اذا دارت بنا الدنيا وخانتنا أمانينا .... وأحرقنا قصائدنا وأسكتنا أغانينا

ولم نعرف لنا بيتا من الأحزان يؤوينا .... وصار العمر أشلاء ودمر كل ما فينا

وصار عبيرنا كأسا محطمة بأيدينا ...... سيبقى الحب واحتنا اذا ضاقت ليــالينـــا

الرائع/ فاروق جويدة

السبت، 5 فبراير 2011

مش هنسيبك .....

أنا شيلت البوست بتاع عمرو أديب عارف ليه يا حسنى يا مبارك
عشان صورة الشباب الشهداء اللى جابتها الفضائيات اللى قطعت قلبى
عشان كلمة رئيس وزراءك اللى قالها انهاردة من غير مناسبة لما قال  "جمعة الرحيل عدت يعنى ومحصلش حاجة"
عشان ال 70 مليار دولار يا فاجر اللى شفطهم انت وولادك وماما سوزان  من دمنا وما خفى كان أعظم

مش أنا كان صعبان عليا جدا الناس اللى اتقفل بيتها واتخربت مشروعاتها وخسرت ملايين كنت متقبلة (بالعافية وعاصرة على نفسى 100 لمونة) الحل الوسط انك تسلم سلطاتك ل عمر سليمان وتقعد ال 6 شهور الباقيين طرطور
أنا دلوقتى مش قابلة بحل "الطرطور" ده مش هيشفى غلى ... لازم تتحاكم ..ترحل رحيل سلمى لأ.... تطلع كدة وتسافر تصرف فلوسنا فى منتجع عملته من دمنا..لأ.... 
مش  هنسيبك يا كلب... 

هناك 9 تعليقات:

فاروق سحير ( فاروق بن النيل ) يقول...

شيماء ............
إننى لما قابلت هؤلاء الشباب وكنت معهم وهتفت ونمت معهم لليوم التالى بالمسيرة المليونية يوم الثلاثاء 1 فبراير عرفت فعلا أنهم بسطاء جدا مؤمنون بقضيتهم على إستعداد للتضحية بأرواحهم بدون تردد لذا كان الله معهم وإيدهم وأنزل السكينة عليهم فزلزلوا الأرض كلها
ليست مصر وحدها التى يئست من الحلول
أوروبا كلها راهنت على مبارك وخسرت
أمريكا مزهولة مما حدث ولاتصدق أن حليفا الأول سقط فى عشرة أيام
إسرائيل مرعوبة قلقة تطلب فقط من الحكومة الجديدة أن تلتزم بإتفاقاتها مع إسرائيل .
حتى العرب كانوا يحتقرون المصرى جدا الآن عادت كلمة مصر أم الدنيا هم يقولونها ويقولون ياخير أجناد الأرض أنتم الذين ستحررون فلسطين
فعلا كما قلتى عائلة مبارك لها أموال ببنوك العالم وسويسرا من أكبر الأموال المحولة من دولة بالخارج ويعتبر أغنى أغنياء العالم هو وعائلته فأغنى ملياردير هو " بيل جيتس" يمكلك 54 مليار دولار فى حين يقولون أن مبارك وعائلته تتراوح ثروتهم من 60 - 70 مليار دولار يجب أن يحاكم ولايبقى رئيس طرطور كما قلتى لأنه حايكملها 100 مليار دولار بالسبعة أشهر الباقية
هؤلاء الشبان الرائعون ثوار النيت ثوار 25 يناير ثوار الفيس بوك ثوار البلوجز ثوار الشهيد خالد سعيد ثوار 6 إبريل فاهمين جدا هذا وأذكياء ولن يتنازلوا عن محاكمته هكذا قلناها معا عندما خطب فينا وقال سيبونى أموت فى مصر لم نتأثر وهتفنا جميعا 2,5 مليون محتج :" حاكموه ..حاكموه..إوعو تهربوه"
شكرا لكى يارب نقبض عليه وناخد فلوسنا اللى سرقها والحمد لله إن البرلمان السويسرى أصدر قرارا بالتحفظ على أموال رؤساء الدول مثل " زين العابدين بن على رئيس تونس وإن شاء الله الدور على مبارك رئيس مصر المحروسة المسروقة المتعوسة بيه"

sal يقول...

ايوه كده يا شيماء كنت زعلان منك
وقلت معقولة يكون رأيك فى الكلبوزة عماد كدا ومصدقاه

ربنا ينصر شبابنا

Ms Venus يقول...

