اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 13 يناير 2010

أنـا.....و......أنـــــا

امبارح جاتللى رسالة على الموبايل ...فتحتها لقيتها .. ("كلمنى...شكرا") .. بشوف مين اللى باعتها لقيتها "أنــــــــا" قولت فى عقل بالى ودى عايزة ايه دى كمان.... والله أنا ما ناقصة وجع دماغ ورغى ..وهيه ما بتبطلش طلبات..
قولت يا بت يا شيماء اشترى دماغك واطلبيها لحسن دى زنانة ومش هتسكت.....

شيماء : ألو..أيوة خير عاوزة ايه؟؟


أنـــا : معلش أصل معنديش رصيد عشان كدة قولت أبعتلك رسالة وتطلبينى انتى..!!!

شيماء : معندكيش رصيد؟؟!!!!!! انتى ايه بتحوشيه للورثة؟؟؟؟ ..!!!!!

أنـــا : لأ والله أصل أنا امبارح كنت بكلم....!!!!

شيماء : شششش .....بس... ايه؟؟؟ انتى هتحكيلى حكاية ولا عشان أنا اللى طلباكى يبقى كتر من أبو بلاش...قصرى عاوزة ايه؟؟؟

أنـــا : مفيش ...أنا بس كنت عاوزة شوية طلبات كدة بسيطة من "هـــــو" ...مش عارفة بقى ينفع ولا ايه؟؟!!!

شيماء : ما تنجزى يا زفتة عاوزة ايه؟؟؟؟

أنـــا : أولا أنا معنتش عايزة أشوف وش حد من العاهات "العرسان" الغريبة اللى بتيجى دى ..اللى نصاب..واللى كذاب...وأبو لمعة...واللى دماغه لسعة...واللى شايف نفسه زويل والدنيا مش على مقاسه...واللى ماما راكبه على نفسه...واللى معدوم الشخصية..واللى مسمار مقطوم..واللى......

شيماء : بس ..ايه؟؟؟...انتى ما بتصدقى تتفتحى..!!!! يا ساتر يارب عليكى..خلصيلى بقة العشرين جنيه اللى لسه شاحنة بيها امبارح.. عاوزة ايه وباختصار بلاش لوك لوك دى.

أنـــا : عاوزاه يكون انسان ..انسان ...مختلف فى كل حاجة.... يكون راجل أوى.... وحنين أوى..ويخاف عليا أوى ...و....

شيماء : طب بصى ...عارفة المصنع اللى على أول الشارع ده

أنـــا : آه عارفاه

شيماء : روحى ومعاكى كراسة الشروط والمواصفات..وهما هيدوكى واحد راجل معتبر ومعاه ضمان سنتين .. وقطع غيار مجانى.. أنا سامعة كمان ان فى عرض دلوقتى ..لو أخدتى واحد التانى مجانا

أنـــا : بتتريقى حضرتك؟؟!!!!!

شيماء : ما أنا أعملك ايه والنبى ... شايفانى بصدر عواطف..ولا بستورد حب وأحاسيس ومشاعير؟؟؟؟!!!!

أنـــا : .....!!!!!!!!...صمت.........


شيماء : طب ما تزعليش أوى كدة....بصى... انتى بتوجهيلى أنا الكلام ده ليه؟؟؟..... أنا مالى.؟؟؟؟...ما تقولى ل "هــــو" الكلام ده مباشرة ......وخرجينى أنا بره الموضوع ده........ يالله... معايا 14 دقيقة رصيد ..انتى سبع دقايق وأنا سبع دقايق .... أنا هطلوبهولك أهه ....بس قصرى وانجزى...


