اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 6 يناير 2010

هنجيلكوا والله....

بقى فيه "ظاهرة" غريبة أوى بقالها ييجى 3 أو 4 سنين أو حتى يمكن أكتر... كل ما تكلم حد فى التليفون ولا تقابله فى الشارع ولا تشوفه فى مناسبة عائلية مثلا تبص تلاقيه يقوللك -بعد طبعا السلامات والتحيات- تقوله انت فين من زمان ؟؟؟!!! يقوم بسرعة يقولك
"هنجيلكوا والله... طب اسأل طنط فلانة.. مش احنا كنا بنلبس ورايحيين لهم أول امبارح يا "فلانة" ...بس فى آخر لحظة جالنا عمك فلان فطبعا اضطرينا نقعد ... بس "والله هنجيلكوا قريب"...!!!
أنا عاوزة أعرف ايه السر بقه فى الموضوع ده .....ليه هما بس اللى هييجوا ...؟؟؟!!!! ليه احنا منروحش؟؟؟؟؟!!!!! ليه معنتش بسمع كلمة "والله لازم تيجوا يا جماعة ... والله هنستناكوا يوم كذا... والله لو ما جيتوا لنزعل منكم.... مبسمعش الكلام ده خالص ليه؟؟؟
كل ما ييجى عيد صغير ولا عيد كبير ولا أى مناسبة ...نتصل نقول للناس كلها "كل سنة وانتم طيبين"...تلاقيهم علطول زى المدفع .."ان شاء الله هنجيلكوا فى العيد"..... الله!!!!! اشمعنا انتوا هتيجوا ؟؟؟!!!! ليه احنا منروحش عندكوا يعنى؟؟؟!!.. ايه السبب؟؟؟!!!! مش عارفة؟؟؟؟ ..لأ والمصيبة الأكبر بقة انهم يفضلوا رابطين الواحد فى البيت .... "احنا هنيجى أول يوم".... يفوت أول يوم ومحدش يعبرنا حتى ولا يعتذر... تانى يوم يتصلوا بالليل ....(واخدين بالكوا) بالليل .. ويقولوا معلش أصل خرجنا رحنا لفلان علشان كدة معرفناش نيجى... يمكن نجيلكوا بكرة .... وفين عما السادة الضيوف يشرفوا ...تكون الأجازة كلها خلصت انتظارا للسادة الضيوف اللى
" لازم هما اللى ييجوا احنا منروحش.... !!!
سألت ناس كتيييير أوى فى "الظاهرة" دى ..قولت اسألى يا بت يا شيماء لحسن تكونى انتى والفاميليا "نحس" ولا حاجة والناس بتخاف منكوا ... لقيت تقريبا معظم أقاربنا ... وكل ..كل .. كل أصحابى بيأولولى ..لأ فعلا ..احنا كل ما نكلم حد ولا نقابل حد فعلا يا شيماء يقولنا كدة برده "هنجيلكوا والله".. أو جيين والله الأسبوع ده ان شاء الله" ... وهكذا...لدرجة اننا معدناش بنلاقى مكان نخرج فيه ... فبنروح النادى....وبطلنا خالص نروح لحد..... الله..... ده الموضوع بجد بقه .... أنا برده والفاميليا مقضيينها نادى.... لما زهقت ... نفس هوه هوه المكان اللى الواحد بيروحه تقريبا يوم ويوم ألا وهو "النادى"...
طب ليه ؟؟؟!!! حد يقولى ليه؟؟؟ بقينا كده ليه مع بعض؟؟؟!!!!! ايه اللى بعدنا عن بعض للدرجة دى....؟؟؟!!!! ليه معتش فيه لا ألفة ولا مودة ولا حب خالص أوى كدة ؟؟؟!!!! ايه اللى بعدنا... التليفون والموبايل والانترنت واليميل وال missed وال message ... هما دول اللى بعدونا أوى كدة؟؟؟!!!!!!! .... لأ .....مش هما ... احنا اللى معدناش عايزين نشوف بعض.. ولاعدنا حابين نسمع بعض... بقت حياتنا كلها مركزة فى حاجة واحدة ..اننا نخبى عن بعض كل حاجة وأى حاجة وخصوصا "الخير" طبعا علشان الموضة المبتكرة ألا وهى "الحسد"
اللى اتخطبت هتتحسد.... واللى اتجوزت هتتحسد.... واللى نجح هيتحسد.... واللى اتطلقت بقت وباء ممنوع دخوله أى بيت.... واللى حامل هتتحسد.... واللى ولدت هتتحسد...والعانس بقى دى المصيبة الكبرى دخلتها شؤم على الكل".
مش بس الأسباب اللى فاتت دى فقط .. لأ... احنا خلاص بقى الحب عندنا عملة نادرة ... الألفة مش موجودة فى قاموس أى شخص... واحدة صحبتى قالتلى :عارفة يا شيماء الصح ايه؟!!... الصح ان احنا نبقى "تليمين" ...حلوة "تيلمين دى!!!! نبقى تيلمين وغليسين زيهم ولما يطلبونا نقوم نلحق بسرعة ونقول لهم .."احنا هنجيلكوا الأسبوع ده ان شاء الله " ..... لقيتنى مقدرش أبدا أعمل ده لأن"عض رغيفى ..ولا تعض كرامتى ..اللى هيه علطول بتنأح عليا من غير حاجة.. وأنا أصلا بفضل الجلوس مع عيلتى حبيبتى أكتر من أى حد فى العالم..
المصيبة اللى بتوجعنى أوى انك تلاقى الناس دول هما نفسهم اللى بيتشدقوا "بقالى تعالى " وقالى الرسول" وصلة الأرحام"..ومعلش لازم أستأذن علشان ألحق "صلاة العشاء جماعة"... ما هوه لو يعرف ربنا عمل صلاة الجماعة دى ليه؟؟؟ ما هو "ربنا" كان ممكن يقبل الفرض حتى لو صليته فى بيتك.. بس ربنا عمل صلاة الجماعة ..وعمل صلاة العيد ...والحج.....وفروض تانية كتيرعشان نجتمع مع بعض ونشوف بعض ونحس ببعض... ده ما فيش فرض ربنا فرضه الا وفيه "اجتماع" أكبر عدد من المسلمين ...يبقى احنا بنطبق الدين على مزاجنا ليه؟؟؟!!!!
يا عالم..... يا هووووووووووه الدين سلوك
يلا بقى سلالالالالالالالام

