اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

الأربعاء، 3 مارس 2010

نتيجة التصويت

شكرا جزيلا على مشاركتكم وتواصلكوا معايا....

أصوات حضراتكوا  كالآتى :
شيما "الشعب"                  " الأول"
Emymony        ميمو      "الأول"
محمد عبد الوهاب              "الأول"
الوفية للأبد         مهموهة   "الأول"
Winner          أحمد فايز  "الأول"
صبرنى يارب   مشمشة     "الأول"


أميرة الأحلام  مرمورة   اختيار قلب العروسة
الطير العاشق  فرفورتى  اختيار قلب العروسة


tears              اختيار عقل + قلب
كيكى عوووووو اختيار عقل + قلب
وكنا فى انتظار حصان المرجيحة كمان... بس واضح انه محتار 


تبقى نتيجة التصويت لصالح "العريس الأول" اللى عنده أهل وعزوة وأصل وفصل... كل اختيار من الاختيارات بتاعتكوا أنا عارفة ومتأكدة ان وراها وجهة نظر محترمة ومنطقية جدا... أنا عارفة والله

أقولكوا بقى أنا كنت عاملة التصويت ده ليه وربنا يسترها ... أنا عارفة ان الطوب هينزل على دماغى رزع... واحتمال يهدروا دمى ...ودمى يتفرق ما بين القبائل.... أو أروح فى حادثة اغتيال
الأول عايزاكوا تعرفوا انى مسلمة وموحدة بالله ومحجبة وبصلى وبصوم وبزكى بس لسة محجتش... وعارفة أمور دينى كويس


الكلام حلو لحد كدة.... جميييييييييييييييييييييييل ........ماشى


الأمر اللى نفسى أتكلم فيه ويتحقق هوه قضية  "التبنى" ... شوف الطوب اللى نازل على دماغى ... استنوا بس.. الله أنا لسة كملت...

عايزين نعقد مقارنة الأول ما بين طفلين واحد لقيط فى دور رعاية .. والتانى برده لقيط بس فى أسرة متبنياه "كتباه يعنى باسمها ..


الطفل اللقيط اللى اتربى فى دور رعاية :
1- هيتربى فى مكان مليان أطفال أشكال على ألوان... فيه الكويس وفيه اللى مش كويس اطلاقا ودول أكيد كتييييييييييييييير
2- أكل أى كلام ... نومة أى كلام... لبس أى كلام
3-التعليم ..الأغلبية العظمى بيبقى تعليم مش أد كدة (ده لو اتعلموا أساس) ومعظمهم بيدخلوا مدارس صنايع ... أنا مش بعيب لقدر الله فى الناس الحرفيين بس التعليم العالى والوصول لدرجات علمية حاجة تانية برده
4- البيئة اللى هينشأ فيها الطفل ده شكلها عامل ازاى وهتساعد تنمى جواه ايه ياترى؟؟!!!!
5-لما بيمرض الطفل ده .. بيتصرف عليه صح.. لو محتاج علاج مستمر زى مريض السكر ولا فيروس "سى" دور الرعاية بتصرف عليه كل الفترات الطويلة دى... وفى مستشفيات شكلها ايه ؟؟؟!!!!!!!!
6- القائمين على المكان ده بياخدوا التبرعات اللى بتييجى وبيصرفوها على الأطفال صح وبياخدوا بالهم منهم بضمير ولا لأ؟؟!!!!!!!
7- الطفل ده بيعيش الدفا والحب والحنان اللى أى طفل عادى بيعيشه ولا لأ
8- الكـــــارثـــــة الكـــبــــرى بقى لما بيكبر الطفل ده وييجى يواجه المجتمع الشرقى ...اللى مهما طال الزمن أو قصر ..مهما وصل لدرجات علمية... مهما وصلت معرفته بالتكنولوجيا والتطور والانترنت والعالم اللى بقى قرية صغيرة...مهما دينه قاله ان الطفل ده مش ذنبه انه نتاج علاقة غير شرعية..... بتفضل نظرة الأغلبية العظمى للطفل ده انه... لقيط ... مجهول النسب... منبوذ فى كل نواحى الحياة .... فى المدرسة... فى العمل...... لا يمكن يدخل بيت محترم ويتجوز منه ... ولو ده حصل بتبقى حالات فردية نادرة جدا جدا 