أنـــا : ماااشى.....الى من سوف يكون.................:

عاوزاك تبقى راجل مختلف ...مختلف عن أى انسان تقليدى
عاوزاك تخطفنى من أول لحظة ....بأخلاقك...واحترامك..وحضورك.
عاوزة أشوف المبادىء والقيم معاك "فعـــل " مش كلام.
عاوزاك تبقى راجل أوى وحنين أوى وطيب أوى.
عاوزاك صادق فى كل كلمة وحرف مهما كان مؤلم ...عشان الراجل كلمة.
عاوزاك تكون بتعرف ربنا أوى "بس بالفعل" مش علامة صلاة وجلابية وخلاص...
عاوزاك تبقى "أب" ليا...لأنى معشتش الاحساس ده من ييجى 20 سنة.. "أب" يحب ويخاف ويضلل عليا..."أب" يحمينى من كل وأى حاجة.. أب يدلعنى أوىىىىىىىىىى كأن معندوش غيرى..."أب" يوجهنى للصح بحكمة وحنية فى نفس الوقت.
عاوزاك "أخ"... "وخال".... "وعم"... و"أهل" وعيلة وعزوة وضهر وسند.
عاوزاك تحس بيا وتفهمنى من غير ما أتكلم...كفاية عنينا بس تعبر وتتكلم وترد وتقول كل حاجة
عاوزة وأنا معاك أسيب ايديا لايديك.... توجهنى وتطبطب عليا وتدفينى......
عاوزة أحس معاك بمنتهى الحرية ...ومنتهى الأمان.... منتهى الثقة.....
مش عاوزة معاك أبقى تقليدية فى أى حاجة... لأ.... عاوزين نبقى مختلفين فى كل حاجة...عاوزة عينيك تقولى نفسى" أجبلك الدنيا كلها وأحطها بين ايديكى" - فيرد قلبى.."كفاية انت معايا" وما دمنا مع بعض هنكبر مع بعض.
عاوزاك تحتوى هدوئى.. وجنونى.. وعصبيتى.. وشرودى.. وثورتى.. وكل عيوبى وحسناتى.....تقبلنى فى كل حالاتى.
مش عاوزة أقول وأنا معااك "أنا عايشة فى البيت ده بس عشان ولادى"- لأ ...أنا عايشة هنا عشان حبيبى اللى بشوف بعنيه "أحلى دنيا".
عاوزاك أنجح راجل فى العالم ....لأنى هكون دايما وراك وفى ضهرك... وعاوزاك انت كمان تحب نجاحى وتشجعنى وتساعدنى عليه.
عاوزاك تخاصمنى بعقلك 5 دقايق.. وتصالحنى بقلبك العمر كله.
عاوزاك تكون أول وآخر مين يشوف دموعى.....ويمسحها.
عاوزة حياتى معاك كتاب مقفول أول صفحاته عندى.. وآخرها عندك.
عاوزة كرامتى تذوب وتتلاشى فى كرامتك ..لأننا أساسا واحد.
عاوزة أجيب منك أحلى أطفال فى العالم...لأنهم أولاد أعظم راجل فى الكون.

عاوزة كمان.......

"لقد نفذ رصيدكم ....برجاء اعادة شحن البطاقة"


شيماء : منك لله يا شيخة هما دول السبع دقائق اللى قولتلك عليهم.....خلصتى الرصيد...روحى منك لله

هناك 29 تعليقًا:

أميرة الأحلام يقول...

الله الله الله الله ياشوشو ياجميله
يااااااااااه يابنتى على كلامك الي بيأثر في الواحد ده
ربنا ياحبيبتى يرزقك بالي تتمنيه وتلاقي فيه كل الصفات الى انتى عايزاها
وتعيشي في سعاده وحب طول العمر يارب
واكيد باذن الله ده هيحصل لان ربنا بيقول "الطيبون للطيبات "
وانتى اجمل واطيب بنوته في الدنيا
ربنا يوفقك يارب

Humman being يقول...

يا مرمورة يا قمر ...دايما أفتح وألاقيكى منورة كدة بأول تعليق
ربنا يعوضك انتى خير....ويخلفك خير ويديكى انسان هيكون ان شاء الله أحسن مما بتتمنى وأحسن مما بتطلبى من ربنا عشان انتى انسانة محترمة
ملحوظة : ده مش كلام مجاملة عشان تعليق مرمورة.. لأ..هيه فعلا من غير ما أشوفها تستاهل أحسن راجل فى العالم

هي وظروفها يقول...