هناك 8 تعليقات:

أميرة الأحلام يقول...

شوشو عامله ايه ياقمر ..
موضوعك حلو ..فعلا الجمله دي دايما بنسمعها من اي حد بنسأل عليه معرفش ليه ..
بس ممكن تكون مشاغل الحياه وظروفها هى الي بتخلي الناس تبعد عن بعضها ومحدش بيسال علي حد ولاحساسهم انهم مقصرين مثلا في حاجه زي كده ده الي بيخليهم يقولوا الكلمه دى وبعدين مافيش مانع يقولوا كده واحنا الي نروح نزورهم لو اتاخروا في الزياره ونسال عليهم.

لكي من كل الحب

مهموهة أحمد يقول...

شيماء يا قمر ....
بجد و الله عندك حق انا نفسي بقول كده لما حد بيكلمني بس و الله فعلا بيبقى نفسي اروحلهم بس ما تعرفيش الدنيا بتشغل الواحد فعلا

و يا ويلنا من ربنا على صلة الرحم دي
ربنا بجد يرحمنا برحمته احنا مقصرين في حاجات كتير اوي

يللا خير
المهم كلامك حلو اوي و من واقع ملموس بجد
و بقت الناس تقريبا كده و الكل فعلا بقى بيجري من كله
ما عادتش حد طايق حد

يلا الحمد لله على كل حال
بجد شكرا على البوست الجميل ده

مع خالص حبي ليكي يا قمر

Humman being يقول...

مرمورة الأحلام نورتى الدنيا وشكرا على تعليقك وأتمنى تكونى دلوقتى أقوى حد فى العالم

Humman being يقول...

مهموهة... شكرا على التعليق الجميل وخالص حبى وتحياتى ليكى انتى واالحد الجميل اللى بتكتبى ليه البوستات الروعة اللى فى مدونتك الهادية

حصان المرجيحة يقول...

المشكلة اني لسة مقابل واحد امبارح ماشفتوش بقالي كتير و قلتله فعلا هبقي اجيلك هههههههههههه
بس يمكن ماتكنش اونطة او كلام علي الفاضي بس كتير منا بينشغل و الحياة بتاخده
و الكلمة الجميلة اوي ان الناس فعلا مش عارفة قيمة صلاة الجماعة و ان ليها ميت فايدة بس اللي يفهم
شكرا علي موضوعك الجميل
و هابقي اجيلك هههههههههههه

Humman being يقول...

"حصان المرجيحة"
ههههههههههههههه
انت تشرفنى والله العظيم ... زيارتك غالية

ghada mOhsen يقول...

مرحبا شيماء ...
دى اول زياره ليا بين فصصك ومواقفك الواقعيه فى مدونتك ...
بجد حبيت اسلوبك العفوى فيها اوى ...
وان شاء الله ماراح تكون اخر زياره ...

اما عن البوست ده بقى ... انا مش هانكر انه بيحصل كتير بس الاكتر بقى ان الناس دايما هى اللى بتقولنا نيجيلها ... وبجد بنبسط كتير لما بيقولوها وبرضو احنا بنقولهم يجو عندنا ...
بس بتبقى كتير لما توعدى اى حدا انك راح تيجى وماتروحيش بتبقى والله مشاغل ...
وحكايه الحسد دى بجد حاصله بشكل كبير ... واللى تلاقيها لابسه هى وبناتها خرزه زرقه تسد عين الشمس عشان الحسد ... ايه الكلام ده بجد ... الحافظ هو ربنا ...
وفعلا ياريت الناس تفهم ان الدين هو معامله مش حاجه تانيه ...ربنا يديم الود يارب

بجد بشكرك اوى على البوست اللى اكتر من رائع ..وعلى مدونتك كلها
وسورى على اطالتى من اول زياره كده ...
بس هاجيلك تانى ( وده مش كلام والله ههههههه )
تحياتى
... ;) ,,, ;) ...

Humman being يقول...

غادة انتى تشرفينى بزيارتك ..وميرسى جدا على كلامك الجميل ويارب فعلا ما تكون آخر مرة ....وأبدا مفيش اطالة ده انتى نورتينى