الطفل التانى اللى فى أسرة اتبتنه "كتبته باسمها يعنى - والأسرة دى بتبقى "أغلبيتهم" محرومين من نعمة الانجاب :
1- هيتربى زى أى طفل عادى فى وسط والده ووالدته
2-هياكل أحسن أكل..أحسن شرب ... أجمل لبس
3- هيتعلم فى مدارس محترمة .. ان لم تكن مدارس لغات .. هيختلط فيها بأطفال زيه من أسر محترمة.. ويمكن يوصل ويبقى دكتور ولا مهندس ولا طيار ...حاجة تفيده وتفيد مجتمعه بجد
4- الطفل هينشأ فى بيئة سوية..أب وأم  وجد وخال وعم وجدة وخالة وأصحاب وأقارب زيه زى أى طفل سوى عادى طبيعى
5- لقدر الله لو الطفل ده مرض أو كان بيعانى من مرض عادى أو طويل زى مرض "السكر" مثلا ... بياخد الرعاية اللازمة وبيدخل أحسن مستشفيات
6- هيتصرف عليه صح فى كل نواحى الحياة واللى هيطلبه هيلاقيه وهتربى أخلاقيا صح لأنه مش هيبقى فى وسط 100 ولا 200 طفل ... لأ ..ده هيبقى فرد واحد... له" أم" واحدة و"أب" واحد ... شوفوا بقى الاهتمام المركز ده هيبقى شكله ايه
7- الطفل ده هيتحب حب ...لا حد شافه ولا هيشوفه فى عمره كله... لأن الأسرة اللى هتتبناه دى بتبقى شافت الويل سنين طويلة لف على دكاترة وعمليات لعلاج العقم... غير اللف على بتوع الودع والأعمال...  يعنى عيلة شافت الويل ... فالطفل ده هيبقى كل عمرها
8- أهم نقطة هيه مواجهته للمجتمع... هيواجه المجتمع زيه زى أى طفل عادى...هيروح مدرسته وهيروح النادى والجامعة وهيحب ويتحب ويخطب ويتجوز ويشتغل ويدخل فى كل مكان بقلب جامد من غير ما حد يتغمز عليه ويقول ..."الواد ده لقيط" .. هيبقى راجل أو بنت عنده كرامة.....

التبنى حــــرام..... ماشى أنا عارفة والله.... بس احنا ديننا دين يسر .... دين لين ... يعنى نقدر نلاقى طريقة أو تشريع يخلى التبنى حلال مش حرام مع وضع الضوابط الشرعية والدينية اللى يوافق عليها الأزهر من ميراث ...ل غيره وغيره بحيث محدش من أقارب المتبنين يتظلم ونحقق شرع ربنا.
شوفوا الطوب والدبش ... طب حاسبوا عينى والنبى... استنوا بس ...

حد هيدخل دلوقتى ويقولى يا فاشلة يا متخلفة ... ما ممكن الأسرة اللى عايزة طفل دى  تصرف عليه وتربيه من غير ما يكتب باسمها... أقوله ..نبقى معملناش حاجة سيادتك... لما الراجل يدخل بيت يخطب مثلا... ويقدم نفسه ويقول ...أنا محمد ابراهيم كامل... وده والدى فاروق عبد الرحمن اسماعيل ... الناس فورا هتقول العيلة دى هبلة؟؟!!!... اذاى اسمك كذا وأبوك اسمه كذا... هيردوا يقولوا ايه.. أصله معلش لقيط .. بس والله احنا اللى صرفنا عليه وعلمناه .. وبقى محترم زى ما انتو شايفينه كدة... أخلاق ايه .. ورجولة ايه.... عيلة العروسة هتقولهم...  شرفتونا وياريت منشفش خلقتكم السمحة دى تانى

حد تانى يقولك ... طب ما ده خداع وكذب يا شيماء يا كذابة... لما يبقى لقيط وجاى من دار رعاية أيتام ... ولما يكبر وييجى يتجوز ويدخل بيوت الناس لازم الحقيقة تتقال عشان الجواز أصله الصراحة... أقوله ...أبوس ايد سيادتك والنبى بلاش الشعارات الخيبة دى... أيوة خيبة بتبحلقوا فيا كدة ليه .... الرسول حلل لما يكون فى خلاف ما بين زوج وزوجة مثلا ويجيبوا حكم من أهلها وحكم من أهله وتبدأ العيلتين تشوف ايه سبب الخلاف ويحاولوا يصلحو بينهم.. لو حد من الطرفين قال حصل كذا وكذا الطرف التانى عشان يصلح ما بينهم بيقول لأ ... محصلش... طب يمكن ما يقصدش... طب جايز ساعتها كان متنرفز.. طب ما يمكن.... وهكذا..... هل هوه كدة بيكذب ... لأ ده بيحاول وقف هدم أسرة.... وبعدين ما السرقة والرشوة والكذب شغالين ليل نهار وهدفهم الهدم والتخريب... دى كذبة غرضها حماية مستقبل بنى آدم .... بدل ما يطلع متشرد حرامى صايع سوابق.... يطلع دكتور ومدرس ومهندس 

وبعدين الأم هيه اللى بتربى مش اللى بتخلف..... ومادام اتربى فى وسط أسرة سوية ... يبقى هيطلع انسان سوى وراجل أو بنت محترمة... وبعدين ربنا ستر عليه... لازم احنا نفضحه ونقول بص اللقيط أهوه...فى مجتمع ما بيرحمش

