدف الإساءة إلى سمعتي والطعن فى نزاهتي ومواقفي و تاريخي العسكري والسياسي الذى إجتهدت خلاله من أجل مصر و أبنائها.. حرباً و سلاماً..

لقد آثرت التخلى عن منصبى كرئيس للجمهورية.. واضعاً مصالح الوطن وأبنائه فوق كل إعتبار، وإخترت الإبتعاد عن الحياة السياسية.. متمنياً لمصر وشعبها الخير والتوفيق والنجاح خلال المرحلة المقبلة.

إلاَّ أنني، وقد قضيت عمراً فى خدمة الوطن بشرف وأمانة، لا أملك أن ألتزم الصمت فى مواجهة تواصل حملات الزيف والإفتراء والتشهير، وإستمرار محاولات النيل من سمعتى ونزاهتي، والطعن فى سمعة و نزاهة أسرتي. ولقد إنتظرت على مدار الأسابيع الماضيه أن يصل الى النائب العام المصرى الحقيقه من كافة دول العالم والتى تفيد عدم ملكيتي لأى أصول نقدية أو عقارية أو غيرها من ممتلكات بالخارج.

و إيماناً من جانبى بأنه لا يصح فى النهاية إلا الصحيح و دحضاً لما يتم الترويج له من إدعاءات و إفتراءات، فلقد قررت الآتى :

1- بناء على ما تقدمت به من إقرار لذمتي المالية النهائي و البيان الذى أصدرته مؤكداً فيه عدم إمتلاكى لأى حسابات أو أرصدة خارج جمهورية مصر العربية فإننى اوافق على أن أتقدم بأى مكاتبات أو توقيعات تمكن النائب العام المصرى بأن يطلب من وزارة الخارجية المصرية الإتصال بكافة وزارات الخارجية فى كل دول العالم لتؤكد لهم موافقتى أنا و زوجتى على الكشف عن أى أرصدة لنا بالخارج منذ إشتغالى بالعمل العام عسكرياً و سياسياً و حتى تاريخه و ذلك حتى يتأكد الشعب المصرى من أن رئيسه السابق يمتلك بالداخل فقط أرصدة و حسابات بأحد البنوك المصرية طبقاً لما أفصحت عنه فى إقرار الذمة المالية النهائى.

2- موافقتى على تقديم أى مكاتبات أو توقيعات تمكن النائب العام المصرى من خلال وزارة الخارجية المصرية الإتصال بكافة وزارات الخارجية فى كل دول العالم لإتخاذ الإجراءات القانونية المناسبة للكشف عما إذا كنت أنا و زوجتى و أى من أبنائى علاء و جمال نمتلك أى عقارات أو أى أصول عقارية بشكل مباشر أو غير مباشر سواء كانت تجارية أو شخصية منذ إشتغالى بالعمل العام عسكرياً و سياسياً و حتى تاريخه حتى يتسنى للجميع التأكد من كذب كافة الإدعاءات التى تناولتها وسائل الأعلام و الصحف المحلية و الأجنبية حول أصول عقارية ضخمة و مزعومة فى الخارج أمتلكها أنا و أسرتى.

هذا و سيتضح من الإجراءات المعمول بها أن عناصر و مصادر أرصدة و ممتلكات أبنائى علاء و جمال بعيدة عن شبهة إستغلال النفوذ أو التربح بصورة غير مشروعة أو غير قانونية.

و بناء عليه و بعد إنتهاء الجهات المعنيه من هذا و التأكد من سلامته و صحته فإننى أحتفظ بكافة حقوقى القانونية تجاه كل من تعمد النيل منى و من سمعتى و من سمعة أسرتى بالداخل و بالخارج...

الأخوه و الأخوات

ستظل مصر دائماً لنا جميعاً هى الهدف و الرجاء …

وفق الله مصر و شعبها…

و سدد على طريق الخير خطى أبنائها…

و السلام عليكم و رحمة الله و بركاته…".

نقلا عن موقع جريدة الفجر....