ايه ده يا شيماء انتي عرفتي ان المواصفات دي فيا ازاي من غير متشوفيني
هههههههههههههههههههه

بصي مش عارف اقولك ايه حلمك حلم عادي ومش مستحيل واكيد بثقتك في الله
ان شاء الله هيتحقق

عارف ان الكلام اللي انتي بتحلمي بيه صعب تقولي عليه لحد عندك ثقافه مجتمع متخربأ

مادي مفهوش احاسيس

انتي حلوه اوي من جوه سا شيماء وبكره ربنا يحقق ان شاء الله كل احلامك ونجيلك المنصوره ونحضر الفرح وتكون اميره ان شاء الله برده ربنا رزقها بحد يعوضها لان انتو الاتنين بجد بنتين زي العسل وكلامكم حلو واخلاقكم حلوه ونضيفه في زمن مبيقدرش الا اللي لابسه بادي ستومك وبادي تاتش

وزي مقولتلك اموت وارف عرفتي ان الصفات دي فيا كلها ازاي؟؟؟؟

تحياتي ليكي يا شوشو

Ahmed Fayez يقول...


بسم الله.
في البداية أحب أقول إن الأحلام دي ظاهرة صحية، لكن لازم يكون فيه ادراك للفرق بين الأحلام و الواقع.

من ملاحظاتي للسلوك البشري لقيت إن كل الناس عاوزة كل حاجة كويسة، و إذا كنا هنتكلم عن شخص بيبحث عن شريك حياته، هنلاقي إن كل شخص راسم صورة جميلة للشخص اللي بيتمناه، لكن غالباً الشخص ده مابيكونش موجود غير في الأحلام و بس. بيبقى صعب على الناس تقبّل إن الشخص اللي منتظرينه يكون مختلف عن اللي عاوزينه، و زي ما بيقولوا الحلو ما بيكملش.

أحياناً الواحد لازم يتنازل عن بعض أحلامه عشان يقدر يحقق الباقي.

على السادة ركاب طائرة الأحلام ربط أحزمة الأمان سيتم الهبوط على أرض الواقع.

إيمان يقول...

بصراحه عجبنى كلامك اوى وحاسه انك بتقولى اللى انا عيزاه او بمعنى اصح اللى بحلم بيه
بس الفرق بينى وبينك انى بجمعهم ف صفتين اخلاق ويعرف ربنا وانه يكون بيحبنى
لو توافر الصفتين دول اكيد هيتحقق كل اللى قولتيه..... بجد احساس الحب والامان مفتقدينه اوى بالرغم من ان كل اللى حواليكى بيحبوكى وحاسه برضو ان ناقصك شىء مستنيه حد .
ومش اى حد تقبلى بيه كلها بقت احلام وبنبشر نفسنا اننا لما نحلم فى يوم ان الحلم ممكن يتحقق
ربنا يوفقك فى حياتك وتتحقق كل احلامك الجميله
تقبلى مرورى
ايمى

مهموهة أحمد يقول...

ههههههههههههههههههههههههههههه

يخرب عقلك ي شوشو ايه يا بنتي البوست الجميل ده و الله عجبني اوي اوي اوي

و تركيبته حلوة
و على فكرة الانا بتاعتنا لو تطول تتكلم علطول هتتكلم بس احنا بييجي علينا اوقات و نحبسها علشان لكاكة زي ما انتي عارفة
ههههههههههههههههههههههههههه

المهم يا حبيبتي ربنا يرزقك يا رب باللي تتمنيه و فعلا يكون راجل فيه مواصفات احلى من كده كمان
و كفاية كلمة راجل
دي لوحدها مليانة معاني كتيرة ما حدش بيفهما خالص
راجل يعني حب -- حنية -- امل -- عطف -- مسؤولية -- رقة -- اب و اخ و اهل -- و الاهم امان و ارتياح و طمانينة طول ما انتي معاه

لكن للاسف الناس فاكرة ان راجل دي معناها فتوة -- عضلات -- طول و عرض -- شخط و نطر -- زعيق -- ضرب و قلة ادب

ربنا يحفظنا يا رب من الحاجات دي

و معلش يا حبيبتي السوق شاحح اليومين دول من الرجالة بس ان شاء الله ربنا هيوعدك بابن الحلال اللي يقدرك صح و تعيشوا مع بعض احلى و اجمل حياة

مع خالص حبي ليكي يا قمر

Humman being يقول...