هيدخل حد يقولك طب لو المتبنية (بنت) اذاى تكشف على راجل غريب هوه فى الأصل مش أبوها... أقوله.... لو الأسرة محترمة .. هتحط ضوابط للموضوع ده

فى حاجة مهمة أوى يا جماعة عايزاكوا تعرفوها كمان.... الست اللى مش بتخلف دى فيها ألم ووجع وآآآآآآآآآآآآآآآآآآآآآآآآآآآآآآآآآآآآآآآآآه لو قعدت تقولها من هنا ل 100 سنة قدام مش هتخلص.... محدش يحس بيها غير الست اللى زيها.... بتبقى ست مكسورة.... لو شافت طفل بتبكى بحرقة من جواها.... وده أصعب أشكال البكى..... ده غير تنبيط الناس اللى مبتريحش نفسها وكل شوية تسأل مفيش حاجة فى الطريق... غير الدكتارة اللى بيبهدلوا فيها ليل نهار وكل واحد يجرب فيها شوية....ليه نحرمها يبقى ليها سند فى الدنيا.... على الأقل لما تكبر هيه وجوزها يلاقوا حد ياخد بايدهم.... 
لما هتتبنى طفل ويبقى معاها وابنها فعلا .. غير ما تنفق عل طفل قدام المجتمع مش ابنها... لما يكون فى حضنها وباسمها هتحس بالدفا والأمان اللى اتحرمت منه سنين طويلة... ويمكن يكون بيتها على وشك الانهيار والطفل ده هوه اللى يلحقوا

نقل الأعضاء كان حرام لسنوات طويلة... ودلوقتى عملوا تشريع بلاشتراك مع الأزهر ووافقوا عليه

ياريت كمان نحاول نلاقى قانون بالاشتراك مع فتوى الأزهر ورأى كل الأئمة (اللى بيفهموا بس والنبى... بلاش بتوع الفضائيات) ونحاول نعمل تشريع لقضية التبنى وتبقى حلال بضوابط ... ننقذ بيه أطفال ملهمش ذنب....يبقالهم بيت وعيلة وأهل ومركز اجتماعى زى أى طفل عادى.

فى انتظار آرائكم.......
بس بعد شوية كدة أصل أنا رايحة المستشفى آخد غرزتين جنب عينى اللى اتفتحت دى 

هناك 22 تعليقًا:

Baskouta يقول...

هالو شيماء
ازيك يا جميلة
برغم اني ماشتركتش في التصويت بس احب اقولك اني موافقة على فكرتك
انا كل ما بشوف طفل يتيم او لقيط محروم من حنان الاسرة قلبي بيتعصر وبقول وفيها ايه لو اسرة محرومة من الاطفال تتبناه وتديله حنيه وحب وهو يمنحهم احساس اتحرموا منهم
ليه نصعب الامرو ونخللي ناس تلجأ لشراء الاطفال والمتاجرة بهم ما نيسر الامر ونخللي كل اسرة اتحرمت تاخد طفل وتتبناه وترعاه ويطلع انسان سوي
بدل ما نقدم للمجتمع نماذج مريضة نفسيا
محدش يقولي البنت هتتكش على راجل غريب ولا الابن هيشوف ام مش امه
لان الاسرة اللى هتاخد ولد او بنت وتربيهم اكيد هتكون نفسها تعيش بجد احساس الام والاب واكيد مفيش اب سوي هيبص لبنته ولا طفل اتربى كويس هيبص لامه
احنا بنتكلم عن اسرة محترمة هتربي طفل وتحتضنه بمنتهى الحنان
انا موافقة على كلامك
ده احسن بكتير من اطفال الم اليتم بيعتصرهم ليل نهار
ده غير ان منهم اللى بيهرب من دور الرعاية ويتحول الى مجرم او شحات نخاف منه ونبعد عنه مع انه في الاصل طفل كان المفروض يكون رمز للبراءة

من كم يوم كنت راجعة من الكورس بتاعي الساعة سبعة ونص مساءا وكنت راكبة المترو
دخل طفل لا يتعدى السبع سنوات بيبيع توك وحاجات صغنتوتة زيه
الدنيا كانت برد .. وانا اللى كبيرة حاسة ان الوقت متاخر انى اكون برة البيت فما بالك بطفل صغير
فضلت بصاله وسرحت بتفكيري ليه الطفل ده مش نايم في سريره دلوقت
ليه مش موجود في وسط اسرة ... قلبي وجعنى وحمدت ربنا على النعمة اللى احنا فيها واوقات كتير مش بنكون مقدرينها
قولت الحمد لله على بابا وماما وبيت بيضمنى ... الحمد لله على كل النعم ..الحمدلله
ولما قريت موضوعك النهاردة حسيت انك قريتي افكاري

تحياتي على البوست الرائع
وياريت تعملي حسابي في المكركروم والقطن والبلاستر علشان اكيد هيكون ليا نصيب من الطوب
تحياتي البسكوتية ..اللى شكلها هتتحول اللى بسكوتة متكسرة بعد شوية

mhmdwahab يقول...