1- انت لسة عايش فى الدور ... "الأخوة والأخوات".... و"لقد قررت"  .... ايه لسة مفؤتش... مش عايز تنزل من البرج العاجى اللى كنت معيش نفسك فيه وفاصل نفسك عن "المواطن" ..المواطن" الى كنت بتغنيها فى كل خطبة .. البرج العاجى اللى وصلك للى انت فيه دلوقتى

2- بقى كل الهليبة والحرامية اللى حواليك اللى عمالين يقعوا واحد ورا التانى اللى قسموا أموال البلد وأرضها على بعض دول كلهم حرامية وانت الشريف اللى فيهم..... سبحان الله.... وكنت منتظر طول المدة دى عشان تدى فرصة للنائب العام يدور ؟... شكرا على ذوقك.....
 هوه فى حد اتحرك وبعت يجمد أرصدتك الا بعد خراب مالطة.....

3- بحييك جدا جدا على كلمتك المتزنة اللى كل كلمة فيها حقيقة ... أيوة .... وليك حق تقول وتعمل أكتر من كدة .... لما تقعد أكتر من شهر لما النائب العام يهز طوله ويفتكر يحجز على أموالك

-لما أحمد شفيق وأحمد أبو الغيط يرفضوا مخاطبة أى دولة أوروبية بتجميد أموالك لحد ما انت وولادك ترستأوا نفسكوا وترتبوا أوراقكم . ومش انت بس ... لأ ده جميع رؤساء العصابة أمثال فتحى سرور وزكريا عزمى وابراهيم كامل والزغلول الكبير "صفوت الشريف" رئيس العصابة ... كلهم ادينالهم فرصة كافية جدا يرتبوا نفسهم ويهربوا أموالهم ويأجروا اللى هيشيل الليلة كلها كمان ...

- ومش بس كدة ... الحمد لله والشكر لله المجلس العسكرى محولك شرم الشيخ لسكنة عسكرية ....حاطين عليك حماية برا وبحرا وجوا وأكيد فى التواليت كمان .... ما انت ثروة قومية ..... سايبين الآثار تتنهب بايد حاميها حراميها اللى هوه "زاهى حواس" وقاعدين يحموك انت

- لو كنت اتاخدت على غافلة زى "زين العابدين بن على " كنا عرفنا ناخد فلوسنا... لأ وايه الشعب التونسى ماكتفاش  بكدة لأ بيلاحقوه قضائيا هوه وكل عيلته ....

-المجلس العسكرى بقة بيقول انك انت ومراتك وجمال وعلاء قيد الاقامة الجبرية ... وفجأة وعلى غفلة الناس تشوف ابنك قاعد فى نادى من النوادى مع زكريا عزمى .... حلوة الاقامة الجبرية اللى على المزاج دى..

-طب سؤال برىء سطحى..... انت كنت بتاخد مرتب عشان رئيس جمهورية والمفروض محدش يحاسبك عشان انت كنت موظف حكومى رسمى ..  ماشى هنبلعها ... طب الأستاذ جمال والأستاذ علاء كانوا بياكلوا منين؟ ... صنعتهم ايه يعنى  ؟.....

- ليك الحق تحتفظ بحقك فى مقاضاة  من أساءوا لسمعتك ما هى البجاحة ليها ناس...

أنا بحييك والله ....عندك حق تقول كدة وأكتر من كدة .... بس اذا كنت رتبت ورقك فى موضوع الأموال -اللى هنلاقيلها سكة ان شاء الله- لازم تعرف ان مش الفلوس بس هيه الحاجة اللى هتخلينا نحاسبك .. لأ ...
*فيه متظارين أبرياء استشهدوا بأمر منك
*فيه مجموعة حرامية حواليك انت كنت عارف بيهم ومحاسبتهمش
* فى ملف توريث انت كل الراعى الرسمى ليه
*فيه غاز بيتصدر ببلاش واحنا مش لاقيين أنبوبة البوتاجاز
*فيه "توشكى" اللى بعتها ببلاش لل الوليد ابن طلال
*فى بلد رجعتها لوراء 30سنة عشان خاطر ارضاء أمريكا واسرائيل  
*فى وزير داخلية كنت طالقه زى الكلب علينا لحد ما حولت البلد لشيكاغو
*فى بلد خصخصتها وبعتها لرجال الأعمال وسيبت الشعب يولع
فى تراجع سياسى واقتصادى وعالمى وداخلى وخارجى وكوارث كنت انت الراعى الرسمى ليها يعنى مش هنسيبك