وليد....انت مش شوية ..والصفات الحلوة بتبان مش لازم الواحد يشوف الشخص ده..انت international
هههههههه
فعلا الكلام ده مش بتعرف أى بنت تقوله أو تتكلم فيه مع حد ...بس بتبقى حسه بيه ومكتوم جواهاونفسها يتحقق..الموضوع مش جواز وبس لأ..الموضوع انسان هرتبط بيه العمر كله.
انت هتبقى أول المعزومين طبعا انت وكل الناس المحترمة أوى اللى عرفتهم من خلال البلوج ده
ميرسى جدا لذوقك العالى

Humman being يقول...

ايمى... ميرسى جدا على مرورك ويارب أحلامنا كلنا تتحقق...ووالله حاسه انه مش مستحيل لأنى ببساطة شوفت النموذج اللى اتكلمت عليه فى البوست ده شوفته فى الواقع ودعيت لهم ربنا يديم عليهم نعمة السعادة
خالص تحياتى

Humman being يقول...

winner... لأ أنا مش حالمة أوى كدة..مش عاوزة ملاك مش بيخطىء لأ ..لأنى ببساطة فيا عيوب كتير ... ولازم احنا الاتنين نتنازل شوية فى الأول عشان الحياة تمشى
بس مؤخرا شوفت ان الراجل اللى بجد بقه نادر أوى "النصاب والكذاب واللى ضاربها جزمة ومكبر دماغه" بقوا كتير أوى كأنها عدوى
لو الجواز بالشكل ده ...يبقى قلته أحسن
كل البنات عاوزة انسان "راجل" "ويعرف ربنا"..أى صفة تانية بقه ممكن التغاضى عنها
تحياتى وشكرا لمرورك

Humman being يقول...

وسع يا عم لمهموهة الجميلة
ربنا ما يحرمنى من ذوقك يا مهموهة
وربنا يدينا كلنا كل اللى بنتمناه وأحسن كمان
خالص تحياتى يا مهموهة

حصان المرجيحة يقول...

بجد حوار جامد
بس هاقوللك :
طلباتك كتير اوي
يعني لو طلب واحد يبقي كفاية و بلاش طمع
يا اما لو ضروري فاكيد الصين هاتعمل رجالة فيها المواصفات اللي البنات عايزاها لانها تعجيزية
بصراحة الشاب اللي طالع عنيه في الشغل مثلا لما يرجع مين اللي هايدلع مين
بصي يا شوشو احنا ممكن نفاصل مع بعض لحد ما تصفي انه يبقي مكتوبله في البطاقة ذكر هههههههههه
ربنا يرزقك الاصلح ليكي
و موضوع جميييييييل

ghada mOhsen يقول...

شيماء ...

بجد رهييييييبه ... حبيت البوست ده كتير ...
اول حاجه بإسلوبك العفوى والفكاهى ... وتانى حاجه فى مضمونه بجد انتى تقريبا فسرتى حلم كل بنت فى كلماتك ...

بجد بتمنى ربنا يسعدك ويحققلك حلمك لانه بجد مش مستحيل والناس الكويسه موجوده حوالينا كتير ...
تحياتى ..
... ;) ,,, ;) ...

Humman being يقول...

حصان المرجيحة
آآآآآآآآآآآه شكلها فعلا هترسى على حاجة صينى ....طب مفيش منشأ تانى عشان خاطرى...الصينيين قصيرين أوى مش هيمشوا مع أختك شيماء النخلة
هههههههه
ميرسى على ذوقك

Humman being يقول...

غادة.... ميرسى على كلامك الجميل ..ربنا يوفقك انتى كمان ويحققلك كل اللى بتتمنيه يارب

الشعب لابد له من حكومه تشكمه يقول...