السلام عليكم
اسمحيلى احيكى اولا على الروح الجميلة اللى شيلة هموم الطفل اللقيط
و كمان احسدك على الروح القوية اللى تخليكى تكتبى الحاجات دى كلها و انت مضروبة و متعورة ايوة ازعلى بقى و اعلنى الحرب علية مرة زملتى فى الشغل كانت عندها خبطة عند عينة برضو سالتها اية دة اللى عند عينك قالت اصلى مخبوطة قلت لها مخبوطة و لا مضروبة
انا بهزر بس استحملينى و النبى
انا شايف انك نسيت امور مهمة طيب لية اللقيط يتجوز لقيطة و خلاص يعنى اللقيط يتجوز وحدة عادية طيب و اختة اللى فى الملجاء تعمل اية؟
كمان حاجة برضة احب اعيدها
الحب يلغى كل شىء بالنسبة لى لو اتقبلت مع انسانة بدون نسب و لكنى حبتها ماليش دعوة اتجوزها على طول
الف سلامة و ان شاء الله تخرجى من الغرز افضل من الاول
بدون زعل لية كمية الالفاظ الصعبة دى يا شيماء اقول الصعبة شكلك كدة هتيجى تضربينى

mhmdwahab يقول...

اة عايز اعيد حاجة بالنسبة الى الولد اللى جدتى رعاتة لم يسىء الية احد ولكن كان سبب رفضة من بنات العائلة انة اتربى فى وسطيهم هو اتجوز بنت من الجيران و انجب ثلاث ابناء و بداء انشاء عائلة و الناس بتنساة يا شيماء

Tears يقول...

عارفة يا شيماء ايه الحاجة الوحيدة اللى ماعجبتنيش فى كلامك؟

لهجة الخوف و الدفاع عن النفس و التبرع بانك تأكدى انك بتصلى و تصومى و... و... و...و كأنك سلمتى بان من حق البشر انهم يفتشوا فى ضميرك و نواياكى و كأن من حقهم الحكم عليكى مش مناقشة فكرك فقط ده لو انتى سمحتى ليهم بده اصلا لان من حقك ان تسمحي و تمنعي فانتى فى مساحتك الخاصة

بتكتبى و انتى خايفة...الاسلوب ده هو اللى انا دايما بحذر منه و بقول بقى فيه نوع من الارهاب الفكرى فى المجتمع لم نعد بنفس رحابة الصدر التى كانت فى مصر زمان او حتى التى كانت عند العرب فى صدر الاسلام..

لو راجعتى التاريخ لوجدتى انهم كانوا اكثر تفتحا و حرية فى التعبير بينما الان لمجرد فكرة اردتى طرحها و تحمستى لمنطقيتها اضطررتى ان تبررى و تدافعى مقدما و تتوجسى و تعلنى براءتك لانك حاسة ان فيه اتهامات ح تنزل عليكى

هو ده سبب سخطى على هذا المجتمع و ده اللى مخلى العالم كله يعتبره متخلف...الارهاب....اصل الارهاب مش بس ان حد يشيل سلاح و يضربك لكن انه يحطك فى الحالة اللى عبرتى عنها دى لمجرد ان عقلك اشتغل فى اتجاه غير السائد او غير اللى همه فاهمينه صح مع ان اشياء كتير جدا نسبيه و زمنيه فى حياتنا

لو خرجتى بره مصر ح تشوفى بعيون اخرى و ح تقرى صحافة دول اخرى و ح تشوفى ان منظرنا وحش جدا و مخجل...بس مش عشان فقرنا و لا الفساد اللى عندنا

العقلية العربية او النفسية الشرقية تغيرت و اصبحت اثيره لثقافة الخوف و النمطية عشان كده حدث قطعنه للمجتمع و عشان كده احنا فى تخلف اسوأ من ما حدث فى اوربا فى القرون الوسطى و لسه اللى جاى أكتر كتير


عارفه زمان اوى و انا طالبة فى الجامعة ... اثناء دارستى فى الجامعه الاسترالية كنت بلاحظ فرق فى حرية التعبير بين العرب و غيرهم و لما كبرت و بقيت انا بدرس و خاصة لما بتعامل مع طلبة الماجستير

بلاقى ان كتير منهم لو عرب...و دول طبعا قله بره... فاهمين انهم لازم يقولوا نفس رايى او بالضبط اللى انا قلته فى المحاضرة فلو مثلا طرحت ثلاث طرق لعلاج مشكلة ما و وضحت انى بميل للطريقة الاولى مثلا و تلك اسبابى

تجدى ان كل العرب كتبوا ما قلت بالحرف فى الامتحان بينما الطلبة الاجانب و الاسيويين بيكتبوا اللى همه شايفينه صح و بيكتبوا اسباب رؤيتهم تلك لان ما فيش عندهم ثقافة ان لو قلت كلام تانى ح يجى واحد متسلط دماغه مقفوله يهبشك او يقولك يا فاشل او يا كافر او... او...