يا شيماء هو احنا ليه نخلط الامور ببعض


مين قال اننا لما ننادى الناس انها تهدى ونحافظ على بلدنا ده معناه اننا هنسيب كل فاد ظلمنا وسرقنا


يا جماعة مصر حاجة وحفاظنا عليها وعلى امنها وحمايتها من الذئاب اللى حوالينا فى كل حتة

وبين مطالبتنا بمحاكمة كل اللى ظلمنا وسرقنا

Humman being يقول...

فـــاروق ابن النيل
ياريت تبلغ سلامنا واحترامنا وتأييدنا ليهم وقولهم لولا "أمى" اللى عاملالى حظر تجول اجبارى ومقيدة حريتى بدموعها ليل نهار كنت بقيت معاهم ..
عندى احساس انه عايز يقعد الست شهور دول لحد مايشوف مخرج يخليه يسيب السلطة من غير أى ملاحقة قانونية
ربنا معاكوا
خالص تقديرى

Humman being يقول...

sal....
أهلا بالثوار الأوائل .. أهلا بالشرارة التونسية الأولى ...
والله يا sal مش موضوع مصدقاه أو لأ .. بس فعلا فى أحزاب وناس بتحاول تركب الموجة ..
أى حدث بيحصل فى أى بلد بيبقاله منتفعين أو بمعنى تانى ناس كانت مستنية اللحظة دى عشان تخرج من جحورها وتفرض آراءها وسيطرتها زى "الأخوان المسلمين " مثلا
الفنان عمار الشريعى على اتصال بمجموعات كبيرة من الشباب دول ومعظمهم قال ان الاخوان ركبوا الموجة وهيفرضوا سيطرتهم وهينسبوا الموضوع ليهم
وأيمن نور ... والبرادعى والبلاوى السودة اللى ربنا بلانا بيهم من غير ميعاد
من ناحية تانية فى ناس غلابة جدا متعرفش لا ثورة ولا تفويض سلطة ولاتغيير دستور ولا حل مجلس شعب ... دول يعرفول معاهم فلوس النهاردة للفطار .. هيقدروا يجيبوا عشاء ولا لأ ... وهكذا
طولت عليك ... المهم .... دعواتك معانا

مشرفنى دايما

Humman being يقول...
أزال المؤلف هذا التعليق.
MaNoO يقول...

زهقنا كذب زهقنا وعود احنا شباب انتفض بدون نظام لانه من جواه موجوع مش عايزينه ولا عايزين نظامه احنا اهه الشباب اللى قالوا عنه سلبى والشعب اللى قالوا عنه اتعود على الظلم خلاص هنصنع بلدنا بايدينا
الناس اللى فى التحرير فى لقاهره واللى لفت المنصوره على رجليها واللى فى السويس فاهمه ايه البرادعى وفاهمه الاخوان وفاهمه مين ايمن نور وغيره احنا اللى هنصنع مستقبلنا
واهم حاجه اننا وثقنا ان الشعب مصدر السلطات وان البلد بلدنا مهما طال فيها حاكم

Humman being يقول...

Ms Venus
بصى يا فينوس فى محلل سياسى معروف جه فى قناة OTV بيقول ان حسنى مبارك عايز يستنى لشهر 9 عشان وهوه ماش بياخد وثيقة فيما معناه براءة زمة أو معناه ان الراجل أدى الواجب اللى عليه ومفيش عليه أى حاجة تدينه

دى حاجة

الحاجة التانية هوه بيقول أنا زهقت من السلطة وعايز أرتاح طيب ما بتمشيش ليه سايب البلد والعة ليه ده عمره ما يفكر فى كرامة ولا حاجات من دى .. فى حاجة فى دماغه احنا مش فاهمينها
احنا هنتعب شوية بس هنرتاح بعد كدة
شوفتى الفساد أد ايه؟ شوفتى العصابة منتشرة ازاى؟ شوفتى وقفتنا خليتهم ينهاروا ازاى
معلش هانت

Humman being يقول...

MaNoO...
عايزة أروح معاكوا ميدان التحرير يا "مانو" بس ماما عاملة حظر تجول ولو روحت هتبهدلنى
بس فى مظاهرة كبيرة بكرة فى المنصورة هشارك فيها من غير ما تعرف
ربنا معاكو ياااااااااااااااارب