اهلاااااااااااان والمنصوره كمان وشيماء كمان:))
ازيك ياجميله.
حلو البوست معنديش غير اقولك تعالى اقفى فى الطابور وزودينا واحده هههههههههه.

Humman being يقول...

أهلالالالالالالالان شيما.. هنعمل قفلة كدة احنا الاتنين
نورتى المدونة..وطبعا المنصورة منورة طبيعى بينا احنا الاتنين
ميرسى لذوقك

mhmdwahab يقول...

انا حضرتك مندوب من المصنع و جاى ارفع المقاسات يعنى العرض و الطول والموصفات كلها لو سمحتى تكون محددة و عايزة يكون بحجرة ولا شحن احنا على استعداد تمام لتوصيل الطلبات الى اى مكان غير ان قطع الغيار اصلية و ليست تقليد

Humman being يقول...

محمد عبد الوهاب...أخبار عبد الحليم حافظ ايه؟؟
ياريت يكون 6 سلندر ..والازاز أوتوماتيك....وعايزة الشنطة كبيرة عشان حاجات المصيف....واظبط والنبى الزوايا

mhmdwahab يقول...

تحت امرك يا فندم بس 6 سلندر هتكون غالية شوية و هتسحب وقود كتير وهتلوث البيئة على العموم ممكن نركب فلتر و نعمل خصم كبير بالنسبة لعبد الحليم حافظ فهو حاليا بيغنى نار نار نار نار نار اما عبد الوهاب فبيقول ايها الراقدون تحت التراب

ميرام يقول...

ربنا ينولك كل الي انت عايزاه
(:

Humman being يقول...

ميرام...ميرسى يا حبيبتى ... وينولك انتى كمان كل اللى انتى عاوزاه احنا وكل المسلمين

Humman being يقول...

pakkaramu
thanks a lot for yr kind visit

amirelhob يقول...

بوست حلو اوى حلو اوى طريقه التخيل دى جامد مووووووووووت بجد برافو عليكى


واسف عشسان غبت عن زياره المدونه وربنا يوفق "انا" وتلقى اللى بتحلم بيه ويا رب تحولى من كارت لخط عشان متسمعيش لقد نفذ رصيدكم

ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

Humman being يقول...

أمير الحب
ميرسى على كلامك الجميل وأتمنى متكونش آخر زيارة
ربنا يخليك ويارب يحققلك انت كمان كل الللى بتتمناه سواء فى العمل أو الحياة الخاصة
ميرسى على ذوقك

غير معرف يقول...

ما شاء الله .. ايه الأسلوب الراقي ده بس ؟ .. نمسك الخشب .. بجد تحفففففففه

اتمنى أتشرف بزيارة حضرتك في مدونتي الجديده و أشوف تعليقك على إحدى صفحاتها

رابط المدونه
http://ra7alaat.blogspot.com/

شكرا لوقتك

غير معرف يقول...

ما شاء الله .. ايه الأسلوب الراقي ده بس ؟ .. نمسك الخشب .. بجد تحفففففففه

اتمنى أتشرف بزيارة حضرتك في مدونتي الجديده و أشوف تعليقك على إحدى صفحاتها

رابط المدونه
http://ra7alaat.blogspot.com/

شكرا لوقتك

غير معرف يقول...

ما شاء الله .. ايه الأسلوب الراقي ده بس ؟ .. نمسك الخشب .. بجد تحفففففففه

اتمنى أتشرف بزيارة حضرتك في مدونتي الجديده و أشوف تعليقك على إحدى صفحاتها

رابط المدونه
http://ra7alaat.blogspot.com/

شكرا لوقتك

غير معرف يقول...

ما شاء الله .. ايه الأسلوب الراقي ده بس ؟ .. نمسك الخشب .. بجد تحفففففففه

اتمنى أتشرف بزيارة حضرتك في مدونتي الجديده و أشوف تعليقك على إحدى صفحاتها

رابط المدونه
http://ra7alaat.blogspot.com/

شكرا لوقتك

Humman being يقول...

ميرسى يا أحمد على زيارتك لمدونتى ويسعدنى زيارة مدونتك