جايز تكون رؤيتى دى هى اللى خليتنى اكتب فى مدونتى انى مش عايزة اتحاور مع حد و هى اللى بتخلينى لا انشر معظم التعليقات...لانى عارفه النماذج الموجودة و لانى اصلا مش فاتحة المدونة عشان الناس اللى معدية و خلاص لكن عشان قله مستنيرة عاجباهم و عاجبنى و مرتاحين اوى كده بعيد عن غوغائية و حنجورية المجتمع اللى لو كان ما ينتهجه عظيم ما كان وصل لما هو فيه من جهل و فقر و تخلف و فساد و ذل و هوان و هدر كرامة ما بعده هدر

اسفه انى لم اناقشك فى الموضوع المذكور و اطلت فى شرح اشياء اخرى بس ده لان بجد صعبتى عليه اوى و صعب عليه حال بلدنا...

بلدنا كانت منارة للعالم و حضارة عظيمة

عقلك هو تاجك فأن تخليتى عنه تنازلتي عن عرش انسانيتك

كيكى عوووووو يقول...

اها فعلا روحى اقرب مستشفى جانبك
يعنى اللفه دى كلها عشان الموضوع دة طب ماكنتى كتبتى الموضوع علطول
بس انا فاهمة انتى عملتى كدة عشان تعرفى وتحسى رائ الناس الاول فى الموضوع
او وجهة نظرهم ايه اصلا
الموضوع دة مهم وخطير اوى
بس تفتكرى الازهر بيبص للاامور زينا كدة
اقصد فى ناس تفكيرها عقيم
الاهم من دة كلوا تفكير المجتمع كلوا يتغير
!!!!
يديكى بقى طوله العمر ويدينى

shimaa elkholy يقول...

لا لا لا لا لا

انا كده هاعورك رسمي

اولا موضوع زرع الاعضاء ده سكه

والتبنى سكه تانيه خالص مالص بالص

التبنى يا ماما نازل فيه آيه واضحه وصريحه

وادعووووهم لابائهم


حضرتك بقى عايزانا نجيب واحد مش ابنى مثلا واعطيله اسمي واسم جوزي ويبقى رسميا اخو ولادي ؟؟

ده اسمه خلط انساب يا ماما حاجه لا تجوز ابدا ابدا ابدا

ما تفكريش انها حاجه سهله دى حاجات يترتب عليها مليون حكم وحكم فى الجواز والورث والتحريم يا لهووووي موال

ما تفكريش فى الموضوع بشكل سطحي تعمقي شويه عشان تشوفي الموضوع صح

الاجانب بيعملوا كده بس فى نفس ذات الوقت عندهم الجرأه والمناخ الاجتماعي الى تخليهم يقولوا ببساطه ده ابنى بالتبنى

المهم
عايزه حل ؟؟

طب التعليق الجاي اصل هبط من الكلام يا اختي

mhmdwahab يقول...
أزال أحد مشرفي المدونة هذا التعليق.
shimaa elkholy يقول...

احم احم

هانقول بقى

دلوقتي انا شايفه ان موضوع التبنى ده جميل جميل جميل

وباستغبى اي اثنين عندهم مشاكل فى الخلفه انهم ما يروحوش يتبنوا طفل يطلعوا فيه كل طاقاتهم ويفضل عندهم الامل برضه ما يمكن يخلفوا

انما مين يقول ان الواحد يعيش خماشر سنه يستنى خلفه ويعيط وينوح على عمره
مش كان زمانه ربى طفل يتيم هو محتاج والطفل محتاجه ؟؟ ويبقى يخلف بعدها ولا انشاله عنه بقى

كمان مش بس دول اي حد يلاقي فى نفسه المقدره دي يعمل كده يا ستى وياما اكترها الطرق

وهو ليه مقلقين من فكرة وجود بنات وولاد مش اخوات فى بيت واحد

امال حضرتك زمان كانوا ولاد العم فى بيت واحد ازاي

بلاش كده اكم من بيوت فيها الام لها اطفال من زوج سابق والاب له اطفال من زوجه سابقه ولهم اطفال مشتركين والكل عايش بما يرضى الله
المهم يكون فى السبيل لكده

اه ما نيمهمش فوق بعض ونستهبل طبعا



الحل الحل الحل بقى ما تلكيش

المهم

الى يتبنى طفل يسميه زي ما هو عايز مش مشكله ولو كان له اسم فعلا سيبه على اسمه
بس حبذا لو يلحق عليه اسم العيله بتاعه

بمعنى واحد مثلا اسمه احمد عبدالمجيد محمد برعي

اه برعي

قوم لما يتبنى ولد مثلا

والولد ده اسمه سامح السيد رامبو

اه رامبو برضه

فيبقى مسموح بقى انه يخلي اسم الولد

سامح السيد رامبو برعي

وبكده لما الولد يكبر يقوله يا حبيبى انت ابوك كان ابن عمي بس خده الوبا
ايوه مع هنادي

وانا خدتك ربيتك

ولما يروح برضه يخطب يقولهم كده

وهاتبقى اهون واجمل واحلى وكل شيء هايبقى فى التمام


ها ايه رايك ؟؟؟

shimaa elkholy يقول...

اه نسيت اقولك
ان الموضوع ده متجرب

واحد ابن حلال

لقى بنت مرميه فى عماره تحت الانشاء فى حته مقطوعه

نزل خدها ووداها لمراته كان نص الليل

وعمرها كان 3 ايام

وكان هو عنده 3 عيال


وتاني يوم خد الاجراءات كلها اللازمه فى القسم وخلافه وعمل حكاية الاسم دي بنصيحه من بابا

والبنت دلوقتي على وش جواز لو عندك عريس ابعتيه

وخلف بعدها عيال كمان



وعلى فكره الشيخه فاطمه الكتبي

زوجة الشيخ زايد الله يرحمه

كانت بتتبنى بنات ايتام تربيهم

كانت عندها بتاع ثلاثن اربعين بنت كده

الناس كلها بتقول عليهم بنات الشيخه فاطمه
وكانت فى الاوراق الرسميه عاطياهم لقب عيلتها
الى هو الكتبي

ايه رايك يا معلمي ؟؟

قال نتفق مع الازهر قاااااااال

احنا هانعمل دين تفصيل يا مشموش ولا ايه

ده لا ممكن ابدا

الغلط مش فى تحريم التبنى

الغلط فى نظرة المجتمع المتخلف يبقى نصلح ايه
المجتمع ولا القوانين الشرعيه التلى لا شك فيها ولا خلاف عليها ؟؟؟؟؟؟؟؟؟؟

الكتالوج بيقووووووول ممنوع الحاق حد مش ابنك على اسمك

قولوا امين يا غجر وانتم ساكتين

اي خدمه اظن كده انتى هاتضطري تروحي الدولي هي الى فيها استقبال باين النهارده
نيهاهاهاها

Ahmed Fayez يقول...



سؤال: هل فيه حد أحسن من النبي؟؟
النبي تبنى، و ربنا حرّم التبني، فالنبي أطاع. لا احنا زي النبي، و لا احنا أرحم من ربنا بخلقه.

فيه نظام الكفالة، لكن التبني محرّم شرعاً و مفيش أي داعي يكون فيه نقاش في شرعيته. محدش ييجي يتناقش و يقول ما نخلي الضهر ركعتين بس أصل الناس اليومين دول مابقتش فاضية و الدين يسر.

أتمنى تكون وجهة نظري وصلت.

مهموهة أحمد يقول...

شوشو حبيبة قلبي واحشاني خالص يا حبيبتي و الله
و بجد زعلتيني اوي و الله على عنيكي الف سلامة عليكي يا بنتي
ايه هو ابن المدير اداكي نظرة و لا ايه ؟؟؟
اصل انا عارفاه عنيه مقورة و مدورة
هههههههههههههههههههههه
ربنا يقومك بالسلامة يا حبيبتي و ان شاء الله خير يا قلبي

اما عن الموضوع اللي قعدت اقراه في ساعة الا ربع ده
و شربت شاي و نيسكافيه و عصير و عملت محشي و انا بقراه كمان
هههههههههههههههههههههههههههه
لا مش اوي كده يعني

المهم يا حبيبتي معاكي حق و قلبك ابيض اوي في كل كلمة قولتيها
بس صدقيني احنا بنخالف ديننا كتير اوووي و في عرض حاجة نعملها صح
فمش معقول هروح اتبنى ولد او بنت و اخالف الدين
ايوة ممكن اكفل يتيم بردو دي افضل من التبني بكتير حتى الرسول موصي عليها و قال -- انا و كافل اليتيم كهاتين --

و معلش للاخت ندى الياسمين كلامها زعلني اوي و هي بتقول بستغبي الازواج اللي مش بيخلفوا علشان ما بيروحوش يتبنوا و كده
على فكرة انا متجوزة من فترة تقريبا طويلة و ربنا ما رزقنيش بالاولاد و فعلا مؤمنة بكده كل الايمان و الحمد لله بس هي بتتكلم بطريقة وحشة اوي عن النوعية دي من الناس اصلها ما تعرفش الاحساس ده عامل ازاي
الواحدة بردو مهما كانت تحب تعيش مشاعر الامومة من اول الحمل لغاية التربية و كله لكن لو تربية بس هتفضل تحس ان فيه حاجة ناقصة في ابنها ده هي مش حساها

و على فكرة الناس اللي ما عندهمش اولاد دول الحمد لله راضيين بقضاء الله و عايشين حياة كلها سعادة و حب و الحمد لله
اخدوا بالاسباب و الحمد لله من قبل و من بعد

ربنا يخليكي يا شوشو يا حبيبتي
خالص تحياتي و تقديري

mhmdwahab يقول...
أزال أحد مشرفي المدونة هذا التعليق.
الطيــر العاشـق يقول...

مشمشه
حبيبتي والله ألف سلامه عليكي وان شاء الله تكون حاجه بسيطه

وبجد موضوعك حلو قوي بس بردو مش عارفه أرد هههههههههههه ليه لأني الاحساس بجد صعب قوي ان لما يكون حد مش بيخلف ويتبني

صدقيني والله مش عارفه أقول ايه؟

سامحيني ولأسباب شخصيه كان عدم ردي

Humman being يقول...

شكرا جزيلا على ردكم جميعا ومشاركتكم وبحيى وبحترم كل الآراء.. وأكيد كل واحد حر فى رأيه... بس عايزة أوضحلكوا شوية حاجات كدة

*لما طرحت الموضوع ده طرحته لأنى مؤمنة بيه ...وزى ما قلت كل واحد حر فى رأيه وفى تفكيره... حاولت أعمله فى شكل مخفف شوية عشان الناس تقبله وتفهمه صح... مش خوف من حد

*محستش اطلاقا ان فى حد "حـــــس" الموضوع "حـــس". (يمكن ناس قليلة جدا).. يمكن عشان كلنا لينا أب وأم وجد وخال وعم وعيلة... استحالة ...استحالة حد هيعيش نفس اللى الناس دى عايشاه مهما قلت

*الرسول(ص) كان بيستشير الصحابة والتابعين فى كل أمور دينهم ..ده معناه ان كان بيبقى فى موضوعات مطروحة للمناقشة... مش هيه كدة ...ومش هتمشى غير كدة...وممنوع النقاش فى كدة...وانتى هتفصلى دين على مقاسك

*الموضوع ملوش علاقة لا بظهر ولا بعصر... أنا مش بغير أركان اسلام...بنحب دايما نوصل ديننا بشكل راجل عابس عامل دقن مترين وراسم 111 عل وشه مش فاهمة ليه...مع ان ديينا دين سمح بشوش مرن سهل مليان رحمة ومغفرة ومحبة واتحاد فى صلاة وصوم وأعياد حتى فى صلاة الجنازة فى اتحاد... انما احنا نحب نقول للناس وللعالم الغربى (ديننا كدة اذا كان عاجبكوا)

*فى مثال صغير لسماحة ديننا... لما زوجة زوجها بيرمى عليها يمين الطلاق ويلجأوا لمفتى ولا شيخ ولا مأذون... بيبتدى يسألها ويسأله .. ما يمكن كان متنرفز... طب قال ايه بالظبط... طب كنتى فى دور الحيض ولا لأ.... طب ما يمكن كذا... ويقعدوا يدوروا على مخرج شرعى حلال فى حلال بحيث لا يقع الطلاق ...عشان ايه ؟؟؟!!!.. عشان مفيش أسرة تتهد ... مفيش بيت يتخرب


* ديننا للمرة المليون دين لين... دين مش جامد.. وهيه دى عظمته...لو كان جامد مكنش هيبقى فيه "المذاهب الأربعة" كمان كنا أخدنا بالقرآن وسنة الرسول وخلاص...كان فيه حاجات كتيييييير جدا بنعملها أيام الرسول والصحابة ... مش بنعملها خالص دلوقتى..... لو كان ديننا دين جامد مكنش بقى فيه حاجة اسمها "فتوى" ورأى دين...كانت كل القوانين نزلت مرة واحدة ومشينا عليها بحذافيرها - ديننا كمان مناسب لكل عصر يمكن زمان مكنش ينفع تبنى .. بس دلوقتى مع العدد الغير طبيعى من المشردين وازدياد الجريمة بشكل مرعب... يبقى لازم يبقى فى حل ... وحل يطلع جيل سوى...أعتقد اللى يرضى ربنا ورسوله هوه تربية جيل محترم أخلاقيا وعلميا .وده أعتقد يعنى أساس ديننا


*أعتقد اننا باذن الله تعالى بأفكارنا دى مش هنوصل لأى حاجة اطلاقا...هنفضل زى ما احنا....الغرب بيطبق ديننا بكل سلوكياته...زى ما الشيخ "محمد عبده" قال لما سافر أروبا...قال انه شاف ناس غير مسلمين بيطبقوا ديننا بكل تفاصيله... انما على رأى (كيكى عوووووووو... التفكير العقيم) هنعيش وهنموت فيه

ملحوظة مهمة جدا جدا : النقاش فى الموضوع أعلاه يا جماعة انتهى... مش ديكتاتوية ولا حاجة ...بس أنا متأكدة ان مفيش فايدة ومش هنوصل لحاجة.. مش فى الموضوع ده بس... لأ... فى أى حاجة تخص مصر والعرب والمسلمين سواء دينيا أو اجتماعيا أو سياسيا

شكرا لتواصلكم

Humman being يقول...

طلب محترم لأستاذ محمد عبد الوهاب المحترم اللى دايما بيشرفنى بآراءه
رأى حضرتك فى أى مدونة غير مدونتى أو صاحبها أرجو رجاء من حضرتك تنشره عنده مش عندى...ورجاء بدون تجريح

أنا زى ما قلت قبل كدة يا جماعة أى حد فينا مش عاجبه آراء وأفكار الطرف الآخر أو المدونات الأخرى ميدخلش عنده ولا يقرا حاجة ليه... زى ريموت التليفزيون.. معمول عشان نقلب بيه .. اللى يعجبنا نشوفه ... واللى ميعجبناش منفتحش عليه خالص
شاكرة صادق تعاونك وتفهمك

حصان المرجيحة يقول...

اولا انا اسف اني ماحطتش تعليق
بس والله كل ما اقعد علي المكتب و افتح الكمبيوتر و احاول اني افكر في الموضوع
الاقيه اصعب من المرة اللي قبلها
و مش عايز ارد بحاجة اندم عليها
انا بعتذر جدااااااااا
و بجد الموضوع ده مالوش حل و ايلوبك فيه كان اكتر من رائع
و قدرتي تطلعي اللي جوانا من غير ما نحس
بجد انا بحب المواضيع الهادفة اللي زي دي
تسلم ايدك
شكرا ليكي

Humman being يقول...

حصان المرجيحة
شكرا جزيلا يا فندم على مرور حضرتك..وفعلا صعب الاختيار لأن الاتنين فى الآخر بشر من حقهم يعيشوا ويتعلموا ويتجوزوا
بس حتى لو فى حد مننا وافق يتجوز حد بالمواصفات دى.. أعتقد ان الأهل هيرفضوا رافض قاطع مانع لا رجعة فيه
خالص تقديرى

أميرة الأحلام يقول...

شوشو حبيبتى
الف سلامه على عينك ياقلبي
حلو الموضوع ده ياشوشو
وجميل
بس طبعا زى ما انتى قولتى التبنى ده حرام
مافيش مانع انهم يربوه وانهم يتكفلوا بيه بس مايكونش مكتوب باسم الام والاب
وفضل كفاله اليتيم عظيم عند ربنا سبحانه وتعالى
بجد الموضوع ده محير جدااا

Guevara يقول...

آسف لاختلافى معاكى

قال رسول الله صلى الله عليه و سلم لأسامه فى المرأه المخزوميه ما معناه :

أتشفع فى حد من حدود الله

لا شفاعه يا شيماء و لا تحايل فى الحدود

نمره اتنين

النبى عليه الصلاة و السلام و هو خير البشر نزلتله آيه تمنعه من التبنى
و هو خير الناس خلقا و طباعا.

فما بالك بالبشر العادى زيى و زيك

لذا احتفظ لنفسى بحق الاختلاف معاكى

Humman being يقول...

Guevara
أهلا بحضرتك... وأنا أبدا لا ألغى رأى الآخر اطلاقا... الاختلاف لا يفسد للود قضية.. ووجهة نظر حضرتك تحترم
شرفتنى بالزيارة .. وأسفة فى التعليق التانى اتمسح مش عارفة ازاى بس واضح انى عندى مشكلة فى الاشراف على التعليقات
شرفتنى بالزيارة
خالص تقديرى

Humman being يقول...

الطير العاشق فرفورتى
أبدا يا حبيبتى متتأسفيش على حاجة أنا عارفة ان الاختيار صعب ويحير.. وساعات القلب بيختار وبيبقى اختيار صح... بس المؤكد ان الأهل مش بيوافقوا على كدة

منورانى داياما يا فرافيرو

Humman being يقول...

مرمورة الأحلام...
اذيك يا حبيبتى يارب تكونى بخير
أنا عارفة والله ان الموضوع محير ما بين أطفال مشردين مش ذنبهم انهم كدة.. وما بين رأى الدين
وحشااانى جدا يارب تكونى بألف خير